The Second Letter John Write
1 Da me the older man,* I writing this letter to the woman who God na choose and to her children dem who I love with my whole heart. Da not only me love yor, but all the people dem who know the truth love yor too. 2 And da because the truth in our hearts and it will stay there forever. 3 We will get special kindness, mercy, and peace from God the Father and from his Son Jesus Christ. And they will show us love and teach us the truth.
4 I wor really happy because I saw da some of your children following the truth just how the Father command us. 5 So, you the woman who God na choose, I begging you, let love each other. (This commandment I writing you not new. Da the same one we been having from the beginning.) 6 And to get love mean to continue to obey his commandment dem. Da this commandment yor hear from the beginning, yor mon continue to show love. 7 Because in the world, they get plenty people dem who can fool other people. Da this people dem who not believe da Jesus Christ came as human being. Anybody who can talk this kindna thing, da the person who can fool other people, and da person against Christ.
8 Yor be careful so da yor will not lose the thing dem yor na work hard for. Then yor will be able to get all the blessing dem da God get for yor. 9 Anybody who teach thing dem da different from Christ teaching, da person not united with God. But the person who continue to follow the thing dem Christ teach us, da person united with the Father and with the Son. 10 If anybody come to yor and start teaching yor thing dem da not agree with what Christ teach us, yor mon not let da person to enter your house, or even say hello to him. 11 Because anybody who tell da person hello, they supporting the wicked thing dem he doing.
12 Even though I get plenty thing dem to tell yor, I not want write everything in letter.* But I really want come to yor for us to talk face to face so da yor can really be happy.
13 The children for your sister who God na choose, say I mon tell you hello.