Ow’oluganda Omulala Eyagattibwa ku Kakiiko Akafuzi

KU Lwokusatu ku makya, nga Jjanwali 24, 2018, ab’oluganda ku Beseri y’omu Amerika ne Canada baasanyuka nnyo okuwulira ekirango kino: Ow’oluganda Kenneth Cook, Jr., alondeddwa okuba ku Kakiiko Akafuzi ak’Abajulirwa ba Yakuwa.

Ow’oluganda Cook yazaalibwa mu Pennsylvania, America, era eyo gye yakulira. Amazima yagayigira ku muyizi munne eyamubuulira bwe yali anaatera okumaliriza emisomo gye egya siniya, era yabatizibwa nga Jjuuni 7, 1980. Yatandika okuweereza nga payoniya owa bulijjo nga Ssebutemba 1, 1982. Oluvannyuma lw’okumala emyaka ebiri ng’aweereza nga payoniya, yayitibwa okuweereza ku Beseri, era obuweereza bwe obw’oku Beseri yabutandikira Wallkill, New York, nga Okitobba 12, 1984.

Mu myaka 25 egyaddirira, Ow’oluganda Cook yakola emirimu egitali gimu ku Beseri, omwali n’okukola omulimu ogw’okukuba ebitabo byaffe mu kyapa. Yawasa Jamie, mu 1996, era ne batandika okuweerereza awamu ku Beseri e Wallkill. Mu Ddesemba 2009, Ow’oluganda Cook ne mukyala we baasindikibwa okuweereza ku Watchtower Educational Center e Patterson, New York, era eyo Ow’oluganda Cook yaweerereza mu kitongole ekikola ku kuddamu ebibuuzo by’abantu. Mu Apuli 2016, bwe baali baakamala akaseera katono nga bazzeeyo e Wallkill, Ow’oluganda Cook ne mukyala we baasindikibwa okuweerereza e Brooklyn, New York. Nga wayise emyezi etaano, baagenda okuweereza ku kitebe kyaffe ekikulu e Warwick, New York. Mu Jjanwali 2017, Ow’oluganda Cook yalondebwa okuba omuyambi ku Kakiiko Akakola ogw’Okuwandiika akakolera wansi w’Akakiiko Akafuzi.