?Nasa e Mari Namatarau Eu Laelaea?

LORIKI WAINA TUSI TAPU E NOAE

“Tea maga waina eu dogo navasaana ki Sup̃e, po pavaigoro e, eu maropa liu ra.”​—Luka 11:⁠28.

?NATAEANA WANOGOE E SILAEKO DAPALESAVA?

Kuga dum̃amu dodomi mu.​—Efeso 5:​28, 29.

Kuga dum̃amu dodomadaganimu.​—Efeso 5:⁠33.

Kuga wo pei tea sikai maau.​—Marko 10:​6-9.

?TU MARIATAE SARALOMAU LORIKI WAINA TUSI TAPU E NOAE?

Io, raki namroroana maga waia:

• Sup̃e epei Natulakeana ni namatarau. Tusi Tapu e pisei kinia naga, Yehovah Sup̃e e mari navitawiriana vea ki Adam ma Iv. (Genesis 2:​18-24) Pei nalakena e lawoki nawotaena ki namatarau maga naga euga dausia. ?Nataeana wanogoe e p̃ia liu dapalesava?

  P̃a ko pa midoakinia: Kupe gani navinaga sikai waina e lolo go ku masau ataea naga eu doropusi nasava paki navinaga wanogoe, ?p̃a vususu paki sei? P̃a vususu paki naata waina e mari navinaga wanogoe.

  Epataka sikai, waina tu pe masau naga tuga atae nasa maga waina eu mariatae silae namatarau maga naga euga laelaea, tuga leo paki Yehovah nalakena nae e pei Natulakeana ni namatarau maga.

• Sup̃e e do leoparatikigo. Namatarau maga waina eu manumatua eu laaga navasasokiana ki Yehovah waina e doko Tusi Tapu. ?Raki nasava? Nalakena nae e do midoaki paratikimu sara ragi. (1 Petero 5:​6, 7) Yehovah e masau silaeko, go navasaparatiki aneana maga eu p̃ia sara ragi.​—Naluluakia maga 3:​5, 6; Isaiah 48:​17, 18.