Yova no ndrŭ krʉ longavʉdha dhi uhuru na. Ko adi njínji fø kado na lonanga ko vʉ ná saa na. Bbo na mana kʉ ná lo kʉ, nja le ddiro vʉri ndi bbʉ ndi Yova dho ndirigoti ndi tsu Yova dzá familia kana. Yova jirieri ko krʉ njiri fø. Ká addudho? Ke jirieri ndima kana nga ngʉ chøchø ndrŭ na ndirigoti ndrŭ di theinga dho. (Kum. 30:​19, 20; Gal. 6:​7, 8) Yova nzɨ adi ndrŭ cho kpakpanga na ndiro ndrŭ njinjí ndi dho d’e ri. Yova adi riji nja le ddiro vʉ ndi ji ndi njí ná lo. Njati ddikpa Mukristo njí bbò chenga ró, ká wazee adi rinji ngbǎ? Ke øni nzá ndidhó chenga nǎ ro ró, ringani le pʉ ke pʉ kutaniko nǎ ro. (1 Ko. 5:​13) Føro mai, Yova adi riji chenga nji ná ke ki ngʉ vi ndi ro. Ri kʉ føri dho i Yova bbʉngʉe le ødha dhi be ndiro ngbà leni ndima dhó chenga nǎ ro ná ndrŭ zø njini d’e ri. Yova kʉ jidha dhi Mungu nari dho, ke rija bbò chenga nji ná ndrŭ leni le.​—Zek. 1:⁠3; Ro. 2:⁠4; Yak. 4:⁠8. w24.08 14 §1-2

Yohana ndingʉe lo Mungu dho le ngarr nari nǎ ro adi si ná hwè djo ná saa na nja ndrŭ ngʉ adi kali dhi lo ddi ndirigoti ndrŭ ngʉ adi nji ná lo ngʉ adi rili kutaniko nanga ndoni ndo. Nì mai ri kʉ fø ro, nja kʉ ná ndrŭ ngʉ ra anzi dhé “bbʉbbʉlo kana ndima bbi nari na.” Kpa ngʉ adi ngarr Yova dho ndirigoti kpa ngʉ adi “bbi kedzá yadha po nari bbai.” (2 Yo. 4, 6) Chi ngʉ tøni ná fø Wakristo dhó lo bbʉngʉe hwè Yohana ma, Yova ma na dho bbo. (Mez. 27:11) Ko ká ka ko bá ngbá somo? Chi le tøni nari adi hwè bbʉ. (1 Yo. 5:⁠3) Loroji na, ko adi hwè ba dhonalo kʉ, ko adi rili Yova thí ba hwè. Yova adi hwè ba bbo njati ko pʉ che kʉ ná lo ko ró ro ndirigoti ko rrnga ndidzá yadha dho ró. Malaiká maddi adi hwè ba fø lo dho. (Lu. 15:​10) Føri kina, ko maddi adi hwè ba njati ko di ko djoi ma, ko vei ma na tøni chi nari nja ró. (2 Te. 1:⁠4) Shetani dhó i dz’ le si sa ná saa na, ko sie hwè na ko tøngʉeni chi Yova dho nari dho. w24.11 12 §17-​18

Ni ká ka ni chu ddikpa le thɨcha ni ji le inga ke ji nari ni po nari njí? Njati ni po ddikpa le ni ji nari le ni nja nari goti théi ró, le ka ndi ddiri ni nzɨ ngaddi bblo lonanga ni vʉ nari njí ri. (Mez. 29:​20) Njati ddikpa le churi ni ji ndi ji, ro ni di si ripo lele nzá ró, le ka ndi ddiri ni nanga adi rɨni bbo lonanga ni vʉ nari njí. (Muh. 11:⁠4) Anonga nari kʉ ddikpa le dhi ngana ni si nari njí ri nzá ngani ni uri u nari kʉ, fø le inga ke na ni si ndoa chichi dhé ri. Ringani ni uri nari kʉ, ni i kʉ tayari ndoa dho, ro nja ndrŭ nga ka ndima é tayari dhé ri. Ni ká ka ni njiri ngbǎ njati ni d’i ri utso ddikpa le inga ke riji ndi chu ni bblo ri ró? Njati rie nzá ni ji fø le inga ke ri ró, adhori pʉlʉ ni nji ná lo ró. Njati ni di riddi ni ka ni jini ngbà nzá ni ji fø le inga ke ro ró, føri kʉ che bbo.​—Efe. 4:​25. w24.05 22-​23 §9-​10