KARTA LOROMA LILEMBILE PEDRU

1 Miyo Pedru rumiwi wa Yesu Kristu, ndinolembela nyo osakuliwa na Nlungu oi muli alendo muilamboi nyo mumwadheile wu Ponto, Galatiya, Kapadokiya, Aziya na Bituniya. 2 Ndinolembela nyo oi Nlungu Baba atoomala idhiwelatu vya nyo. Liye atouva-ani zimwee ira mukale ochena. Atooirana vyevi ira mukale ovwela thitho ira aucheni-eni na sangiri ya Yesu Kristu:

Ndinovepa ira Nlungu authonyi-edheni tangaranga dhilukhulu thitho ira mukaena rendele.

3 Atitimi-eye Nlungu wa Mbwii-u Yesu Kristu, oi thitho ndi Babee. Nlungu atoonithonyi-edha tangaranga dhilukhulu vairi-idhe liye ira nibaliwe okoka upya nokaana idedi-edho yonyindeleya. Vyevi vyatoodeya namwasa ovenyathi-iwa wa Yesu Kristu. 4 Atooiri-a ira nibaliwe okoka upya ira nikaena yotuva yo-onongeya, yo-othakali-iwa thitho yo-o-uweya. Yotuva yei atoulokotedhani dhulu. 5 Atoulokotedhani nyo oi munobareliwa na kopolo ya Nlungu namwasa oi mutokaana iroromelo. Nlungu unaaubarelani ira mudhawachele ivulumucho, thitho ivulumucho yei inodha oneela muhora yakhomoni. 6 Vamwasa wen’na, munaasangalala maningi angalive ira va-eeni pyofwanelela ira muone nyarwa wa isihora yoyeva namwasa wa vyowesedha vyo-iyana-iyana vinogumanana nyo. 7 Vyevyo vinouireelani ira iroromelo inyu idhauiri-eni ira musimbiwe, titimi-iwa nolemeziwa, Yesu Kristu adhaoneela. Iroromelo inyuyo itowesedhiwa thitho chapereso yavadhulu kwaranya oro oi unonongeya angalive ira utowesedhiwa vamuloni. 8 Angalive ira Kristuo kamunarome m’monavo, munom’dhiveliwana. Angalive ira kamunom’mona va-eeni, munom’roromela thitho munosangalala maningi, 9 namwasa oi mutosikimizela ira iroromelwinyu inodha uiri-ani ira muvulumuwe.

10 Anamaongela taro-edhile vyoriya rima ulukhulu wauthonyi-edheni Nlungu, tatoosakasaka vya ivulumucho yei mwathindhi na mopwasedha maningi. 11 Zimu ochena watoovaelatu onga ira Kristu unodha oni-iwa nyarwa adhamala unodha wachela titimi-o. Anamaongela tanoosakasaka vizindiyelo vyaathonyi-edhe zimu ochena vyokhuza hora yaimbarimbari yafuna dhaireya vyevi. 12 Nlungu atoawandela anamaongelao ira katadhilabela okhene, mbwenye talabela nyo. Va-eeni, mutowandeliwa vyongo vyevi naatu anolaleela milanyu yapama mokami-iwa na zimu ochena okhumela dhulu. Angelo anofunechecha vwechecha vyongo vyevi.

13 Ee-no mukozeeli-edhe mathuulelwinyu ira mulabe basa mwakopolo. Mukaleve othuulela pama thitho mudedi-edhele na rima wethene riya rima ulukhulu unofunanyo dhathonyi-edheliwa, Yesu Kristu adhaoneela. 14 Ninga a-ima ovwela, mu-iye irana vyongo vyasililecha nyo mwa-anam’mwidhiwe Nlungu. 15 Mbwenye mofwanafwana na wenuo uli Ochena auwitan’neni, nyo thitho mukale ochena mumakalelwinyu othene, 16 namwasa oi malemba anoonga ira: “Mukale ochena, namwasa oi miyo ndili ochena.”

17 Thitho akala munovepha vyongo wa Baba, oi unotonga mo-osakula movwelana na vinoira mutu uliwethene, muirenga vyongo vyothonyi-edha ira munoova Nlungu vanokala nyo muilamboi ninga alendo. 18 Nyo munoidhiwa ira vyongo vyauthathunleni wu ingumi yo-okaana basa yalandele nyo anamabalinyu, kavyali vyongo vyooda nongeya ninga fero venango oro. 19 Mbwenye mwathathuliwile na sangiri ya pereso yavadhulu ya Kristu, yoi njofwanafwana na sangiri ya libila lo-okaana damba thitho yo-okaana matoto. 20 Mwaimbarimbari, Nlungu atoovaelatu m’sakula Kristu ilambo ya-anapanduchiwe, mbwenye liye aoneele hora yakhomoni namwasa wa nyo. 21 Dhela mwa liye, munororomela Nlungu am’venyathi-idhe muukwani nom’va-a titimi-o, naifunelo yoi iroromelo na idedi-edho inyu vikale mwa Nlungu.

22 Voi va-eni mutodhicheni-a vokala ovwela imbarimbari ya madhu a Nlungu thitho munodhiveliwana abali mo-okala mwainyengo, mudhivelengana maningi khumela vathi varima. 23 Nyo mutobaliwa okoka dhela mumadhu a Nlungu waingumi na odhowa nodhowa. Kamwabaliwile na mbeu yoi inooda nongeya, mbwenye na mbeu yoi kinooda nongeya. 24 Voi “atu othene ali ninga malachi, thitho titimi-o liwa lothene nli ninga mafolori a-angani. Malachi anonyala thitho mafolori anokhodhowa, 25 mbwenye madhu a Yohova* anodhowanave kalavo modhowa nodhowa.” “Madhu” enala ndi milanyu yapama yalaleiwile wa nyo.

2 Ee-no mu-iye vyothakala vyothene, vyainyengo vyothene, vyonami-a, bivu na mafyeda a tundu uliwethene. 2 Mbwenye ninga akhombwani, mufunenga ukaka o-othangani-ana yongo oi uli mu madhu a Nlungu. Mwamwanga ukaka wen’na, unoukami-ani ira muulukhule nofwanelela ivulumucho. 3 Vyevi vinoodeya akala mutowesa noona ira Mbwiye ngoriya rima.

4 Vahora inokwivela nyo wa Mbwiye, oi ndi limbwe laingumi lakhondile atu, mbwenye oi Nlungu atoom’sakula, wenuo thitho uli wa pereso yavadhulu wa Nlunguo, 5 nyo thitho ninga mabwe a ingumi munaamangiwa ninga nyumba yauzimu ira mudhakale alimbo velela sembe ochena. Ninga alimbo velela sembe ochena, mudha velelanga sembe dhauzimu dhorumeleya vamethoni va Nlungu dhela mwa Yesu Kristu. 6 Voi Lemba linoonga ira: “Miyo ndinaa-ela libwe losakuliwa mwavakhundu mu Ziyoni. Leli ndi libwe lavakhomoni loi tapereso yavadhulu thitho mutu uliwethene unofuna roromela libwelo kanodha sukwala.”*

7 Ee-no liye ngwapereso yavadhulu wa nyo namwasa oi munom’roromela. Mbwenye waatu oi katinom’roromela, “libwe lakhondile alimbo manga nyumba lidhidhe libwe lofuneya maningi lavakhomoni.” 8 Thitho lidhidhe “libwe logwegweducha na liphandhe losukwali-a.” Atu enala anogwegwedua namwasa o-ovwela madhu, thitho vyevi piyevyo vinofwanela aireela. 9 Mbwenye nyo muli “atu osakuliwa mwavakhundu, gulu la mamwene oi ndi anamavelela sembe, ziza lochena naatu oi anodha kala fuma yavakhundu. Mutosakuliwa ira mulaleele vya makalelo apama maningi” a Nlungu oi auitaneni ira mukhume isini thitho atouwachelani mu njezee yodabwi-a. 10 Voroma kamwali atu a Nlungu, mbwenye va-eeni muli atwee. Nlungu ali a-anauvweleni tangaranga, mbwenye va-eeni utouvwelani tangaranga.

11 Odhiveliwiwa, voi muli alendo naatu o-odimbela muilamboi, ndinousembezelani ira murambele silila vyongo vyothakala vyoi vili vakhondo yolimbanana nyo. 12 Mukaena makalelo apama vari vaatu amuilamboi, ira tauongelangani ira munoirecha vyongo vyothakala, taonenga okhene vyoira vinyu vyapama ira amala tadhatitimi-e Nlungu vadambolee lotonga.

13 Muirengana vinofuna Mbwiye vogonjela utongi uliwethene ukaathi-iwile naatu. Mugonjelenga mwene namwasa oi utokaana izo ilukhulu, 14 thitho anamatonga namwasa oi anorumiwa na mwenuo ira talangenga atu anoirana vyongo vyothakala thitho simba atu anoirana vyongo vyapama. 15 Nlungu unofuna ira muirengana vyongo vyapama ira mumiyali-e atu anoonga vyongo vyo-okaana zelu namwasa o-oidhiwa vyongo. 16 Mutokaana ufulu, mbwenye kamu-indi-edhenga basa ufulwinyuo ninga vofuna vithalela voirana vyongo vyothakala, mbwenye muu-indi-edhenga basa vom’labela Nlungu. 17 Mulemezenga atu amaziza othene. Mudhiveliwengana gulu lothene laabali, muovenga Nlungu nolemeza mwene.

18 Anamalaba tagonjelenga mapatarawiwa noalemezanga maningi. Katiirenga vyevi wa mapatarau apama na ololela baa-i, mbwenye thitho wa mapatarau orucha adhiveliwi-a. 19 Akala mutu unovilela vanooni-iwa liye nyarwa nogumanana vyorucha* namwasa ovwela Nlungu, Nlunguo unosangalala na liye. 20 N’nga vilela vanokhomiwa nyo namwasa oi mutodawa unoganyali n’ni? Mbwenye Nlungu unosangalala mwavilelanga nyarwa namwasa oi mutoira vyongo vyapama.

21 Nyo mutoitaniwa na Nlungu ira muirengana vyevi. Voi masiki Kristu atoona nyarwa namwasa wa nyo, thitho atou-iyedhelani ifwanafwani-o yoi mu-arelenga manyalwee mwapolepole maningi. 22 Liye kanarome dawavo thitho kanarome ongavo madhu ainyengo. 23 Vahora yam’mongela atu vyaiburutu, liye kaaweli-edhe vyaiburutu. Vahora yaoni-iwa liye nyarwa, kaatuchile atu am’moni-a nyarwao. Mbwenye atoo-iya vyongo vyothene mandhani mwa namatonga oi unotonga molongomana. 24 Liye atootukula vyodawa vi-u manungonimwee vathomeiwile liye vaimurini. Atooirana vyevi ira nivulumuchiwe wu vyodawa noiranga vyongo vyolongomana. Thitho “mwatooili-iwa na vilondavyee.” 25 Voroma mwali ninga mabila odimela, mbwenye va-eeni mutowelela wa namakumbizinyu na wa namaing’anela vingumi vinyu.

3 Mofwanafwana na vyevi, nyo a-iyana mugonjelenga aman’ninyu ira akala ira katinofuna vwela madhu a Nlungu, takopeye na kalelo linyu, a-kala na madhwinyu 2 mbwenye namwasa oi tatoona kalelo linyu lapama* na lemezo linyu nlukhulu. 3 Dhibalei-a winyu kukale waundhe baa-i ninga manga sisi, wara vyodhibalei-ana vya oro venango vyowara vyodula. 4 Mbwenye ukale wa mutu olokoteya wa rimani, angawarile vyowara vyo-onongeya, vyoi ndi rima okhurudheya na opwaseya oi ngwapereso yavadhulu vamethoni va Nlungu. 5 Ndi mwemo thitho mwadhibalei-edha a-iyana ororomeleya awale, oi tanoodedi-edhela Nlungu. A-iyana enala tanoogonjela aman’niwa. 6 Mofwanafwani-a, Sara anoom’vwela Abrahamu thitho anoom’romola ira “mbwiyanga.” Va-eni nyo muli a-imee moi munokalave a-imee mwadhowanave irana vyongo vyapama thitho akala kamunoova yongo iliyothene.

7 Nyo thitho alombwana, mudhowenave khaathi na a-iyaninyu mowaidhiwa pama. Mualemezenga namwasa oi a-iyana ali ninga iya yo-orucha thweya. Muirengana vyevi ira malobelwinyu ta-afungeliwe, namwasa oi munodha wachela ingumi vambo-i naaliwa inofuna dhauva-ani Nlungu namwasa oriya rimawee ulukhulu.

8 Vomari-a, mwethene mukale amathuulelo mambo-i, mudhiveliwengana abali, musukwalenga vambo-i naaliwa, mukaena tangaranga dhilukhulu thitho mukale odhiyevi-a. 9 Mutu auwirelani yongo yothakala kamum’mweli-edhe na yongo yothakala, auwirelani vyaiburutu kamum’mweli-edhe na iburutu. Malomwee muairelenga vyongo vyapama* namwasa oi Nlungu atousakulani ira muraeli-enga atu enango ira naliyene thitho adhauraeli-eni.

10 Mutu “unodhiveliwana ingumiyee na unofuna kaana ingumi yapama, unofwanela ira polepole ira a-aongenga vyongo vyothakala na lumilee thitho ira a-aongenga vyongo vyainyengo na lomwee. 11 Unofwanela i-yachi irangana vyongo vyothakala noirangana vyongo vyapama. Unofwanela thitho dhilimbi-edha kalanga mwarendele naatu enango noulimbi-a rendeluo. 12 Metho a Yohova* anoing’ana atu olongomana, thitho mabarwee anovuruwana malobelwiwa osembezela, mbwenye Yohova* unothakaleliwana atu anoirana vyongo vyothakala.”

13 Mwaimbarimbari, n’nga mbaani unofuna uirelani vyongo vyothakala mwadhilimbi-edhanga irana vyongo vyapama? 14 Mbwenye angalive ira murucheye namwasa oirana vyongo molongomana, munodhowanave kala osangalala. Kamuovenga vinoova aliwa* thitho kamuvikhumbanyena. 15 Mbwenye murumele mirimani mwinyu ira Kristu ndi Mbwiye thitho ira ngochena. Hora dhothene mukalenga okozeya wakhula mutu uliwethene unoufukani vya idedi-edho inyu, mbwenye muawakhulenga mopwaseya na mwalemezo maningi.

16 Mudhowenave kaana ithuulela rima yapama, ira akala atu tanaauongelani vyongo vyothakala tadhakaena manyadho namwasa wa kalelo linyu lapama ninga anama-arela a Kristu. 17 Ndipama rucheya namwasa oirana vyongo vyapama, akala Nlungu utorumela ira vyevyo viireye, i-yani-ana rucheyanga namwasa oirana vyongo vyothakala. 18 Voi masiki Kristu atookwa fendo imbo-i baa-i ira amali-e vyodawa. Mutu olongomanuo atookwela atu o-olongomana ira auvwelani-eni na Nlungu. Liye atoophiwa ninga mutu, mbwenye avenyathi-iwile ninga zimu. 19 Adhamale atoodhowa malaleela milanyu yotongiwa wa mizimu yali perezo. 20 Mizimu yen’na kayavwenle Nlungu vahora yaleva liye rima mumalambo a Nowa. Vahora yeniyo, Nowa anoosaka-edha mwadiya wenuo wavulumuchile vama-injeni atu olengeseya, okwakwana 8 baa-i.

21 Va-eni ubadizo, oi unofwanafwana na mwadiya, unovulumucha thitho nyo (a-kala khumi-a siro manungoni, mbwenye vepha Nlungu ira auva-eni ithuulela rima yapama) namwasa oi munororomela Yesu Kristu avenyathi-iwile. 22 Liye atoodhowa dhulu thitho uli wu dhandha lodyana la Nlungu moi tatoom’va-a izo ira maguverno, kopolo na angelo vikale vathivee.

4 Voi Kristu atoona nyarwa vahora yali liye mutu, nanyeene thitho mukozeele vokaana mathuulelo ofwanafwana na ana Kristu. Vili e-no namwasa oi mutu unoona nyarwa kuongela ira atoo-iyachi irana vyodawa. 2 Atooirana vyevi ira vahora yothene yana liye ingumi a-airena vyofuna vyaatu mbwenye airena vyofuna vya Nlungu. 3 Ndulimu mwakalelecha irana vyofuna vyaatu ailamboi. Vahora yeniyo mwatookaana makalelo ova-a manyadho,* mwanoolavela vyongo vyothakala, mwanoomwa vinyu mokwaranyi-a madile, mwanoodhiveliwana mafesta othakala,* mwanooira mipikisano yomwa vyomwa vyolezeli-a nolambela mafwano, oi wali pwanya malamulo. 4 Voi muto-iya irana vyothakala vambo-i naatu ailamboi, aliwa katinovwechecha mwasiwa, ngumwasee anaaunyozani. 5 Mbwenye atu enala anodha wakhula selu vamethoni va Kristu oi ngunofuna dhatonga atu aingumi na okwene. 6 Ngumwasiwa milanyu yapama inodha laleeliwa thitho waatu okwa, ira angalive ira anaatongiwa mwaututu movwelana na maonelo aatu, aliwa takaena ingumi mwazimu movwelana na maonelo a Nlungu.

7 Mbwenye mamalelo a vyongo vyothene ali duzi. Ee-no mukale othuulela pama, thitho mukale methove ira mwa-apwaze lobela. 8 Kwaranya vyothene, mudhivelengana maningi namwasa oi udhivela unovu-elela vyodawa vinjinji. 9 Muwachelengana mo-odungunya. 10 Mutu uliwethene atoowachela yotuva, ee-no mulabi-edhenga basa vyotuva vinyuvyo volabelana. Muirena vyevi ninga arumiwi anokami-a atu enango ira taganyali noriya rima ulukhulu wa Nlungu, unothonyi-edha liye mundhila dho-iyana-iyana. 11 Akala mutu utokaana yotuva yoonga, aongenga movwelana na madhu opambuleya a Nlungu. Akala mwinango unolabela atu enango, aalabelenga monyindela kopolo inovelela Nlungu. Airengana vyevi ira Nlungu alemezeye muvyongo vyothene dhela mwa Yesu Kristu. Titimi-o na kopolo ndi vyee modhowa nodhowa. Ame.

12 Odhiveliwiwa, kamudabwe na vyowesedha vilukhulu vinogumanana nyo kalanga ninga munogumanana yongo inangwee yailendo. 13 Mbwenye musangalalenga namwasa oi munogumanana vyowesedha vimbo-ive ninga vyaguman’nena Kristu ira thitho mudhasangalale maningi vahora inofuna dhaoneela titimi-olee. 14 Muli osangalala akala atu anounyozani namwasa wa dhina la Kristu namwasa oi vyevi vinothonyi-edha ira zimu ochena wa Nlungu na titimi-olee vili vanyo.

15 Mbwenye kandinofuna ira mutu mwinango wa nyo aonenga nyarwa namwasa oi utoroma uba, upha atu, irana vyongo vyothakala venango utoroma volowela myasa yaatu enango. 16 Mbwenye akala mutu mwinango unoona nyarwa namwasa okala Kristau, kakaena manyadho, mbwenye adhowenave lemeza Nlungu wu aidhiweyangave ninga Kristau. 17 Yen’na ndi hora yavaeletu Nlungu sakula ira atonge, thitho unoromana tonga vandhevee. N’nga akala tongao unoromana va-iyo, atu o-ovwela milanyu yapama ya Nlungu vinodha amalela a-vi? 18 “Akala mutu olongomana unodha vulumuwa morucheela, n’nga chini inofuna dham’mwireela mutu o-oova Nlungu na odawa?” 19 Ee-no atu anorucheya namwasa oi anoirana vinofuna Nlungu tavelele vingumi viwa wa Namapanduchi-u oi ngororomeleya nodhowanave irana vyapama.

5 Ee-no, miyo oi thitho ndili ndimuwa fwinyu wapingo, oi ndatoona moda warucheile Kristu oi thitho ndinodedi-edhela dhawachela vambo-i naatu titimi-o linofuna dhaoneela, ndinovepha andimuwa apingo ali vari vinyu ira: 2 Mukumbize kumbi wa mabila a Nlungu ali mandhani mwinyu. Ninga anamaing’anela, mulabenga basa linyu, a-kala mokanyi-edheya mbwenye mofunechecha ninga arumiwi a Nlungu. Mulilabenga narima wethene, a-kala namwasa ofuna ganyalivo yongo. 3 Kamuirenga vyongo ninga mamwene vari vaatu a Nlungu,* mbwenye muvelelenga ifwanafwani-o yapama wa kumbi wa mabila. 4 Thitho namakumbiza wandimuwa adhaoneela, munodha wachela yotuva yo-onongeya yoi ndi titimi-o.

5 Saasawa thitho nanyo azombwe, mugonjelenga andimuwa a pingo.* Thitho mwethene muirenga vyongo modhiyevi-a, namwasa oi Nlungu kanosangalala naatu odhiulukhuli-a. Mbwenye unothonyi-edha riya rimawee ulukhulu waatu odhiyevi-a.

6 Ee-no mudhiyevi-e vamethoni va Nlungwi-u wakopolo ira horee yadhakwakwana adhaugweli-eni. 7 Muirengana vyevi vanom’rulela nyo vyokhumbanyi-a vinyu vyothene, namwasa oi liye unousamalelani. 8 Mukale othuulela pama thitho mukale methove namwasa oi mwidaninyu Namanami-a unawendawenda ninga kalamu yokhuwa maningi, yoi inosaka mutu ira im’dye. 9 Ee-no mukaena iroromelo yolimba thitho mum’limbanena, voidhiwa ira abalinyu vailambo yothene anogumanana thitho nyarwa ninga dhedho. 10 Mwarucheya wahora yoyeva, Nlungu oi unothonyi-edha riya rimawee othene ulukhulu, oi thitho atouitanani ira mukale ovwelana na Kristu noira muwachele titimi-o lo-omala, unodha mari-a ufunji-ani. Liye unodha uva-ani kopolo, unodha ukami-ani ira mukaleve ororomeleya noulimbi-ani. 11 Kopolo tidhee modhowa nodhowa. Ame.

12 Dhela mwa Silvano* bali-u unom’mona miyo ira ngororomeleya, nditoulembelani karta logwandelali ira ndiulimbi-eni nousimikizelani ira riya rima ulukhulu wa Nlungu kuweu. Thitho muu-indedhele mwakopolo. 13 I-yana* uli wu Babulo, oi Nlungu atoom’sakula mwavakhundu ninga nyo, na mwananga Marku, anaaumwenyulani. 14 Mumwenyulane mwaudhivela.

Nyo mwethene oi muli ovwelana na Kristu, mukaena rendele.