Branch Letter

Ababuulizi b’Obwakabaka Abaagalwa:

Tuli basanyufu nnyo okulaba engeri omulimu gwaffe gye gwakulaakulanamu mu East Africa mu mwaka gw’obuweereza 2007! Bapayoniya bangi ab’enjawulo n’aba bulijjo baweerezeddwa okubuulira mu bitundu ebitali bimu, era balina kinene nnyo kye bakoze mu mulimu gw’okubuulira. Omulimu gw’okuzimba ettabi lya Tanzania gugenda bulungi. Kyali kya ssanyu nnyo okulaba ng’ettabi lya Burundi liweebwayo mu Noovemba 25,2006, erya Rwanda mu Ddesemba 2, 2006, n’erya Uganda mu Jjanwali 20, 2007. Sudan yafuna entikko empya ey’ababuulizi 1,508 mu mwezi gwa Apuli. Kitwetaagisa okweyongera okusabira baganda baffe ab’omu Eritrea. Kati we twogerera, ab’oluganda 23 bali mu kkomera mu Eritrea era ng’abamu ku bo baakamalayo emyaka egisukka mu 12.

Obukadde n’obukadde bw’obupapula bw’Amawulire gw’Obwakabaka Na. 37, “Enkomerero y’Eddiini ez’Obulimba Eri Kumpi!” bwagabibwa mu kitundu kyaffe kyonna. Oluvannyuma lw’okufuna akapapula kano era n’okukasoma, mwannyinaffe ow’omu United States eyali aweddemu amaanyi mu by’omwoyo yabulwa otulo. Ku Ssande eyaddako, yagenda mu nkuŋŋaana era n’asaba okuyigirizibwa Baibuli. Abo abaasiima obubaka obwo baakozesa endagiriro eri ku kapapula ako okusaba okuweerezebwa brocuwa eyitibwa Beera Bulindaala! n’okuyigirizibwa Baibuli.

Ekigendererwa kya kaweefube ng’oyo kwe kuyamba abantu abeesimbu okuyiga ekyo ddala Baibuli ky’eyigiriza. (Mat. 28:19, 20) Bw’oba obuulira, weetegereze abo abaagala okumanya ebisingawo, era obaddire ng’olina ekiruubirirwa eky’okutandika okubayigiriza Baibuli. Tuli basanyufu okukolera awamu nammwe mu mulimu guno omukulu, era tubalamusizza nnyo.

Ffe baganda bammwe,

Ku ofiisi y’ettabi lya Burundi, Kenya, Tanzania ne Uganda