KARTA LODHOWA WA TITU

1 Miyo Paulo, dhaari wa Nlungu narumiwi wa Yesu Kristu, nditokaana iroromelo yovwelana na yaatu osakuliwa na Nlungu. Thitho ndinoidhiwa molinyali imbarimbari yokhuza dhivelela wi-u wa Nlungu. 2 Vyongo vyevi ninovikaana namwasa wa idedi-edhwi-u ya ingumi yo-omala, yalanyedhile Nlungu walelene oi kanonama. 3 Mbwenye vahoree yofwanelela, atooiri-a ira madhwee aidhiweye dhela mubasa lolaleela lava-iwile miyo movwelana na lamulo la Namavulumuchi-u, Nlungu. 4 Ndinolembela we Titu, mwananga waimbarimbari oi utokaana iroromelo yofwanafwana na yanga:

Riya rima ulukhulu na rendele vyokhumela wa Nlungu Babi-u na Kristu Yesu Namavulumuchi-u, vikale na we.

5 Ndatou-iya wu Kereti ira usaka-edhe vyongo vyodaweya noira u-ele andimuwa apingoni mu sidadi nlilothene movwelana na malangi-o auva-idhe miyo. 6 Ndimuwa wa vapingoni unofwanela kala o-okaana mwasa om’nukhudhela, lombwana wa i-yana m’mbo-i, waa-ima ororomela thitho o-onukhedhiwa ira mbokaana makalelo othakala venango o-otongeya. 7 Voi ndi rumiwi wa Nlungu, namaing’anela unofwanela kala o-okaana mwasa om’nukhedhela. Kakale ovwa vyee baa-i, ombaranya thakaleliwa, osimbwa umwa vyomwa vyolezeli-a, wauwalanga* venango odhiveliwana ganyali vyongo mwa inyengo. 8 Mbwenye akale owachela alendo, odhiveliwana vyongo vyapama, othuulela pama, olongomana, ororomeleya thitho odhikondi-a. 9 Thitho akale o-indedhela mwakopolo madhu ororomeleya vanofunji-a liye mwadodoliso, ira aode limbi-a atu namakhundo olinyali thitho sumulula atu oruni-a.

10 Namwasa oi vatokala atu anjinji o-otongeya, oonga vyo-okami-a na onami-a atu enango. Vari vaatu enala vatokala thitho atu anolimbi-ave ineliwa. 11 Atu enala unofwanela amiyali-a, namwasa oi vofuna ganyali vyongo mwa inyengo, anodhowanave nonga mabanja vofunji-a vyongo vyo-ofwanela funji-a. 12 M’mbo-i mwaaliwa, oi thitho ndinamaongeliwa, aongile ira: “Akereti mbaatu onama hora dhothene, vinyama vya uwali vya a-ngani, opolola na osimbwa udya.”

13 Umboni wen’na ngwaimbarimbari. Namwasa wa vyevi, udhowenave asumulula mwakopolo ira takaena iroromelo yolimba. 14 Kativuruwanenga vichitwa vya Ayuda thitho a-rela malamulo aatu oi ato-iya imbarimbari. 15 Vyongo vyothene pyochena waatu ochena. Mbwenye vari vaatu othakali-iwa na o-okaana iroromelo kavali yochena, namwasa oi mathuulelwiwa na ithuulela rima iwa pyothakali-iwa. 16 Anoonga vakwecha ira anom’mwidhiwa Nlungu mbwenye na vyoira viwa anom’khonda, namwasa oi mbonyakavala, o-ovwela na o-ofwanelela basa nlilothene lapama.

2 Mbwenye we udhowenave onga vyongo vyovwelana na makhundo olinyali. 2 Alombwana oulula katiirenga vyongo mokwaranyi-a madile, katiirenga vyongo ninga a-ima, takale othuulela pama, airoromelo yolimba, audhivela ulukhulu na ovilela maningi. 3 Naaliwene thitho a-iyana oulula takaena makalelo anairi-e ira Nlungu alemeziwe. Katikale oonga mafyeda, venango adhaari omwa vinyu unjinji, mbwenye takale anamafunji-a a vyongo vyapama, 4 naifunelo yoi tava-enga malangi-o* asikana ira tadhiveliwengana amaniwa, a-imiwa, 5 takalenga othuulela pama, ochena, olaba mabasa avandhe,* apama na ogonjela amaniwa, ira madhu a Nlungu a-anyoziwe.

6 Thitho udhowenave limbi-a azombwe ira takale othuulela pama. 7 Mundhila iliyothene ukale ifwanafwani-o vamabasa apama. Ufunji-enga vyongo vyolinyali* thitho uthonyi-edhenga ira kunoira vyongo ninga mwana. 8 Madhwaa akalenga ofwanelela, oi katinoruni-iwa, ira atu oruni-a takaena manyadho thitho ta-afwanye mwasa oniongela vyongo vyothakala. 9 Adhaari tagonjelenga mapatarawiwa va vyongo vyothene thitho taadhiveliwi-enga. Kataawakhulenga mothakala 10 venango abela, mbwenye takale ororomeleya va yongo iliyothene, ira tarii-edhenga vinonifunji-a Namavulumuchi-u Nlungu.

11 Nlungu utooni-a riya rimawee ulukhulu oi utodhi-a ivulumucho waatu amaziza othene. 12 Vyevi vinonifunji-a kaana ingumi yoova Nlungu ira na-alavelenga vyongo vyothakala vyailamboi, mbwenye nikale othuulela pama, oira vyongo molongomana na odhivelela wa Nlungu muilamboi* 13 vanodedi-edhela i-yo vyongo vyosangalali-a nooneela wa Nlungu nlukhulu mwatitimi-o na Namavulumuchi-u Yesu, 14 oi ngwadhivelenle malo mwa i-yo ira anivulumuche* wu ingumi yoira vyongo vyo-ovwela malamulo vya tundu uliwethene thitho ira anicheni-e, ira nikale atwee avakhundu na odhivelela vamabasa apama.

15 Udhowenave onga vyongo vyevi, limbi-a nosumulula atu vo-indi-edha basa kopolo dhothene dhava-iwile we. Kurumeli-e ira mutu uliwethene aupwaze.

3 Udhowenave athuucha ira tagonjelenga novwela maguverno na anamatonga. Takale thitho okozeya laba basa nlilothene lapama. 2 Kationgelenga mutu uliwethene vyongo vyothakala thitho katidhiveliwengana kangana. Mbwenye takale ololela na opwaseya waatu othene. 3 Voi na-iyene thitho voroma nali o-okaana zelu, o-ovwela, odimeli-iwa, adhaari analuveluve o-iyana-iyana na avyongo vyosangalali-a, oira vyothakala, abivu, onyakavala thitho nanooidana.

4 Mbwenye Namavulumuchi-u Nlungu angathonyi-edhe riya rima nodhiveliwana atu, 5 (a-kala namwasa wa mabasa olongomana alabile i-yo, mbwenye namwasa wa tangarangadhee), atoonivulumucha voni-ambi-a ira nikaena ingumi ipya. Thitho atoonivulumucha vonikami-a na zimu ochena ira nikale atu apya. 6 Liye atoonikhutulela zimu wen’na dhela mwa Yesu Kristu Namavulumuchi-u, 7 ira ningamadhi oniwa kala olongomana namwasa oriya rimawee ulukhulu, nikale ofwanelela wachela yotuva movwelana na idedi-edho ya ingumi yo-omala.

8 Madhu enala mbaimbarimbari thitho ndinofuna ira udhowenave gogomedha vyongo vyevi, ira atu anororomela Nlungu tathuulelenga maningi mwemo munadhowelena aliwa laba mabasa apama. Vyevi pyapama thitho pyokami-a waatu

9 Mbwenye we urambelenga runi-ana va vyongo vyo-okaana basa na vyokhuza maziza aanamabala. Urambelenga thitho kangana nolimbanana atu vamwasa okhuza Ilamulo, namwasa oi vyevi pyo-okami-a thitho pyo-oganyali-a. 10 Mutu unolimbi-edha vyopanduwa wam’sumulula* fendo yoroma na yanambili, kum’vwelaneneeve okoka 11 voidhiwa ira mutu wenuo utodimela, unaadawa thitho unaadhiomba landu.

12 Ndadharuma Atema venango Tikiko wa we, udhadhilimbi-edhe ira udhandifwanye wu Nikopoli, namwasa oi ndithuulele makala weo hora yodidilila. 13 Zena oidhiwa Ilamulo ule na Apolo, uava-e vyongo vyofuneya na vyokwakwanela vaulendo, ira ta-arambulele yongo. 14 Mbwenye abali-u tafunjedhe laba mabasa apama ira taode kami-a vafuneela kami-o, ira takale ova-a vyova-a.

15 Atu othene ali vambo-i na miyo uno anaaumwenyulani. Uvelele mwenyula wanga waatu oi anonidhiveliwana namwasa oi nina iroromelo yofwanafwana.

Riya rima ulukhulu ukale na nyo mwethene.