KARTA LODHOWA WA AGALATIYA

1 Miyo Paulo, ndili rumiwi a-kala waatu venango osakuliwa na mutu, mbwenye osakuliwa na Yesu na Nlungu Baba am’venyathi-idhe muukwa. 2 Miyo vambo-i naabali othene ana miyo ninomwenyula mipingo yau Galatiya:

3 Riya rima ulukhulu na rendele vyokhumela wa Nlungu Babi-u na Mbwii-u Yesu Kristu, vikale na nyo. 4 Liye atoodhivelela namwasa wa vyodawa vi-u, ira anivulumuche wu ilambo yothakalai* movwelana naifunelo ya Nlungu oi ndi Babi-u. 5 Titimi-o lidhowe wa Nlunguo modhowa nodhowa. Ame.

6 Miyo ndinodabwa ira mutovandhuwa mombaranya khuma mwa Nlungu oi atoouitanani dhela moriya rima ulukhulu wa Kristu thitho mutoroma vuruwana milanyu yapama ya tundu unango. 7 Yen’na kaiira ndi milanyu yapama, mbwenye vatokala atu enango oi mbanoudhodhomi-ani naifunelo yofuna bendi-a milanyu yapama yoonga vya Kristu. 8 Mbwenye akala i-yo venango ngelo okhumela dhulu alaleela mwasa unango wa nyo noonganga ira unolaleela milanyu yapama, mbwenye mwasuo kala o-iyana na milanyu yapama inolaleela i-yo wa nyo, wenuo akale otembeleliwa. 9 Ninga mwaongile i-yo wale, ndinoonga okoka ira: Mutu uliwethene unolaleela mwasa unango wanyo noonganga ira ndi milanyu yapama, mbwenye ingali yo-iyana na yaulaleeleni i-yo, mutu wenuo akale otembeleliwa.

10 N’nga va-eeni ndinofuna ira atu tandidhiveliwengana venango dhiveliwana Nlungu? N’nga venango ndinofuna sangalali-a atu? Aakale ira ndinave sangalali-a atu, kandakale dhaari wa Kristu. 11 Namwasa oi ndinofuna muidhiwe abali ira, milanyu yapama yaulaleeleni miyo kiyakhumile waatu. 12 Milanyu yen’na kandaiwachenle khumela wa mutu thitho kandifunji-iwile, mbwenye Yesu Kristu ngwandiwandenle.

13 Mwaimbarimbari mwanoovwecha vyairecha miyo wale vyali miyo mu religiau la Iyuda, ira ndanoo-ara-ara maningi* pingo wa Nlungu naifunelo yofuna unonga. 14 Ndali odhowa vasogolo maningi mu religiau la Iyuda kwaranya afwanga anjinji aziza langa, oi ali atunga langa, namwasa oi ndali wathindhi maningi va sanganiko dha anamabalanga. 15 Mbwenye Nlungu andiiri-idhe ira ndibaliwe vailambo yavathi nondiitana dhela moriya rimawee ulukhulu, atoona ira pyapama ira 16 aonge vya Mwanee dhela mwa miyo, naifunelo yoi ndilaleele waatu a maziza enango milanyu yapama yoonga vya liye. Kandadhowile hora yeniyene matapanya na mutu uliwethene. 17 Thitho kandadhowile wu Yerusalemu waatu ali arumiwi miyo nda-anakale rumiwi, mbwenye ndadhowile wa Arabiya, ndidhamale ndatoowelela okoka wu Damasku.

18 Moi e-no vangavirile vyawa viraru, ndatoodhowa wu Yerusalemu mawaredha na Kefa* thitho ndatookala vambo-i na liye wa malambo 15. 19 Mbwenye arumiwi enango othene kandaaoni khumi-avo Yakobo baa-i balee Mbwiye. 20 Ndinousimikizelani vamethoni va Nlungu ira vinoulembelani miyovi, kai vyonama.

21 Ndidhamale ndatoodhowa matatamo a Siriya na Silisiya. 22 Mbwenye atu a mipingo yau Yudeya yoi yali yovwelana na Kristu, katandiidhiwa pama. 23 Aliwa taira uvwawene ira: “Mutu ani-ara-ara walelenule thitho anaifunelo yofuna nonga mipingo, va-eeni unalaleela milanyu yapama.” 24 Ee-no atwao tatooroma m’lemeza Nlungu namwasa wa miyo.

2 Ee-no vangavirile vyawa 14, ndatoodhowa okoka wu Yerusalemu na Barnaba vambo-i na Titu. 2 Ndatoodhowao namwasa oi ndawandeliwile mu masopenya ira ndidhoweo. Thitho ndatoawandela abali milanyu yapama inolaleela miyo waatu amaziza enango. Mbwenye ndatooira vyevi mwasegeredo waabali onyindeleya baa-i vofuna asikimizela ira urumiwi walaba miyo kandaulabela vapezi. 3 Thitho angalive ira Titu, oi ali vambo-i na miyo ali Mugiriki, kaakanyi-edhiwile ira aineliwe. 4 Mbwenye mwasa wen’na waromeile namwasa wa abali ainyengo avolowile vari vi-u mozemba ninga anamazondela, naifunelo yoi tadhodhomi-e ufulu unosangalalana i-yo movwelana na Yesu Kristu, nonichinja kala adhaari. 5 Atu enala kanaagonjenle, masiki wahora yoyeva, ira nyo mudhowenave kaana imbarimbari ya milanyu yapama.

6 Mbwenye onga vyaatu aoneya ninga avadhulwale, katandifunji-idhe yongo iliyothene ipya, peno aliwa tali oi a-vi kavina basa wa miyo, namwasa oi Nlungu kanoing’ana maoneelo amutu aundhe. 7 Mbwenye tangaoni ira nditova-iwa basa lolaleela milanyu yapama waatu o-oineliwa, mofwanafwana na Pedru oi atoova-iwa basa lolaleela milanyu yapama waatu oineliwa, 8 namwasa oi am’va-idhe Pedru kopolo ira akale rumiwi waatu oineliwa ngwenuo thitho andiva-idhe kopolo ira ndikale rumiwi waatu amaziza enango. 9 Aliwa tangazindiyenle riya rima ulukhulu wava-iwile miyo, Yakobo, Kefa* na Juwau, oi tali ninga mizati, tatoonimwenyula miyo na Barnaba na dhandha lodyana vothonyi-edha ira tanovwelanana vyoi i-yo nidhowe waatu amaziza enango thitho aliwa tadhowe waatu oineliwa. 10 Aliwa tatoonivepha ira nithuulelenga alimbo sauwa thitho nditodhilimbi-edha moona rima irana vyevi.

11 Mbwenye Kefa* angafiile wu Atiokeya, ndatoom’sumulula* khove na khove namwasa oi vyanooneelatu ira atooira vyodaweya. 12 Namwasa oi atu okhumela wa Yakobo ta-anafiye, liye adya vambo-i naatu amaziza enango. Mbwenye atwao tangafiile liye atoo-iyachi irana vyevi namwasa oi liye aova atu oineliwao. 13 Ayuda enango thitho tatoovwelana vambo-i na liye voira vyainyengovi. Naliyene thitho Barnaba atooirana vimbo-ive. 14 Mbwenye ndingaoni ira katinoirana vyongo movwelana na imbarimbari ya milanyu yapama, ndatoom’mwandela Kefa* vari vaatu othene ira: “Akala we angalive ira uli Muyuda, unoirana vyongo ninga atu amaziza enango, a-kala ninga Muyuda, mwasiwa ngwan’ni unoiri-a atu amaziza enango ira tairenga ninga vinoira Ayuda?”

15 I-yo oi nili atu aziza la Iyuda, a-kala odawa okhumela mwaatu amaziza enango, 16 nitoidhiwa ira mutu unooniwa ira ngolongomana, a-kala namwasa o-arela ilamulo, mbwenye namwasa ororomela Yesu Kristu baa-i. Ee-no i-yo ninororomela Yesu Kristu ira nioniwe kala olongomana namwasa om’roromela, a-kala namwasa o-arela ilamulo. Nitoirana vyevi namwasa oi kavali mutu unooniwa kala olongomana namwasa o-arela ilamulo. 17 Akala i-yo nitooniwa ira nili odawa vanodhilimbi-edha i-yo ira nioniwe ira nili olongomana dhela mwa Kristu, N’nga kuongela ira Kristu ngu rumiwi wa vyodawa? Mwaimbarimbari khabe. 18 Akala ndinaamanga okoka vyongo vyagwi-idhe miyo, kuongela ira ndinothonyi-edha ira ndili mutu o-ovwela malamulo. 19 Namwasa oi ndanoo-arela ilamulo, ndatookwa wu ilamulo ira ndikaena ingumi nom’labelanga Nlungu. 20 Ndatookhomeliwa vaimurini vambo-i na Kristu. Kai miyove una ingumi, mbwenye ndi Kristu una ingumi thitho ngovwelana na miyo. Pyaimbarimbari ira ingumi inokaana miyo va-eeni, ndinoikaana mororomela Mwana Nlungu, oi andidhiveliwilena nodhivelela ekhene namwasa wa miyo. 21 kandinokhonda riya rima ulukhulu wa Nlungu, namwasa oi akala mutu unokala olongomana vo-arela ilamulo, kuongela ira Kristu akwele vapezi.

3 Nyo Agalatiya opupwa! N’nga mbaani aunami-idheni, vyakanle nyo ninga muoni Yesu Kristu angakhomeliwile vaimurini? 2 Ndinofuna ndiufukeni yongo imbo-i: N’nga mwawachenle zimu namwasa o-arela ilamulo venango namwasa ororomela milanyu yavwide nyo? 3 N’nga muli opupwa? Voroma mwatooroma nyindela zimu, n’nga va-eni munofuna murome nyindela zelu dhaatu o-olongomana? 4 N’nga rucheya wethene weule wadhowile vapezi? Ndinororomela ira kwaadhowile vapezi. 5 N’nga unouva-ni zimu noirana vyongo vyakopolo vari vinyu, unoirana vyevi namwasa oi nyo muno-arela ilamulo venango mwatoororomela milanyu yapama yavwidenyo? 6 Muthuulele vya Abrahamu. Liye “Atoororomela vyam’mwandele Yohova* thitho anooniwa ira ali olongomana.”

7 Mwaimbarimbari nyo munoidhiwa ira atu anokaanave iroromelo mbali a-ima a Abrahamu. 8 Walelene malemba atoongelatu ira Nlungu unodhaona atu amaziza enango ira mbolongomana namwasa wa iroromelo. Ee-no atoovaelatu laleela milanyu yapama wa Abrahamu ira: “Dhela mwa we, maziza othene anodha raeli-iwa.” 9 Ee-no atu ana iroromelo yolimba anoraeli-iwa vambo-i na Abrahamu, oi atookaana iroromelo.

10 Atu othene anonyindela mabasa a ilamulo mbotembeleliwa, namwasa oi malemba anoonga ira: “Mutu uliwethene unokhonda a-arela vyongo vyothene vilembiwile mu pukutu wa ilamulo, ngotembeleliwa.” 11 Thitho pyoidhiweelatu ira kavali mutu unaoniwe na Nlungu ira ngolongomana namwasa o-arela ilamulo, voi “mutu olongomana unodha kaana ingumi namwasa wa iroromeloyee.” 12 Va-eni Ilamulo kinonyindela ira mutu akaena iroromelo. Mbwenye “mutu uliwethene unoirana vinoonga ilamulo unodha kaana ingumi namwasa wa ilamuloyo.” 13 Kristu atoonigula nonithathula motembeleliwa na ilamulo. Atooirana vyevi vokala otembeleliwa malo mwa i-yo, namwasa oi malemba anoonga ira: “Mutu uliwethene othomeiwa vaimurini ngotembeleliwa.” 14 Ifuneloyee yali yoi dhela mwa Kristu Yesu, maziza othene aatu tafwanye maraeli-o alanyedhiwile Abrahamu, ira nidhawachele zimu walanyedhiwiluo namwasa wa iroromelo yi-u.

15 Abali, ndinouwandelani ifwanafwani-o movwelana na vinoireya vari vaatu: Vwelano lakaathei-iwa, angalive ira ndi vwelano laatu, kavali unalimali-e venango wenjedhelavo makhundo enango. 16 Ee-no vyolanyedha vyatooveleliwa wa Abrahamu na mbumbee.* Malemba kationgile ira: “Wa mbumbadhaa,”* kalanga ninga mbumbadho tidhinjinji. Mbwenye anoonga ira, “wa mbumbaa,”* thapulela ira ndi imbo-i oi ndi Kristu. 17 Mbwenye miyo ndinoonga ira: Voroma Nlungu atoovwelana na Abrahamu thitho vangavirile vyawa 430 atoovelela ilamulo waatwee. Mbwenye ilamuloyo kiyamali-idhe vwelano na yolanyedha yairile Nlungu na Abrahamu, ira yolanyedhayo ya-akaenave basa. 18 Namwasa oi akala Nlungu unovelela yotuva dhela mu ilamulo kuongela ira ilamulo kinonyindelave yolanyedha. Mbwenye moriya rima Nlungu utoivelela yotuviyo wa Abrahamu dhela mu yolanyedha.

19 N’nga mwasiwa ngwan’ni ilamulo yatooveleliwa? Atooniva-a ilamuloi ira vyodawa vioneele, fiyedha mbumba* yalanyedhiwiliyo ingafiile. Angelo tatoovelela ilamuloyo dhela mwa namaimelela. 20 Akala vwelano linokhuza mutu m’mbo-i, kavanofwanelelave namaimelela. Ndisaasawa thitho vyali aliwa na Nlungu, vavelela liye yolanyedhayo ali ekhene. 21 N’nga Ilamulo inoruni-ana na vyolanyedha vya Nlungu? Mwaimbarimbari khabe. Namwasa oi aakale ira vatoveleliwa lamulo lova-a ingumi, ningaoniwile ira nili olongomana namwasa o-arela ilamulo. 22 Mbwenye malemba anothonyi-edha ira atu anotongiwa na vyodawa, ira yolanyedha inoveleliwa na mwasa ororomela Yesu Kristu, iveleliwe waatu anom’roromela.

23 Mbwenye iroromelo ya-anafiye, naing’aneliwa na ilamulo thitho yanooniiri-a kala adhaari. Vahora yeniyo nadedi-edha iroromelo yoi ya-adhi vang’ono ira ikalevo. 24 Ee-no ilamulo yali namaing’aneli-u* oi anoonisogolela wa Kristu, ira nioniwe kala olongomana namwasa wa iroromelo. 25 Mbwenye voi iroromelo itokalavo, kaninofuneelave namaing’aneluo.*

26 Thitho mwethene muli a-ima a Nlungu namwasa oi munororomela Kristu Yesu. 27 Namwasa oi mwethene mwabadiziwile nokala ovwelana na Kristu mutokaana makalelo ninga a Kristu. 28 Kavali Muyuda venango Giriki, kavali dhaari venango mutu waufulu, thitho kavali lombwana venango i-yana namwasa oi mwethene muli ambo-ive mwa Kristu Yesu. 29 Thitho akala muli anamafunjedha a Kristu, muli mbumba* dha Abrahamu dhinofuna dhawachela yotuva movwelana na yolanyedhayo.

4 Va-eeni ndinoonga ira, mutu unowachela vyongo akala mwana, liye kano-iyana na dhaari, angalive ira vyongo vyothene ndivyee. 2 Mbwenye unokalave ovwela waatu anom’mwing’anela na anoing’anela vyongo vya patarawiwa, fiyedhela dambo lakaathi-idhe babee. 3 Saasawa thitho na i-yo, vyali i-yo a-ima, na-arelecha makhundo ano-arelecha atu amuilamboni. 4 Mbwenye hora ingakwakwan’ne, Nlungu atooruma Mwanee oi abaliwile dhela mwa i-yana thitho atoovwela ilamulo. 5 Atooirana vyevi ira avelele yoombolana atu oi tanoovwela ilamulo naifunelo yoi nikhale a-ima a Nlungu.

6 Va-eeni voi muli a-ima a Nlungu, Nlunguo uto-ela zimu wa Mwanee mirimani mwi-u thitho zimuo unokhuwa ira: “Abba,* Baba!” 7 Ee-no uliwethene wa nyo kai dhaarive, mbwenye ndi mwana. Thitho akala uli mwana, kuongela ira uli ofwanelela dhawachela yotuva inofuna dhauva-a Nlungu.

8 Angalive e-no, mwa-anam’mwidhiwe Nlungu, mwali adhaari a vyongo vyoi kavyali alungu. 9 Mbwenye va-eeni mutom’mwidhiwa Nlungu, venango nionge ira Nlungu utouidhiwani. N’nga mwasiwa ngwan’ni muno-arela okoka makhundo ano-arela atu amuilamboi oi mbo-okhami-a, thitho o-okaana basa, nofunanga kala adhaaree? 10 Munoira mafesta a malambo, myedi, hora na vyawa vyoi munovithuulela ira pyavakhundu. 11 Ndinaakhumbanya ira venango basa lalabile miyo ndalilabile vapezi.

12 Ndinouvephani abalanga ira mukhale ninga miyo namwasa oi miyo thitho voroma ndali ninga nyo. Nyo kamundidawele. 13 Mbwenye munoidhiwa ira voroma ndatookaana ngari yolaleela milanyu yapama wa nyo namwasa oi ndanoobulela. 14 Thitho angalive ira urendanga wali ninga vyowesedha wa nyo, kamwandipwazile venango ndithakaleliwana. Mbwenye mwatoondiwachela ninga ngelo wa Nlungu venango ninga Kristu Yesu. 15 N’nga sangalala wana nyo voromaule uliwani? Namwasa oi ndinosikimizela ira, aakale ira pyoodeya, mungaodile kodobola methwinyuao nondiva-a. 16 N’nga va-eeni ndili mwidaninyu namwasa oi nditouwandelani imbarimbari? 17 Atu enango anaadhilimbi-edha maningi ira taukopeni naifunelo yoi mwaa-arelenga. Aliwa katinoirana vyevi naifunelo yapama, mbwenye tanofuna ira nyo mukhale undendai na miyo ira mwaa-arelenga. 18 Ndipama akala mutu unoukopani naifunelo yapama a-kala vili miyo vambo-i nanyo baa-i, mbwenye hora dhothene. 19 Nyo a-imanga, nditoroma okoka uvwa upha namwasa wa nyo ninga mwemo munovwela i-yana oi u-adhi vang’ono ira abale. Ndinodhowanave uvwa upha weu fiyedha murome thonyi-edha makhalelo a Kristu. 20 Va-eeni ndingadhiveliwile kala vambo-i na nyo ira ndiuongenani mwa ndhila inango namwasa oi mutondigomi-a luso.

21 Kandiwandeleni, nyo munofuna ira mu-arelenga ilamulo, n’nga kamunoidhiwa vinoonga Ilamuloyo? 22 Mofwanafwani-a, malemba anoonga ira Abrahamu atoobala a-ima ambili aalombwana, mwinango abanle na i-yana wa dhaari thitho mwinango abanle na waufulu. 23 Mwana abaliwile na i-yana wa dhaarule abaliwile ninga munobaliwecha a-ima enango othene, mbwenye mwana abaliwile na i-yana waufulu abaliwile dhela mu yolanyedha. 24 Vyongo vyevi vitokaana vyothapulela vyopipirisa, namwasa oi a-iyanala anoimelela vwelano lavikhundu vinli. Ikhundu yoroma ndi vwelano lava Mwango wa Sinai, loi linobala a-ima ira takale adhaari. Vwelano leli ndi Agara ule. 25 Va-eeni, Agara wen’na unothapulela mwango wa Sinai unofwanyeya wu Arabiya, thitho malamboano unofwanafwana na Yerusalemu, namwasa oi uli vaudhaari vambo-i na a-imee. 26 Mbwenye Yerusalemu wa dhulu ndi waufulu thitho ndi m’mi-u.

27 Namwasa oi malemba anoonga ira: “We i-yana o-obala oi kunabalevo mwana usangalalevyaa. Ukhuwe mosangalala we i-yana oi kunavwevo vyopha vyobala, namwasa oi a-ima a i-yana o-iiwa mbaanjinji kwaranya a-ima a i-yana oi utokaana lombwana.” 28 Va-eeni abali, nyo muli a-ima abaliwile namwasa wa yolanyadha ya Nlungu mofwanafwana na Izaki. 29 Mbwenye mofwanafwana na moda mwali aliwa vahora yeniyo, ira mwana oi abaliwile ninga munobaliwela a-ima enango othene, atooroma oni-a nyarwa mwana oi abaliwile dhela mwa zimu. Vyevi ndisaasawa thitho na malamboano. 30 Angalive ira vili ee-no, n’nga malemba anoongan’ni? “Utamangi-e dhaari wa i-yanula vambo-i na mwaneeula vano, namwasa oi mwana wa dhaarula kanodha wachela yotuva vambo-i na mwana wa i-yana waufulu.” 31 Ee-no abali, i-yo nili a-ima a i-yana oi ngwaufulu, a-kala a-ima a i-yana oi ngu dhaari.

5 Kristu atoonithathula ira nikaena ufulu wen’na. Ee-no mukale olimba thitho kamurumeli-e ira mumangiwe okoka na goli laudhaari.

2 Muvuruwane! Miyo Paulo, ndinouwandelani ira mwaineliwa, vyairile Kristu kavinodha uganyali-ani. 3 Ndinaathuucha thitho fendo yanambili ira mutu unoineliwa, unofuneela thitho a-rela vyongo vyothene Vyamuilamulo. 4 Nyo munofuna ira muoniwenga kala olongomana namwasa o-arela ilamulo, mutodhi-iyani-a na Kristu. Moi mutoiri-a ira mwa-adhawachele thitho riya rimawee ulukhulu. 5 Mbwenye mosogoleliwa na zimu, i-yo ninodedi-edhela mofunechecha vyongo vinofuna dhaniireela namwasa ooniwa ira nili olongomana, namwasa wairoromelo. 6 Namwasa oi akala mutu uli ovwelana na Kristu Yesu, ineliwa venango a-inela kunokaana basa wa liye. Mbwenye yofuneya maningi kukaana iroromelo inooneela vothonyi-edha udhivela.

7 Nyo mwanootamanga pama. N’nga mbaani audhodhomi-idheni ira mwa-adhowenave vwela imbarimbari? 8 Vyaufunji-idheni aliwavyo kavyakhumele wa Nlungu auitan’neni. 9 Rombwe vang’ono otupi-ana mapau unotupi-a utu othene omunyiwa. 10 Ndinororomela ira nyo oi muli ovwelana na Mbwiye, kamunodha chinja mathuulelo. Mbwenye mutu unouruchi-anuo mo-obala ira mbaani, unodha tongiwa mofwanelela. 11 Onga vya miyo abali, akala ndinodhowanave laleela ira atu taineliwenga, n’nga mwasiwa ngwan’ni ndinaadhowanave oni-iwa nyarwa? Vyaakale e-no, kuongela ira vyongo vinofunji-a miyo vyokhuza wukwa wa Yesu vaimurini yoonelavo nyarwa,* kavyasukwali-e atu. 12 Ndingadhiveliwile ira atu anofuna ubendi-ani mathuulelwao, tadhikapali okhene.*

13 Abali, mwaitaniwile ira mukale aufulu. Mbwenye kamulabi-edhe basa ufulu wen’na ninga ngari yoirelana vyongo vinolavela manungo o-olongomana. Malomwee murumeli-enga ira udhivela uulimbi-engani labelana. 14 Namwasa oi Ilamulo yothene inothangani-iwa mu lamulo limbo-i loi: “Um’dhiveliwengana fwaa ninga munodhidhiveliwana we wekhene.” 15 Mbwenye mwadhowanganave lumana nooni-angana nyarwa mwekhene,* muire polepole ira mwa-anongane.

16 Malomwee ndinoonga ira, mudhowenave wenda mosogoleliwa na zimu, thitho mwaira e-no kamunodha irana navang’onove vinolavela manungo o-olongomana. 17 Namwasa oi vyongo vinolavela manungo vinolimbanana zimu, zimu naaliwene thitho unolimbanana manungo. Vyongo vinlivi vinoruni-ana ira mwa-aire vyongo vinofuna nyo. 18 Thitho akala munosogoleliwa na zimu, kamunotongiwa na ilamulo.

19 Mabasa a manungo odawala anooneela vakwecha. Mabasa enala ndi unyambi,* kalelo linothakali-a mutu, kalelo lova-a manyadho,* 20 lambela mafwano, roromela mizimu,* idana, ndale, sanje, thakaleliwa rimani, kangana, gaaneya, magulu opanduwa, 21 bivu, simbwa umwa,* mafesta othakala,* na vinango ninga vyevi. Abali, movwelena na vyauwenjeli-idheni miyo wale, ndinouwenjeli-ani okoka ira atu anoirana vyevi katinodha volowa mu Umwene wa Nlungu.

22 Mbwenye makalelo anokaana atu mokami-iwa na zimu ochena ndi udhivela, imwerumweru, rendele, leva rima, riya rima, upama, iroromelo, 23 pwaseya nodhikhondi-a. Kavali lamulo linokhondi-a makalelo enala. 24 Thitho atu oi mbaanamafunjedha a Kristu Yesu, tatookhomela vaimurini manungwiwa vambo-i na vinofuna aliwa na vinolavela aliwa.

25 Akala vaingumii-u ninosogoleliwa na zimu, dhoweni nidhowenave irana vyongo movwelana na zimuo. 26 Kanikale atu odhigweli-a, kaniromi-e pikisano vari vi-u thitho kaniirelane bivu.

6 Abali, akala mutu utovandhuwa noroma wenda ndhila yodaweya mo-ozindiyela, nyo oi muli ofwanelela mwauzimu, mudhilimbi-edhe m’kami-a mutu wenuo na zimu ofwasa. Mbwenye vanoirana nyo vyevi muire polepole, ovela ira nanyeene thitho munooda wesedhiwa. 2 Mudhowenave tukulelana vyongo vyonyemela. Mwairangana vyongo vyevi munokala mukwakwaneli-edhanga ilamulo ya Kristu. 3 Namwasa oi akala mutu mwinango unaadhiona ira ngofuneya angalive ira kai ofuneya, unaadhinami-a ekhene. 4 Mutu uliwethene vaekhene asakesake vyoiravyee ira aone ira pyoi a-vi. Aira e-no unodha kaana mwasa osangalalela na vinoira liyevyo, a-kala modhifwanafwani-edhela na mutu mwinango. 5 Namwasa oi mutu uliwethene unofwanela tukula tolwee.*

6 Thitho mutu uliwethene unofunji-iwa madhwao, agaane vyongo vyothene vyapama na mutu unom’funji-uo.

7 Kamunami-eye, Nlungu kanonyengi-eya. Yongo iliyothene idhalile mutu, unodha a-nda thitho yeyo. 8 Namwasa oi mutu unodhala naifunelo yoganyali-a manungwee, unodha a-nda nongiwa khumela wu vyofuna vya manungweao. Mbwenye mutu uno-arela vyofuna vya zimu wa Nlungu unodha a-nda ingumi yo-omala khumela wu zimuo. 9 Ee-no kani-iye irana vyongo vyapama, namwasa oi vahora yofwanelela ninodha a-nda na-achenyele.* 10 Moi ee-no akala ninooda, dhoweni niirele atu othene vyapama mbwenye simbwasimbwa abali naarongoli-u muiroromelo.

11 Kaonani maletra malukhulu aulembeleni miyo na dhandha langali.

12 Atu othene tanofuna ira taoneyenga ninga apama vari vaatu mbanoukanyi-edhani ira muineliwe. Aliwa tanoirana vyevi ira ta-a-ara-ariwe namwasa wa imuri yoonelavo nyarwa* ya Kristu. 13 Namwasa oi masiki atu taineliwilao kaiira tanovwela ilamulo, mbwenye tanofuna ira nyo muineliwe naifunelo yoi aliwa tadhititimi-enga namwasa wa manungwinyu. 14 Miyo kandinofuna dhititimi-a va yongo iliyothene, khumi-avo vamwasa wa imuri yoonelavo nyarwa* ya Mbwii-u Yesu Kristu. Wa miyo, ilambo yatootongiwa ira iphiwe* dhela mwaliye, mbwenye movwelana na maonelo ailamboi, miyo ndatootongiwa ira ndiphiwe dhela mwaliye. 15 Namwasa oi ineliwa venango a-ineliwa kai ofuneya, mbwenye yofuneya kukala mutu m’pya. 16 Mbwenye atu othene tano-arela lamulo leli, oi ndi Israeli wa Nlungu, takaena rendele thitho Nlungu aathonyi-edhe tangaranga.

17 Romela va-eeni, kavafwanyeye mutu ondiruchi-a, namwasa oi manungwangala atokaana vidindo vyothonyi-edha ira ndili dhaari wa Yesu.

18 Abali, riya rima ulukhulu wa Mbwii-u Yesu Kristu ukale nanyo namwasa wa makalelo anothonyi-edha nyo.* Ame.