Yofuka yo-orucha inaode fuka mutu uliwethene

Mary na manee John,a takalecha uilambo unodhecha atu anjinji kumela wu Filipina dhalaba basa. Aliwa tanokaana ngari yolaleela milanyu yapama waatu enala. Vahora ya sau wa COVID-19, Mary atooromi-a funjedha wa Bibilya, a-kala naatu ailambo inokala liye baa-i mbwenye naatu avilambo vinango. N’nga airile a-vi vyevi?

Mary anoofuka atu afunjedhana liye Bibilya ira, “N’nga vatokala mutu uliwethene m’mwidhi nyo ira unodhiveliwana funjedha Bibilya?” Atwao tawakula ira ee, liye anowafuka ira “N’nga munooda ndikami-a ira ndim’mwidhiwe?” Hora dhinjinji fuka yofuka yo-oruchila wanokaana na vyo-arelavovyee vyapama. Ninoonga ee-no namwasa oi atu anodhiveliwana madhu a Nlungu hora dhinjinji tanofuna wandela abaliwa naafwiwa vyongo vifunjedhile aliwa. N’nga fuka yofuka yei wana vyo-arela vyoi a-vi?

Mutu mwinango afunjedha na Mery dhinalee Jasmin, atoonkami-a fwanya atu enango 4 ira tafunjedhenga na liye. Mbo-i mwaanamafunjedhao ali Kristine, anoosangalala maningi nofunjedhao thitho atoom’vepa Mary ira afunjedhenga na liye fendo 2 vasumana. Mary atoom’fuka Kristine ira akala vatokala atu enango anadhiveliwena funjedha Bibilya liye atoowakula ira, “ee, vatokala afwanga enango thitho ndinoawandhela vya nyo.” Vangavirile masumana oyeva, Kristine atookami-a Mary ira afunjedhenga naafwee 4. Vasogolovee Kristine atookami-a Mary idhiwana thitho naafwee enango enao tawandela afwiwa ira tanooda funjedha Bibilya.

Kristine afuna thitho ira abalee wu Filipina thafunjedhenga vyokhuza Bibilya. Ee-no atoovwelana na mwanee wa-iyana dhinalee Andrea ira naliyene thitho arome funjedha Bibilya. voroma Andrea athuulela ira a Mboni ndi relijiyau yailendo katinororomela Yesu thitho tano-indi-edha basa ivwelano yawale. Mbwenye angafunjedhile fendo yoroma atoozindiyela ira vyathuulela liyevyo kavyali vyaimbarimbari. Hora dhothene afunjedhanga anoodhiveliwana onga ira, “akala Bibilya linoonga vyevi, kuongela ira vinooda kala vyaimbarimbari.”

Vangavirile hora indedai, Andrea atoomwandhela Mary vyokhuza afwee ambili thitho vya fwee mwinango mbo-i enao tafuna funjedha Bibilya. Mbwenye Mary kaaidhiwa ira vahora inofunjedha aliwa, tiye Andrea dhinalee Angelina, wenuo ali o-ona anoovuruwana. Dambo n’nango Angelina atoowandhela Andrea ira amwandhele Mary vyoi naliyene thitho unofuna afunjedhenga. Angelina anoosangalala na vyongo vyafunjedha liye mwedi o-arela, liye ali angalokotile maverso manjinji muruni thitho afuna ira afunjedhenga vendo 4 vasumana. Andrea atookami-a tiyeo ira airenga migumano vambo-i naatu dhela va vidiyo konferensiya.”

Mary angazindiyele ira manee Kristine dhinalee Yoswa unokala vaduzi vahora inofunjedha aliwa, atoomfuka akala unodhiveliwa kala vambo-i vahora inofunjedha aliwa Bibilya. Yoswa atoowakula ira, “Ee mbwenye ndinairenga vuruwana baa-i. Kamundifuke yofuka iliyothene, mwandifuka yofuka ndinodha kumavo.” Vavira aliwa maminto 5 liye ali angafukile vyofuka vinjinji kwaranya Kristine thitho atooroma funa ira afunjedhenga Bibilya.

Yofuka yo-orucha yafuka Mary yatooiri-a ira akaena anamafunjedha Bibilya anjinji. Voi anamafunjedhee tali anjinji, Mary atooira masaka-edho oi anamafunjedha enango tafunjedhenga na Amboni awaniwao. Liye ali angana anamafunjedha Bibilya okwakwana 28 muvilambo 4.

Jasmin, namafunjedha oroma uongiwile mumwasula, abadiziwile mwedhi wa Abril muyawa ya 2021. Kristine abadiziwile mwedhi wa Maio mu yawa ya 2022 thitho atoowelela waniwa wu Filipina ira amakalenga na banjalee. Naaliwene thitho anamafunjedha ambili afwaidhe Mariy dhela mwa Kristine, tatoobadiziwa. Angelina abadiziwile vangavirile myedi yoyeva thitho va-eeni ngu painiya okaatheya. Manee Kristine dhinalee yoswa namwanee wa-iyana dhinalee Andrea na anamafunjedha enango tanodhowanave funjedha Bibilya thitho tanovilimbi-edha kala vauxamwali wapama na Yohova.

Muhora yaarumiwi milanyo yanoomwadheya mombaranya namwasa oi atu tanoolaleela abaliwa naafwiwa. (Ju. 1:41, 42a; May. 10:24, 27, 48; 16:25-33) N’nga munoona a-vi ira masaka-edho ira mufuke namafunjedhinyu venango atu ana ifunelo yofuka yoi “N’nga vatokala mutu mwinango unom’mwidhiwa nyo wenuo unadhiveliwena funjedha Bibilya?” Munooda romi-a funjedha Bibilya naatu anjinji namwasa ofuka yofuka yo-oruchila, yoi mutu uliwethene unooda fuka.