MADHU OROMA

Malemba Opambuleya tatoolembiwa movudheleliwa na Nlungu Muiebere, Muiaramu na Muigiriki. Ira atu a “maziza othene” taganyali na Madhu a Nlungu, vatoofuneela thapulela Malemba mu viongelo vinjinji. (Mateu 24:14) Mabukhu 27, romela Mateu fiyedha Apokalipse anoromoliwa ira “Malemba a Igiriki Aikristau.” Namwasa oi, mabukhu oromene alembiwile muigiriki na anamalemba Aikristau ovudheleliwa. Vyevi vyatooireya wari mwa vyawa 100 khumela vabaliwile Yesu.

Bibilya la Ilambo Ipya la Malemba a Igiriki a Ikristau, laromile khuma mu Ingeles mu yawa ya 1950. Ikhundu ilukhulu ikhumile va malemba a Igiriki oidhiweya pama a Westcott na Hort, oi anovwelana na mipukutu yoinjiva yawale maningi ya Igiriki. Bibilya la ilambo ipya latoothapulela malemba a Igiriki mororomeleya ninga mwafuneela aliwa. Bibilya la Ilololi litothapuleliwa khumela wu Bibilya la Ingeles likhumi-iwile mu 2013, loi litothapuleliwa mororomeleya. Ifunelo yi-u kuthapulela Bibilya loi to-o-iyana na mipukutu yoroma, thitho lovweya pama na lo-orucha leri. Mu Apendesi A mutokala miru yoi “Makhundo a-indi-edhe atu basa vothapulela Bibilya,” “Vili Bibilyanimu,” na “Vyongo vyaireile ira Bibilya lifiyedhele va-eeni.” Makhundo enala anoonga vyongo vi-areliwile vothapulela Bibilyali.

Dhina la Nlungu lavakhundu, loi Yohova, linofwanyeya maulendo 237 mu Bibilya la Ilambo Ipya Malemba a Igiriki Aikristau. Vaikhundu ya Apendesi 1 ya Bibilya leli nitoonga mwasee vili e-no thitho vatokala viruthiruthi. Voona funeya wa chena wa dhina la Nlungu noira atu othene oitana va dhina lelo ira tadhavulumuwe, Bibilyali litoweleli-edha dhina loi Yohova mumamburwee ofwanelela Mumalemba Opambuleya.—Mateu 6:9; Aroma 10:13.

Dhina loi Bibilya la Ilambo Ipya, likhumile va yolanyedha ya Nlungu yodhi-a ilambo ipya yolongomana, yeyo inofuna dhaganyali-a atu othene. (2 Pedru 3:13) Alimbo thapulela Bibilyali, oi tanom’dhiveliwana Nlungu, Namalemba Nlukhulu wa Malemba Opambuleya, tanodhivwa ira tatokaana izo yavakhundu wa liye. Ee, izo yothapulela mathuulelwee na vyoongaywee molinyali maningi. Lobelo li-u toi Bibilyali liganyali-e maningi atu oona rima anoleri thitho anodhilimbi-edha ira ‘takale oidhiwa imbarimbari molinyali.’—1 Timoteo 2:4.