Ninaire a-vi ira nikaleve ororomeleya nagumanana vyongo vinawesedhe iroromelwi-u?

1-2. N’nga chini yaireile vahora yafunji-a Yesu wu Kafarnau?

“MADHU enala mborucha. N’nga mbaani unofuna avwechecha?” (Ju. 6:60) Mwemu ndi moda mwairile anamafunjedha a Yesu va vyongo vyaongile Yesu vahora yafunji-a liye wu Kafarnau. Ee-no Yesu atooawandela ira: “Mwakonda udya nokhu wa Mwana mutu noumwa sangiree, kamunodha kaana ingumi yo-omala.” Thitho atoodhowanave onga ira: “Mutu uliwethene unodya nokwanga noumwa sangiranga, unokala ovwelana na miyo, thitho ndinodham’venyathi-a vadambo lomari-a.”—Ju. 6:53, 54.

² Atu tasukwanle na madhu a Yesu tatoo-iya m’arela. N’nga vyevi vinothapulela ira aliwa katam’roromela Yesu? Khabe. Ninoonga ee-no namwasa oi vyevi vya-anaireye, atu enango thangani-avo anamafunjedha a Yesu, tatoodabwa na vyairile Yesu moi tatoonga ira: “Mo-okaikela wen’na ngunamaongela aongiwile ira unodhadha vailambo.” (Ju. 6:14) Ee-no pyooneelatu ira anamafunjedhao tanoom’roromela Yesu. Mbwenye iroromelwiwa ingawesedhiwile, tatoo-iya kala ororomeleya wa liye.

3. N’nga arumiwi tairilen’ni tangavwide madhu a Yesu, n’nga mwasiwa ngwan’ni? (Muone thitho iruthiruthi.)

³ Mbwenye arumiwi tatookalave ororomeleya wa Yesu. Yesu angaafukile akala aliwa thitho tanofuna tadhowenga Pedru atoowakula ira: “Mbwiye, ninadhowe wani? Nyo nguna madhu okami-a mutu ira adhakaena ingumi yo-omala. I-yo nitororomela thitho nitoidhiwa ira nyo muli ochena urumiwile na Nlungu.” (Ju. 6:68, 69) Naliyene thitho Pedru naarumiwi enango katavwechechile vyathapulela Yesu vyaongile liye ira anofwanela udya manungwee noumwa sangiree. Mo-obala vyavwide aliwa vahoriyo, aliwa tatoosakula kala ororomeleya wa Yesu. Mwasiwa ngwan’ni? Namwasa oi aliwa tanoosikimizela ira Yesu ali “Kristu wa Nlungu.”—Luka 9:20, 35.

4. N’nga ninagumanena vyowesedha viivi?

⁴ Roromeleya wi-u wa Yohova unooda wesedhiwa mundhila dhinango. Mwaifwanafwani-o, n’nga ninoira a-vi navwa machinjo okhuza lemba n’nango la Bibilyani venango machinjo a moda munalaleelenga i-yo? N’nga ninoona ira pyorucha vwechecha mwasee Yohova unorumeli-a ira nigumanengana nyarwa? Iroromelwi-u inooda wesedhiwa thitho akala ira fwi-u wavarimani utonisukwali-a venango mutu unom’lemezecha i-yo utoniirela vyongo vyo-olongomana.

5. Mwasiwa ngwan’ni ninofwanela limbi-a iroromelwi-u? Muonge ifwanafwani-o. (Akolose 1:23)

⁵ Ira nithonyi-edhe funeya okaana iroromelo yolimba, kathuulelani vya nyumba imangiwile utatamo yoi hora dhinjinji unoireya vindharandhara. Nyumba yen’na inofuneya ira ikaena sapato yolimba ira ya-agwe. Ndi saasawa thitho na i-yo, ira niodenga vilela vyowesedha ninga vitapanyile i-yo mu ndima dhivirile, ninofwanela kaana iroromelo yolimba. Akala ninolimbi-a iroromelwi-u, ninodhadhowanave m’labela Yohova mororomeleya angalive ira ninogumanana vyowesedha.—1 Akor. 15:58; muleri Akolose 1:23.

6. N’nga chini yaakami-idhe arumiwi kalave ororomeleya wa Yesu atu anjinji tangam’iidhe?

⁶ N’nga chini yakami-idhe arumiwi ira tadhowenave m’arela Yesu angalive ira atu enango tatoom’iya? Arumiwi tali osikimiza ira Yohova ngofwanela lambeliwa namwasa oi liye ndi namapanducha wa vyongo vyothene thitho ira Yesu ndi mwana Nlungu, oi utokaana “madhu okami-a mutu ira adhakaena ingumi yo-omala” thitho aliwa tanooidhiwa ira Yohova anoodhiveliwana vyongo vyaira Yesu. Va-eeni malo mothuulelanga vyongo vinowesedha iroromelwi-u, dhoweni nitapanyeni makhundo mararu ananikami-e dhowanave kala olimba angalive ira ninogumanana nyarwa. Likhundo (1) Yohova ndi Namapanducha wa vyongo vyothene. (2) Yohova ngwavudhelele Bibilya. (3) Yohova unokami-a atwee malamboano. Akala ninororomela narima othene vamakhundo mararwala, ninodha kalave ororomeleya nagumanana vyowesedha.

YOHOVA NDI NAMAPANDUCHA

7. N’nga lemba la Apokalipse 4:11 linonithuuchan’ni vyokhuza Yohova, n’nga chini inaireye nagumanana vyongo vinawesedhe iroromelwi-u?

⁷ Muleri Apokalipse 4:11. Lembali linonithuucha ira Yohova atoopanducha vyongo vyothene. Likhundo leli linom’mwiri-a kala ofwanelela lambeliwa. Nathuulela vya kopolodhee dhodabwi-a, ninooda sikimizela ira unooda nikami-a va vyowesedha vi-u vyothene. Mbwenye Satana utodhali-a ilamboi na vyonama vyofuna iri-a atu kaikela vyoi utokala Nlungu. Masiyentista anooda onga ira ingumi yate kalao okhene. Akala kaninororomela ira Yohova ndi Namapanducha thitho ira unonidhiveliwana, ninoroma kaikela vyoi liye utokalao thitho kaikela ira unodha nikami-a nagumanana vyowesedha.—Aeb. 11:6.

8-9. N’nga munofwanela iran’ni mwaroma kaikela ira Yohova ndi Namapanducha? (Muone thitho iruthiruthi.)

⁸ Akala mutoroma kaikela ira Yohova ndi Namapanducha, muirevo yongo mombaranya. Musakesake pama mabukhuni mwi-u ira muidhiwe umboni othonyi-edha ira Yohova atoopanducha vyongo vyothene. Munooda fwanya myasa minjinji yolimbi-a iroromelo vamwasa wen’na muma bruxura oi Kodi Zamoyo Zinachita Kulengedwa? Mmene Moyo Unayambira—Mafunso 5 Ofunika Kwambiri. Umboni unango osikimizeleya ninoufwanya mu thandha unofwanyeya va saite ya jw.org. wa muru oi “Kodi Zinangochitika Zokha?” Rongola mwinango wau Estados Unidos dhinalee Jessica aongile ira: “Ndingalerile bruxura loi Mmene Moyo Unayambira, ndatoororomela ira vatokala namapanducha wazelu. Miyo ndatoovidhiwa walelene, mbwenye ndingathuulele pama vili mu bruxurali ndatoosikimizela ndekene mo-okaikela.” Thitho atu anjinji atoganyali voleri bukhu loi Existe um Criador Que Se Importa com Você? Venango mutouleri wale mwasa wen’na. N’nga munoona a-vi uleri okoka?

⁹ Mwaleringa Bibilya vamwekene, muthuulelenga makhundo anosikimizela ira Nlungu utokalao. Makhundo anofuna nyo fwanya anooda ukami-ani limbi-a iroromelwinyu yoi Yohova utokalao thitho anooda ukami-ani ira muidhiwe makalelwee. (Aroma 1:20) Thitho munooda i-ndi-edha basa vyongo vifunjedhile nyo vokami-a atu anokaikela ira Nlungu utokalao. Likhundo lofuneya maningi toi: Yohova utoniva-a umboni okwakwanela othonyi-edha ira liye ndi Namapanduchi-u.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

YOHOVA ATOOVUDHELELA BIBILYA

10. Mwasiwa ngwan’ni ninoona ira Bibilya tofuneya maningi? (2 Timoteo 3:16, 17)

¹⁰ Muleri 2 Timoteo 3:16, 17. Bibilya ndi milanyu ya Yohova ilembele liye atu. Linowakhula vyofuka vyofuneya maningi vyokhuza ingumi thitho linoniwandela vinofuna Yohova ira niirengana. Ninororomela ira Yohova ngwalembile Bibilya thitho vyevi vinoiri-a ira Bibilya likale bukhu lofuneya maningi vaingumii-u. Ninofwanela sikimizela ira ninovwechecha madhwee noirana vyothene vinaode i-yo voa-indi-edha basa vaingumii-u.

11. N’nga chini inousikimizeli-ani ira Bibilya lavudheleliwile na Nlungu?

¹¹ Mwasiwa ngwan’ni ninororomela ira Yohova atoovudhelela Bibilya? Mwaifwanafwani-o, vinoonga Bibilya va myasa yaireile ndulimu pyaimbarimbari. (Luka 3:1, 2) Vinoonga aliwa thitho vyokhuza vyopanduchiwa, pyaimbarimbari. (Yobo 26:7) Bibilya ndi bukhu loi litogaweliwa maningi kwaranya bukhu nlilothene angalive ira Satana unodhilimbi-edha ira alinonge. Bibilya latoolembiwa naatu o-iyana-iyana okwakwana 40 wa vyawa vyowandamela 1.600, mbwenye milanyu ili mwemo, njovwelana. Litokaana malangi-o okami-a, akami-idhe atu mamiliyau anjinji vaingumiiwa ya dambo na dambo. (Sang. 13:20; 15:21; Mat. 7:12) Thitho maulosi manjinji a Bibilyani atokwakwaneli-edhiwa. Wen’na ndi umboni owenjedheleya oi Bibilya ndi bukhu lonyindeleya. (Yoswa 23:14) Mwaimbarimbari, Bibilya lavudheleliwile na Nlungu!

12. N’nga ninofwanela iran’ni akala nitoroma kaikela ira Bibilya lavudheleliwile na Nlungu?

¹² N’nga chini inofwanela i-yo irana akala nitoroma kaikela ira Bibilya lavudheleliwile na Nlungu? Ninofwanela lobela wa Yohova noiravo yongo movwelana na malobelwi-u. Kaonani vyaongile bali mwinango wazombwe dhinalee Jordan oi aulukhulele mubanja la Mboni dha Yohova, liye aongile ira: “Mwaibaliwelo kandinororomela yongo iliyothene iwandeliwile miyo, ndinofwanela roma thuulela vandekene. Onga mwaimbarimbari hora dhinango ndinokaikelecha vyongo vinango, mbwenye ndaroma kaikela, ndinodhilimbi-edha sakasaka mabukwi-u ira ndifwanye vyowakula vya vyofuka vyanga naifunelo yoi nda-akaikelenga.” Nadhowanave fwanya umboni oi Yohova ngwavudhelele Bibilya, iroromelwi-u inodha kala yolimba.—1 Akor. 3:12, 13.

YOHOVA UNOSOGOLERA ATWEE MALAMBOANO

13. N’nga ninofwanela iranan’ni akala nitoroma kaikela ira Amboni dha Yohova mbaatu anosogoleliwa na Nlungu malamboano?

¹³ Naroma kaikela ira Mboni dha Yohova mbaatu anosogoleliwa na Nlungu malamboano, ninofwanela iravo yongo mombaranya. Malomwee, ninooda dhifuka vyofuka vyo-arelavi: ‘N’nga mbaatu avi anodhilimbi-edha a-rela makhundo a Bibilya? N’nga ndi gulu liivi linororomela vinoonga Bibilya?’ (2 Timo. 4:3, 4) ‘N’nga mbaani anoirana vinofuna Nlungu malamboano?’—Mat. 7:20, 21.

14. N’nga Nlungu uno-indi-edha a-vi basa Amboni dha Yohova vokwakwaneli-edha lemba la Mateu 24:14?

¹⁴ Mwaifwanafwani-o, Yohova unofuna ira atu othene tavwe milanyu yapama komoni wa-anafiye. Ee-no munooda dhifuka ira, ‘N’nga mbaani unolaleela milanyu yapama yaongile Yesu ira inodha laleeliwa malambo omari-a?’ (Mat. 24:14) Yowakulayee njoidhiweya pama. Nlungu uno-indi-edha basa atwee oi ndi Mboni dha Yohova ira talabe basa yolaleela. I-yo Amboni dha Yohova baa-i ngunolaleela milanyu ya Umwene mu vilambo vyokwaranya 240. Nikadhi nilabanga basa yen’na wa vyawa vyokwaranya 100 muutongi Waumwene. Hora dhothene ninoona ira basa yolaleela nofunji-a atu njofuneya maningi.—Mat. 28:19, 20.

15. N’nga Amboni dha Yohova tanokami-a a-vi ira dhina la Yohova licheni-iwe malamboano? (Mateu 6:9, Esaya 43:10)

¹⁵ Muleri Mateu 6:9 na Esaya 43:10. Ninoidhiweyana dhina laimbarimbari la Nlungu loi Yohova, thitho ninogaya na mwasa oitaniwa Mboni dha Yohova. Atu anjinji malamboano katinoidhiwa dhina la Nlungu loi Yohova, mbwenye i-yo nitodhilimbi-edha liweleli-edha dhinali mumamburoni mwiwa. Mu Bibilya lailambo ipya la malemba opambuleya linofwanyeya fendo dhokwaranya 7.000.

16. Mwasiwa ngwan’ni ninooda onga ira Amboni dha Yohova tanovwela lamulo lofwanyeya va Juwau 13:34, 35? (Muone thitho iruthiruthi.)

¹⁶ Muleri Juwau 13:34, 35. Ubali-u wavailambo yothene ngodabwi-a maningi, namwasa oi ninodhivelana thitho vwelana vyoi ndi vyo-iyana maningi naatu ailambwila. Angalive ira nikhumele muvilambo vyo-iyana-iyana, nitokaana makalelo o-iyana-iyana, mbwenye ninodhilimbi-edha kala mwarendele na mwaudhivela. Mwaifwanafwani-o, n’nga mutoroma gumaneyavo wu pingo unango? Akala ndi ee-no venango mwatoona ira abali naarongoli-u anodhivelana thitho mbovwelana. Vyevi vinothonyi-edha ira Yohova uno-indi-edha basa Mbonidhee ira takwakwaneli-edhenga ifunelwee malamboano. Thuulela vyongo vyevi unooda nikami-a kalave ororomeleya wa Yohova nagumanana vyongo vyowesedha iroromelwi-u.

KAMUM’IYE YOHOVA

17-18. N’nga ndi nyarwa dhiivi dhinagumanena i-yo, n’nga ninooda ongan’ni mosikimizela?

¹⁷ Ninokala muhora yavakhundu thitho yorucha, ee-no ninongogumanana nyarwa mumalambo omari-ala. (2 Timo. 3:1, 13) Hora dhinango ninooda gumanana vyongo vyorucha. Gulu la Yohova linooda sakula vyongo vyoi kaninovivwechecha. Bali venango rongola unooda nisukwali-a venango onanga ira kanivwechechile, ninooda rucheya fwanya ndhila yomari-ana yorucha inogumanana i-yo venango kaninaode vwechecha mwasee nitogumanana yorucha inangwee.

¹⁸ Angalive ira vyongo vyevi vinooda nisukwali-a, ninooda kalave ororomeleya wa Yohova akala ninororomela ira liye ndi Namapanducha, atoovudhelela Bibilya thitho ira Amboni dha Yohova ndi atwee. Movwelana na vyaongile Pedru m’mwandela Yesu, i-yo thitho ninooda onga wa Yohova ira: “Ninadhowe wani? Nyo nguna madhu okami-a mutu ira adhakaena ingumi yo-omala.”