Ninaakhami-e avi abali-u va hora yorucha?

Vanduli voireya soka, mboni dha Yohova anokhozeela mombaranya vofuna khami-a abali takhuziwile. Vilimbi-edha wewu unothonyi-edha udhivela una iyo naatu enango. (Juwau 13:34, 35; 1 Juwau 3:17, 18) N’nga ninaakhami-a avi abali-u?

Ninovelela khobiri dhi-u. Yawa ya ndhala ilukhulu wu Yudeya yatoafiela makristau a vyawa zana loroma abali a wu Antiokeya tatorumi-edhao khobiri ira taakhami-ena abaliwa. (Mayirelo 11:27-30) Mofwanafwana na aliwa, iyo thitho naidhiwa ira abali a vilambo vinango tanogumaneyana nyarwa, ninovelela vyovelela vyi-u dhela mipingoni ira vimaode akhami-a vogulana vyongo vyofuneela waabali aguman’nena nyarwao.—2 Akoritiyo 8:13-15.

Ninokhami-a vo-indi-edha basa vyongo vyi-u. Andimuwa ampingo tali ikhundu yeniyo uireile sokalo tanosakasaka uli wethene wa mpingoni ira tasikimize ira othene tali ovuneleya. Komiti yoing’anela vyokhami-a tanoing’anelecha vyodya, ma-inje aphama, vyowara, vogona thitho mirombwe. A Mboni dha Yohova anjinji oidhiwa phama mabasa o-iyana-iyana tanovivelela na khobiri dhiwa dhowa mafiya uireile sokalo na laba vabasa losaka-edha Nyumba dha Umwene dhonongeya. Vwelana wi-u ninga gulu na dodoliso li-u lolabela vambo-i vinoniiri-a khami-a mombaranya. Angalive ira ninokhami-echa abali “tanaira ikhundu ya banja lairoromelo na iyo,” thitho ninokhami-echa atu enango angalive ira khatili na iyo.—Agalata 6:10.

Ninolimbi-ana vo-indi-edha basa malemba. Mwaimbarimbari atu takhuziwile na soka tanofuneya limbi-iwa. Vahora ninga yenna ninooda limbi-iwa na Yohova, “Nlungu wolimbi-a mu ndila ili yothene.” (2 Akoritiyo 1:3, 4) Iyo ninooda alimbi-a atu tali vanyarwani voawandela Milanyu ili Bibilyani ira vachicheneeva Umwene wa Nlungu unodha mali-a masoka othene anodhi-a vyopha vambo-i na nyarwa.—Apokalipse 21:4.

• N’nga Mboni dha Yohova anokhami-a avi mombaranya vaireya soka?

• N’nga ninalimbi-e avi mwaunemba atu anogumaneyana nyarwa?