Moda munawenjedhele nyo “dodoliso linyu lofunji-a” muurumiwini

1. N’nga ndi dodoliso livi linofwanela nyo ulukhuli-a, n’nga mwasiwa ngwan’ni? (2 Timoteo 4:2) (Muone thitho iruthiruthi.)

YESU atoowandela anama-arele ira: “Mudhowe mumafunji-e atu . . . , mwaafunji-enga ira tavwelenga vyongo vyothene viuwandenleni miyo.” (Mat. 28:19, 20) Malangi-o enala anothonyi-edha ira Makristau othene anofwanela funji-a atu enango. Pyaimbarimbari ira Yohova unoitana atu ana “mathuulelo apama,” thitho angelo anonikami-a ira nifwanye atu ninga enala. (May. 13:48; Ju. 6:44; Apk. 14:6) Mbwenye vingalive ee-no, ninofwanela dhilimbi-edha irana ikhundu yi-u. Kathuulelani ifwanafwani-o yavelenle rumiwi Paulo na Barnaba. Bibilya linoonga ira vahora yalaleela aliwa mu sinagoga wau Ikoniyo, “vyaongile aliwa weo vyatooiri-a ira mwinji wa Ayuda na Agiriki, tarome roromela.” (May. 14:1) Vyevi vinooni-a ira Paulo na Barnaba tatoowenjedhela “dodoliso liwa lofunji-a.” (Muleri 2 Timoteo 4:2.) Ee-no, Makristau othene anofwanela wenjedhela dodoliso liwa lofunji-a.

2. N’nga mwasiwa ngwan’ni atu enango anoona ira katinaode wenjedhela dodoliso liwa lofunji-a?

² Atu enango anothuulela ira katinaode wenjedhela dodoliso liwa lofunji-a namwasa oi katifunjile maningi thitho anothuulela ira katina dodoliso lofunji-a. Arumiwi enango a Nlungu aongiwile Bibilyani, tanoodhivwa e-no. (Eki. 4:10; Jer. 1:6) Atu enango tanosukwala namwasa oi katina dodoliso lofunji-a thitho katinokaana vyo-arelavovyee vyapama molandana naatu enango va basa yolaleela. Pyaimbarimbari ira kai atu othene anoalaleela i-yo oi anooda funa funjedha Bibilya. Ee-no vyo-arelavo vya basa li-u lolaleela kavinonyindela dhilimbi-edha wi-u baa-i. Ninga muoni i-yo, ira nifwanye atu amirima yapama ninofwanela kami-iwa na Yohova thitho angelo. Mbwenye vingalive ee-no, ninofwanela dhilimbi-edha ira nilaleele milanyu yapama mundhila yova-a ifunelo atu. Ira vyevi viodeye, muyofunjedha yei ninotapanya vyongo viraru vinofwanela i-yo irana ira niwenjedhele dodoliso li-u lofunji-a muurumiwini.

MUKAENGANA IFUNELO NAATU

3. N’nga mwasiwa ngwan’ni Yesu anoafiya warimani atu?

³ Bibilya linoonga ira Yesu “anooidhiwa vili rimani mwa mutu.” (Ju. 2:25) Vyevi vinothonyi-edha ira Yesu anooidhiwa moda mwathuulela atu thitho mwasee anoothuulela vyevyo. Liye anooafiya varimani atu namwasa oi anooidhiwa vyafuneela aliwa. Yesu anooidhiwa ira aliwa katana mutu owasogolela thitho owadidili-a mbwenye tali onyemeliwa na sanganiko thitho malamulo akaathi-iwile na anamasogolela amareligiau. (Mat. 9:36; 23:4) Vaulalikee wavamwangoni, Yesu atoofunji-a vyongo vinjinji vyaakami-e atu ira takaena ingumi yapama. Atu anjinji tanoodhiveliwana vuruwana Yesu namwasa oi anoonga vyongo vyoi vyali vyofuneya maningi waaliwa.

4. N’nga chini inanikami-e ira nithonyi-edhenga ifunelo waatu? (Muone thitho viruthiruthi.)

⁴ Yongo inanikami-e kaana ifunelo naatu anoalaleela i-yo, kuvwechecha vyongo vinoakhumbanyi-a. Atu othene anoagumanana i-yo nalaleelanga, anolimbanana nyarwa dhamuilambo ya Satanila. Thuulela vyevi unonikami-a ira nikaengana tangaranga naatu atatamoni mwi-u. Mwaifwanafwani-o, n’nga tatamoni unokala nyo utoireya yongo inango yoi itodabwi-a atu? N’nga anamabala anokhumbanyedha a-imiwa ira katili obareyela xikolani? N’nga unokala i-yo ndi vyorucha fwanya basa? Kathuulelani moda munokalela ingumi yaatu “muhora yorucha” oi katina idedi-edho inofwanyeya Bibilyani. —2 Ti. 3:1; Esa. 65:13, 14.

5. N’nga Yesu athonyi-edhe a-vi ira ali o-iyana na Afarisi? (Mateu 11:28-30)

⁵ Yesu anokaana ifunelo naatu, thitho atu tanoona vyevi na moda mwairela liye vyongo naaliwa. Yesu ali o-iyana maningi na Afarisi. Anamasogolela amareligiauala tadhiona ira mbavadhulu maningi kwaranya atu enango thitho tanoairela atu vyongo vyothakala. (Mat. 23:13; Ju. 7:49) Mbwenye Yesu anoairela vyongo atu moriya rima thitho mwalemezo. Liye ali “opwaseya thitho odhiyevi-a,” vyevi vyatoom’kami-a ira akale namafunji-a wapama maningi. (Muleri Mateu 11:28-30.) I-yo thitho ninofwanela airelanga vyongo atu moriya rima thitho mwalemezo.

6. N’nga ninathonyi-edhe a-vi riya rima na lemezo waatu anokhonda vuruwana milanywi-u thitho niruni-a?

⁶ Atu enango anokhonda milanywi-u thitho niruni-a. N’nga chini inaire i-yo akala vyongo vyevi vitoireya? Yesu aongile ira ninofwanela dhowanave kala ovilela. Liye aongile ira munofwanela ‘irela vyapama atu anoidanana nyo,’ “raeli-a atu anoutembelelani thitho lobelela atu anounyozani.” (Luk. 6:27, 28) Vinodha kala vyo-orucha akala nitothuulela ira mutu ukhondile niwachela utokaana myasa yovweya im’mwiri-idhe ira akhonde vuruwana milanywi-u. Pyaimbarimbari ira atu enango tanofuna ninga-iidhe laleela milanyu yapama. Mbwenye vatokala atu enango oi katina mathuulelo odaweya okhuza milanywi-u. Namwasa ogumanana nyarwa dhabanjani thitho vyongo vinango, vinoairi-a ira ta-afune vuruwana milanywi-u. Venango ninoafiyedha vahora yodaweya. Mulimwethene munakalele aliwa, ninofwanela a-rela malangi-o anofwanyeya va Akolose 4:6: “Hora dhothene madhwinyu tathonyi-edhenga ira muli mutu oriya rima thitho takalenga oriya ninga mwaa-edhi mwinyu, ira muidhiwe moda munawakhulele nyo mutu uliwethene.” Naathonyi-edhanga atu tangaranga nodhilimbi-edhanga ira nivwecheche nyarwa dhiwa, vinodha kala vyorucha ira nisukwale akala kativuruwanile milanywi-u thitho ninodha kala anamafunji-a apama.

MU-INDI-EDHENGA BASA BIBILYA MWAFUNJI-ANGA

7. N’nga Yesu avelenle ifwanafwani-o ivi vahora yafunji-a liye atu? (Juwau 7:14-16)

⁷ Yesu kaafunji-a atu vyongo vyamathuulelonimwee. Liye anoofunji-a atu Madhu a Nlungu thitho mundhila yo-orucha ira atu taode vi-indi-edha basa vaingumiiwa. Bibilya linoonga ira liye afunji-a “ninga mutu wautongi, a-kala ninga alembi.” Ndi mwasee atu “tanoodabwa maningi.” (Mrk. 1:22) Alembi amuhora ya Yesu, tatoo-ela anamafunji-a amareligiau ira taalemezenga thitho ira ta-arelenga mathuuleliwa. Mbwenye Yesu anoofunji-a movwelana na Malemba. Angalive ira liye atookalao dhulu ninga Mwana Nlungu, Yesu kaa-indi-edhile basa zeludhee voiri-a atu enango ira tadhivwenga kala o-alela venango vofuna sangalali-a atu enango. Malomwee, liye anoofunji-a ifunelo ya Nlungu vo-indi-edha basa Malemba. (Muleri Juwau 7:14-16.) Ee-no, Yesu atoovelela ifwanafwani-o yapama waanama-arelee.

8. N’nga Pedru asazi-edhe a-vi ifwanafwani-o ya Yesu?

⁸ Anamafunjedha a Yesu thitho tanoofunji-a vo-indi-edha basa Madhu a Nlungu. Mwaifwanafwani-o, kathuulelani mwasa waongile Pedru va Petekoste mu yawa ya 33 K.A.B. Pedru kaali mutu oi atoofunja maningi. Vingalive ee-no, liye anoafiya varimani atu tavuruwana vaonga liye malemba othonyi-edha ira Yesu atookwakwaneli-edha maulosi a Bibilyani. (May. 2:14-37) N’nga vyo-arelavovyee vyali vyoi a-vi? “Ee-no atu tavwide madhweao mosangalala tatoobadiziwa, moi dambo lelo numero ya anamafunjedha yatoowenjedheleya naatu owandamela 3.000.”—May. 2:41.

9. Mwasiwa ngwan’ni ninofwanela indi-edha basa Bibilya nafunji-anga?

⁹ Ndhila yapama yoafiya varimani atu khu-indi-edha basa Madhu a Nlungu. (Aeb. 4:12) Ndi mwasee vofunji-a atu ninofwanela i-ndi-edha basa Bibilya. I-yo ninofwanela ‘laleela madhu,’ a-kala onga vyongo vyamathuuleloni mwi-u. (2 Ti. 4:2) Sanganiko 2:6 linoonga ira: “Namwasa oi ndi Yohova unovelela zelu. Idhiwa vyongo nozindiyela vinokhuma valomonivee.” Ee-no na-indi-edhanga basa Bibilya ninom’va-a ngari Yohova ira aongena atu. (Mak. 2:7) Ninofuna ira atu taidhiwe ira malangi-o a Bibilyani mbapama kwaranya malangi-o anova-iwa i-yo naatu. Bibilyali ndi madhu ovudheleliwa na Nlungu thitho anonifunji-a vinofwanelela i-yo irana ira nim’sangalali-enga Namapanduchi-u thitho ira nikaena ingumi yosangalala.—2 Ti. 3:16, 17.

10. N’nga munam’thonyi-edhe a-vi namafunjedhinyu Bibilya ira vinofunjedha liye vinokhumela Bibilyani?

¹⁰ Mwakozeelanga ira mumairi-e funjedha wa Bibilya, muthuulelenga thitho vinofunji-a makhundo a Bibilya. Angalive ira nino-indi-edha basa viruthiruthi na mavidiyo, namafunjedhi-u unofwanela vwechecha ira vinofunjedha liye vinokhumela Bibilyani. Ee-no mwafunjedhanga, muleringa malemba anam’kami-e namafunjedhinyu ira avwecheche makhundo ofuneya maningi. Mwamala mum’kami-e thuulela vinofunjedhavo liye va malemba alerile nyoao. Vofuna kami-a namafunjedha Bibilya vwechecha imbarimbari inofunji-a i-yo Bibilyani, munooda i-ndi-edha basa viruthiruthi na mavidiyo. Vyevi kavinothapulela ira munofwanela onga maningi venango leri malemba manjinji. Malomwee, mum’va-enga hora namafunjedhinyu ira athuulele novwechecha lemba lilerile nyo, venango munofwanela leri okoka akala pyofuneeleya. Mwandhila yen’na, ninokala ira ninoiri-a funjedha wa Bibilya a-kala funjedha bukhu la viruthiruthi na mavidiyo baa-i.—1 Ak. 2:13.

11-12. (a) N’nga ninathonyi-edhe a-vi leva rima waanamafunjedha Bibilya? (Mayirelo 17:1-4) (Muone thitho iruthiruthi.) (b) N’nga atu enango ta-aidhi vya Bibilya ninaakami-e a-vi?

¹¹ Akala namafunjedhinyu unoona ira pyorucha roromela vyongo vinofunjedha liye, muthuulele ira ‘munofwanela laleela madhu . . . moleva rima.’ Nithuulelenga ira mutu uliwethene unodhowa vasogolo mo-iyana na mutu mwinango. Anamafunjedha Bibilya enango anofuneeleya hora injinji ira tavwecheche imbarimbari inofunji-a i-yo yoi wa i-yo njo-orucha ivwechecha. Ninofwanela sazi-edha ifwanafwani-o ya rumiwi Paulo. Liye angalaleele Ayuda awu Tezalonika, anoofuneela akami-a wahora injinji ira tavwecheche Malemba afunji-a liye.—Muleri Mayirelo 17:1-4.

¹² Ndhila inango inathonyi-edhe i-yo atu anoafunjedhana i-yo Bibilya, kuafuka vyofuka thitho ava-a hora yokwakwanela ira tawakhule. Muvuruwanenga mopwasedha vyowakhula viwa thitho mudhilimbi-edhenga vwechecha mwasee anothuulela vyevyo. Mwamala muleri malemba anam’kami-e vwechecha moda munoonela Nlungu mwasuo. Muthuulele ira atu enango katinalerivo Bibilya venango idhiwa vinoonga aliwa. Va myasa ninga yen’na, munooda m’moni-a Bibilya lodindiwa mutu unom’funji-a nyo. Munooda thitho indi-edha basa “Milanyu Yoroma ya Madhu a Nlungu,” inofwanyeya mu Bibilya la Ilambo Ipya, ira mum’thonyi-edhe ira Bibilya linoonga myasa injinji yofuneya maningi. Thitho ira mum’mwandele moda munam’kami-edhe Bibilya kaana ingumi yosangalala, muleri lemba limbo-i venango menli anofwanyeya va yofuka 15. Ee-no mwathonyi-edha namafunjedhinyu Bibilya ira madhu a Nlungu mbakopolo, munooda kala namafunji-a wapama.

MWAAKAMI-ENGA IRA TATHUULELENGA MANINGI VYA YOHOVA

13. N’nga vahora inofunji-a i-yo ninofwanela m’nyindela ani? Muonge ifwanafwani-o.

¹³ Ifunelwi-u kukami-a atu anoafunji-a i-yo ira tam’mwidhiwe Yohova thitho takale afwee. (Yak. 4:8) Vamwasa wen’na, basa li-u ninooda lifwanafwani-edha na mutu unomoneela ira akami-e afwee ona yongo ili vaisini. Liye kanodhimoneela ekhene, malomwee unomoneela yongo inofuna atuyo. Saasawa thitho i-yo nafunji-anga atu Bibilya ninofwanela m’nyindelanga Yohova a-kala dhinyindelanga okhene.

14. N’nga chini inofwanela i-yo irana ira nim’kami-e namafunjedha Bibilya ira am’sangalali-enga Yohova?

¹⁴ Mwafunji-anga Bibilya, mukami-enga namafunjedhinyu Bibilya wenjedhela ifunelwee yofuna m’sangalali-a Yohova. (San. 27:11) Ifunelwi-u kai kami-a mutu unom’funji-a i-yo Bibilya ira akwakwaneli-edhe thandha wa malamulo ira akale wa Mboni dha Yohova. Mbwenye ninofwanela m’kami-a ira aire machinjo namwasa ofuna m’sangalali-a Yohova. Mwaifwanafwani-o, akala liye unolimbanana ira amali-e kalelo n’nangolee lothakala, munoira pama m’fuka vyofuka ninga vi: “Mwasiwa ngwan’ni Yohova unoidanana kalelo leli? Mwasiwa ngwan’ni Yohova unouvepa ira u-iye yongo inodhiveliwanawee? N’nga lamulo leli linothonyi-edha a-vi ira Yohova unoudhiveliwana?” Mwam’kami-anga mutu unom’funji-a nyo Bibilya thuulela vya Yohova na makalelwee apama, paevo vanovwechecha liye ira Yohova unom’dhiveliwana. Vyevyo vinodha m’kami-a namafunjedhinyu Bibilya kaana ifunelo yom’sangalali-a Yohova.

MUDHOWENAVE WENJEDHELA DODOLISO LINYU LOFUNJI-A

15. N’nga chini inaire nyo ira mudhowenave wenjedhela dodoliso linyu lofunji-a?

¹⁵ Munooda m’vepa Yohova ira aukami-eni ona vyongo vinofwanela nyo irana ira muwenjedhele dodoliso linyu lofunji-a. (1 Ju. 5:14) Naira e-no, ninofwanela dhilimbi-edha irana vyongo movwelana na malobelwi-u. Imbo-i mwa ndhila inairele i-yo vyevyo ndi a-rela vifwanafwani-o vinoniva-a Yohova vamigumano ya wari mwa sumana novi-indi-edha basa. Thitho ninooda m’vepa bali oidhiwa vinjinji ira nidhowe vambo-i mairi-a funjedha Bibilya namala i-yo m’vepa ira aniwandela vyongo vinofwanelela i-yo chinja. Muthuulelenga ira vyongo vinofuna nyo funjedha ndi vyailendo wa namafunjedhinyu. Ee-no mudhilimbi-edhenga ona moda munovwela liye va mwasuo. Thitho mum’kami-enga namafunjedhinyu ona funeya wa vyongo vinofunjedha liye. Idhiwa vyevi unooda ukami-ani ira mukale vauxamwali wapama na Yohova thitho ira mukaena ingumi yosangalali-a.—Sal. 1:1-3.

16. Mwasiwa ngwan’ni ndi pama dhowanave wenjedhela dodoliso li-u lofunji-a?

¹⁶ Funji-a atu enango vyokhuza Yohova ndi yongo yofuneya maningi inanikami-e ira nikalenga osangalala. Thitho ninodha dhowanave laba basa leli muilambo ipya. Ee-no nalaleenga milanyu yapama, ninofwanela thonyi-edha ifunelo naatu, indi-edha basa Bibilya vofunji-a thitho m’nyindela Yohova. Mwandhila yen’na, ninodhowanave wenjedhela dodoliso lofunji-a atu enango.