Muonenga nyarwa dhinyu ninga munodhionela Yohova

1-2. N’nga chini vinofwanela i-yo irana ira niodenga vilela nyarwa dhinogumanana iyo? (muone thitho iruthiruthi.)

N’NGA nyo munogumanana vyongo vyo-olongomana, runi-iwa naabalinyu thitho a-ra-ariwa namwasa wairoromelwinyu? N’nga nyo munolimbanana marenda venango nyarwa dhinodha namwasa oulula? N’nga nyo mutogumananavo soka nlukhulu, venango kweliwa mutu wam’dhiveliwana nyo? Akala ndi ee-no, mofwanafwana na mabila enango ofuneya maningi pyo-okaiki-a ira ‘vaingumiinyu munongogumanana nyarwa.’—Sal. 90:10.

² Ira niodenga limbanana nyarwa dhi-u, ninofwanela dhionanga mofwanelela. N’nga ninaire a-vi vyevi? Ninooda fwanafwani-edha nyarwa dhinogumanana i-yo na nyarwa dhinogumanana mulimbo wendi-a karo. Movwelana na yongo inagumanena liye, venango unooda fuuneela pota, yevi-a thamanga venango imela wene. Ira aidhiwe vyofwanelela irana, mulimbo wendi-a karwiyo unofwanela ona mofwanelela yongo iguman’nena liye. Mbwenye kanaode irana vyevi akala vidru la karwiyo litopingidheya. Mofwanafwana na vyevi, akala ninogumanana nyarwa venango vyongo vyodhodhomi-a vaingumi yi-u, ninofwanela ona nyarwadho ninga munodhionela Yohova. Naira ee-no ninoidhiwa vyofwanela irana. Muyofunjedha yei ninoona (1) vinaire i-yo ira nionenga mofwanelela nyarwa dhinogumanana i-yo, (2) yorucha inakalevo naonanga modaweya nyarwa dhinogumanana i-yo thitho (3) vyongo vinaire i-yo ira nidhowenave ona vyongo mofwanelela nagumanangana nyarwa.

VINAIRE I-YO IRA NIONENGA MOFWANELELA NYARWA DHINOGUMANANA I-YO

3. N’nga ninofwanela rumelan’ni va mwasa waingumi inokala i-yo malamboano?

³ Kaninaode rambela nyarwa muilambo inokala i-yoila. Namwasa oi nili atu o-olongomana thitho ninokala muilambo yotongiwa na Satana, i-yo othene ninogumanana nyarwa. Wenjedhela vevo, vanowandamela i-yo komoni wailambwila nyarwa dhinongo wenjedheleyave. Ninooda gumanana vindharandhara, ma-inje odalela, mulo o-odedi-edhela venango nyarwa dhinoromi-iwa naatu anoira vyongo vyothakala. (Mat. 24:8; 2 Timo. 3:13) Ee-no Yohova amali-a nyarwa va-eeni, vinongo oneya ninga unaam’kami-a Satana oi ngunamatonga wailambwila. Ee-no muilambo yothakalila kavali inaire i-yo ira na-agumanena “masoka.”—Namal. 9:12.

4. Mwasiwa ngwan’ni makristau anogumanana nyarwa dhinjinji?

⁴ Makristau tanogumanana nyarwa dhinjinji. Yesu atooawandela anamafunjedee ira anodha a-ra-ariwa namwasa wairoromelwiwa. (Mat. 24:9; Ju. 16:2) Ee-no, kaninodabwa na-ara-ariwanga thitho iroromelwi-u inodhowanave kala yolimba. (1 Atez. 3:3, 4) Mwaimbarimbari, nagumanangana nyarwa namwasa wairoromelwi-u, vinonisikimizeli-a ira ninowenda mundhila yonisogolela wuingumi yo-omala. I-yavo vyevyo, ninothonyi-edha ikhundu isakunle i-yo vari va Yohova na Satana. Satana atoonga vyonama ira atu katinom’dhiveliwana Nlungu mbwenye anom’labela vyongo vyaawendelanga pama vaingumiiwa. Vofuna dhilimbi-edha kwakwaneli-edha yonama yen’na, liye unolimbana maningi na arumiwi a Yohova. (Yobo 1:9-11) Mbwenye navilelanga nyarwa dhi-u, ninothonyi-edha ira ninom’dhiveliwana Yohova thitho ninom’mwiri-a ira asangalalenga.—Sang. 27:11.

5. N’nga ninofunjedhavon’ni va Sanganiko 7:13, 14? (Muone thitho viruthiruthi.)

⁵ Yohova unorumeli-a ira nigumanengana nyarwa. Yohova kai wauwalanga thitho kanoniwesedha na vyongo vyothakala. (Yak. 1:13) N’nga mwasiwa ngwan’ni mwene Solomu atoolemba ira “dambo lasoka” ndi dambo lamabasa a Nlungu waimbarimbari? (Muleri Namalaleya 7:13, 14.) Veva Bibilya kalathapulela ira Yohova ngunoiri-a vyongo vyothakala mbwenye vyongo vyothakala vinoireya namwasa oi liye utovirumeli-a ira viireyenga. N’nga ninofunjedhavon’ni? Yoroma ninofwanela kala ozindiyela. Muilambo ya Satanila, kanidedi-edhenga ira vyongo vinongo niwendela pama hora dhothene. Vyongo vyaniwendelanga pama, ninofwanela m’simba Nlungu noonanga ira ndimaraeli-o okhumela waliye. Yanambili, Solomu unonithuucha ira “kaninoidhiwa vyongo vinofuna niireela sogolo” thapulela ira, kaninasikimizele akala vyongo vinodha niwendela pama venango khabe. Nyarwa dhinodha gwela atu othene, apama na othakalene.

6. Mwasiwa ngwan’ni Yohova unorumeli-a ira nigumanengana nyarwa? (Aebere 12:7, 11)

⁶ Akala ninoona vyowesedha vi-u mofwanelela, ninooda ona ira Yohova unonifunji-a ira kanidhinyindelenga i-yo okene mbwenye nim’nyindelenga liye. Yohova unoidhiwa nyarwa dhinogumanana i-yo thitho hora dhothene unonisamalela. Angalive ira Yohova unorumeli-a ira nigumanengana “nyarwa dhilukhulu” liye unodhowanave nisogolela, nisikimizeli-a ira unonidhiveliwana thitho niva-a kopolo dhinofuneela i-yo ira niode vilela. (Sal. 23:4) Nyarwa dhinogumanana i-yo dhinooda nikami-a ira nizindiyelenga vyofooka vi-u, thitho mokami-iwa na Nlungu, ninooda chinja umutwi-u. (Muleri Aebere 12:7, 11.) Mofwanafwani-a, Yobo anoofwanela kala odhiyevi-a. Kaiira ndi Yohova airi-a nyarwa dhagumanana Yobo, mbwenye liye atoorumeli-a ira vyevyo viireye thitho atoo-indi-edha basa nyarwa dhagumanana Yobo vofuna m’funji-a likhundo lofuneya maningi. (Yobo 42:1-6) Mo-obala nyarwa dhinogumanana i-yo, ninoidhiwa ira vyongo vinorumeli-a Yohova ira viniireelenga kavinodha niphei-a modhowa no dhowa. Mbwenye nadhowanave vilela mororomeleya nyarwa dhinogumanana i-yo ninogonji-a “vyongo vyothene.”—Aroma. 8:35-39.

7. Mwasiwa ngwan’ni munofwanela kala osangalala angalive ira muno-ara-ariwa namwasa wairoromelwinyu?

⁷ Ninooda kala osangalala angalive ira nino-ara-ariwa. Akala nyo munaa-ara-ariwa namwasa wairoromelwinyu, kamuthuulelenga ira Yohova uto-iya uraeli-ani. Mo-iyana na vyevyo, a-ara-riwa namwasa wairoromelwi-u unothonyi-edha ira nili orumeleya wa Nlungu. (Mat. 5:10-12) Naonanga nyarwa dhi-u mwandhila yen’na, ninoodha kala osangalala na-ara-ariwanga ninga mwemo mwadhivwela arumiwi andulimu. (Mayir. 5:40-42) I-yavo vyevo munooda kami-a atu enango idhiwa imbarimbari yokuza Yohova no ‘m’titimi-a Nlungu.’ (1 Pe. 2:12) Kathuulelani ifwanafwani-o ya Yosefi, athukuliwile dhowa wu Iguputu. Yohova atom’kami-a vahora yagumanana liye nyarwa thitho atoodhowanave m’raeli-a vahora yamadhi nyarwadhee. I-yo thitho ninooda ona ira Yohova unonikami-a vahora inogumanana i-yo nyarwa thitho unodhowanave nikami-a masiki nyarwadho dhimale.—Maromelo 39:3, 23.

8. N’nga chini inanikami-e ira nidhowenave vilela angalive ira ninogumanana nyarwa?

⁸ Nyarwa dhinogumanana i-yo dhitokaana madile. Ifwanafwani-o ya Yobo inonithuucha ira nyarwa dhinogumanana i-yo malamboano dhinodha mala. Bibilya linoonga ira “Yohova atooraeli-a maningi komoni waingumi ya Yobo kwaranya maromelo waingumiyee.”(Yobo 42:12) Yohova utolanyedha ira unodha niraeli-a na ingumi yokalao modhowa nodhowa. Mwaimbarimbari, madhu enala anokami-a uliwethene wa-iyo vilela fiyedha komoni!—Mat. 24:13.

YORUCHA INAKALEVO NAONANGA MODAWEYA NYARWA DHINOGUMANANA I-YO

9. N’nga ninagumanena nyarwa dhiivi naonanga modaweya nyarwa dhinogumanana i-yo?

⁹ Akala ninokaechana mathuulelo odaweya nagumanangana nyarwa, ninooda iri-a ira vyongo vithakale maningi. Mofwafwani-a, ninooda roma thuulelanga ira ndi Yohova unoiri-a nyarwa dhi-u dhothene. Thitho hora dhinango Yobo atoothuulela ira ngu Yohova airi-a nyarwadhee. Thitho mathuulelo odaweya ninga enala, atoom’mwiri-a Yobo dhionanga ira “liye ngolongomana kwaranya Nlungu.” (Yob. 32:2) Thitho Naomi, atoom’momba landu Yohova ira ngunoiri-a nyarwadhee. (Rut 1:13, 20, 21) Aakale ira Yobo na Naomi atoodhowanave kaana mathuulelo odaweyala, tangaluzile uxamwaliwa na Yohova. (San. 19:3) Mbwenye Yohova atoakami-a ira taonenga mofwanelela nyarwa dhiwa thitho atoaraeli-a namwasa odhowanave kala ororomeleya.

10. N’nga nagumanangana nyarwa, ninooda thuulelanga vyan’ni?

¹⁰ Angalive ira ninoidhiwa ira kai Yohova unoiri-a nyarwa dhi-u, hora dhinango ninooda roma kaikelanga akala unodhowanave nisamalela. Mathuulelo ninga enala anooda nifooki-a. (San. 24:10) Mwene Davide na namaongela Abakuku tatoogumanana nyarwa thitho hora dhinango tanookaikela akala Yohova anoovuruwana malobelwiwa. (Sal. 10:1; Aba 1:2) Angalive ee-no aliwa kata-iidhe lobela. Yohova atowakula malobelo aalombwana ororomeleleyala nodhowanave akhami-a. Thitho unodha irana vimbo-ive wanyo.—Sal. 10:17.

11. N’nga chini inaireye akala kanin’na mathuulelo ofwanelela okuza nyarwa dhinogumanana i-yo?

¹¹ Na-akaena mathuulelo apama okuza nyarwa dhinogumanana i-yo, ninooda roma onanga ira vyongo vyothakala kavyafwanela niireela. (1 Pe. 4:12) Anamafunjedha a Yesu tanoorucheya vwechecha ira tanodha a-ara-ariwa maningi. (Luk. 18:33, 34) Angalive ira Yesu atoonga movweya pama ira unodha oni-iwa nyarwa, Pedru kaaroromela vyevi. Liye athuulela ira Nlungu unodha m’barela Yesu ira a-agumanena nyarwa. Mbwenye Yesu atooviidhiwa ira mathuuelo enala, anooda m’mwimwanani-a irana vinofuna Yohova. Ee-no atoom’sumulula Pedru. (Mrk. 8:31-33) Vasogolo voi Yesu utokwa, anamafunjedhee vyanoarucha vwechecha mwasa wapiwele Yesu. Vingalive ee-no, Yesu kaa-iidhe afunji-a. Vyatapanya liye naanamafunjedhee vasogolo vovenyathi-iwa, Yesu atoakami-a ira taonenga mofwanelela nyarwa dhiwa. Liye atooira vyevi voawandela “malemba movweya pama.” (Luk. 24:25-27, 32, 44-48) Vothuulela vyongo vyaafunji-idhe Yesu, aliwa tatooda kala okozeya vavyongo vyafuna aliwa dhagumanana vasogolovee. I-yo thitho ninooda irana vyevi vothuulela imbarimbari inonifunji-a Bibilya yokuza nyarwa. Naira ee-no ninodha kala okozeya limbanana nyarwa dhinagumanena i-yo ninga anamafunjedha a Yesu.

12. N’nga ninadhivwe a-vi nakaana mathuulelo odaweya va vyongo vinogumanana i-yo?

¹² Kaana mathuulelo odaweya va nyarwa dhinogumana i-yo vinooda iri-a ira nidhionenga nyarwadho kala dhilukhulu maningi kwaranya muli aliwa. Yesu atoothonyi-edha moda munairelenga aliwa vaifwanafwani-o yaongile liye ya anamalaba a munda wa mauva. Anamalaba enango tanoodungunya namwasa oi tathuulela ira katava-iwile kobiri dhiwa mokwakwanela, mbwenye Patrawiwa atoowandela mbo-i mwaanamalabee ira: “Andimuwa miyo kandiiudaweleni.” (Mat. 20:10-13) Aliwa katadungunya namwasa oi tateireliwa vyongo mo-olongomana, mbwenye namwasa oi tadedi-edhela vyongo vyodaweya. Molandanana vyevi, Abali naarongoli-u tanooda dhivwanga ee-no. Mwaifwanafwani-o, aliwa tanooda dhionanga ira tatoireliwa vyongo mo-olongomana namwasa o-ova-iwa izo venango tavepiwa ira tarome i-ya izo ina aliwa. N’nga chini inaire i-yo ira nikaena mathuulelo ofwanelela va vyongo ninga vyevi?

N’NGA CHINI INAIRE I-YO NAGUMANANGANA NYARWA?

13. N’nga chini inaireye nagumanana nyarwa?

¹³ Venango munoidhiwa maversu enango a Bibilyani oonga vya nyarwa, venango mutoroma m’kami-avo mutu mwinango vo-indi-edha basa maversu enao. Mbwenye akala ngunyo unogumanana nyarwa, vinooda kala vyorucha ira muonenga vyongo mofwanelela. Mwaifwanafwani-o, munooda thuulelanga ira munaalangiwa venango malobelwinyu katinovweya. N’nga chini inaire nyo akala mutoroma kaana mathuulelo enala?

14. N’nga nim’vephenga Yohova vyongo viivi nagumanangana nyarwa? (Afilipi 4:13)

¹⁴ Mum’vephenga Yohova ira aukami-eni. Mu’mwandelenga vyongo vyothene vinogumanana nyo namwemo munodhivwela nyo. Thitho mu’mvephenga ira auireleni vyongo vinango vyavakundu, mum’vephenga ira auva-eni zimu ochena, zelu, na kopolo ira muode vilela. Muthuulelenga ira Yohova unodha wakula lobelo linyu mundhila yoi kamwaidedi-edhela. (Aef. 3:20) Liye unooda i-ndi-edha basa angelo venango abali naarongola ira taukami-eni. (Sal. 34:7) Ee-no, muwachelenga kami-o nlilothene linavelele liye thitho musimbenga. Yohova unovelela zimwee ochena modhala mandha thitho unodha uva-ani vyofwanelela movwelana na nyarwa dhinyu.—Muleri Afilipi 4:13.

15. N’nga chini inaukami-eni ira muvilelenga nyarwa? (Muone thitho iruthiruthi.)

¹⁵ Mudhowenave irana vyongo vyauzimu. Mudhowenave irana vyongo vinaode nyo angalive ira kai vyevyo vyairecha nyo wale. Vanogumanana nyo vyongo “vyosukwali-a venango nyarwa” ndi vevo vanofwanela nyo thuulelanga maningi ninga mwemo munothuulela Yohova. (Sal. 119:143) Mudhowenave leri Bibilya dhambo nlilothene thitho thuulelanga modhi-a vinoleri nyo. Mudhilimbi-edhenga laba basa yolaleela ninga munaodele nyo, thitho fwanyeya vamigumanoni. Murambelenga kala vamwekene, mukaengana hora yowaredha na abali naarongolinyu angalive ira hora dhinango kamunokaana ifunelo yoirana vyevyo. —San. 18:1.

16. N’nga ndivyofuka viivi vyokaikela vinakaena i-yo, n’nga ninavimali-e a-vi? (2 Akoritiyo 10:4, 5)

¹⁶ Mumali-e mathuulelo okaikela. Nagumanangana nyarwa, ninooda kaana mathuulelo odaweya odhikaikela venango m’kaikelanga Yohova. Mathuulelo enala anooda kala ninga “panda olimba” oi unooda kala orucha ira niugwi-e. (Muleri 2 Akoritiyo 10:4, 5.) Nyo munooda mali-a mathuulelo enala vo-indi-edha basa “zelu dha Nlungu” dhinofwanyeya Bibilyani na mumabukhu aguluni mwi-u. Mwaifwanafwani-o, n’nga nyo munokaikela akala ira Yohova unoudhiveliwanani? Akala ndi ee-no muleri mabukhu oonga vya rumiwi Paulo. Vaurumiwee, liye atoogumanana nyarwa dhilukhulu. Mbwenye vyongo vyothene vyagumam’nena liye vyatoom’sikimizeli-a ira liye ngorumeleya wa Yohova na wa Yesu kristu. (2 Ak. 11:23-27) N’nga munokaikela akala ira Yohova utoulevelelani vyongo vyadawi-idhe nyo ndulimu? Akala ndi ee-no, mulembe thanda wa malemba Abibilyani othonyi-edha ira Yohova kanolanga mutu adawile oi utomala n’levelela. (Esa. 43:25) Ee-no muwaleringa malembao noathuulela modi-a. (Sal. 119:97) N’nga nyo mutogumanana nyarwa yoi itouiri-ani kaikela akala ira Yohova unobareladi arumiwee ororomeleya? Akala ndi ee-no musakesake mabukhuni mwi-u ira muidhiwe mwasee Nlungu unorumeli-a nyarwa thitho moda munonibarela liye mwauzimu mo-obala vyongo vinaireye. (Sal. 91:9-12) Thitho muleri myasa dha abali naarongola tagumam’nena nyarwa dhilukhulu thitho aliwa dhowanave m’labela Yohova mororomeleya.a

17. N’nga ninaire a-vi nagumanangana nyarwa?

¹⁷ N’nga nyo munokala “muhora” yoi vyongo vinaauwendelani pama thitho kamunogumanana nyarwa iliyothene? Akala ndi ee-no, mukaengana hora yom’simba Yohova va vyongo vyothene vyapama viuireeleni liye. (Nam. 7:14) Mbwenye akala ira munaagumanana nyarwa, mudhowenave kaana mathuulelo apama thitho mudhowenave nyindela Yohova. Ee-no, Yohova “unodha velela dhila yooda vilelana nyarwa dhinyu.” (1 Ak. 10:13) N’nga chini inaire i-yo akala ira yongo inango yothakala ithoireela abali-u? Ninowakula yofuka yen’na muyofunjedha yo-arela.