KARTA LANAMBILI LODHOWA WA AKORITIYO

1 Miyo Paulo, rumiwi wa Kristu Yesu mofuna wa Nlungu, vambo-i na Timoteo bali-u, ndinolembela pingo wa Nlungu wu Koritiyo thangani-avo atu othene ochena ali wu Akaya:

2 Riya rima ulukhulu na rendele vyokhumela wa Nlungu Babi-u na Mbwii-u Yesu Kristu, vikale nanyo.

3 Atitimi-eye Nlungu na Baba wa Mbwii-u Yesu Kristu, Baba wa tangaranga dhilukhulu na Nlungu oi unonididili-a va yorucha iliyothene, 4 oi thitho ngunonididili-a* va vyowesedha vi-u vyothene, ira niode didili-a atu anogumanana vyowesedha vya tundu uliwethene, namwasa oi na-iyene thitho nitodidili-iwa na Nlungu. 5 Voi ninogumanana nyarwa dhinjinji namwasa wa Kristu, thitho ninodidili-iwa maningi dhela mwa Kristu. 6 Nagumanana vyowesedha, nyo munodidili-iwa novulumuchiwa. Nadidili-iwa, nanyeene munodidili-iwa thitho vyevi vinokami-a ira muvilele nyarwa ninga dhinogumanana i-yo. 7 Idedi-edhwi-u va nyo cholimba, namwasa oi ninoidhiwa ira voi munogumanana nyarwa ninga dhinogumanana i-yo, nanyeene thitho munodha didili-iwa.

8 Abali, ninofuna muidhiwenga vya nyarwa dhaguman’nena i-yo wu provisiya ya Aziya. Natoogumana nyarwa dhilukhulu dhokwaranya kopolodhi-u, moi kanana idedi-edho yoi ninokaana ingumi. 9 Thitho nadhivwa ninga nitotongiwa ira niphiwe. Vyevi vyatooireya naifunelo yoi na-adhinyindelenga mbwenye ninyindelenga Nlungu oi unovenyathi-a alimbo wukwa. 10 Liye atoonivulumucha wu vyongo vyevi vyoi vyangaodile nipha thitho unodha nivulumucha. Ninororomela ira liye unodhowanave nivulumucha. 11 Nyo thitho munooda kami-a volobela mosembezela, ira vakale atu anjinji onilobelela vosimba kami-iwa wi-u na Nlungu vowakhula malobelo aatu anjinji.

12 I-yo nitokaana mwasa odhititimi-ana, thitho ithuulela rima yi-u inoniirela umboni, ira vailamboi, simbwasimbwa vari vinyu, nitooni-a makalelo apama movwelana na vinofunji-a Nlungu. Nitoira vyevi a-kala monyindela zelu dha ilamboi, mbwenye monyindela riya rima ulukhulu wa Nlungu. 13 Namwasa oi vinoulembelani i-yovi ndi vyongo vyoi munooda vileri novivwechecha. Thitho ndinororomela ira munodhowanave vivwechecha pama vyongo vyevi. 14 Mutoidhiwa ira i-yo nili mwasa ouiri-ani ira mudhititimi-e, ninga munofunanyo dhakalela mwasa oniiri-a ira nidhagaye vadambo la Mbwii-u Yesu.

15 Voi kandinokaikela vyevi, ndanoofuna ira voroma ndidhe weo, ira mudhasangalale okoka. 16 Namwasa oi ndinofuna ira ndadhowanga wu Masedoniya ndidhavirena weo ira ndidhauwaredheleni, thitho ndadhakhuma wu Masedoniya ndinodha virana weo okoka amala mudhandivelele vodhowa wu Yudeya. 17 N’nga vyathuulela miyo vya mwasa wen’ne ndauona movevuwa? Venango, n’nga ndana mathuulelo aidyani ira ndaira “Ee, ee” hora yeniyene ndichinje ira “Khabe, khabe?” 18 Mbwenye muroromele Nlungu ira vyauwandeleni miyo pyaimbarimbari. Kandinauwandeleni ira “ee” amala “khabe.” 19 Voi Mwana Nlungu, Yesu Kristu, wenuo wam’laleele miyo, Silvano* na Timoteo, kanaongevo ira “ee” amala ira “khabe,” mbwenye aonga “ee” hora dhothene inokalave “ee.” 20 Thitho vyolanyedha vya Nlungu, masiki vikale vinjinji a-vi, vinokalave “ee” dhela mwa liye. Ee-no dhela mwa liye, i-yo ninoira “Ame” wa Nlungu thitho Nlungu unowachela titimi-o dhela mwa i-yo. 21 Mbwenye Nlungu ngunonisikimizela ira nyo na i-yo nili Makristau thitho liye ngwanizozile. 22 Liye utonidinda na idindoyee. Idindo yei ndi zimu ochena uli mirimani mwi-u thitho uli ninga maraeli-o a sogolo.

23 Fiyedha va-eni miyo kandidhidhe weo wu Koritiyo namwasa oi kandafuna wenjedhela sukwala winyu thitho Nlungu unondiirela umboni. 24 Kaiira nili anamatonga a iroromelwinyu, mbwenye nili anamalaba afwinyu ira musangalalenga, voi muli olimba namwasa wa iroromelwinyu.

2 Ndisakunle ira ulendwanga odha okoka wanyo, kudhakale osukwali-a. 2 N’nga ndausukwali-ani mbaani unofuna dhandisangalali-a khumi-avo nyo? 3 Ndalembile vyevile ira ndadhafiya weo, nda-asukwale namwasa waatu anofwanela miyo asangalalana. Namwasa oi ndinororomela ira vyongo vinondisangalali-a, vinouwiri-ani mwethene kala osangalala. 4 Miyo ndaulembeleni kartanle ndirucheyanga, ndikhumbanyanga maningi, thitho ndilanga, a-kala ira musukwale mbwenye ira muidhiwe ira ndinoudhiveliwanani maningi.

5 Akala mutu mwinango utoira vyongo vyosukwali-a, kasukwali-idhe miyo baa-i, mbwenye usukwali-idhe nyo mwethene. Mbwenye kandinofuna onga maningi vyamwasa wen’na. 6 Voi mutu wen’na utosumululiwa naatu anjinji e-ni vitokwakwana. 7 Va-eeni mum’levelele narima wethene nom’didili-a rima, ovela ira unodha sukwala mokwaranyi-a madile fiyedha fooka. 8 Ee-no ndinoulimbi-ani ira mum’sikimizele ira munom’dhiveliwana. 9 Ndatoulembelani naifunelo yoi ndiidhiwe akala munovwela vavyongo vyothene. 10 Mwalevelela mutu vayongo iliyothene iirile liye, miyo thitho ndinom’levelela. Thitho yongo iliyothene ilevelele miyo mutu (akala vatookala yongo ilevelele miyo) nditoira vyevi namwasa wanyo vamethoni va Kristu, 11 ira Satana a-anigonji-e, namwasa oi nitoidhiwa pama migo-ee.*

12 Ndingafiile wu Trowade malaleela milanyu yapama yoonga vya Kristu, thitho ndingakanle na ngari yolaba basa la Mbwiye, 13 ndatoorucheya maningi rimani mwanga namwasa oi balanga Titu kandam’fwaidhe. Ee-no ndatoolanyana na abali aweo nodhowa wu Masedoniya.

14 Mbwenye ndinosimba Nlungu oi hora dhothene unonisogolela vambo-i na Kristu kalanga ninga nili anyakhondo okozeela dhowa maganyali. Thitho dhela mwa i-yo kwema lonukhela pama loidhiwa Nlungu linaamwadheya vali vothene. 15 Namwasa oi wa Nlungu nili kwema lonukhela pama loonga vya milanyu ya Kristu, yoi inovwiwa naatu anofuna mavulumuchiwa naatu anofuna manongiwa. 16 Waatu anodhowa manongiwao nili kwema laukwa linosogolela wuukwa, mbwenye waatu anodhowa mavulumuchiwao nili kwema lapama la ingumi linosogolela wu ingumi. N’nga mbaani uli ofwanelela laba basa leli? 17 I-yo nili ofwanelela, namwasa oi madhu a Nlungu kaninoaira goso ninga munoirela atu anjinji, mbwenye ninolaleela moona rima movwelana na vinofwanela irana anamafunjedha a Kristu. Nirumiwile na Nlungu thitho ninoirana vyevi vamethoni va Nlunguo.

3 N’nga ninaaroma okoka dhiirela umboni okhene? N’nga kofuneya ira nikaena makarta oniirela umboni odha wa nyo venango okhumela wa nyo ninga munoirela atu enango? 2 Nyo muli karta li-u, lolembiwa mirimani mwi-u, loidhiweya na loleriwa naatu othene. 3 Namwasa oi vinooneya ira muli karta lokhumela wa Kristu lolembiwa na i-yo arumiwi a Nlungu. Kartalo kai lolembiwa na tinta mbwenye na zimu wa Nlungu waingumi. Kai lolembiwa vamatabwani a mabwe mbwenye lolembiwa mirimani mwinyu.

4 Dhela mwa Kristu, ninooda onga vyevi molimba rima vamethoni va Nlungu. 5 Kaninaonge ira nili ofwanelela laba basa leli namwasa wa kopolo dhi-u, mbwenye nili ofwanelela laba basa leli namwasa wa Nlungu, 6 liye atooniona ira nili ofwanela kala arumiwi a vwelano lipya, a-kala dhela mu malamulo olembiwa, mbwenye dhela mu zimu. Malamulo olembiwa anodhi-a wukwa, mbwenye zimu unodhi-a ingumi.

7 Malamulo anodhi-a wukwa, mbenao thitho alembiwile vamatabwani a mabwe, tatoodhana titimi-o nlukhulu maningi, moi Aisraeli kataodile ing’anechecha kove ya Mose namwasa owala wa titimi-o oi vasogolovee watoomala. 8 N’nga zimu kunofwanela kaana titimi-o nlukhulu kwaranya veva? 9 Akala malamulo anodhi-a wukwa tatookaana titimi-o, longomano linofwanela kaana titimi-o kwaranya veva. 10 Naaliwene thitho malamulo alembiwile vamatabwani a mabwao oi tatookaana titimi-o, titimi-oliwa litomala namwasa oi vasogolo viwa vatoodha titimi-o nlukhulu kwaranya loromanle. 11 Akala malamulo olembiwa oi tatookaana titimi-o vasogolovee tongomala, kuongela ira malamulo oi katinodha mala tanodha kaana titimi-o nlukhulu kwaranya vevo.

12 Voi nitokaana idedi-edho yei, nitookaana ufulu wethene oonga, 13 a-kala ninga Mose oi anookhunela kovee na nguwo ira Aisraeli ta-aone mala wa titimi-o lo-odimbelalo. 14 Thitho mathuulelwiwa atofungeya. Fiyedha va-eeni, nguiyo inokalave yokhunela vwelano lawale laleriwanga, namwasa oi inokhumi-iwa dhela mwa Kristu baa-i. 15 Fiyedha va-eni, vyalembile Mose vyaleriwanga, mirimiwa inokalave yokhuneleya. 16 Mbwenye mutu awelela noroma m’lambela Yohova,* nguiyo inokhumi-iwa. 17 Yohova* ndi zimu thitho vanofwanyeya zimu wa Yohova,* vatokala ufulu. 18 I-yo othene nina kove dho-okhunela thitho nili ninga masupeyo oi anooni-a titimi-o la Yohova.* Naoni-anga titimi-oli, ninochinja nokala ninga ifwanafwani-oyee thitho ninooni-a titimi-o mowenjedheleya wenjedheleya* mofwanafwana na mwanichinjele Yohova,* oi ndi zimu.

4 Ee-no voi nitokaana urumiwi wen’na movwelana na tangaranga dhathonyi-edhiwile i-yo, kaninofooka. 2 Mbwenye nito-iya vyongo vyova-a manyadho vyoireya mwasegeredo, thitho kaninoira vyongo mwainyengo venango bendi-a madhu a Nlungu. Mbwenye voiri-a ira imbarimbari iidhiweye, nili ifwanafwani-o yapama wa mutu uliwethene vamethoni va Nlungu. 3 Akala milanyu inolaleela i-yo njokhuneleya, njokhuneleya waatu anodhowa manongiwa, 4 atu o-ororomela oi nlungu wahora* ino utofunga mathuulelwiwa ira ta-aone wala wa milanyu yapama yatitimi-o yoonga vya Kristu, oi ndiifwanafwani-o ya Nlungu. 5 Namwasa oi kaninolaleela vya milanyu yoonga vya i-yo mbwenye yoonga vya Yesu Kristu, ira liye ndi Mbwiye thitho i-yo nili adhaarinyu namwasa wa Yesuo. 6 Voi Nlungu ngwaongile ira: “Wala ukhumele mu isini,” thitho vo-indi-edha basa khove ya Kristu utomoneela mirimi-u ira iwale na titimi-o lokhuza idhiwa Nlungu.

7 Mbwenye nitokaana fuma yen’na muviya vya ulongo, ira kopolo yokwaranya yobaliwana, ikhumele wa Nlungu a-kala wa i-yo. 8 Ninofinyiwa mundhila dho-iyana-iyana, mbwenye kaninoimwanana puluputa. Ninomaliwa zelu, mbwenye a-kala fiyedha rambulela votawela.* 9 Nino-ara-ariwa, mbwenye Nlungu kanoni-iya. Ninogwi-iwa vathi, mbwenye kaninonongeya. 10 Hora dhothene na-ara-ariwanga ninovilela ninga mwairele Yesu thitho ninoirana vyevi ira ingumi ya Yesu ioneele okoka wa i-yo. 11 I-yo atu aingumi hora dhothene ninooda kala vangovi yoi ninooda phiwa namwasa wa Yesu, ira ingumi ya Yesu ioneele okoka manungoni mwi-u oi anooda wukwala. 12 Ee-no angalive ira ingumi yi-u ili vangovi, vyevi vinodhi-a ingumi wanyo.

13 I-yo nitokaana iroromelo yofwanafwana na vyalembiwile ira: “Ndatookaana iroromelo, moi ndatoonga.” Ee-no i-yo thitho nitokaana iroromelo moi ninoonga, 14 voidhiwa ira am’venyathi-idhe Yesu unodha nivenyathi-a thitho i-yo ninga mwam’venyathi-idhe liye Yesu, thitho unodha nivelela wa Yesuo vambo-i nanyo. 15 Namwasa oi vyevi vitoireya ira viukami-eni. Thitho vyevi vitoireya ira riya rima ulukhulu weo wawenjedheleye udhowenave wenjedheleya namwasa oi atu anjinji anolobela mosimba thitho vyevi vinoiri-a ira Nlungu atitimi-iwe.

16 Ee-no kaninofooka. Mbwenye angalive ira umuthwi-u waundhe unaamala, umuthwi-u wawari unodhowanave saka-edhiwa upya dambo nadambo. 17 Angalive ira nyarwa* dhinogumanana i-yo ndi dhahora yoyeva thitho dhing’ono, dhinoniiri-a ira niwachele titimi-o nlukhulu loi thitho ndi lodhowa nodhowa, 18 vanothuulela i-yo vyongo vyo-ooneya, a-kala vyooneya. Namwasa oi vyongo vyooneya pya hora yoyeva, mbwenye vyo-ooneya pyodhowa nodhowa.

5 Nitoidhiwa ira nyumbi-u yavailambo yavathivano venango ira tenda leli, ladhafudheya, ninodha kaana nyumba yokhumela wa Nlungu. Yeniyo inodha kala nyumba yo-omangiwa na mandha, mbwenye inodha kala yadhulu thitho yodhowa nodhowa. 2 Namwasa oi nyumba inokala i-yuila ninaadumbela thitho ninofunechecha wara nyumbi-u yadhulu, 3 moi nadhaiwara, kaninodha kalave mandhave. 4 Mwaimbarimbari, tendani munokala i-yo ninaadumbela nonyemeliwa, a-kala namwasa ofuna iungula, mbwenye ira niware nyumba inango, naifunelo yoi tutuli-u loi linooda wukwali livoloweliwe limburo na ingumi. 5 Nlungu ngwanikozeeli-edhe ira niwachele vyongo vyevi. Liye atooniva-a zimu ira ukale izindiyelo ya vyongo vinodha sogolou.

6 Ee-no hora dhothene ninokala olimba rima thitho ninoidhiwa ira vili i-yo na nyumbi-uila manungoni, nili undendai na Mbwiye. 7 Namwasa oi ninowenda mosogoleliwa nairoromelo, a-kala mosogoleliwa na vyongo vyooneya na metho. 8 Mbwenye ninolimba rima thitho nili osangalala kala vambo-i na Mbwiye, malo mokaana manungo enala. 9 Ee-no masiki nikale vaduzi venango undendai na liye, ifunelwi-u ilukhulu choi nikale orumeleya wa liye. 10 Namwasa oi mutu uliwethene wa i-yo unodha oneela wu pando otongela miselu wa Kristu, ira mutu uliwethene awachele yotuvayee movwelana na vyaira liye angana manungo enala, akala vyali vyapama venango vyothakala.

11 Ee-no voi ninoova Mbwiye, ninodhowanave funji-a atu thitho Nlungu unoidhiwa pama ifunelo yi-u. Mbwenye ninororomela thitho ira nyo, ithuulela rima inyu inoidhiwa pama ifunelo yi-u. 12 Kaiira nite roma okoka dhiirela umboni okhene. Mbwenye ninouiri-ani kaana mwasa odhititimi-ana namwasa wa i-yo, ira muwakhule atu anodhititimi-a voona maoneelo aundhe, a-kala vili rimani. 13 Akala nili anami-ala, vili e-no namwasa wa Nlungu. Mbwenye akala nili azelu, ndivyokami-a wa nyo. 14 Udhivela una Kristu unonikanyi-edha, namwasa oi nitosikimizela ira mutu m’mbo-i atookwela atu othene, namwasa oi atu othene tatoomala wukwa. 15 Liye atookwela atu othene ira atu ana ingumi ta-akaena ingumi yodhisangalali-a okhene, mbwenye takaena ingumi yosangalali-a mutu aakwele ongovenyathi-iwa.

16 Romela va-eeni kaninoona mutu mwaututu. Angalive ira nitom’monavo Kristu mwaututu, va-eeni kaninom’monave e-no. 17 Moi ee-no akala mutu uliwethene ngovwelana na Kristu, liye ndi mutu m’pya.* Vyongo vyawale vitomala, va-eni vali vipya. 18 Mbwenye vyongo vyothene pyokhumela wa Nlungu, wenuo anikami-idhe ira nikale ovwelana na liye dhela mwa Kristu, thitho aniva-idhe urumiwi okami-a ira atu tavwelane okoka na Nlungu. 19 Urumiwee ngoi nilaleele ira Nlungu atoovwelani-a ilambo na liye dhela mwa Kristu, moi kabanle vyodawa viwa, thitho utoniva-a basa lolaleela milanyu yokami-a atu ira tavwelane okoka na Nlungu.

20 Ee-no nili anamaimelela malo mwa Kristu, kalanga ninga Nlungu unaa asembezela atu dhela mwa i-yo. Ninga atu anolaba basa malo mwa Kristu ninovepa ira: “Muvwelane okoka na Nlungu.” 21 Mutu oi kaana vyodawa, Nlungu atoom’velela ninga sembe ya vyodawa* namwasa wa i-yo, ira dhela mwa liye, Nlungu anionenga kala olongomana.

6 Vinolaba i-yo basa vambo-i na liye, ninoulimbi-ani ira kamuwachele riya rima ulukhulu wa Nlungu noluza ifunelo yoriya rimao. 2 Namwasa oi liye aongile ira: “Vahora yorumeleya ndatouvuruwana, thitho vadambo laivulumucho ndatoukami-a.” Mwaimbarimbari, yen’na ndi hora yaimbarimbari yorumeleya. Penene ndi dambo laivulumucho.

3 Kaninoira yongo iliyothene yosukwali-a, ira atu ta-afwanyele mwasa urumiwi-u. 4 Mbwenye ninothonyi-edha mundhila iliyothene ira nili arumiwi a Nlungu. Ninoirana vyevi vovilela vyongo vinjinji, vogumanana nyarwa, vorambulela vyongo vyofuneela, vogumanana vyongo vyorucha, 5 vokhomiwa, e-liwa perezo, gereve, volaba basa mwathindhi, a-gona thitho a-dya. 6 Ninothonyi-edha thitho vyevi vokala ochena, oidhiwa vyongo, oleva rima, oriya rima, vosogoleliwa na zimu ochena, vothonyi-edha udhivela o-okaana inyengo, 7 voonga vyaimbarimbari thitho vokaana kopolo ya Nlungu. Mbwenye ninoirana vyevi votukula mafwaramento a longomano* wu dhandha lodyana na lazwele, 8 votitimi-iwa no nyoziwa thitho voongeliwa vyongo vyothakala na vyapama. Ninooniwa ninga atu ainyengo, mbwenye nili oona rima, 9 ninga atu o-oidhiweya mbwenye nili oidhiweya pama, ninga atu ofwanelela phiwa, mbwenye nilive aingumi, ninga atu olangiwa mbwenye kaninofiyedhela phiwa, 10 ninga atu osukwala mbwenye osangalala hora dhothene, ninga atu osauwa mbwenye ofumi-a atu anjinji thitho ninga atu o-okaana iliyothene mbwenye okaana vyongo vyothene.

11 Nikanle nionganga na nyo abali awu Koritiyo, i-yo nitodhula maningi mirimi-u. 12 I-yo ninouwoni-ani mokwakwanela udhiveli-u, mbwenye nyo kamunonioni-a udhivelinyu mokwakwanela. 13 Ee-no ndinoongana nyo ninga a-imanga, nyo thitho muirengana vyevyo, mudhule maningi miriminyu.

14 Kamumangeleliwe goli vambo-i naatu o-ororomela, namwasa oi muli o-iyana. N’nga vatokala vwelana vari va longomano na a-vwela malamulo? N’nga vatokala vwelana vari va njeza na isi? 15 N’nga vatokala vwelana vari va Kristu na Beliyali?* N’nga vatokala fwanafwana vari va mutu ororomela* na o-ororomela? 16 N’nga vatokala vwelana vari va kachisi wa Nlungu na mafwano? Namwasa oi i-yo nili kachisi wa Nlungu waingumi, ninga mwaongele Nlungu ira: “Ndinodha kala vari viwa thitho ndinodha wenda vari viwa. Ndinodha kala Nlungwiwa thitho aliwa anodha kala atwanga.” 17 “‘Ee-no mukhumevo vari viwa thitho mu-iyane naaliwa,’ uongile e-no ndi Yohova* ‘kamusakwinye yongo yothakali-iwa,’” “‘thitho miyo ndinodha uwachelani.’” 18 ‘“Ndinodha kala Babinyu thitho nyo munodha kala a-imanga aalombwana na aa-iyana,’ uongile e-no ndi Yohova* Wakopolo Dhothene.”

7 Odhiveliwiwa abali, voi nitolanyedhiwa vyongo vyevi, dhoweni nidhicheni-e thitho ni-iye yongo iliyothene yothakali-a manungo na zimu, ira nikale ochena vanoova i-yo Nlungu.

2 Munidhulele miriminyu.* I-yo kanidawele mutu uliwethene, kanithakali-idhe mutu uliwethene thitho kaninyengelele mutu uliwethene. 3 Voonga vyongo vyevi kaiira ndinaauombani landu. Namwasa oi nditoonga wale ira nyo muli mirimani mwi-u, ira nikwe vambo-i venango thitho onga ira nikaena ingumi vambo-i nanyo. 4 Ndinoonga nanyo mothathuwa maningi, thitho ndinogaya maningi namwasa wanyo. Nditolimbi-iwa maningi thitho ndinosangalala maningi vanyarwa dhothene dhinogumanana i-yo.

5 Ningafiile wu Masedoniya kanavumileve mbwenye natoodhowanave gumanana nyarwa dho-iyana-iyana. Atu enango tanooniruni-a thitho nanookhumbanyedha mipingo. 6 Mbwenye Nlungu oi unolimbi-a atu osukwala, atoonilimbi-a namwasa wa udha wa Titu. 7 Mbwenye a-kala namwasa wa udhawee baa-i, mbwenye thitho na moda mwam’limbi-idhe nyo. Liye atoonidhelana thitho milanyu yoonga ira munofunechecha ndiona, munaasukwala maningi thitho munaandikhumbanyedha. Thitho ndingavwide vyevi ndatoosagalala maningi.

8 Ee-no angalive ira ndatousukwali-ani namwasa wa karta langa, kandinodungunya. (Ndinoona ira kartalo latousukwali-ani, mbwenye lausukwali-idheni wahora yoyeva.) Angalive ira voroma ndatoodungunya, 9 mbwenye va-eeni ndinaasangalala. Kaiira ndinaasangalala namwasa oi mwatoosukwala, mbwenye namwasa oi sukwalao watouiri-ani chinyuwa. Voi mwatoosukwala movwelana naifunelo ya Nlungu, vyaulembeleni i-yovyo kavyauphei-idheni. 10 Sukwala movwelana naifunelo ya Nlungu unoiri-a mutu chinyuwa novulumuwa thitho mutu kanodungunya namwasa wa vyevyo. Mbwenye sukwala movwelana naatu ailambo, unodhi-a wukwa. 11 Thitho muone mwemo sukwala movwelana naifunelo ya Nlungu yei muukami-edheleni aliwa. Utoukami-ani kala athindhi maningi, utouiri-ani dhicheni-a thakaleliwana yongo yothakala, kala atu oova, funechecha chinyuwa, kala odhivelela thitho saka-edha vyodaweya. Mutooni-a ira muli ochena* muvikhundu vyothene vamwasula. 12 Angalive ira ndatoulembelani, kandiirile vyevyo namwasa wa mutu odauo venango odaweliuo, mbwenye ira viidhiweye vamethoni va Nlungu ira muli ofunechecha vwela madhwi-u. 13 Ngumwasiwa nitolimbi-iwa.

Mbwenye wenjedhela volimbi-iwa, natoosangalala maningi thitho ningaoni ira Titu unaasangalala, namwasa oi nyo mwethene mwatoom’limbi-a. 14 Ndatoom’mwandela mogaya vya nyo thitho kamwandiva-idhe manyadho. Mbwenye vyaongile miyo mogaya wa Titu pyaimbarimbari, ninga mwemo muli aliwa vyongo vyothene vyauwandenleni i-yo. 15 Thitho liye unoudhiveliwanani maningi nyo mwethene athuulela vya vwela winyu, na moda mwam’mwacheenle nyo mwalemezo maningi. 16 Ndinosangalala maningi namwasa oi munondilimbi-a vavyongo vyothene vinoira nyo.

8 Va-eni abali, ninofuna niuidhiwi-eni vya riya rima ulukhulu wathonyi-edhe Nlungu wu mipingo yau Masedoniya. 2 Vyagumanana aliwa vyowesedha vilukhulu namwasa wa nyarwa, tanoosangalala maningi thitho tanooni-a va-a modhala mandha angalive ira tali osauwa maningi. 3 Aliwa tatooira vyongo movwelana na vyaode aliwa, thitho ndinoairela umboni ira tatooira vyokwaranya veva. 4 Aliwa mbaromile okhene nivepha mokhumela vathi varima ira niava-e ngari yoi naaliwene thitho tavelele vyotuva vyatangaranga naifunelo yoi tairena urumiwi okami-a atu ochena. 5 Thitho katairile vyadedi-edha i-yo baa-i khabe, mbwenye yoroma tatoodhilimbi-edha narima wethene m’labela Mbwiye adhamale atoonikami-a movwelana naifunelo ya Nlungu. 6 Ee-no natoom’limbi-a Titu ira voi ngu liye aromi-idhe basa logumanei-a vyovelela vinyu, nguliye thitho unofuna mari-a gumanei-a vyotuva vinyu vyatangaranga. 7 Nyo muli ofuma vavyongo vyothene, mutokaana iroromelo yolimba, munoonga mwadodoliso, munoidhiwa vyongo vinjinji, munoira vyongo vyothene mwathindhi thitho munodhiveliwana atu enango ninga munoudhiveliwanani i-yo. Ee-no mudhowenave kaana rima ofuna velela.

8 Kandinaaukanyi-edhani, mbwenye ndinoonga vyevi ira muidhiwe vyongo vinoira atu enango mwathindhi thitho ira ndione akala udhivelinyu ngwaimbarimbari. 9 Namwasa oi munoidhiwa riya rima ulukhulu wa Mbwii-u Yesu Kristu, ira angalive ira ali ofuma, atoosauwa namwasa wanyo, ira nyo mufume dhela mosauwa weuo.

10 Mbwenye maonelwanga mboi: Mungairile pama mari-a basa la vyovelelali, namwasa oi mwaliromile yawa imadhi thitho mwatoothonyi-edha rima ofunechecha irana vyevi. 11 Voi mwanoofunechecha irana vyevi, va-eeni mumari-e basa laromile nyo movwelana na vinanyo. 12 Nlungu unodhiveliwana yotuva yokhumela vathi varima, namwasa oi liye unofuna ira mutu avelelenga vinaode liye, a-kala vinokonda liye aoda. 13 Kandinofuna ira vikale vyo-orucha waatu enango, mbwenye wanyo vikale vyorucha. 14 Mbwenye ndinofuna ira vyongo vinjinji vina nyo vikami-e va vinorambulela aliwa, thitho vyongo vinjinji vina aliwa vikami-e va vinorambulela nyo ira vikale saasawa. 15 Movwelana na vinoonga malemba ira: “Mutu ana vyongo vinjinji kaana vyosimbwa injiva, thitho mutu ana vyongo vyoyeva kaana vyosimbwa yeva.”

16 Ninosimba Nlungu namwasa okami-a Titu ira aukhumbanyedhengani ninga munoirela i-yo. 17 Liye utovwela vyam’limbi-idhe i-yo irana, thitho voi unofunechecha kami-a, unodha weo mofunawee. 18 Thitho ninom’ruma vambo-i na bali mwinango oi unotitimi-iwa mipingo yothene namwasa wa vinoira liye vyokhuza milanyu yapama. 19 Kai vyevi baa-i, mbwenye atoosakuliwa thitho na mipingo ira awendenga vambo-i na i-yo vanovelela i-yo vyotuvavi. Ninovelela vyotuvavi ira Mbwiye atitimi-iwe thitho ira nithonyi-edhe ira ninofunechecha kami-a atu enango. 20 Ee-no kaninofuna ira mutu uliwethene anifwanyele mwasa va vyovelela vyaufulu vinodhana i-yovi. 21 Namwasa oi ‘ninosamalela vyongo vyothene moona rima, a-kala vamethoni va Yohova* baa-i, mbwenye thitho vamethoni vaatu.’

22 Abalala ninaaruma thitho na bali-u mwinango oi nitom’mwesedha mowelela welela thitho nitoona ira ngwathindhi vavyongo vinjinji. Va-eeni utooni-a thitho ira ngwathindhi maningi namwasa oi unouroromelani maningi. 23 Mbwenye akala munaam’kaikela Titu, ndinofuna ndiuwandeleni ira liye ngufwanga thitho ndinolaba basa vambo-i na liye voukami-ani. Venango akala munokaikela vyongo vilivyothene vyokhuza abali-uwala, aliwa mborumiwa na mipingo thitho anodhi-a titimi-o wa Kristu. 24 Ee-no athonyi-edheni ira munowadhiveliwana thitho muoni-e mipingo ira ninogaya namwasa wa nyo.

9 Voonga vya urumiwi okami-a atu ochenao, kandinofwanela ulembelani. 2 Namwasa oi nditoidhiwa ira mutokaana rima ofunechecha kami-a thitho ndinoonga vyevi mogaya waatu awu Masedoniya. Ndinoawandelecha ira va-eni abali awu Akaya takanle okozeya wa yawa imbo-i, thitho dhivelela winyu utoalimbi-a abali anjinji a weo. 3 Mbwenye ndinoruma abali wa nyo ira ugayelani unoira i-yo wa-akale wapezi, mbwenye mukale okozeya movwelana na vyaawandenle miyo. 4 Namwasa oi i-yo naatu awu Masedoniya nadha fiya ufwanyani mwa-anakozeye, i-yo vambo-i na nyo ninodha kaana manyadho namwasa oi naroromela ira munokozeya. 5 Ee-no ndioni ira ndi pama aruma abali ira tadhe weo i-yo na-anafiye, naifunelo yoi tadhaukami-eni kozeela vyotuva vyalanyedhile nyo ira munodha vivelela modhala mandha. Vyaira e-no yotuva inokala yangamadhi saka-edhiwa wale thitho vinodha oneelatu ira munoivelela modhala mandha, a-kala mokanyi-edhiwa.

6 Vamwasa wen’na, odhala moumeleliwa unodha a-nda vyoeva mbwenye odhala modhala mandha unodha a-nda vinjinji. 7 Mutu uliwethene aire vyongo visikimizele liye rimanimwee, a-kala mo-ofuna venango mokanyi-edheya, namwasa oi Nlungu unodhiveliwana mutu unovelela mosangalala.

8 Thitho Nlungu unodha uthonyi-edhani riya rimawee ulukhulu ira mwa-a rambulele vyongo vyofuneya vaingumi thitho ira mukaena vyongo vinjinji vyoukami-ani laba basa nlilothene lapama. 9 (Movwelana na vinoonga malemba ira: “Liye utogawela modhala mandha. Utova-a waatu osauwa, thitho longomanolee linodha kalavo modhowa nodhowa.” 10 Wenuo unovelela modhala mandha mbeu wa mulimbo dhala na yodya ira atu tadye, unodha uva-ani modhala mandha mbeu ira mudhale. Unodha wenjedhela thitho vyo-anda vya longomano linyu.) 11 Nlungu unaauraeli-ani va yongo iliyothene ira muode va-a modhala mandha mundhila dho-iyana-iyana thitho atu anaam’simba Nlunguo namwasa wa yotuva inyu inovelela i-yo waatu enango. 12 Namwasa oi urumiwi okami-a atula kaiira unokami-a atu ochena baa-i ira tafwanye vyofuneela, mbwenye unokami-a thitho ira atu anjinji tasimbenga Nlungu mu malobelwiwa. 13 Aliwa anolemeza Nlungu namwasa wa basa leli, anoira e-no namwasa oi nyo mutovwela milanyu yapama yoonga vya Kristu inolaleya nyo vakwecha thitho mutoava-a aliwa modhala mandha naatu enango othene. 14 Aliwa anoulobelelani wa Nlungu mosembezela thitho anothonyi-edha ira anoudhiveliwanani namwasa oriya rima ulukhulu uuthonyi-edheni Nlungu.

15 Ninom’simba Nlungu namwasa wa yotuvayee yapezi, yoi ndi ilukhulu.

10 Va-eni miyo Paulo, ndinousembezelani mo-arela Kristu oi ngofwasa thitho oriya rima, angalive ira ndinooneya kala ofooka ndakala nanyo, mbwenye olimba rima ndakala ulimburo n’nango. 2 Ndingadhiveliwile ira ndadha weo nda-aire vyongo vilukhulu vinodedi-edhela miyo a-ira voruni-ana naatu enango oi anoona ira i-yo natooira vyongo ninga atu amuilamboi. 3 Angalive ira ingumii-u chofwanafwana naatu enango othene, mbwenye kaninokhoma khondo mo-arela mathuulelo ailamboi. 4 Vyongo vinokhomana i-yo khondwila kai vyamuilamboi, mbwenye ndi mafwaramento akopolo aniva-idhe Nlungu thitho anooda gwi-a vyongo vyolimba. 5 Namwasa oi ninomali-a mathuulelo na yongo iliyothene inoimwanani-a idhiwa Nlungu, thitho ninogonji-a mathuulelo aliothene noamanga ninga nyaperezo ira tavwelenga Kristu. 6 Nyo mwadhathonyi-edha ira muli ovwela va yongo iliyothene, i-yo nili okozeya langa mutu uliwethene o-ovwela.

7 Nyo munoona vyongo movwelana na maoneelo aundhe. Akala mutu uliwethene unororomela rimanimwee ira ngunama-arela wa Kristu, athuulele thitho ira: Ninga muli liye nama-arela wa Kristu, i-yo thitho nili anama-arela a Kristu. 8 Mbwiye atooni-a kopolo ira niulimbi-eni, a-kala ufooki-ani. Thitho akala ndinofuna gaya mokwaranyi-a madile namwasa wa kopolodhi, kandinokaana manyadho. 9 Namwasa oi kandinofuna ira muthuulele ira ifunelo ya makartanga kuutuchani. 10 Voi atu enango anoonga ira: “Makartee anokaechana milanyu yakopolo, mbwenye liye adha unooneya kala ofooka thitho vyoonga vyee vinokala vyo-o-inda rima.” 11 Atu enao taidhiwe ira vinoongecha i-yo makartanimwi-u ningali wu limburo n’nango, ninodha ira thitho vimbo-ive vyevyo nadhadha weo. 12 Kaninodhiona ninga nili atu ofwanafwana naatu anodhigweli-a venango dhifwanafwani-edhela naatwao. Mbwenye atwao tadhisaka vo-indi-edha basa makhundwiwa katinovwechecha yongo iliyothene.

13 Mbwenye i-yo kaninodha dhititimi-a va vyongo vili undhe wa madile ava-iwile i-yo. Mbwenye ninodha dhititimi-a va vyongo vili wari mwa madile a ikhundu inimeedhe Nlungu, yeyo yafiile winyuo. 14 Ee-no kaninolupha madile a ikhundu i-yu, kalanga ninga ikhunduyo kinofiya winyuo namwasa oi aromile ngu-iyo fiya winyuo dhalaleya milanyu yapama yoonga vya Kristu. 15 Kaiira ninogaya undhe wa madile wa ikhundu yava-iwile i-yo namwasa wa basa la mutu mwinango. Mbwenye ninororomela ira iroromelo inyu yadhawenjedheleya, basa thitho linodha ulukhula mu ikhundu yi-u. Moi ninodha kaana vyoira vinjinji 16 naifunelo yoi nilaleele milanyu yapama wu vilambo vyaundendai kwaranya winyuo, ira na-agaye vabasa limadhi labiwa wale mu ikhundu ya mutu mwinango. 17 “Mbwenye mutu unogaya, agaenga mwa Yohova.”* 18 Namwasa oi mutu odhigweli-a ekhene kanorumeliwa, mbwenye um’rumele Yohova.*

11 Ndingadhiveliwile ira mundirumeli-e ira ndidhigweli-e vang’ono. Thitho imbarimbari choi mutomaandirumeli-a wale. 2 Ndinoukaelanani sanje ninga mwemo Nlungu munoukaelanani liye, voi ndatoulanyedhani ira mutheliwe na lombwana m’mbo-i oi ndi Kristu, thitho ndinofuna nduuveleleni ninga namwali ochena wa liye. 3 Mofwanafwana na mwemo nyowa mwam’nami-edhe aliwa Eva, inondikhumbanyi-a choi venango mathuulelwinyu anooda bendi-iwa moi kamunakaleve oona rima thitho ochena. Mbwenye mutu wa Kristu unofwanela kala oona rima thitho ochena. 4 Namwasa oi mutu mwinango adha wanyo dhalaleela vya Yesu o-iyana na wam’laleele i-yo, venango taudhelanani zimu o-iyana na uwacheenle nyo, venango milanyu yapama yo-iyana na iwacheenle nyo, nyo munom’mwachelecha mutu wenuo. 5 Mbwenye va yongo iliyothene inoira miyo, kandinodhiona ira ndili wang’ono vofwanafwani-edhela na arumiwinyu avadhulwao. 6 Akala kandina dodoliso loonga, kaiira ndili o-oidhiwa vyongo thitho ndatouoni-ani vyevi mundhila iliyothene na muvyongo vyothene.

7 N’nga ndatoodawa vadhiyevi-idhe miyo ira nyo mugweli-iwe vahora yalaleela miyo mosangalala milanyu yapama ya Nlungu nyo a-ndipagali? 8 Ndatookami-iwa khumela wu mipingo inango thitho vyali ninga ndaira abela naifunelo yoi nduulabeleni. 9 Mbwenye vahora yarambulela miyo vyofuneeleya ndingali weo, kandanyemeli-idhe mutu uliwethene namwasa oi abali akhumela wu Masedoniya tatoondiva-a vyongo vyothene vyafuuneela miyo. Mwaimbarimbari ndatoodhilimbi-edha ira nda-aunyemeli-eni mundhila iliyothene, thitho ndinodhowanave ira e-no. 10 Ndinaaonga imbarimbari ya Kristu ee-no ndinodha dhowanave onga vyevi mogaya visa vyau Akaya. 11 N’nga ndinoira vyevi namwasa wan’ni? N’nga ndi namwasa oi kandinoudhiveliwanani? Nlungu unoidhiwa ira ndinoudhiveliwanani.

12 Ndinodhowanave irana ninga vinoira miyo, ira ndimiyali-e atu anodhionga ira tali saasawa na i-yo va vyongo vinogaya naaliwa. 13 Atu enala ndi arumiwi onama, anamalaba ainyengo thitho anodhiiri-a oneyanga ninga mbaarumiwi a Kristu. 14 Vyevi kai vyodabwi-a, namwasa oi naliyene Satana unodhiiri-a oneyanga ninga ngelo wapama. 15 Ee-no kai vyodabwi-a akala arumiwee thitho tanodhiiri-a kala ninga arumiwi a longomano. Mbwenye magomelwiwa tanodha kala ovwelana na mabasiwa.

16 Ndinoonga okoka ira mutu uliwethene kandione ninga o-okaana zelu. Mbwenye akala munondiona ira ndili o-okaana zelu, muire rumela ira pyievyo vili miyo, ira namiyene thitho ndigaye vang’ono. 17 Vinoonga miyovi kandinovionga ninga mutu o-arela ifwanafwani-o ya Mbwiye. Mbwenye ninga mutu o-okaana zelu thitho ogaya na odhinyindela maningi. 18 Voi atu anjinji anogaya namwasa wa vyongo vyailamboi. Namiyene thitho ndinogaya. 19 Nyo kamunorucheya irana vyongo naatu o-okaana zelu namwasa oi munodhiona ira muli atu azelu maningi. 20 Mbwenye munorumeli-a mutu uliwethene uonani ninga dhaari, otukula vyongo vinyu, ouwakani vyongo vinyu, odhiona ninga mutu wavadhulu kwaranya nyo thitho mutu uliwethene oukhomani puradha.

21 Chiyongo yonyozeya wa i-yo onga vyongo vyevi, namwasa oi ninooneya ninga niirile vyongo mofooka.

Mbwenye akala atu enango anoira vyongo molimba rima, ndinoonga ninga mutu o-okaana zelu, miyo thitho ndinoira vyongo molimba rima. 22 N’nga aliwa mba Aebere? Namiyene thitho saasawa. N’nga aliwa mba Aisraeli? Namiyene thitho ndili mu Israeli. Venango aliwa ndi mbumba* ya Abrahamu? Namiyene thitho saasawa. 23 N’nga venango aliwa mbaarumiwi a Kristu? Ndinowakhula ninga nami-ala, miyo ndili rumiwi wa Kristu kwaranya aliwa. Nditolaba mabasa manjinji kwaranya aliwa, ndatoomangiwa fendo dhinjinji dhene, ndatookhomiwa mo-olengeseya thitho fendo dhinjinji dhene nda-adhi vang’ono funa wukwa. 24 Fendo 5 Ayuda tatoondikwapula michamu 40 khumi-avo umbo-i. 25 Fendo taaru tatoondikhoma na golomondo. Fendo imbo-i tatoondiponyedha mabwe. Barko latoondithweela fendo taaru. Fendo imbo-i ndatookala vabara nama-iyu na nathana wethene. 26 Ndatoowenda maulendo manjinji, ndatoogumanana vyoophi-a mi-inje thitho gumanana mambavwa ndhila. Ndatoogumanana thitho vyoophi-a khumela waatu aziza langa, atu amaziza enango, sidadi, kokolani, vabara na vari vaabali ainyengo. 27 Ndanoolaba mabasa orucha na okhumi-a kaluma. Hora dhinjinji nama-iyu kandagonecha, ndanookaana ndhala na tona thitho hora dhinjinji kandadyecha, ndanoodidileliwa thitho kandana vyowara vyokwakwanela.*

28 Wenjedhela vavyongo vyevi, vatokala thitho yongo inango yoi fiyedha va-eni inondiruchi-a mathuulelo dambo na dambo. Ndinokhumbanyedha mipingo yothene. 29 N’nga mbaani unafooke miyo thitho a-fooka? N’nga mbaani unasukwali-iwe, miyo a-vithakaleliwana?

30 Akala ndinofwanela gaya, ndinogaya va vyongo vinooni-a vyofooka vyanga. 31 Nlungu thitho Baba wa Mbwiye Yesu oi ngunofwanela titimi-iwa dhowa nodhowa, unoidhiwa ira kandinaanama. 32 Wu Damasku, namatonga wa mwene Areta atoo-ela anamaing’anela a amilango a sidadi la Damasku ira tandi-inde. 33 Mbwenye atu tatoondi-ela mugogoda lukhulu nondithithi-edhela na vajanela la panda wa sidaduo moi ndatoovulumuwa mandhanimwee.

12 Ndinofwanela dhititimi-a. Ee-no ndinoonga mwasa okhuza masopenya na milanyu yokhumela wa Mbwiye, angalive ira dhititimi-a kuna basa. 2 Nditoidhiwa mutu mwinango ovwelana na Kristu vyawa 14 vivirile, mutu wenuo atootukuliwa dhowa dhulu waneraru. Akala atukuliwile na manungweene venango khabe, miyo kandinoviidhiwa. Unoviidhiwa ndi Nlungu. 3 Pyaimbarimbari ira nditom’mwidhiwa mutu wenuo. Akala atukuliwile na manungweene venango khabe, miyo kandinoviidhiwa. Unoviidhiwa ndi Nlungu. 4 Liye atootukuliwa dhowa Paradaizoni, thitho angali Paradaizonimo atoovwa madhu oi mutu kanaode aonga venango rumeli-iwa aonga. 5 Ndinodha dhititimi-a vamwasa okhuza mutu wenuo, mbwenye kandinodha dhititimi-a vya miyo, mbwenye ndinodha dhititimi-a vamwasa wa vyofooka vyanga. 6 Mbwenye angalive ira ndidhititimi-e, kandinaadhigweli-a namwasa oi ndinaongenga imbarimbari. Mbwenye kandinoirana vyevyo namwasa oi kandinofuna ira mutu mwinango andititimi-e maningi kwaranya va vyongo vinoona liye venango vinovwa liye wa miyo, 7 namwasa oi ndatooni-iwa masopenya avakhundu.

Mbwenye ira nda-adhigweli-e mokwaranyi-a madile, ndito-eliwa minga manungoni mwanga yoi inondilatha ninga ngelo wa Satana thitho inondiiri-a ira ndivwenga upha hora dhothene, naifunelo yoi nda-adhigweli-e mokwaranyi-a madile. 8 Miyo ndatoom’sembezela Mbwiye fendo taaru ira andikhumi-e mingila manungoni mwanga. 9 Mbwenye atoondiwandela ira: “Riya rima ulukhulu uuthonyi-edhe miyo kokwakwanela, namwasa oi kopolodhanga dhinooneela pama maningi we wakala ofooka.” Ee-no ndinodha dhititimi-a maningi va vyofooka vyanga, ira kopolo dha Kristu dhikaleve va miyo ninga tenda. 10 Ee-no ndinosangala nofooka, nyoziwa, rambulela vyofuneela vaingumi, a-ra-ariwa na vyorucha vinango namwasa wa Kristu. Namwasa oi vanokala miyo ofooka, paevo vanokaana miyo kopolo.

11 Va-eni ndili mutu odhigweli-a. Mbwenye ngunyo mwandikanyi-edhe irana vyevi, namwasa oi mwanoofwanela ndisimba va vyongo vyapama vyairile miyo. Mbwenye va yongo iliyothene inoira miyo kandinodhiona ira ndili wang’ono vofwanafwani-edhela na arumiwinyu avadhulwao, angalive ira munondiona ira kandili yongo. 12 Mwaimbarimbari nyo mwatoona umboni oi miyo ndili rumiwi. Mwatoona ira ndatoovilela maningi, ndatoira vizindiyelo, vyongo vyodabwi-a na mabasa a kopolo. 13 N’nga vatokala ndhila inango thitho yoi ndinooda onga ira mwatookaana ngari yoyeva vofwanafwani-edha na mipingo yothene, khumi-avo akala miyo kandali tolo onyemela wanyo? Ndinaauvephani ira mundilevelele va yodawa yei yoi kandali tolo onyemela wa nyo.

14 Miyo ndili okozeya udha wa nyo, thitho yen’na ndi fendo yaneraru kala okozeya. Mbwenye kandinodha kala tolo onyemela namwasa oi kandinofuna vyongo vinyu, mbwenye nyo. Voi kai izo yaa-ima lokota fuma ira idhakami-e anamabaliwa, mbwenye anamabala mbanofwanela lokota fuma ira idhakami-e a-imiwa. 15 Mbwenye miyo ndinodha i-ndi-edha basa vyongo vyanga vyothene nodhivelela na rimanga wethene namwasa wa nyo, thitho ndinodha irana vyevi mosangalala. Akala miyo ndinoudhiveliwanani maningi, n’nga nyo munofwanela ndidhiveliwana vang’ono? 16 Mbwenye mwandhila iliyothene, kandaunyemeli-idheni. Mbwenye nyo munoongecha ira, ndatounami-ani thitho ndatoira vyongo mwainyengo. 17 Mbwenye miyo kandaunyengeleleni dhela mwa mutu uliwethene mwaatu aarumile miyo wa nyo. 18 Ndatoom’limbi-a Titu ira adhe weo vambo-i na bali mwinango. N’nga Titu atounyengelelani yongo iliyothene? N’nga kanawendile vambo-i mu zimu thitho ira vyongo mofwanafwana?

19 N’nga hora yothene yen’na munothuulela ira ninaadhibarela vamethoni vinyu? I-yo ninoonga vyevi vamethoni va Nlungu vambo-i na Kristu. Mbwenye abali, ninoirana vyevi ira niulimbi-eni. 20 Ndinoova ira ndhadha fiya, venango kandinodha ufwanyani ninga munofunela miyo thitho venango miyo kandinodha kala ninga munofunela nyo. Venango apwase vanodha kala ndale, bivu, nyanyui-ana, kangana, mafyeda, dhiulukhuli-a na a-vwelana. 21 Venango ndadha wela okoka, Nlungwanga unodha rumeli-a ira ndikaena manyadho vari vinyu. Thitho venango ndinodhanla namwasa waatu anjinji adawile mbwenye a-chinyuwa vakaleloliwa lothakala, unyambi,* na kaleloliwa lo-okaana manyadho* linoirecha aliwa.

13 Va-eni yen’na ndi fendo yaneraru kozeela ulendo odha weo. “Mwavwa mwasa uliwethene muusimikizelenga mwavwa umboni waatu ambili venango araru.” 2 Angalive ira kandili nanyo weo vili ninga ndili nanyo fendo yanambili. Mbwenye ndinovaelatu wenjeli-a atu adawile na enango othene ira ndadhadha okoka weo kandinodha ukaelanani tangaranga. 3 Ndinoonga e-no namwasa oi munofuna umboni osimikizela ira Kristu oi kai ofooka mwanyo mbwenye wakopolo, unaaonga dhela mwa miyo. 4 Liye atookhomeliwa vaimurini namwasa ofooka, mbwenye utokaana ingumi namwasa wa kopolo ya Nlungu. Pyaimbarimbari ira i-yo nili ofooka vambo-i na liye, mbwenye ninodhakala na liye namwasa wa kopolo ya Nlungu inolaba basa mwanyo.

5 Mudhowenave dhisakasaka ira muone akala mutokaana iroromelo. Mudhowenave dhisakasaka ira muidhiwe ira muli mutu oi a-vi. N’nga kamunoidhiwa ira muli ovwelana na Yesu Kristu? Munofwanela idhiwa vyevi khumi-avo akala kamuli orumeleya. 6 Ndinororomela ira munodha zindiyela ira nili orumeleya.

7 Va-eni ninolobela wa Nlungu ira mwa-aire yodawa iliyothene. Ifunelwi-u kaiira nioneye ira nili orumeleya, mbwenye ira nyo muirenga vyongo vyapama, angalive ira i-yo nioneye ninga o-orumeleya. 8 Namwasa oi i-yo kaninoira yongo iliyothene yoruni-ana na imbarimbari, mbwenye vyovwelana na imbarimbari baa-i. 9 Ninosangalala hora dhothene nakala ofooka mbwenye nyo kala akopolo. Thitho yongo inolobelela i-yo choi muchinje vyongo vinofwanela nyo chinja. 10 Ngumwasiwa ndinoulembelani vyongo vyevi ndingali uno, ira ndadhadha nda-alabi-edhe basa mothakala kopolo dhindiva-idhe Mbwiye, ira ndiulimbi-eni a-kala ufooki-ani.

11 Vomari-edha abali, mudhowenave sangalala, chinja mathuulelo, limbi-iwa, kaana mathuulelo ovwelana thitho kala mwarendele. Mwaira e-no, Nlungu uli waudhivela thitho warendele unodha kala nanyo. 12 Mumwenyulane mwaudhivela. 13 Atu ochena othene anoumwenyulani.

14 Nyo mwethene mukaena riya rima ulukhulu wa Mbwiye Yesu Kristu, udhivela wa Nlungu thitho maraeli-o a zimu ochena.