KARTA LODHOWA WA AEFESO

1 Miyo Paulo, movwelana naifunelo ya Nlungu ndili rumiwi wa Kristu Yesu thitho ndinolembela atu ochena ali wu Efeso oi mba anamafunjedha ororomeleya a Kristu Yesu ira:

2 Nlungu Babi-u na Mbwiye Yesu Kristu, auva-eni riya rima ulukhulu na rendele.

3 Atitimi-eye Nlungu oi ndi Baba wa Mbwii-u Yesu Kristu, namwasa oniraeli-a na maraeli-o othene auzimu mamburo adhulu movwelana na Kristu. 4 Liye atoonisakula ira nikale ovwelana na Kristu ilambo ya-anaphanduchiwe naifunelo yoi nithonyi-edhenga udhivela thitho ira nikale ochena na o-okaana damba vamethoni va Nlungu. 5 Namwasa oi atoovaelatu nisakula ira nikale a-imee dhela mwa Yesu Kristu, movwelana na vyam’sangalali-idhe na vyafuna liye. 6 Atooirana vyevi ira liye atitimi-eye namwasa oriya rima ulukhulu wa titimi-o wanithonyi-edhe liye dhela mwa Mwanee odhiveliwiwa. 7 Dhela mwa Mwaneula, natoothathuliwa na khuto* wa sangiree, ee natooleveleliwa vyodawa vi-u movwelana noriya rimawee ulukhulu.

8 Liye atooiri-a ira riya rima weu ukale oinjiva wa i-yo vonikami-a ira nikale azelu thitho ovwechecha vyongo,* 9 voniwandela segeredwee yopambuleya yokhuza ifuneloyee. Segeredo yen’na njovwelana na vinom’sangalali-a na vinofuna liye, 10 vyoi akaathi-e masaka-edhwee vahora yakaathi-idhe liye. Masaka-edho enala ndi gumani-a vyongo vyothene vambo-i ira vikale vyovwelana na Kristu, vyongo vyadhulu na vyavailambo yavathi. Ee, vyongo vyothene vinodha gumani-iwa wa Kristu, 11 oi namwasa ovwelana na liye, natoosakuliwa ira nidhawachele yotuva. Liye oi unoira vyongo vyothene movwelana naifunelwee, atoonisakula wale mofunawee. 12 Atooirana vyevyo ira i-yo oi nili oroma kaana idedi-edho mwa Kristu nititimi-e Nlungu namwasa oi liye ndi ndimuwa. 13 Mbwenye nyo thitho mwatookaana idedi-edho mwa liye mungavwide imbarimbari, yoi ndi milanyu yapama yoonga vya ivulumucho inyu. Mungaroromenle, Nlungu atoo-indi-edha basa zimu ochena walanyedhile liye ira au-eleni izindiyelo* thitho atoo-indi-edha basa Kristu ira airena vyevi. 14 Zimu ochenuo uli ninga izindiyelo yosikimizela ira ninodha wachela vyanilanyedhile Nlungu. Nlungu unodha irana vyevi naifunelo yoi avelele khuto ira atwee tathathuliwe. Vyevi vinodha iri-a ira atitimi-iwe nolemeziwa.

15 Ngumwasiwa namiyene thitho, romela vavwide miyo vyairoromelwinyu mwa Mbwiye Yesu thitho udhivela wathonyi-edhe nyo waatu othene ochena, 16 kanda-iidhe m’simba Nlungu namwasa wa nyo. Ndinodhowanave ulobelelani, 17 ira Nlungu wa Mbwii-u Yesu Kristu, Baba watitimi-o auva-eni zimu ira mukaena zelu dhovwechecha vyauwandenleni liye vanofunjedha nyo ira mum’mwidhiwe molinyali. 18 Nlungu utodhula miriminyu naifunelo yoi muone thitho muidhiwe vya idedi-edho yauva-idhe liye na vyongo vyapama maningi vilanyedhile liye waatu ochena, 19 ira thitho muidhiwe ulukhula wa kopolodhee dhokwaranya dhithonyi-edhe liye wa i-yo ororomela. Kopolodhee dhilukhuludho dhinooneela dhela mumabasee, 20 vadhi-indi-edhe liye basa vovenyathi-a Kristu muukwa nom’kaathi-a wu dhandhalee lodyana mamburo adhulu. 21 Atoom’ela vadhulu kwaranya guverno uliwethene, utongi uliwethene, atu othene akopolo, ambwiye othene na mutu uliwethene una dhina lalemezo, a-kala muhora* ino baa-i, mbwenye thitho muhora inodhiyo. 22 Nlungu atoo-ela thitho vyongo vyothene vathi vamanyalwee nom’ela ira akale muru* wa vyongo vyothene vyoi pyokhuzana na pingo 23 oi ndi tutulee thitho ngodhaliwa na vyongo vya Kristu, oi ngunokwakwaneli-edha vyongo vyothene.

2 Wenjedhela vevo, Nlungu atouva-ani ingumi angalive ira mwatookwa namwasa wa vyododoma vinyu na vyodawa vinyu. 2 Vahora inango mwanooirana vyevi movwelana na vyoireya vya hora* ino, vovwela namatonga wa mwela oi unotonga vyoira vyaatu. Mwela wen’na, venango ira mathuulelo enala, anaalaba basa mwa a-ima o-ovwela. 3 Ee, vahora inango yali i-yo vari viwa, nanooira vyongo mo-arela naluveluve wa manungwi-u. Nanooira vyofuna vya manungwi-u na mathuulelwi-u, thitho mwaibaliwelo nali a-ima ofwanela langiwa na Nlungu mofwanafwana naatu othene. 4 Mbwenye voi Nlungu ngwatangaranga dhilukhulu, thitho namwasa waudhivelee ulukhulu wanithonyi-edhe liye, 5 atooiri-a ira nikaena ingumi vambo-i na Kristu, angalive ira natookwa namwasa wa vyodawa vi-u, thitho mutovulumuchiwa namwasa oriya rima ulukhulu. 6 Wenjedhela vevo, Nlungu atooiri-a ira nikaena ingumi thitho atooniva-a limburo loi nimakhale dhulu namwasa oi atoonivwelani-a na Kristu Yesu. 7 Liye atooirana vyevi ira muhora* inodhiyo, adhanioni-e fuma yokwaranya yoriya rimawee ulukhulu. Nlungu unodha irana vyevi vonithonyi-edha tangaranga namwasa oi nili anamafunjedha a Kristu Yesu.

8 Nyo oi mutokaana iroromelo, mutovulumuchiwa namwasa wa riya rimawee ulukhulu, a-kala namwasa wa thindhi linyu, mbwenye namwasa wa yotuva ya Nlungu. 9 Khabe, kaiira mwavulumuchiwile namwasa wa mabasinyu, ira mutu a-akaena mwasa odhiulukhuli-a. 10 Nili basa la mandha a Nlungu. Liye ngwanipanduchile thitho i-yo nili ovwelana na Kristu Yesu ira nilabe mabasa apama, avaeletu Nlungu akozeela ira i-yo nialabe.

11 Ee-no nyo oi mwali atu amaziza enango, muthuulele ira vahora inango atu oineliwa na mandha aatu, tanouromolani ira muli o-oineliwa. 12 Vahora yen’ne, Kristu kamwam’mwidhiwa, mwali olapelana na ziza la Israeli thitho kamwaira ikhundu ya vwelano ya yolanyedha. Kamwana idedi-edho thitho kamwam’mwidhiwa Nlungu vailamboi. 13 Mbwenye va-eni mutovwelana na Kristu Yesu, nyo oi vahora inango mwali undendai, mutodha vaduzi namwasa wa sangiri ya Kristu. 14 Namwasa oi liye oi atoothangani-a magulu menlale nokala gulu limbo-i nogwi-a chi-i laa-iyani-a, utonidhi-edha rendele. 15 Na manungwee, atoomali-a yongo yeyo yaaidani-a yoi ndi Ilamulo yeyo inokaana malamulo na malangi-o. Atoimali-a ira magulu menli oi mbovwelana wa liye, akale mutu m’mbo-i m’pya nokaathi-a rendele. 16 Thitho ira dhela mwa imuri yoonelavo nyarwa,* avwelani-e magulu menlao wa Nlungu ira atwao takale manungo mambo-i, namwasa oi ali angamali-idhe idanao dhela mu wukwawee. 17 Ee-no, liye atoodha nolaleela milanyu yapama ya rendele wa nyo oi mwali undendai. Atoolaleela thitho vyarendele waatu oi tali vaduzi, 18 namwasa oi dhela mwa liye, magulu melala anooda fiya wa Baba mo-orucha dhela mwa zimu umbo-i.

19 Ee-no, nyo thitho kamuli atu o-oidhiweya venango alendo, mbwenye mofwanafwana naatu ochenao nyo thitho muli anarala na abanja la Nlungu. 20 Nyo muli ninga nyumba imangiwile vadhulu vaarumiwi naanamaongela thitho Kristu Yesu ndi libwe lava khomoni. 21 Movwelana na liye, nyumba yothene voi njo-indana pama, inaaulukhula nokala kachisi ochena wa Yohova.* 22 Movwelana na liye, nyo vambo-i naatu enango munaamangiwa ira mukale nyumba yoi Nlungu akalemo mu zimu.

3 Ee-no miyo Paulo, ndili perezo namwasa okala ikhundu ya Kristu Yesu thitho namwasa oukami-ani nyo atu amaziza enango— 2 mwaimbarimbari, mwatoovwa ira ndatoova-iwa izo youkami-ani ira muganyali noriya rima ulukhulu wa Nlungu, 3 thitho ira ndatoowandeliwa segeredo yopambuleya, movwelana na vyalembile miyo mogwandela ndulimu. 4 Ee-no mwaleri vyevi munooda zindiyela ira segeredo yopambuleya yoonga vya Kristu ndinoivwechecha pama. 5 A-ima aatu ahora yawale, katawandeliwile segeredo yen’na ninga mwemo muwandenle Nlungu va-eeni waarumiwi naanamaro-edhee ochena dhela muzimu. 6 Segeredo yen’na njoi atu amaziza enango oi ndi ovwelana na Kristu Yesu, tadhawachele yotuva inofuna dhawachela Kristu, thitho tadhakale vikhundu vyamanungo mambo-i. Aliwa thitho anodha wachela vyongo vinilanyedhile Nlungu namwasa wa milanyu yapama. 7 Ndatookala rumiwi wa vyongo vyevi, movwelana na yotuva yapezi yoriya rima ulukhulu wa Nlungu, yava-iwile miyo dhela mukopolwee.

8 Miyo mutu wang’ono maningi kwaranya mutu wang’ono vari vaatu ochena othene, ndatoova-iwa riya rima ulukhulu weu ira ndilaleele milanyu yapama waatu amaziza enango yoonga vya fuma yo-okaana magomelo ya Kristu, 9 thitho ira ndikami-e mutu uliwethene ona mwemo segeredo yopambuleyayo munowendi-edhiwela aliwa. Nlungu oi ngupanduchile vyongo vyothene vyevi, ukanle alokotanga segeredo yen’na wa vyawa vinjinji. 10 Vyevi vyatooireya naifunelo yoi dhela mumipingo, maguverno na mautongi oi ali mamburo adhulu taidhiwe vikhundu vyo-iyana-iyana vya zelu dha Nlungu. 11 Vyevi pyovwelana naifunelo yodhowa nodhowa yana liye yokhuza Kristu, oi ndi Yesu Mbwii-u. 12 Dhela mwa liye, nitokaana ufulu oonga thitho ninooda fiya wa Nlungu mo-orucha na mo-okaikela namwasa ororomela Yesu. 13 Ee-no voona nyarwa dhinogumanana i-yo, ndinouvephani ira kamufooke voi nyarwa dhinogumanana i-yodhi dhinoiri-a ira muwachele titimi-o.

14 Vamwasa wen’na ndinaakokora vamethoni va Baba, 15 oi ngunova-a dhina banja nlilothene, dhulu na vailambo yavathi. 16 Ndinovepha ira Nlungu oi ndi watitimi-o nlukhulu, aurumeli-eni ira umutwinyu* wawari ukaena kopolo, vo-indi-edha basa kopolo ya zimu inovelela liye. 17 Ndinovepha thitho ira mwairoromelo inyu mirimani mwinyu mukale Kristu na udhivela. Mukaena michichi thitho mukale okaatheya vasapato, 18 naifunelo yoi nyo vambo-i naatu ochena othene muode vwechecha pama kwiva, lapa, gwela nodi-a wa imbarimbari, 19 thitho ira muidhiwe udhivela wa Kristu oi unokwaranya idhiwa vyongo, ira mudhaleliwe na makalelo othene anovelela Nlungu.

20 Wa liye oi unooda irana vyongo vilukhulu maningi kwaranya vyothene vinovepha i-yo venango thuulela, movwelana na kopolwee inolaba basa mwa i-yo, 21 liye atitimi-iwe dhela mupingo, mwa Yesu Kristu na mbumba dhothene modhowa nodhowa. Ame.

4 Ee-no miyo oi ndili perezo namwasa wa Mbwiye, ndinousembezelani ira muirengana vyongo movwelana na moda uuwitan’neni liye. 2 Hora dhothene muirengana vyongo modhiyevi-a,* mopwaseya, moleva rima thitho mulolelengana namwasa wa udhivela. 3 Mudhilimbi-edhenga narima wethene kala ovwelana mokami-iwa na zimu ochena, vokala mwarendele oi uli ninga yomangelela yonivwelani-a. 4 Vatokala manungo mambo-i na zimu umbo-i, movwelana na idedi-edho imbo-i yaitaniwile nyo. 5 Vatokala thitho Mbwiye m’mbo-i, iroromelo imbo-i, ubadizo umbo-i, 6 na Nlungu m’mbo-i oi thitho ndi Baba waatu othene. Liye ndi ndimuwa kwaranya mutu uliwethene, unoira vyongo dhela mwa i-yo othene thitho kopolo inolaba basa mwaatu othene.

7 Ee-no mutu uliwethene wa i-yo atoova-iwa riya rima ulukhulu movwelana na mwemo Kristu mwapimele liye yotuva yapezila. 8 Namwasa oi malemba anoonga ira: “Angagwenle vadhulu, atootukula adhaari thitho atoovelela alombwana ira takale vyotuva.” 9 N’nga madhu oi “atoogwela” anothapulelan’ni? Anothapulela ira yoroma atoothitha vathi, thapulela vailambo yavathi. 10 Wenuo athithileuo ngwenuo thitho agwenle makala dhulu maningi kwaranya dhulu wethene, ira vyongo vyothene vikwakwaneli-edhiwe.

11 Thitho vyotuva vyavelenle liyevyo, atu enango atoavelela ira takale arumiwi, enango anamaongela, enango anamalaleela* thitho enango anamakumbiza na anamafunji-a, 12 naifunelo yoi akami-e* atu ochena ira tawendenga ndhila yofwanelela, ira talabenga basa lokami-a atu enango thitho ira tavwelani-e pingo oi uli ninga manungo a Kristu, 13 fiyedha i-yo othene nikale ovwelana va vyongo vinororomela i-yo nom’mwidhiwa molinyali Mwana Nlungu. Vyadhaira e-no, ninodhafiya vatunga laundimuwa ninga lana Kristu. 14 Ee-no kanikaleve a-ima. Kanitukuleyenga ninga ninondunyiwa na mabibi thitho kanitukuleye dhowa wu na wu na liphevo nlilothene la vyongo vyainyengo vinofunji-a atu vodapitari vonama mowenjela. 15 Mbwenye niongenga vyaimbarimbari nothonyi-edhana udhivela. Naira e-no ninodha kala andimuwa mu vyongo vyothene thitho ninodha oda ira vyongo movwelana na Kristu, oi ngumuru. 16 Nili ninga manungo, thitho namwasa wa liye, vyano vyothene vyamanungo enala pyo-indana pama thitho vinokami-a manungwao ira talabenga basa pama. Yano iliyothene ya manungwala yalabanga basa pama, manungo anoulukhula pama thitho ninodhowanave dhivelana.

17 Ee-no ndinoonga noirela umboni mwa Mbwiye, ira kamudhowenave wenda ninga munoirela atu amaziza enango, vo-arela mathuulelwiwa o-okaana basa. 18 Aliwa ali muisini yamathuulelo thitho mbolapelana na ingumi inokhumela wa Nlungu, namwasa o-oidhiwa wiwa vyongo nouma wa mirimiwa. 19 Voi aliwa katinoodave i-yani-a yapama na yothakala, tatodhivelela okhene wu kalelo lova-a manyadho* ira tairena vyonyakavala vyatundu uliwethene mwaidyani.

20 Mbwenye nyo kamufunji-iwile ira Kristu ngoi e-no. 21 Yesu anoofunji-a imbarimbari, moi akala mwatoovwa vyafunji-a liye thitho mwatoofunji-iwa naliye, kuongela ira vyongo vyevyo munoviidhiwa pama. 22 Mwatoofunji-iwa ira muungule umutu wawale oi unovwelana na makalelwinyu awale, oi thitho unothakali-iwa namwasa wa naluveluve wainyengo wa umutwinyuo. 23 Thitho mudhowenave chinja ira mukale apya vamathuulelwinyu na moda unoonela nyo vyongo.* 24 Mbwenye muware umutu upya wapanduchiwile movwelana na ifunelo ya Nlungu. Mwairana vyevi munodha oda irana vyongo vyolongomana na vyororomeleya.

25 Ee-no voi muto-iya vyainyengo, mutu uliwethene wanyo aongenga imbarimbari wa fwee namwasa oi nili vyano vyo-indana. 26 Akala mutothakaleliwa, kamudawe. Dhuwa kalivire mungali othakaleliwene. 27 Kamum’va-e ngari Namanami-a.* 28 Mutu unoba a-iye ubao, mbwenye alabenga basa lapama mwathindhi na mandhee, ira aodenga fwanya vyongo vyoi unooda gaana na mutu orambulela. 29 Valomoni vinyu, kavakhumenga madhu othakala.* Mbwenye vakhumenga madhu apama baa-i ira aode limbi-a atu enango, nokami-a atu anoavuruwana. 30 Mbwenye kamusukwali-e zimu ochena wa Nlungu, oi Nlunguo atou-indi-edha basa vou-elani izindiyelo* ira mudhathathuliwe na khuto vadambo laivulumucho.

31 Idana maningi, thakaleliwa rimani, raivwa, lalata, madhu aiburutu na vyongo vyothene vyothakala vikhumi-iwe mwanyo. 32 Mbwenye muriyelengana rima, muthonyi-edhengana tangaranga dhilukhulu thitho mulevelelengana na rima wethene, ninga mwemo Nlungu mwauleveleleni liye na rima wethene dhela mwa Kristu.

5 Ee-no musazi-edhenga Nlungu, ninga a-imee odhiveliwiwa, 2 thitho mudhowenave thonyi-edha udhivela ninga mwemo Kristu mwanidhiveliwilena liye,* nodhivelela ekhene namwasa wa i-yo* ninga yovelela thitho ninga sembe ya kwema lonukhela pama wa Nlungu.

3 Myasa ya unyambi* thitho yongo yonyakavala ya tundu uliwethene venango idyani kaviromoliwe navang’onove vari vinyu, namwasa oi atu ochena katinofwanela irana vyevi. 4 Kamuonge navang’onovene myasa yokhuza kalelo lova-a manyadho, myasa yauzimora tabwalabwa dhoruwana* namwasa oi ndi vyongo vyo-ofwanelela. Malomwee musimbenga Nlungu. 5 Namwasa oi likhundo leli munoliidhiwa thitho munolivwechecha pama, ira mutu waunyambi* venango othakali-iwa na waidyani, oi ndi lambela mafwano, kanodha volowa mu Umwene wa Kristu na wa Nlungu.

6 Mutu kaunyengi-eni na madhu o-okaana basa, namwasa oi thakaleliwa wa Nlungu unodha fiya vaatu* o-ovwela, oi anoira vyongo viongile miyovi. 7 Ee-no kamuirenga vyongo vinoira aliwa.* 8 Namwasa oi voroma mwali ninga isi, mbwenye va-eni muli ninga wala namwasa oi muli ovwelana na Mbwiye. Mudhowenave wenda ninga a-ima aowala. 9 Namwasa oi vyova-a vyowala vinothangani-avo yongo iliyothene yapama, yongo iliyothene yolongomana na imbarimbari. 10 Hora dhothene musikimizelenga ira yorumeleya wa Mbwiye chini. 11 Thitho mu-iye irana vambo-i naaliwa mabasa o-oganyali-a aisini. Mbwenye malomwee, muthonyi-edhenga vakwecha ira ndi vyongo vyothakala. 12 Namwasa oi vyongo vinoira aliwa mwasegeredo ndi vyova-a manyadho masiki vionga. 13 Va-eni vyongo vinoongiwa vinooneela vakwecha namwasa owala, voi yongo iliyothene inooneela inokala wala. 14 Ngumwasee vatokala madhu oonga ira: “We unogona, venyathi! Venyathi muukwa thitho Kristu unodha wala va we.”

15 Ee-no muire polepole maningi ira mwawendanga, kamuwendenga ninga atu o-okaana zelu mbwenye ninga atu azelu. 16 Mu-indi-edhenga basa pama horinyu* namwasa oi malamboala mbothakala. 17 Vamwasa wen’na, mu-iye irana vyongo ninga atu o-okaana zelu, mbwenye mudhowenave zindiyela ifunelo ya Yohova.* 18 Thitho kamulezelenga na vinyu namwasa oi lezela unooda iri-a ira muirena vyongo vyothakala maningi, mbwenye mudhowenave dhaliwana zimu. 19 Muongenga wa unango na fwee vo-indi-edha basa masalimo, nyumbo dhotitimi-a Nlungu na nyumbo dhauzimu. Muombenga nyumbo dhom’titimi-a Yohova* mirimani mwinyu. 20 Hora dhothene musimbenga Nlungu, Babi-u, va vyongo vyothene mudhina la Mbwii-u Yesu Kristu.

21 Mugonjelengana voova Kristu. 22 A-iyana tagonjelenga amaniwa ninga munogonjelela aliwa Mbwiye, 23 namwasa oi lombwana ndi muru wa i-yanee mofwanafwana na Kristu oi ndi muru wa pingo, voi liye ndi namavulumucha wa manungo enala. 24 Thitho mofwanafwana na mwemo pingo munogonjelela aliwa Kristu, a-iyana thitho tagonjelenga amaniwa va iliyothene. 25 Nyo alombwana, mudhowenave dhiveliwana a-iyaninyu ninga mwemo thitho Kristu mwadhiveliwilena liye pingo nodhivelela ekhene namwasa wa pinguo, 26 naifunelo yoi aucheni-e vou-ambi-a na ma-inje a Madhu a Nlungu. 27 Atooirana vyevi ira liye awachele pinguo ungali obaleya thitho watitimi-o, o-okaana idoli venango makhunyari venango thitho iliyothene mwa vyongo vyevi, mbwenye ira ukale ochena na o-okaana damba.

28 Mofwanafwana na vyevi, alombwana tadhiveliwengana a-iyaniwa ninga munodhiveliwana aliwa manungwiwa. Lombwana unodhiveliwana i-yanee unodhidhiveliwana ekhene, 29 namwasa oi kavali mutu aromile idananavo manungwee, mbwenye unoadyi-a noadhiveliwana, ninga mwemo Kristu munoirela liye na pingo, 30 namwasa oi nili vyano vya manungwee. 31 “Vamwasa wen’na lombwana unodha i-ya babee na m’mee nodhowa makala vambo-i na i-yanee thitho ambilao anodha kala manungo mambo-i.” 32 Segeredo yen’na yopambuleya njiilukhulu. Va-eni ndinoonga vya Kristu na pingo. 33 Mbwenye uliwethene wa nyo adhiveliwengana i-yanee ninga munodhidhiveliwana liye ekhene thitho i-yana alemezenga maningi man’nee.

6 A-imanyo, muvwelenga anamabalinyu movwelana na vinofuna Mbwiye, namwasa oi irana vyevi kofuneya. 2 “Mulemezenga babinyu na m’minyu.” Leli tilamulo loroma lokaana yolanyedha. Yolanyedhayee choi: 3 “Ira vyongo viuwendeleni pama, thitho ira mukaena ingumi yolapela vailambo yavathi.” 4 Nyo ababa kamusukwali-enga a-iminyu, mbwenye mudhowenave aulukhuli-a voava-a malangi-o* noafunji-a movwelana na vinoonga Yohova.*

5 Nyo adhaari, muvwelenga mapatarawinyu. Muaovenga noalemeza mokhumela vathi varima, ninga mwemo munoirela nyo na Kristu. 6 Kamuirengana vyevi simbwasimbwa vanooniwa nyo naatu vofuna asangalali-a, mbwenye ninga adhaari a Kristu oi anoirana ifunelo ya Nlungu na rima wethene. 7 Mulabelenga mapatarawinyu modhivelela, ninga munolabela Yohova* a-kala atu, 8 namwasa oi mutoidhiwa ira va yongo iliyothene yapama inaire mutu, Yohova* unodha m’va-a yotuva, mo-obala ira mutuo ndi dhaari venango waufulu. 9 Nyo mapatarau muairelenga thitho adhaarinyu vimbo-ive. Kamuatuchenga namwasa oi mutoidhiwa ira Mbwiye wa nyo mwethene, uli dhulu thitho kana sakulo.

10 Vomari-a ndinoonga ira, mudhowenave kaana kopolo mwa Mbwiye, namwasa oi kopolodhee tidhilukhulu. 11 Muware mafaramento othene akhondo okhumela wa Nlungu ira mwa-agonje volimbana na vyoira vyainyengo* vya Namanami-a, 12 namwasa oi kaninolimbanana naatu amanungo asangiri na nyama, mbwenye ninolimbanana viwanda vili dhulu, vyoi ndi maguverno na anamatonga anotonga ilambo ya isila. 13 Vamwasa wen’na mutukule mafaramento othene akhondo okhumela wa Nlungu ira vadambo lothakala mwa-agonje, thitho ira mwaira vyongo vyothene pama, mudhakale olimba.

14 Ee-no mukale olimba, mumange maningi imbarimbari yununi mwinyu ninga sintu, muware yodhibarelana vamirimani yalongomano, 15 thitho muware sapato manyaloni winyu vokozeela laleela milanyu yapama ya rendele. 16 Kwaranya vyongo vyotheneevi, mutukule yodhibarelana ilukhulu yairoromelo, ira mudhaode timi-ana mafimo othene o-inda mulo a othakaluo. 17 Thitho muware ichapowa yaivulumucho notukula sarasada la zimu, loi ndi madhu a Nlungu. 18 Vanoirana nyo vyongo vyevi, mulobelenga va yoireya iliyothene mu zimu, no-indi-edha basa lobelo nosembezela wa tundu uliwethene. Ira muode irana vyevi mukale methove thitho hora dhothene mulobelenga mosembezela malo mwaatu ochena othene. 19 Thitho mundilobelelenga miyo ira ndaromanga onga, ndifwanyenga madhu ofwanelela naifunelo yoi ndiode onga molimba rima ndalaleelanga vyokhuza segeredo yopambuleya ya milanyu yapama, 20 yoi miyo ndili namaimelela wee omangiwa na kureti thitho ira ndionge milanyiyo molimba rima ninga munofwanela miyo irana.

21 Va-eeni, ira muidhiwe moda munowendela vyongo vaingumi yanga thitho ira miyo ndili a-vi, Tikiko oi ndi bali odhiveliwiwa thitho rumiwi ororomeleya wa Mbwiye, unodha uwandelani vyongo vyothene. 22 Nditom’ruma wanyo naifunelo yoi muidhiwe vyaingumi yi-u thitho ira adidili-e miriminyu.

23 Rendele na udhivela thitho iroromelo vyokhumela wa Nlungu Baba na wa Mbwiye Yesu Kristu, vikale vanyo abali. 24 Riya rima ulukhulu ukale vaatu othene ana udhivela waimbarimbari va Mbwii-u Yesu Kristu.