Engeri gy’Oyinza Okutegeera Baibuli

2. Gisome ng’Olina Ekigendererwa Ekirungi

Mukwano gwo yali akugambyeko ekintu ekikyamu ekikwata ku muntu gw’otamanyi? Bwe wasisinkana omuntu oyo, ebyo mukwano gwo bye yakugamba byakulemesa okulaba engeri ennungi n’ebitone omuntu oyo by’alina? Bwe kityo bwe kiyinza okuba bwe kituuka ne ku Baibuli.

OMUTUME Pawulo yalabula ku ekyo ekiyinza okubaawo singa tusoma Baibuli nga tulina ekigendererwa ekikyamu. Ng’ayogera ku bamu ku Bayudaaya abaaliwo mu kiseera kye, Pawulo yagamba nti: “Mbawaako obujulirwa nti banyiikira okuweereza Katonda; naye okunyiikira kwabwe tekwesigamye ku kumanya okutuufu.”​—Abaruumi 10:2.

Abamu ku Bayudaaya ab’omu kyasa ekyasooka baali tebaagala kukkiriza nti Yesu ye yali Masiya wadde nga kino kyali kyeyoleka bulungi mu Byawandiikibwa eby’Olwebbulaniya. Ebyo byonna ebyayogerwa ku Masiya mu byawandiikibwa eby’Olwebbulaniya byali bituukagana bulungi ne Yesu owe Nazaaleesi era yatuukiriza obunnabbi bwonna obwali bumukwatako. Naye endowooza enkyamu gye baalina ku Yesu yalemesa bangi ab’omu kiseera kye okutegeera Ekigambo kya Katonda.

Kiki kye tuyinza okuyigira ku kino? Kikulu nnyo okusoma Baibuli nga tulina ekigendererwa ekirungi. Omuntu bw’aba n’endowooza enkyamu ayinza okulemererwa okutegeera amazima agali mu Baibuli.

Ng’ekyokulabirako, kakensa omu mu by’eddiini mu mambuka ga Carolina, mu Amerika, ayogera ku Baibuli ‘ng’ekitabo ekyawandiikibwa abantu, era ekirimu endowooza zaabwe, era nga nnyingi ku zo zikontana era nga tezisobola kuwa bantu bulagirizi butuufu mu bulamu.’ Singa omuntu asoma Baibuli ng’agitwala ‘ng’ekitabo eky’abantu obuntu,’ teyandibuusizza amaaso emisingi n’obulagirizi ebigirimu by’awulira nti tabyagala?

Okwawukana ku ekyo, Baibuli etukubiriza okunyiikira okugisoma. Nga byogera ku b’e Beroya abaaliwo mu kiseera kya Pawulo, Ebyawandiikibwa bigamba nti: “Bakkiriza mangu ekigambo, era buli lunaku beekenneenyanga n’obwegendereza Ebyawandiikibwa okulaba obanga ebintu ebyo byali bituufu.” (Ebikolwa 17:11) Okufaananako ab’e Beroya, naawe kiyinza okuba nga kikwetaagisa okusoma Baibuli ng’olina ekigendererwa ekirungi osobole okugitegeera. Soma Ekigambo kya Katonda ng’olina ekigendererwa ekirungi, era ng’oyagala nnyo okuvumbula obubaka obusanyusa obw’oyo Nnannyini kuwandiika Baibuli.