Okusigala ng’Onyweredde ku Yakuwa

OBUNYWEVU, wadde bwa kkekwa leero, ngeri eyolesebwa abaweereza ba Katonda ow’amazima, Yakuwa. Omuntu omunywevu asigala nga mugumu ng’agezesebwa era tasagaasagana ebiseera bwe bigenda biyitawo. Lowooza ku Kabaka Keezeekiya omulungi. “Oluvannyuma lwe ne wataba amufaanana mu bakabaka bonna aba Yuda so si mu abo abaamusooka,” bw’etyo Baibuli bw’egamba. Kiki ekyafuula Keezeekiya ow’enjawulo? ‘Yanywerera ku Yakuwa,’ wadde yali yeetooloddwa abasinza ba katonda ow’obulimba Moleki. Yee, Keezeekiya ‘teyalekayo kugoberera Yakuwa naye yakwatanga ebiragiro bye.’​—2 Bassekabaka 18:1-6.

Omutume Pawulo ye muntu omulala eyanywerera ku Yakuwa. Ebikwata ku buweereza bwe ebisangibwa mu Byawandiikibwa eby’Oluyonaani eby’Ekikristaayo biwa obujulizi ku ngeri Pawulo gye yenyigiranga mu buweereza bwa Katonda n’emmeeme ye yonna. Ku nkomerero y’obulamu bwe obw’oku nsi, Pawulo yali asobola okweyogerako bw’ati: “Nnwanye okulwana okulungi, olugendo ndutuusizza, okukkiriza nkukuumye.”​—2 Timoseewo 4:7.

Nga byakulabirako birungi nnyo eby’obunywevu Keezeekiya ne Pawulo bye baateekawo! Ka tukoppe okukkiriza kwabwe nga tunywerera ku Katonda waffe ow’Ekitalo, Yakuwa.​—Abaebbulaniya 13:7.