KARTA LANAMBILI LODHOWA WA ATEZALONIKA

1 Miyo Paulo, Silvano* vambo-i na Timoteo ndinolembela pingo wau Tezalonika, oi ndi ovwelana na Nlungu Babi-u na Mbwiye Yesu Kristu ira:

2 Riya rima ulukhulu na rendele okhumela wa Nlungu Babi-u na Mbwiye Yesu Kristu, vikale na nyo.

3 Ndinofwanela m’simbanga Nlungu hora dhothene namwasa wa nyo abali. Vyevi pyofwanelela namwasa oi iroromelwinyu inaaulukhula maningi thitho udhivela unothonyi-edha mutu uliwethene wa fwee unaawenjedheleya. 4 Ee-no i-yo ninogaya naonganga vya nyo wu mipingo ya Nlungu namwasa ovilela winyu nairoromelo inothonyi-edha nyo mwaoni-iwanga nyarwa thitho limbanana nyarwa dhinogumanana nyo.* 5 Wen’na ndi umboni oi Nlungu unotonga molongomana thitho namwasa wa vyevi mutooniwa ira muli ofwanelela Umwene wa Nlungu, unoonela nyo nyarwa.

6 Voi Nlungu ngolongomana, liye unodha langa atu anouoni-ani nyarwa. 7 Mbwenye nyo oi munaaoni-iwa nyarwa, munodha vumi-iwa vambo-i na i-yo vahora inofuna dhaoneela Mbwiye Yesu khumela dhulu vambo-i na angelwee akopolo 8 na mulo o-inda maningi. Vahora yeniyo unodha langa atu o-oidhiwa Nlungu naatu anokhonda a-vwela milanyu yapama yoonga vya Mbwii-u Yesu. 9 Atu enala anodha tongiwa ira tanongiwe modhowa nodhowa thitho anodha khumi-iwa vamethoni va Mbwiye moi katinodhaonave kopolo dhee dha titimi-o. 10 Vyevi vinodha ireya vahora inofuna liye dhadha nowachela titimi-o vambo-i naatwee ochena. Vadambo lelo, atu othene tam’roromenle anodha m’mwing’anechecha modabwa, namwasa oi mwatoororomela umboni wavelenle i-yo wa nyo.

11 Vamwasa wen’na, ninoulobelelani hora dhothene ira Nlungwi-u auoneni ira muli ofwaneleladi itaniwa na liye. Nlungu aire mokwakwanela vyongo vyothene vyapama vinofuna liye na kopolodhee, thitho airi-e ira mabasinyu anolaba nyo mwairoromelo akale oganyali-a. 12 Ninoulobelelani ira dhina la Mbwii-u Yesu Kristu lilemeziwe dhela mwa nyo thitho ira dhina linyu lilemeziwe dhela mwa liye, movwelana noriya rima ulukhulu wa Nlungwi-u na wa Mbwii-u Yesu Kristu.

2 Mbwenye abali, vamwasa okhuza kalavo wa Mbwii-u Yesu Kristu nogumani-iwa wi-u wa liye, ninouvepani ira 2 kamurumele ira mutu uliwethene auchinjeni mathuulelwinyu oi mbolinyali. Kamudodomi-eye mathuulelo akala mutu mwinango unoonga ira dambo la Yohova* litofiya, masiki aonge ira milanywiyo njokhumela wa Nlungu, venango aonge ira alerile karta linoonga atu enango ira alilembile ngu-iyo.

3 Kamurumele ira mutu uliwethene audimeli-eni* mwandhila iliyothene namwasa oi dambolo la-anafiye, voroma vanokala atu opanduwa thitho vanodha oneya mutu o-ovwela malamulo, oi ndi mwana unofuna dhanongiwa. 4 Liye unoruni-a nodhigweli-a vadhulu vamutu uliwethene oromoliwa ira ndi nlungu, venango yongo iliyothene inolambeliwa,* moi unokaathi kachisini wa Nlungu, nodhioneeli-edhanga vakwecha ira liye ngu nlungu. 5 N’nga kamunothuulela ira vyali miyo vambo-i nanyo ndanouwandelani vyevi?

6 Thitho nyo munoidhiwa yongo inom’mwiri-a ira va-eeni a-aoneye, ira adhaoneele vahoree yofwanelela. 7 Pyaimbarimbari, a-vwela wa mutu wen’na, oi kwa segeredo, utoroma wale laba basa. Mbwenye a-vwela weu unodhowanave kala wa segeredo fiyedha unom’mwimwanani-uo angakhumile. 8 Amala o-ovwela malamuluo unodha oneela vakwecha. Mbwiye Yesu unodha m’gonji-a o-ovwela malamuluo na zimu okhumela mwanomwee thitho unodha m’nongelatu vahora inofuna liye dhaoneela. 9 Mbwenye oneela wa o-ovwela malamuluo unosogoleliwa na kopolo dha Satana. Liye unaalaba basa nlilothene lakopolo, vizindiyelo vyonama, vyodabwi-a 10 thitho unolabi-edha basa ndhila iliyothene ya inyengo ira anyengi-e atu anodhowa manongiwa. Vyevi vinodha iri-a ira aliwa talangiwe namwasa oi aliwa katiwachenle nodhiveliwana imbarimbari ira tadhavulumuwe. 11 Ngumwasee Nlungu utorumela ira aliwa tanami-iwe na mafunji-edho onama naifunelo yoi aliwa taroromelenga vyonama, 12 ira othene enao tadhatongiwe namwasa oi kataroromenle imbarimbari mbwenye tasangalala na vyo-olongomana.

13 Mbwenye, ninofwanela m’simbanga Nlungu hora dhothene namwasa wa nyo abali oi munodhiveliwiwa na Yohova,* namwasa oi Nlungu atousakulani khumela vamaromelo ira mudhavulumuwe. Atooirana vyevi voucheni-ani na zimwee thitho namwasa oi mwatoororomela imbarimbari. 14 Atouitanelani wu ivulumucho yei dhela mu milanyu yapama inolaleela i-yo, ira mudhakaena titimi-o la Mbwii-u Yesu Kristu. 15 Ee-no abali, mukale olimba thitho mu-indedhele mwakopolo sanganiko dhafunji-iwile nyo, mo-obala akala mwafunji-iwile dhela mumilanyu yoira onga venango mu makarta okhumela wa i-yo. 16 Thitho Mbwii-u Yesu Kristu na Nlungu Babi-u, oi unonidhiveliwana moi kanoimwanana nilimbi-a thitho atooniva-a idedi-edho yapama, dhela moriyawee rima ulukhulu, 17 alimbi-e mirimiyu noulimbi-ani ira hora dhothene muirengana noonganga vyongo vyapama.

3 Vogomi-edha abali, mudhowenave nilobelela ira madhu a Yohova* adhowenave mwadheya mombaranya nolemeziwa ninga munoireela aliwa vari vinyu. 2 Thitho munilobelelenga ira nivulumuchiwe waatu othakala maningi, namwasa oi kai atu othene ana iroromelo. 3 Mbwenye Mbwiye ngororomeleya thitho unodha ulimbi-ani noubarelani wa othakaluo. 4 Thitho ninga anama-arela a Mbwiye, nitokaana iroromelo ira nyo muno-arela malangi-o auva-idheni i-yo thitho munongodhowanave a-arela. 5 Mbwiye adhowenave sogolela miriminyu ira mum’dhiveliwengana Nlungu noira muvilelenga namwasa wa Kristu.

6 Va-eeni abali, ndinouva-ani malangi-o mudhina la Mbwiye Yesu Kristu, ira murambelenga bali uliwethene unowenda mo-olongosowa na unoirana vyongo vyo-ovwelana na malangi-o* auva-idheni i-yo. 7 Thitho nyo munoidhiwa vyongo vinofwanela nyo irana ira munisazi-edhe, namwasa oi kanairile vyongo vyo-olongosowa vari vinyu, 8 venango udya yodya ya mutu uliwethene mwapezi.* Malomwee, natoolaba basa mwathindhi na kopolo dhi-u dhothene nama-iyu nathana ira mutu uliwethene a-aniva-e yongo iliyothene vofuna nikami-a. 9 Kaiira nairilena vyevi namwasa oi kanana ufulu ouvephani ira munikami-e, mbwenye nafuna ira nuuva-eni ifwanafwani-o yoi mui-arelenga. 10 Thitho vahora yali i-yo vambo-i na nyo, nanouwandelani lamulo loi: “Akala mutu mwinango kanofuna laba basa, kadye.” 11 Namwasa oi ninovwa ira atu enango tanowenda mo-olongosowa vari vinyu, aliwa katinofunave laba basa, mbwenye tanovolowela myasa yoi kinoakhuza. 12 Atu enala ninoawandela mosembezela mwa Mbwiye Yesu Kristu ira talabenga basa mwathindhi mo-ovolowela myasa dhaatu enango thitho tadyenga yodya ilabele aliwa basa.

13 Mbwenye nyo abali, kamu-iye irana vyongo vyapama. 14 Mbwenye akala mutu mwinango kanovwela madhwi-u ali mukartali, mum’ele izindiyelo thitho mu-iye irana vyongo vambo-i na liye ira akaena manyadho. 15 Kamum’mone ninga mwidani, mbwenye mudhowenave m’va-a malangi-o ninga bali.

16 Va-eeni Mbwiye wa rendele auva-eni rendele hora dhothene mundhila iliyothene. Mbwiye akale na nyo mwethene.

17 Muwachele mwenyula wanga, ulembile miyo Paulo na dhandha langa. Hora dhothene ndinolembecha e-ni mu makartanga othene, ira muidhiwe ira ngumiyo ulembile. Mwemu punolembelecha miyo.

18 Riya rima ulukhulu wa Mbwii-u Yesu Kristu ukale na nyo mwethene.