ESSOMO 1

Ennyanjula Ennungi

Ebikolwa 17:22

MU BUFUNZE: Ennyanjula yo esaanidde okuleetera abakuwuliriza okwesunga ky’ogenda okwogerako, okumanya ensonga gy’ogenda okwogerako, era n’obukulu bw’ensonga eyo.

ENGERI Y’OKUKIKOLAMU:

Baleetere okwesunga. Kozesa ekibuuzo, ebigambo, ekintu ekyaliwo ddala oba ekibadde mu mawulire, ekiyinza okusikiriza abakuwuliriza.

Bw’oba otegeka ennyanjula yo, lowooza ku bintu abantu bye bayinza okwagala okuwulira oba ebibeeraliikiriza obikozese mu nnyanjula yo.
Laga ky’ogenda okwogerako. Kakasa nti ennyanjula yo eyamba abakuwuliriza okumanya ensonga gy’ogenda okwogerako n’ekigendererwa kyayo.
Laga ensonga lwaki ky’ogenda okwogerako kikulu. Ky’ogenda okwogerako kituukaganye n’ebyetaago by’abakuwuliriza. Balina okutegeera engeri gye banaaganyulwamu.

Bw’oba otegeka emboozi weebuuze, ‘Mbeera ki baganda bange ne bannyinaze mu kibiina ze boolekagana nazo?’ Oluvannyuma ennyanjula yo gituukaganye n’ebyetaago byabwe.