?Namidodoana Anigo Doko Tusi Tapu e Dapalesava?

LORIKI WAINA TUSI TAPU E NOAE

‘Navasaana maga waina Tusi Tapu e noae e pae Sup̃e.’​—2 Timotheo 3:⁠16.

?NATAEANA WANOGOE E SILAEKO DAPALESAVA?

E silaeko taleva ni namauriana anigo.​—Naluluakia Maga 2:​1-5.

E silaeko naga Tusi Tapu ega marakigo sara naleatia.​—Salamo 119:105.

E silaeko naga p̃a doropusi namidodoana anigo ega toko namauriana wia sikai waina ega wo umai.​—Roma 15:⁠4.

?TU MARIATAE SARALOMAU LORIKI WAINA TUSI TAPU E NOAE?

Io, raki namidodoana maga waia:

• Navasaana aneana maga eu leana. E peani naatam̃oli rualima pati eu midiri Tusi Tapu, eu dape natau manu sikai p̃ontia latesa midiri Tusi Tapu mamau. Naatam̃oli maga wanogoe eu mauri doko ragi p̃ota maga. !Ma navasaana maga ni Tusi Tapu eu leana p̃ia, go eu noa navasaana sikai mau m̃oli!

• E noa nalomauana taleva ni natulakeana. Ragi waina naata sikai e midiri natulakeana ni naatam̃oli sikai, sara ragi e do pasa m̃atakinia. Ma Tusi Tapu eda dapala nogoe. Tea maga waina eu midiri Tusi Tapu, eu midiri sara naleo mamau puti, tea wia go tea sa. Go eu midiri lua namaripeleana ki tea adeada maga.​—2 Kronikel 36:​15, 16; Salamo 51:​1-4.

• Sara ragi navasaana ki profeta maga eu do pakilina. Doko natau p̃ontia dua waina Tusi Tapu e naga natokoana warua ni Babilon ega wo pueli. (Isaiah 13:​17-22) !Eda noae m̃oli naga natokoana warua wanogoe ega vueli, ma e noasai nagisani naatam̃oli waina ega wo mari pueli ki Babilon!​—Isaiah 45:​1-3.

  E peani navasaana ki profeta maga waina Tusi Tapu e noae, e noasai sara naleo kirikiri maga waina euga wo pakilina. Sara naleo kirikiri maga wanogoe eu pakilina puti. Sara naleo maga wanogoe eu pisei kinia lina naga Tusi Tapu epei Tusi ki Sup̃e.​—2 Petero 1:⁠21.