KARTA LOROMA LODHOWA WA ATEZALONIKA

1 Miyo Paulo, Silvano* vambo-i na Timoteo ndinolembela pingo wau Tezalonika, oi ngovwelana na Nlungu Baba thitho na Mbwiye Yesu Kristu ira:

Riya rima ulukhulu na rendele vikale na nyo.

2 Hora dhothene ninosimba Nlungu nauromolangani mwethene mumalobelwi-u. 3 Namwasa wa idedi-edho inanyo mwa Mbwii-u Yesu Kristu na vamethoni va Nlungu Babi-u hora dhothene ndinothuulela mabasinyu airoromelo, mabasinyu audhivela novilela winyu. 4 Nyo abali odhiveliwiwa na Nlungu, i-yo nitoidhiwa ira mwasakuliwile na liye. 5 Namwasa oi milanyu yaulaleeleni i-yo, kanaira ionga baa-i mbwenye yali yakopolo, yadhidhena zimu ochena thitho natoilaleela mosikimizela rima maningi. Thitho nyo munoidhiwa vyairile i-yo vofuna ukami-ani. 6 Angalive ira mwali va nyarwa ilukhulu mwatoowachela madhwao mosangalala unodha namwasa wa zimu ochena. Veva mwatoonisazi-edha thitho mwam’sazi-edhe Mbwiye, 7 moi mwatookala ifwanafwani-o waatu othene ororomela awu Masedoniya na wu Akaya.

8 Kaiira madhu a Yohova* okhumela wa nyo avweile wu Masedoniya na wu Akaya baa-i, mbwenye iroromelwinyu wa Nlungu itomwadheya wu limburo nlilothene, moi i-yo kaninofwanela ongavo yongo iliyothene. 9 Namwasa oi aliwa anoongave vya mwemo mwagumanele i-yo na nyo fendo yoroma na mwemo mwa-iidhe nyo mafwanwinyu nodhimbinuwela wa Nlungu, ira mulabelenga Nlungu waingumi na waimbarimbari. 10 Mwatoodhimbinuwela thitho wa Nlungu ira mudedi-edhenga Mwanee okhumela dhulu, am’venyathi-idhe liye muukwa. Mwanuo ndi Yesu oi ngunofuna dhanivulumucha vothakaleliwa wa Nlungu unodha.

2 Onga vyaimbarimbari, nyo mutoidhiwa abali ira, ulendwi-u odha wa nyo kwaali wapezi. 2 Namwasa oi angalive ira voroma nanoorucheya thitho ireliwa vyongo vyaiburutu wu Filipi, ninga munoidhiwela nyo, natoolimba rima mokami-iwa na Nlungwi-u ira nuuwandeleni milanyu yapama ya Nlungu vahora yaruni-iwa i-yo maningi.* 3 Vyongo vinoulimbi-ani i-yo ira muviirena kavinokhumela mathuuleloni odaweya venango othakali-iwa thitho kaninovionga mwa inyengo. 4 Mbwenye Nlungu utorumela ira niva-iwe basa lolaleela milanyu yapama. Ee-no kaninoonga naifunelo yofuna sangalali-a atu, mbwenye vofuna sangalali-a Nlungu oi unoona mirimi-u.

5 Thitho munoidhiwa ira kaninarome ongavo madhu ousimbani mwa inyengo venango irana vyongo mwa idyani. Nlungu unoniirela umboni. 6 Thitho kanafunile titimi-o lokhumela waatu wa nyo venango waatu enango, ninga arumiwi a Kristu nangavephile ira muniva-e vyongo vinango ira viode nikami-a. 7 Malomwee natoouthonyi-edhani udhivela noriya rima ninga mwemo m’ma oyamwi-a a-ima munoirela liye vosamalela a-imee mwaudhivela. 8 Ee-no voi ninoudhiveliwanani maningi, nali ofunechecha* uwandelani milanyu ya Nlungu thitho velela vingumi vi-u ira nuukami-eni.

9 Mwaimbarimbari abali, munothuulela ira natoodhilimbi-edha laba basa mwathindhi na kopolo dhi-u dhothene. Nanoolaba basa nathana nama-iyu ira mutu uliwethene wa nyo a-aniva-e yongo iliyothene vofuna nikami-a, vahora yalaleela i-yo milanyu yapama wa nyo. 10 Nyo vambo-i na Nlungu munoniirela umboni ira, vyali i-yo na nyo ororomela, nali ororomeleya, nanooira vyongo vyolongomana thitho kanana mwasa oninukhedha. 11 Nyo munoidhiwa pama ira mutu uliwethene wa nyo nanom’khumbanyedha, m’limbi-a nom’va-a malangi-o ninga mwemo baba munoirela liye naa-imee. 12 I-yo nanooirana vyevi ira mudhowenave wenda mundhila yofwanelela ninga munofunela Nlungu. Liye ngwauitaneni ira muvolowe mu Umwenee nowachela titimi-o.

13 Mwaimbarimbari ngumwasee i-yo thitho ninosimba Nlungu hora dhothene, namwasa oi vawachenle nyo madhu a Nlungu avwide nyo khumela wa i-yo, kamwaawachenle ninga madhu aatu, mbwenye muli aliwa, ninga madhu a Nlungu. Madhu enala thitho anaalaba basa wa nyo atu ororomela. 14 Namwasa oi nyo abali mwatoosazi-edha mipingo ya Nlungu yovwelana na Kristu Yesu yoi ili wu Yudeya. Ndinoonga e-no namwasa oi mwatooroma oni-iwa nyarwa naatu ailambo ya waninyu, ninga mwemo aliwa thitho munooni-iwela aliwa nyarwa na Ayuda. 15 Aliwa tatoofiya vom’pha Mbwiye Yesu na anamaongela thitho i-yo tatoonioni-a nyarwa. Wenjedhela vevo, aliwa katinosangalali-a Nlungu. Mbwenye anoirana vyongo vyoi kavinooda ganyali-a atu othene. 16 Aliwa tanoirana vyevi vanodhilimbi-edha aliwa nikondi-a laleela waatu amaziza enango vinaire aliwa ira tadhavulumuwe. Hora dhothene aliwa tanoirana vyevi vowenjedhela vyodawa viwa. Mbwenye va-eeni thakaleliwa wa Nlungu utoafiyela.

17 Mbwenye abali vahora ya-iyana i-yo na nyo, wahora yoyeva (kove na kove a-kala mirimanimwi-u), natoodhilimbi-edha maningi ira nuuoneni kove na kove namwasa oi pyafuna i-yo maningi. 18 Ee-no nanoofuna udha wa nyo thitho miyo Paulo ndatoodhilimbi-edha ira ndidhe, a-kala fendo imbo-i baa-i mbwenye fendo mbili, mbwenye Satana atoofunga ndhili-u. 19 N’nga idedi-edhwi-u venango imwerumwerwi-u ndi n’ni? N’nga yotuva inofuna i-yo dhagayela vamethoni va Mbwiye Yesu, vahora yokalavowee ndi n’ni? N’nga kai nyoo-i? 20 Mwaimbarimbari nyo muli titimi-o li-u no sangalalawi-u.

3 Ee-no vahora yaoni i-yo ira kaninoodave vilela, natoona ira ndipama ira nidhowenave kala wu Atena. 2 Moi e-no natoom’ruma bali-u Timoteo oi ndi rumiwi wa Nlungu* unolaleela milanyu yapama yoonga vya Kristu. Natoom’ruma ira adhaulimbi-eni noudidili-ani mirima naifunelo yoi iroromelwinyu ikale yolimba. 3 Natooirana vyevi ira va-akale mutu uliwethene ufookile* mwairoromelo na nyarwa dhedhi. Namwasa oi nyo mwethene mutoidhiwa ira kaninooda rambela nyarwa dhedhi.* 4 Namwasa oi vyali i-yo vambo-i na nyo, natoovaelatu uwandelani ira ninodha gumanana nyarwa thitho ninga munoidhiwela nyo, vyongo vyauwandenleni i-yovyo piyevyodi viireile. 5 Ngumwasee vaoni miyo ira kandinoodave vilela, ndatoom’ruma Timoteo wa nyo ira ndiidhiwe vyairoromelwinyu. Ndanookhumbanya ira venango Namawesedhuo utouwesedhani noiri-a ira basa lalabile i-yo mwathindhi lidhowe vapezi.

6 Mbwenye Timoteo ufiile chineneeva uno khumela weo thitho utoniwandela mwasa wapama okhuza roromeleya winyu na udhivelinyu. Utoniwandela ira munodhowanave nithuulela nonidhiveliwana thitho ira munofunechecha niona ninga mwemo thitho munofunechecha i-yo uonani. 7 Ngumwasiwa abali, muvyorambulela vi-u vyothene na nyarwa dhi-u dhothene, nitodidili-iwa mirima namwasa wa nyo thitho namwasa ororomeleya unothonyi-edha nyo. 8 Namwasa oi i-yo ninokaana kopolo* nyo mwakala olimba mwa Mbwiye. 9 N’nga ninam’simbe a-vi Nlungu namwasa wa imwerumweru ilukhulu ina i-yo vamethoni va Nlungwi-u namwasa wa nyo? 10 Nama-iyu nathana ninolobela mosembezela khumela vathi varima ira nidhauoneni khove na khove nouva-ani vyofuneya ira iroromelwinyu ikale yolimba.

11 Va-eeni Nlungu oi thitho ndi Babi-u na Mbwii-u Yesu, anikami-e ira niode udha wanyo. 12 Thitho, Mbwiye aukami-eni ira mudhivelengana maningi thitho ira mudhiveliwengana atu enango ninga mwemo munoudhiveliwanani i-yo. 13 Muirena vyevi ira liye alimbi-e miriminyu naifunelo yoi mwa-akaena yodawa na ochena vamethoni va Nlungu oi ngu Babi-u, vahora yokalavo wa Mbwii-u Yesu vambo-i naatwee othene ochena.

4 Vogomi-edha abali, natouva-ani malangi-o a mwemo munofwanela nyo wendela ira mum’sangalali-enga Nlungu thitho munoiranadi vyevyo. Moi e-no ninouvephani mousembezelani mudhina la Mbwiye Yesu ira mudhowenave irana vyevi kwaranya munoirela nyo. 2 Namwasa oi munoidhiwa malangi-o* othene auva-idheni i-yo dhela mudhina la Mbwiye Yesu.

3 Nlungu unofuna ira mukale ochena thitho ira murambelenga unyambi.* 4 Mutu uliwethene wa nyo aidhiwenga tonga manungwee ira akale ochena na olemezeya vamethoni va Nlungu. 5 Kamukale ninga atu amaziza enango o-om’mwidhiwa Nlungu thitho okaana naluveluve o-otongeya ogonana na o-okwakwani-iwa. 6 Kavakale mutu uliwethene olupa madile amakalelo apama nom’mwirela balee vyongo vyothakala vamwasa wen’na, namwasa oi Yohova* unodha langa mutu uliwethene unoirana vyevi, ninga mwemo mwauwandenleni i-yo wale nouwenjeli-ani mwakopolo. 7 Namwasa oi Nlungu kaniitan’ne ira nikaena makalelo othakali-a, mbwenye ira nikale ochena. 8 Ee-no mutu unopwaza wenjeli-iwa weo kanopwaza mutu, mbwenye unopwaza Nlungu unouva-ani zimwee ochena.

9 Mbwenye vyokhuza dhiveliwana abali, kaninofwanela ira ulembelani namwasa oi Nlungu unoufunji-ani ira mudhivelengana. 10 Nyo munaaviirana vyevi waabali othene awu Masedoniya. Mbwenye ninoulimbi-ani abali ira mudhowenave irana vyevi kwaranya mwemo munoirela nyo. 11 Mudhilimbi-edhenga kala mwarendele, kamuvolowelenga myasa dhaatu enango thitho mulabenga basa na mandhinyu movwelana na malangi-o auva-idheni i-yo. 12 Muirengana vyevi ira mukaena makalelo enao anairi-e ira atu aundhe taulemezengani thitho ira mukale o-orambulela yongo.

13 Mbwenye abali, kaninofuna ira mukale o-oidhiwa vyokhuza atu akwide,* ira mwa-akale osukwala maningi mofwanafwana naatu oi katina idedi-edho. 14 Namwasa oi akala ndinororomela ira Yesu atookwa novenyathi-iwa, kuongela ira Nlungu unodha venyathi-a atu akwide dhela mwa Yesu, ira tadhakale vambo-i na liye.* 15 Vyongo vinouwandelani i-yo movwelana na madhu a Yohova* pyoi, i-yo oi ninodhowanave kaana ingumi fiyedha kalavo wa Mbwiye, kaninodha kala vasogolo vaatu akwide. 16 Namwasa oi Mbwiye unodha thitha khumela dhulu nokhuwa mwakopolo. Madhwao anodha vweya ira mba ndimuwa wa angelo.* thitho unodha tukula lipenga la Nlungu mandhanimwee. Ee-no atu akwide mwa Kristu anodha kala oroma venyathi-iwa. 17 Vasogolovee i-yo oi ninodha kala ningana ingumi, ninodha tukuliwa vambo-i naaliwa dhowa miramboni magumana na Mbwiye dhulu, thitho ninodha kala na Mbwiye hora dhothene. 18 Ee-no mudhowenave limbi-ana na madhu enala.

5 Mbwenye va-eeni abali, kaninofwanela ulembelani yongo iliyothene yokhuza hora yakaathi-iwile. 2 Namwasa oi nyo munoidhiwa pama ira dambo la Yohova* linodha fiya mofwanafwana ninga munoirela mbavwa nama-iyu. 3 Tadhaonga ira, “Rendele no bareleya!” hora yeniyene anodha nongiwa. Soka leli linodha afiyedha morurumucha ninga upha unovwa i-yana wa wise oi u-adhi vang’ono ira abale thitho katinodha vulumuwa. 4 Mbwenye nyo abali kamuli isini ira dambolo lidhaururumucheni ninga munorurumuwela mambavwa undhe waachelanga. 5 Namwasa oi mwethene muli a-ima a njeza na a-ima anathana. I-yo kanili a nama-iyu venango a isini.

6 Ee-no kaninofwanela dhowanave gona ninga munoirela atu enango othene, mbwenye nikaleve methove thitho nikaleve othuulela pama. 7 Namwasa oi atu anogona, anogona nama-iyu thitho anolezela, anolezela nama-iyu. 8 Mbwenye i-yo oi nili anathana, nikaleve othuulela pama thitho niware yodhibarelana yavamirimani yairoromelo na udhivela. Niware thitho idedi-edho ya ivulumucho ninga ichapowa, 9 namwasa oi Nlungu kanisakunle ira adhanilange, mbwenye anisakunle ira nidhavulumuwe namwasa wa viirile Mbwii-u Yesu Kristu. 10 Liye atoonikwela, mo-obala ira nikale methove venango nigone,* nikaena ingumi vambo-i na liye. 11 Ee-no mudhowenave didili-ana rima nolimbi-ana ninga munoirela nyo.

12 Va-eni ninouvephani abali, ira mulemezenga atu anolaba basa mwathindhi varivinyu, oi thitho mbanousogolelani mwa Mbwiye nouva-ani malangi-o. 13 Mwaathonyi-edhenga udhivela na lemezo nlukhulu namwasa wa basa liwa. Mukalenga mwarendele varivinyu. 14 Thitho ndinoulimbi-ani abali, ira muwenjeli-enga* atu oira vyo-olongosowa, muongenga molimbi-a waatu asukwanle,* mukami-enga atu ofooka, mukalenga oleva rima waatu othene. 15 Muing’anecheche ira kavafwanyeye mutu oweli-edha yothakala va yothakala wa mutu uliwethene, mbwenye hora dhothene mudhilimbi-edhenga irana vyapama wa ororomela afwinyu na waatu enango othene.

16 Mukalenga osangalala hora dhothene. 17 Mulobelenga hora dhothene. 18 Musimbenga va yongo iliyothene. Nlungu unofuna ira muirengana vyevi namwasa oi muli anama-arela a Kristu Yesu. 19 Kamutimi-e mulo wa zimu ochena. 20 Kamupwazenga madhu a ulosi. 21 Musakenga vyongo vyothene nosikimizela ira pyapama thitho mu-indedhenga mwakopolo vyapamavyo. 22 Murambelenga tundu uliwethene wa vyongo vyothakala.

23 Nlungu wa rendele aucheni-eni mokwakwanela ira muire urumiwee. Thitho vikhundu vyothene abali, zimwinyu, ingumiinyu na manungwinyu, vikale vyo-okaana damba venango yodawa iliyothene, vahora yokalavo wa Mbwii-u Yesu Kristu. 24 Unouitananio ngororomeleya thitho unodha irana vyevi.

25 Abali, mudhowenave nilobelela.

26 Mumwenyulane abali mwethene thitho mubejarina na rima ochena.

27 Ndinovepha mwa Mbwiye ira kartali lileriwe wa abali othene.

28 Riya rima ulukhulu wa Mbwiye Yesu Kristu ukale na nyo.