KARTA LANAMBILI LILEMBILE PEDRU

1 Miyo Simoni Pedru, dhaari na rumiwi wa Kristu Yesu, ndinolembela atu takanlena iroromelo yapereso yavadhulu yofwanafwana na yi-u dhela mu longomano la Nlungwi-u na ya Namavulumuchi-u Yesu Kristu.

2 Riya rima ulukhulu na rendele wa Nlungu viwenjedheleye wa nyo. Ira vyevi viodeye, munofwanela m’mwidhiwa molinyali Nlungu na Yesu Mbwii-u. 3 Vo-indi-edha basa kopolodhee, Nlungu utoniva-a vyongo vyothene vyofuneela mwapezi ira nikaena ingumi thitho ira nikale odhivelela wa liye. Vyevi vitoodeya namwasa oidhiwa molinyali vya Nlungu aniitan’ne dhela mutitimi-o na upamee. 4 Dhela muvyongo vyevi, liye utonilanyedha vyongo vya pereso yavadhulu na vilukhulu maningi, ira movwelana na vyolanyedha vyeevi mukaena titimi-o ninga lina Nlungu. Liye utoirana vyevi namwasa oi natoo-iya irana makalelo othakala amuilamboi oi anoromeya namwasa olavela vyongo vyothakala.

5 Namwasa wa vyevi, mudhilimbi-edhe mwathindhi wenjedhela makalelo apama va iroromelwinyu, vamakalelwinyu apama muwenjedhelevo idhiwa vyongo, 6 voidhiwa vyongo muwenjedhelevo dhikondi-a, vodhikondi-a muwenjedhelevo vilela, vovilela muwenjedhelevo dhivelela wa Nlungu, 7 vodhivelela wa Nlungu muwenjedhelevo dhiveliwana abali, vodhiveliwana abali, muwenjedhelevo udhivela. 8 Mwairangana vyongo vyevi thitho mwathonyi-edhanga makalelo enala munodha indi-edha basa vyongo vinoidhiwa nyo molinyali vyokhuza Mbwii-u Yesu Kristu thitho vinodha ukami-ani ira mwa-aimwanane va-a vyova-a.

9 Mutu ukondile a-kaana makalelo enala ndi o-oona, liye utofunga methwee ira a-aone njeza thitho utodiwala ira atoocheni-iwa wu vyodawa vyairecha liye walelene. 10 Ee-no abali, muirena yongo iliyothene yoodeya ira mukaleve ororomeleya, naifunelo yoi mudhowenave kala vari vaatu aaitan’ne Nlungu noasakula. Mwadhowanave irana vyevi, kamunodha gwegweduwa navang’onovene. 11 Thitho munodha raeli-iwa maningi moi munodha volowa mwatitimi-o mu Umwene o-omala wa Mbwiye na Namavulumuchi-u Yesu Kristu.

12 Vamwasa wen’na, hora dhothene ndinofuna nduuthuuchengani vyongo vyevi angalive ira mutoviidhiwa wale thitho muli olimba muimbarimbari yafunjedhile nyo. 13 Ee-no ndinoona ira ndipama ira nduutekenyengani vouthuuchani va vyongo vyevi vili miyo mututu langali, loi lili ninga sasa.* 14 Ndinoona e-no namwasa oi nditoidhiwa ira ndi-adhi vang’ono khuma musasangula, movwelana na vyandiwandenle Mbwii-u Yesu Kristu. 15 Hora dhothene ndinongo dhilimbi-edha uthuuchangani ira ndadhakhuma mudha-ale muthuulelanga mwekhene vyongo vyevi.

16 Vahora yauidhiwi-ani i-yo vya kopolo dha Mbwii-u Yesu Kristu thitho vyokhuza kalavowee,* kanatukulele myasa yonama inodapitari atu mowenjela. Mbwenye natouwandelani vyongo vyokhuza tiitimi-olee vyaoni i-yo na methwi-u. 17 Namwasa oi Kristu atoolemeziwa notitimi-iwa khumela wa Nlungu Babi-u, vahora yavweile madhu wa liye khumela mutitimi-o nlukhulu ira: “Ula ndi Mwananga odhiveliwiwa, unom’dhiveliwana miyo.” 18 Natoovwa madhu enala khumela dhulu vahora yali i-yo vambo-i na liye mumwango ochena.

19 Ngumwasee kaninokaikela navang’onovene ira madhu aulosala anodha kwakwaneli-edhiwa thitho munoira pama athuulela modi-a. Madhu enala awalenga mirimani mwinyu ninga nyale inowala isini. Mudhowenave irana vyevi fiyedha mabingu ocha, likorofyo* lingakhumile. 20 Nyo munoidhiwa likhundo lofuneya loi, kavali ulosi wa Malembani oi unokhumela mathuuleloni mwa mutu. 21 Namwasa oi ulosi kwaaongiwile movwelana na mathuulelo aatu, mbwenye atwao tatoonga madhu okhumela wa Nlungu mosogoleliwa na zimu ochena.

2 Mbwenye vari va Aisraeli, vatookala atu enango oi tali anamaongela onama. Mofwanafwana na vyevi vari vinyu vanodha kala thitho anamafunji-a onama. Atu enala anodha romi-a mwasegeredo visimagulu vyaatu opanduwa thitho anodha khonda na mbwiiwene aaguunle. Namwasa oirana vyevi, aliwa anodha nongiwa mombaranya maningi. 2 Wenjedhela vevo, atu anjinji anodha tukulela kalelo lova-a manyadho* la anamafunji-a onamao thitho atu tanodha onga monyoza ndhila yaimbarimbari namwasa wa anamafunji-ao. 3 Thitho mwaidyani anodha i-ndi-edhanga basa madhu ainyengo naifunelo yoi taunyengeleleni. Mbwenye tongiwa umadhi kozeela Nlungu wale ira adhaatonge, unaaudha mombaranya thitho nongiwa wiwa mwaimbarimbari unodha fiya.

4 Mbwenye Nlungu ka-iidhe aa-langa angelo adawilale. Mbwenye atoaponyedha mu Tatalasi,* noamanga muisini ilukhulu vodedi-a ira adhaatonge. 5 Nlungu kaa-iidhe ilambo yawaleile o-oilanga mbwenye atoom’vulumucha Nowa oi alaleela vya longomano la Nlungu vadhi-idhe liye igumula vailambo yaatu o-oova Nlungu. Atoom’vulumucha vambo-i naatu enango thitho 7. 6 Thitho atoononga masidadi a Sodoma na Gomora voatumeya na mulo. Liye atooirana vyevi ira ikale yowenjeli-a waatu o-oova Nlungu ya vyongo vinofuna dhaaireela sogolo. 7 Mbwenye atoom’vulumucha Loti oi ali mutu olongomana. Loti anoorucheya maningi rimanimwee namwasa wa kalelo lova-a manyadho* laira atu o-ovwela malamulo. 8 (Mutu olongomanula anoorucheya rimanimwee dambo na dambo namwasa wa vyaona liye nouvwa vahora yakala liye vari vaatu othakala. Liye anoorucheya rimani namwasa wa vyoira viwa vyo-ovwela malamulo.) 9 Vyevi vinothonyi-edha ira Yohova* unoidhiwa vulumucha atu odhivelela wa liye tawesedhiwanga. Mbwenye atu o-olongomana unoalokotedha dambo loatonga ira adhaanonge, 10 simbwasimbwa atu anosakasaka atu enango naifunelo yowathakali-a vogonana naaliwa thitho nyoza anamatonga.

Atu enala katinoova yongo iliyothene mbwenye anovwa viwa baa-i. Aliwa katinoova onga vyongo vyonyoza atu tava-iwile titimi-o na Nlungu. 11 Mbwenye angalive ira angelo atokaana kopolo maningi, katinoanukhedha anamafunji-a onamao na madhu onyoza, namwasa oi angelwao anolemeza Yohova.* 12 Thitho atu enala, mofwanafwana na vinyama vyo-okaana zelu vyoi vinoira vyongo mwaibaliwelo thitho vinobaliwa ira vi-indiwenga nophiwa, anoonga vyongo vyonyoza vyoi katinoviidhiwa. Atu enala anodha nongiwa namwasa wa vyoira viwa vyothakala, 13 aliwa tanogumanana nyarwa ninga yotuva ya vyoira viwa vyothakala.

Aliwa tanoona ira irana vyongo vinolavela aliwa kosangalali-a, masiki taviirenga nathana. Atu enala ali ninga matoto na siro lotimbirira vari vinyu, thitho tanosangalala mokwaranyi-a madile taufunji-angani vyongo vyonama vahora inodya aliwa vambo-i nanyo. 14 Anolavela maningi raruwa thitho anoimwanana rambela dawa, moi anokopa atu airoromelo yo-olimba. Mirimiwa itofunji-iwa idyani. Aliwa mbaa-ima otembeleliwa. 15 Atodimeli-iwa namwasa oi ato-iya ndhila yolinyali, no-arela ndhila ya Balamu mwana Beori, airile vyongo vyothakala namwasa ofunechecha wachela yotuva, 16 mbwenye atoosumululiwa namwasa oimwanana irana vyongo vyapama. Buru oi kanoonga, atoonga ninga mutu noimwanani-a vyoira vyo-okaana zelu vya namaongeluo.

17 Atu enala ndi ninga puno dho-okaana ma-inje na libunda lotukuleya na liphevo nlukhulu, thitho atolokotedhiwa isi ilukhulu maningi. 18 Aliwa anoonga madhu odhiulukhuli-a na o-okaana basa. Thitho tano-indi-edha basa naluveluve wa manungwiwa na kalelo lo-okaana manyadho* vokopa atu taodile tawa waatu oira vyongo vyothakala. 19 Angalive ira anoalanyedha ava-a ufulu, anyaene enao ndi adhaari a kalelo lothakala. Namwasa oi mutu uliwethene unogonji-iwa na mutu mwinangwee, unokala dhaari wa mutu um’gonji-idhuo.* 20 Mwaimbarimbari, akala tatoovulumuwa wu vyongo vyothakali-a vya ilamboi namwasa oidhiwa molinyali Mbwiye na Namavulumuchi-u Yesu Kristu, mbwenye aliwa roma okoka irana vyongo vyothakala vyairecha aliwa voroma vile fiyedha gonji-iwa na vyongovyo, makalelwiwa anokala othakala maningi kwaranya voroma vale. 21 Vyaakale pama ta-akhonde a-idhiwa molinyali ndhila yolongomana, i-yani-ana iidhiwa pama amala vandhuwa va malamulo ochena awachenle aliwa. 22 Sangani waimbarimbarule utokwakwaneli-edhiwa va aliwa. Sanganuo unoonga ira: “Mwanambwa utowelela madya maraveyoee, thitho nguluwe yamadhi a-mbi-iwa itowelela mapingiriya okoka va marogodoni.”

3 Abali odhiveliwiwa, leli va-eni ndi karta lanambili linoulembelani miyo, thitho mofwanafwana na loromanle, ndinoulimbi-ani ira mu-indi-edhenga pama kopolo dhinyu dhothuulela vouthuuchani vyongo viidhi nyo wale. 2 Ndinoirana vyevi ira muthuulele madhu aongile anamaongela ochena walelene thitho lamulo lavelenle Mbwiye Namavulumuchi-u dhela mwa arumiwinyu. 3 Yoroma muidhiwe ira malambo omari-a unodhakala atu anofuna dhaonganga vyongo vyonyoza. Vo-arela vyongo vinolavela aliwa, 4 anodhaonganga ira: “N’nga kalavo* wee olanyedhiwa ule uli uvi? Kaing’anani, kavali yongo ichinjile khumela dambo lakwide anamabali-u. Vyongo vyothene vinave dhowanave ireya saasawa ninga mwakalele aliwa viireyanga romela vapanduchiwile vyongo.”

5 Atu enala anopwaza mwakhomove likhundo loi, walelene vatookala dhulu na ilambo yavathi yeyo yakhumele vari va ma-inje nokaatheya vadhulu va ma-injeao namwasa wa madhu a Nlungu. 6 Thitho khumela mu vyongo vyevi, ilambo ya vahora yeniyo yatoonongiwa vabwinile aliwa na ma-inje a igumula. 7 Mbwenye dhela mu madhu a Nlungwao, dhulu na ilambo yavathi vilivo va-eeni, vitolokotedhiwa mulo thitho anave vilokota fiyedha vadambo linofuna aliwa dhatongiwa no nongiwa waatu o-oova Nlungu.

8 Mbwenye odhiveliwiwa abali, kamuimwanane zindiyela likhundo loi, wa Yohova* dambo limbo-i nli ninga vyawa 1.000, thitho vyawa 1.000 vili ninga dambo limbo-i. 9 Yohova* kanodembuwa kwakwaneli-edha vyalanyedhile liye ninga munoonela atu enango ira unaadembuwa. Mbwenye liye unaaulevelani rima namwasa oi kanofuna ira mutu uliwethene adhanongiwe, mbwenye unofuna ira atu othene tachinyuwe. 10 Mbwenye dambo la Yohova* linodhafiya ninga mbavwa, vahora inofuna dhakhuma dhulu nawuuma ulukhulu. Thitho vyongo vya dhulu na vya vailambo yavathi vinodha ka-a maningi no nyunguluwa, moi ilambo yavathi na mabasee vinodhaoneela vakwecha.

11 Voi vyongo vyothene vyevi vinodha nyunguluwa e-ni, muthuulele vya tundu waatu unofwanela nyo kala. Munofwanela kala atu akalelo lochena thitho muirengana vyongo vyothonyi-edha ira muli odhivelela wa Nlungu. 12 Muirengana vyevi vevo vanodedi-edhela nyo thitho thuulela hora dhothene* udha wa dambo la Yohova.* Vadambo leli dhulu unodhavya na mulo novaelatu nongeya thitho vyongo vya dhulu na vya vailambo yavathi vinodha ka-a maningi no nyunguluwa. 13 Mbwenye vatokala dhulu upya na ilambo yavathi ipya vinodedi-edhela i-yo movwelana na yolanyedha yee, thitho mwemo munodha kala longomano.

14 Ee-no odhiveliwiwa abali, voi munodedi-edhela vyongo vyevi, Mudhilimbi-edhe irana vyongo vyothene vinaode nyo ira Nlungu adhaufwanyeni mungali ochena, o-okaana yodawa thitho mungali varendele. 15 Wenjedhela vevo, muonenga ira leva rima wa Mbwii-u ndi ivulumucho, ninga mwemo mwaulembeleni bali-u odhiveliwiwa Paulo movwelana na zelu dhava-iwile liye. 16 Liye atoonga vyongo vyevi ninga munoirela liye mu makartee othene. Mbwenye mumakarteao mutokala vyongo vinango vyorucha vivwechecha, vyoi atu o-ofunji-eya na okaana iroromelo yo-olimba vinobendi-a aliwa. Aliwa anoirana vyevi ninga munoirela aliwa thitho na Malemba othene, vyevi vinodhairi-a ira tanongiwe.

17 Ee-no nyo abali odhiveliwiwa, voi mutoidhiwelatu vyongo vyevi, muwenjele ira atu o-ovwela malamulwao ta-audimeli-eni na vyoira viwa vyothakala nouwiri-ani ira mugwe namwasa oimwanana kala olimba. 18 Kamuire e-no, mbwenye malomwee muirenga vyongo vinaukami-eni ira mudhowenave wachela riya rima ulukhulu wa Mbwii-u na Namavulumuchi-u Yesu Kristu, thitho ira mum’mwidhiwe pama maningi. Liye atitimi-iwe romela va-eeni fiyedha dhowa nodhowa. Ame.