KARTA LODHOWA WA AKOLOSE

1 Miyo Paulo, rumiwi wa Kristu Yesu mofuna wa Nlungu, ndili vambo-i na bali-u Timoteo. 2 Ndinolembela ochena naabali ororomeleya oi ali ovwelana na Kristu wu Kolose ira:

Nlungu Babi-u auva-eni riya rima ulukhulu na rendele.

3 Hora dhothene naulobelelangani, ninosimba Nlungu, Baba wa Mbwii-u Yesu Kristu. 4 Ninoirana vyevi namwasa oi natoovwa vyairoromelwinyu mwa Kristu Yesu na udhivela unothonyi-edha nyo atu othene ochena, 5 namwasa wa idedi-edho yodhawachela vyongo viulokotedheni liye dhulu. Mwatoovwa vya idedi-edho yen’na ndulimu vevo vavwide nyo milanyu yaimbarimbari, yoi ndi milanyu yapama 6 ifiile wa nyo. Milanyu yapama inaava-a vyova-a thitho inaamwadheya vailambo yothene. Vyevi piyevyo vikanle viireyanga wa nyo romela vadambo lavwide nyo noidhiwa molinyali vyoriya rima ulukhulu wa Nlungu oi kwaimbarimbari. 7 Vyevi ndi vyevyo vyafunjedhile nyo wa Epafora, dhaari fwi-u odhiveliwiwa, oi ndi rumiwi ororomeleya wa Kristu malo mwa i-yo. 8 Liye ngwaniidhiwi-idhe thitho vya udhivelinyu wathonyi-edhe nyo mokami-iwa na zimu wa Nlungu.

9 Ngumwasee i-yo thitho, romela vadambo lavwide i-yo vyevyo, kana-iidhe ulobelelani. Nikanle nivephanga ira muidhiwe molinyali ifunelo ya Nlungu noira mukale azelu thitho muvwechechenga vyongo vyauzimu. 10 Nditoirana vyevi naifunelo yoi mukaena kalelo lovwelana na linofuna Yohova,* ira mum’sangalali-enga va iliyothene, vanodhowanave nyo va-a vyova-a va basa nlilothene lapama nowenjedhela m’mwidhiwa Nlungu molinyali. 11 Ndinovepha thitho ira mulimbi-iwe na kopolodhee dhilukhulu movwelana na kopolodhee dhodabwi-a, naifunelo yoi muode vilela vyongo vyothene moleva rima na mosangalala, 12 thitho musimbenga Baba, oi ngwairi-idhe ira nanyeene thitho mukale ofwanelela wachela yotuva yaatu ochena oi ali munjeza.

13 Liye atoonivulumucha uutongi wa isi, nonithami-edha mu Umwene wa Mwanee odhiveliwiwa. 14 Dhela mwa Mwaneuo, natoothathuliwa na khuto* thitho vyodawa vi-u vinoleveleliwa. 15 Liye ndi ifwanafwani-o ya Nlungu o-ooneyuo, oroma baliwa wa vyopanduchiwa vyothene. 16 Dhela mwa liye, Nlungu atoopanducha vyongo vinango vyothene dhulu na vailambo yavathi. Atoopanducha vyongo vyooneya na vyo-ooneya, mipando ya umwene, ambwiye, maguverno na anamatonga. Atoopanducha vyongo vyothene dhela mwa liye thitho namwasa wa liye. 17 Liye atookalavo wale vyongo vinango vyothene vya-nakaleo thitho vyongo vinango vyothene vyatookalavo dhela mwa liye. 18 Liye ndi muru wa manungo, oi ndi pingo. Liye ndimaromelo, oroma baliwa khumela mwaalimbo wukwa, ira adhakale oroma muvyongo vyothene. 19 Vili e-no namwasa oi Nlungu vyatoom’sangalali-a ira makalelwee othene akale mwa Kristu. 20 Thitho ira dhela mwa Mwaneuo avwelani-e okoka vyongo vinango vyothene na liye, vyongo vya vailambo yavathi venango vya dhulu. Atooirana vyevi dhela mwa sangiri yachuchi-idhe Kristu vaimurini yoonelavo nyarwa.*

21 Mwaimbarimbari, nyo oi walelene mwali olapelana na Nlungu na amwidanee namwasa oi mathuulelwinyu ali vamabasa othakala, 22 va-eeni utovwelana okoka na nyo dhela muukwa wa Mwanee oi atoovelela manungwee aututu naifunelo yoi auleveleleni vamethoni va Nlunguo, mungali opambuleya na o-okaana damba thitho o-okaana mwasa ounukhedhelani. 23 Mbwenye munofwanela dhowanave kala movwelana nairoromelwinyu, mungali okaatheya va sapato, mungali olimba thitho o-otekenyeya vaidedi-edho ya milanyu yapama yavwide nyo, yoi thitho yatoolaleiwa vailambo yothene. Miyo Paulo ndali rumiwi wa milanyu yapama yen’na.

24 Va-eeni ndinaasangalala na nyarwa dhinogumanana miyo namwasa wa nyo. Thitho ndinoona ira kandinagumanenave nyarwa mokwakwanela ninga yano ya Kristu, oi ndi pingo. 25 Ndali rumiwi wa pingo wen’na movwelana na izo yandiva-idhe Nlungu yoi ndilaleele madhu a Nlungu mokwakwanela, naifunelo yoi nyo muganyali. 26 Madhwao anothangani-avo segeredo yopambuleya yoi ilambo kayaidhi thitho yali yolokoteya waatu a hora yawale. Mbwenye va-eeni atwee ochena atowandeliwa segeredo yeniyo. 27 Nlungu vyatoom’sangalali-a wandela atwee ochena vari vaatu amaziza enango segeredo yopambuleila, yoi itokaana titimi-o loinjiva nafuma yauzimu. Segeredo yen’na ndi Kristu oi ndi ovwelana na nyo, vyevi vinothapulela ira mutokaana idedi-edho yodhawachela titimi-o vambo-i na Kristuo. 28 Na zelu dhothene, ninolaleela, wenjeli-a nofunji-a mutu uliwethene vya liye, ira nivelele mutu uliwethene wa Nlungu angali olimba mwauzimu movwelana na Kristu. 29 Ira ndiode irana vyevi, ndinolaba basa mwathindhi thitho ndinodhilimbi-edha maningi vonyindela kopolodhee dhinolaba basa mwa miyo.

2 Ndinofuna ira muidhiwe vya nyarwa dhinogumanana miyo namwasa wa nyo vambo-i naatu awu Laudikeya thitho namwasa waatu othene oi katinandionevo kove na kove. 2 Ndinoirana vyevi ira mirimiwa ilimbi-iwe thitho ira atu othene takale ovwelana mu udhivela thitho ira tawachele fuma yothene inodha namwasa ovwechecha pama vyongo, vo-okala kaikela yongo iliyothene, naifunelo yoi taidhiwe molinyali segeredo yopambuleya ya Nlungu, yoi ndi Kristu. 3 Fuma yothene yokhuzana na zelu vambo-i noidhiwa vyongo yatoolokotiwa mwapama wa liye. 4 Ndinoonga vyevi ira mutu uliwethene a-aunami-eni na makhundo okopa. 5 Angalive ira kandili weo, ndinothuulelave vya nyo. Nditosangalala uvwa ira munaairana vyongo mundhila yapama thitho ira mutokaana iroromelo yolimba mwa Kristu.

6 Voi va-eeni munororomela Kristu Yesu Mbwii-u, mudhowenave wenda movwelana na liye. 7 Movwelana na vyafunjedhile nyo, iroromelwinyu mwa Kristu ikaena michichi yolimba, idhowenave ulukhula nokala yolimba thitho hora dhothene musimbenga Nlungu.

8 Muire polepole ira mutu uliwethene a-auchinjeni kala adhaari,* vo-indi-edha basa zelu dhaatu na inyengo yo-okaana basa, movwelana na sanganiko dhaatu thitho makhundo anowendela atu ailamboi, a-kala movwelana na Kristu, 9 namwasa oi liye utokaana makalelo othene a Nlungu. 10 Kamunorambulela yongo iliyothene namwasa wa liye, oi ndi muru wa guverno nlilothene na utongi uliwethene. 11 Voi muli vauxamwali na liye mwatooineliwa thitho ineliwawee kai oiriwa na mandha aatu mbwenye waireile vaungunle nyo manungo a vyodawa, namwasa oi ineliwa waarumiwi a Kristu unokalecha e-no. 12 Vili e-no namwasa oi mwatoo-eliwa masiyeni vambo-i na liye vobadiziwa ubadizo ofwanafwana na wee. Voi muli vauxamwali vambo-i na liye thitho munororomela vyongo vyakopolo vyairile Nlungu am’venyathi-idhe muukwaa, mwatoovenyathi-iwa vambo-i na liye.

13 Wenjedhela vevo, angalive ira mwatookwa namwasa wa vyodawa vinyu thitho namwasa oi mwali o-oineliwa, Nlungu atouva-ani ingumi ira mukale ovwelana na Kristu. Moriya rima atoonilevelela vyodawa vi-u vyothene 14 thitho atoofudha ilamulo yeyo yana malamulo manjinji enao taniruni-a. Liye atoikhumi-a voithomeya vaimurini yoonelavo nyarwa.* 15 Vo-indi-edha basa imuri yoonelavo nyarwayo, liye atoungula maguverno na anamatonga noa-iya mandhave thitho atoawoneeli-edha vakwecha ira atu othene taone ira utoagonji-a noawendana ninga anyaperezo.

16 Ee-no kamurumele ira mutu uliwethene autongeni namwasa wa yodya na yomwa venango pwando n’nango venango thitho lokota dambo lioneele mwedi upya venango lokota sabudu. 17 Vyongo vyevi ndi izindiyelo* ya vyongo vyafuna udha, mbwenye vyaimbarimbari vyee vyatookwakwaneli-edhiwa na Kristu. 18 Kamurumele ira mutu uliwethene unosangalala nodhiyevi-a mwainyengo thitho unolambela angelo* auimwanani-eni dhawachela yotuva. “Mutu wenuo unokamelela” vyongo vioni liye thitho mathuulelwee odawa anom’mwiri-a ira adhiulukhuli-enga vo-okala mwasa ovweya. 19 Liye kano-arela mutu wenuo oi ndi muru, oi dhela mwa liye, manungo othene anofwanya vinofuneela thitho vyanovyee pyogumana pama na makhundo thitho michira moi anodhowanave ulukhula mokami-iwa na Nlungu.

20 Akala mwatookwa vambo-i na Kristu thitho kamuno-arelave makhundo anowendela atu amuilamboi, n’nga mwasiwa ngwan’ni munodhowanave kala ninga muli atu ali uikhundu ya ilamboi, vogonjela thitho malamulo oi: 21 “Kutukule ji, venango kuwese ji, venango kusakwinye ji?” 22 Malamulo enala anoonga va vyongo vyoi vinomala mutu avi-indi-edha basa thitho ndi malamulo na vyongo vinofunji-a atu. 23 Angalive ira vyongo vyevyo vinooneya ninga vyazelu, atu anoviiranao anosakula okhene ndhila yolambelela. Aliwa anooni-a nyarwa manungwiwa ira atu taaonenga ninga mbodhiyevi-a. Mbwenye vyevyo pyo-okami-a wa mutu unolimbana na vyongo vinolavela manungo.

3 Mbwenye, akala mwatoovenyathi-iwa vambo-i na Kristu, mudhowenave sakasaka vyongo vyadhulu weo ukaathidhe Kristu wu dhandha lodyana la Nlungu. 2 Mudhowenave thuulela vyongo vyadhulu. A-kala vyavailambo yavathi. 3 Namwasa oi mutokwa thitho mutolokotiwa vambo-i na Kristu oi ngovwelana na Nlungu. 4 Kristu oi ndi ingumi yi-u, adhaoni-a kopolodhee, nyo thitho munodha oni-a vambo-i na liye kopolo dhinyu mutitimi-o.

5 Ee-no muiri-e vyano vya manungwinyu vailambo yavathi kala vyokwa wu vyongo ninga unyambi,* vyongo vyothakala, naluveluve o-otongeya ogonana, lavela vyongo vyothakala na idyani yoi khulambela mafwano. 6 Nlungu unodha oni-a thakaleliwawee waatu anoirana vyevi. 7 Nyo thitho mwanooira vyevyo, vahora yananyo ingumi yofwanafwana naatu enao. 8 Mbwenye va-eni munofwanela i-ya vyongo vyothene undendai nanyo. Mu-iye raivwa, thakaleliwa rimani, thakala na madhu aiburutu thitho valomoni vinyu kavakhume madhu oruwana. 9 Kamunami-engana. Muungule umutu wawale vambo-i na mabasee, 10 thitho muware umutu upya unovelela Nlungu. Umutu upya wen’na ngosaka-edhiwa movwelana na ifwanafwani-o ya Nlungu. Ee-no vanom’mwidhiwa nyo Nlungu molinyali, mudhowenave iri-a umuthwinyu kala upya. 11 Mwaira e-no, kavanodha kala Giriki venango Muyuda, ineliwa venango a-ineliwa, lendo, Sita,* dhaari venango mutu wa ufulu, namwasa oi Kristu unoira vyongo vyothene thitho i-yo nili ovwelana na liye.

12 Ee-no ninga atu osakuliwa na Nlungu, ochena na odhiveliwiwa, muware tangaranga ilukhulu, riya rima, dhiyevi-a, pwaseya thitho leva rima. 13 Mudhowenave lolelana nolevelelana narima wethene, masiki mutu mwinango akaena mwasa osukwala na vim’mwirele fwee. Mofwanafwana na Yohova* auleveleleni narima wethene, nyo thitho muirengana vimbo-ive. 14 Mbwenye wenjedhela vavyothene vyevi, muware udhivela, namwasa oi unovwelani-a atu mwakopolo maningi kwaranya yongo inango iliyothene.

15 Thitho murumeli-e ira rendele wa Kristu utonge mirimani mwinyu, voi mwaitaniwile namwasa wa rendele wen’na ninga vyano vyamanungo mambo-i. Thitho muthonyi-edhe ira muli osimba. 16 Madhu a Kristu akaatheye mwanyo nouva-ani zelu dhothene. Mudhowenave funji-ana nolimbi-ana na masalimo, nyumbo dhotitimi-a Nlungu na nyumbo dhauzimu dhosimba. Mudhowenave m’mombela Yohova mirimani mwinyu. 17 Yongo iliyothene inoiranyo mumadhu venango mubasa, muirenga vyothene mudhina la Mbwiye Yesu, thitho musimbenga Nlungu Baba dhela mwa liye.

18 Nyo a-iyana, mugonjelenga amaninyu, namwasa oi vyevi pyofwanelela waatu ano-arela Mbwiye. 19 Nyo alombwana, mudhowenave adhiveliwana a-iyaninyu, thitho kamuathakaleliwena maningi.* 20 Nyo a-ima, muvwelenga anamabalinyu va vyongo vyothene namwasa oi vyevi vinosangalali-a Mbwiye. 21 Nyo ababa, kamusukwali-e a-iminyu, ira ta-afooke. 22 Nyo adhaari muvwelenga atu oi ndi mapatarawinyu va vyongo vyothene, a-kala vanooniwa nyo baa-i vofuna sangalali-a atu, mbwenye moona rima na moova Yohova.* 23 Yongo iliyothene inolabanyo muilabenga na ingumiinyu yothene ninga munolabela Yohova* a-kala atu, 24 namwasa oi munoidhiwa ira maraeli-o anofuna i-yo dhawachela ndi yotuva yokhumela wa Yohova.* Mum’labele Mbwiinyu Kristu ninga adhaari. 25 Mwaimbarimbari, atu anoirana vyodawa anodha langiwa namwasa wa vyodawa viwavyo, namwasa oi Nlungu kana sakulo.

4 Nyo atu oi muli mapatarau, muirelenga adhaarinyu vyongo vyolongomana na vyofwanelela, namwasa oi mutoidhiwa ira nyo thitho Mbwiinyu uli dhulu.

2 Mulimbi-edhenga lobela. Mukale methove vamwasa olobela thitho musimbenga. 3 Thitho munilobelelenga wa Nlungu ira anidhulele lango ira niode laleela madhu noonga vyasegeredo yopambuleya yokhuza Kristu, yeniyo yairi-idhe ira ndimangiwe nokala perezoni muno, 4 ira ndidhalaleele vyasegeredwiyo movweya pama ninga munofwanela miyo irana.

5 Mudhowenave irana vyongo mwazelu vanokalanyo naatu aundhe, thitho mu-indi-edhenga basa pama horinyu.* 6 Hora dhothene madhwinyu tathonyi-edhenga ira muli mutu oriya rima thitho takalenga oriya ninga mwaa-edhi mwinyu, ira muidhiwe moda munawakhulele nyo mutu uliwethene.

7 Tikiko oi ndi balanga odhiveliwiwa, rumiwi ororomeleya na dhaari fwanga mwa Mbwiye, unodha uwandelani vyongo vyothene vyokhuza miyo. 8 Ndinaam’ruma wa nyo ira muidhiwe moda uli i-yo thitho ira alimbi-e miriminyu. 9 Unodha vambo-i na Onesimu balanga ororomeleya na odhiveliwiwa, oi akhumenle vari vinyu. Aliwa anodha uwandelani vyongo vyothene vinoireya uno.

10 Aristarku nyaperezo fwanga unaaumwenyulani. Thitho Marku balee* Barnaba, (wenuo auwandenleni miyo ira mum’mwachele hora iliyothene adhafiya weo), 11 na Yesu, oi unoidhiweya thitho ira Justo, unaaumwenyulani. Aliwa tali mu gulu laatu oineliwa. Mbaaliwa baa-i ali anamalaba afwanga va vyongo vyokhuza Umwene wa Nlungu thitho anondilimbi-a maningi. 12 Epafora oi akhumele vari vinyu, dhaari wa Kristu Yesu, unaaumwenyulani. Hora dhothene liye unoulobelelani mwathindhi ira mudhowenave kala olimba mwauzimu thitho ira mwa-akaikelenga navang’onovene vyongo vyothene vinofuna dhaira Nlungu. 13 Ndinom’mwirela umboni ira unolaba maningi namwasa wa nyo thitho namwasa waabali a Laudikeya na awu Herapoli.

14 Luka dotore odhiveliwiwa, unaaumwenyulani nyo mwethene. Dema naliyene thitho unaaumwenyulani. 15 Muvelele mwenyula wanga wa abali awu Laudikeya thitho wa Nifa na pingo wethene unogumanyeya vanyumbanivee. 16 Kartali mwamala lileri weo, mulitumize ira limaleriwe thitho wu pingo wau Alaudikeya, amala nyo thitho muleri lokhumela wu Laudikeya. 17 Thitho mum’mwandele Arkipo ira: “Uonecheche ira urumiwi wawachenle we khumela wa Mbwiye unaaukwakwaneli-edha.”

18 Va-eeni muwachele mwenyula wanga miyo Paulo, ulembile miyo ndekhene na dhandha langa. Mudhowenave thuulela makureti amangiwilena miyo perezoni muno. Riya rima ulukhulu ukale nanyo.