Buru wa Balamu atoonga

Aisraeli tangali kokolani wa vyawa vaduzi duzi 40, tatoogonji-a masidadi manjinji akopolo. Ee-no tatoomanga misasiwa kokolani ya Amowabu, wu makumelo a dhuwa a-inje wa Yordani. Hora yoi tavolowe muilambo yolanyedhiwa yali ingafiile. Mwene wau Mowabu dhinalee Balaki, atoova maningi voidhiwa ira ilambwee inogonji-iwa. Moi e-no atom’mwitani-a mutu mwinango dhinalee Balamu ira adhatembelele Aisraeli.

Mbwenye Yohova atom’mwandela Balamu ira: ‘Khudhowe matembelela Aisraeli.’ E-no Balamu atookonda dhowa wu Mowabu. Mwene Balaki atom’mwitana fendo yanambili nom’lanyedha ira unom’va-a yongo iliyothene inafune liye. Mbwenye Balamu atookonda. Moi e-no Nlungu atom’mwandela Balamu ira: ‘Unooda dhowa wu Mowabu, mbwenye umaongenga vinofuna miyo uwandela baa-i.’

Ee-no Balamu atooroma ulendwee odhowa wu Mowabu. Rimanimwee afuna amatembeleledi Aisraeli, angalive ira Yohova atom’mwandela ira kadhowe mairana vyevyo. Ngelo wa Yohova atoodhowa magunana liye fendo taaru ndhila mwavira liyemo. Balamu kam’mona ngeluo mbwenye burwee anom’mona. Fendo yoroma, buruo atoovandhuwa liye virana mundani. Fendo yanambili, buruo atoovandhuwa novirana duzi na panda wamabwe, moi mabwao tatoophei-a nyalo la Balamu. Fendo yaneraru, buruo atoogonathi vari va ndhila. Fendo dhothene dhedhi Balamu anookoma buruo na golomondolee.

Va fendo yaneraru, Yohova atooiri-a ira buruo aonge. Buruo atom’fuka Balamu ira: ‘N’nga unondikomela n’ni ee-ni?’ Balamu atoowakhula ira: ‘Namwasa oi unaa-andivwela thitho ndi ngari aa-kale ira nditokaana sarasada ndingauphide.’ Buruo atoonga ira: ‘Ndikadhi ndiwendanga na weyo wa vyawa vinjinji, n’nga nditoroma uirelavo vyongo ninga vyevi?’

Moi e-no Yohova atooiri-a ira Balamu am’mone ngeluo. Ngeluo atoonga ira: ‘N’nga Yohova kaauwandenle ira kudhowe matembelela Aisraeli?’ Balamu atoowakhula ira: ‘Pepani nditodawa, kandinodhowa ndinowelela vano.’ Mbwenye ngeluo atom’mwandela ira: ‘Dhowa wu Mowabu mbwenye umaongenga viuwandenle Yohova baa-i.’

N’nga Balamu atoofunjedhavo yongo? Khabe. Liye atoodhilimbi-edha tembelela Aisraeli fendo taaru. Mbwenye Yohova atooiri-a ira aaraeli-e malo mowatembelela. Ee-no Aisraeli tatoogonji-a ilambo ya Amowabu, mbwenye Balamu atoophiwa. Balamu a-am’vwele Yohova vyongo vingam’mwendele pama.