Mutume Paulo ndingʉe Tesalonike nǎ ndrŭ dho ná lo nǎ ro ká ko ka ko ba ngbá somo? Njati ko rr ná lo é njonjo Biblia adi ddi ko dho ná lo ró ro inga rie bbo ka ndi lø le thí ronga ná lo ró, ringani ko njinjí nyodyu na. Drrdrr Union Soviétique dhó saa na, kodhó mbubai chongʉe le-djoi dho ná barua ngʉ njani Yova dzá Dimu dhó lo dhi bbò bbagʉ ro si nari bbai. Fø barua nǎ le chongʉe nja le-djoi ndima ngá d’i tengenezo tso. Fø barua ngʉ njani bbʉbbʉ kʉ ná ri bbai. Ro, chi ngʉ tøni ná le-djoi nzá bbangʉeri ndima shani ri. Kpa famungʉeri nari kʉ fø barua nǎ kʉ ná lo tso ro nzá gbani ndima dho le adi ddi ná lo na ri. I ddo ró, kodhó mbubai adi njínji nja saa na eternete na ndiro ndima shá ko ndirigoti ndima ndó ko kana nga d’e. Ko bbaeri “[ko] djǒ nanga ngbʉni lele” nari rɨngana, ko ka ko b’o ko ronga b’lo ko churie ná bbʉbbʉlo djo ko ngaddi nari chulu.​—⁠2 Te. 2:⁠2; 1 Yo. 4:⁠1. w24.07 12 §14-​15

Yova no ndrŭ krʉ longavʉdha dhi uhuru na. Ko adi njínji fø kado na lonanga ko vʉ ná saa na. Bbo na mana kʉ ná lo kʉ, nja le ddiro vʉri ndi bbʉ ndi Yova dho ndirigoti ndi tsu Yova dzá familia kana. Yova jirieri ko krʉ njiri fø. Ká addudho? Ke jirieri ndima kana nga ngʉ chøchø ndrŭ na ndirigoti ndrŭ di theinga dho. (Kum. 30:​19, 20; Gal. 6:​7, 8) Yova nzɨ adi ndrŭ cho kpakpanga na ndiro ndrŭ njinjí ndi dho d’e ri. Yova adi riji nja le ddiro vʉ ndi ji ndi njí ná lo. Njati ddikpa Mukristo njí bbò chenga ró, ká wazee adi rinji ngbǎ? Ke øni nzá ndidhó chenga nǎ ro ró, ringani le pʉ ke pʉ kutaniko nǎ ro. (1 Ko. 5:​13) Føro mai, Yova adi riji chenga nji ná ke ki ngʉ vi ndi ro. Ri kʉ føri dho i Yova bbʉngʉe le ødha dhi be ndiro ngbà leni ndima dhó chenga nǎ ro ná ndrŭ zø njini d’e ri. Yova kʉ jidha dhi Mungu nari dho, ke rija bbò chenga nji ná ndrŭ leni le.​—Zek. 1:⁠3; Ro. 2:⁠4; Yak. 4:⁠8. w24.08 14 §1-2

Yohana ndingʉe lo Mungu dho le ngarr nari nǎ ro adi si ná hwè djo ná saa na nja ndrŭ ngʉ adi kali dhi lo ddi ndirigoti ndrŭ ngʉ adi nji ná lo ngʉ adi rili kutaniko nanga ndoni ndo. Nì mai ri kʉ fø ro, nja kʉ ná ndrŭ ngʉ ra anzi dhé “bbʉbbʉlo kana ndima bbi nari na.” Kpa ngʉ adi ngarr Yova dho ndirigoti kpa ngʉ adi “bbi kedzá yadha po nari bbai.” (2 Yo. 4, 6) Chi ngʉ tøni ná fø Wakristo dhó lo bbʉngʉe hwè Yohana ma, Yova ma na dho bbo. (Mez. 27:11) Ko ká ka ko bá ngbá somo? Chi le tøni nari adi hwè bbʉ. (1 Yo. 5:⁠3) Loroji na, ko adi hwè ba dhonalo kʉ, ko adi rili Yova thí ba hwè. Yova adi hwè ba bbo njati ko pʉ che kʉ ná lo ko ró ro ndirigoti ko rrnga ndidzá yadha dho ró. Malaiká maddi adi hwè ba fø lo dho. (Lu. 15:​10) Føri kina, ko maddi adi hwè ba njati ko di ko djoi ma, ko vei ma na tøni chi nari nja ró. (2 Te. 1:⁠4) Shetani dhó i dz’ le si sa ná saa na, ko sie hwè na ko tøngʉeni chi Yova dho nari dho. w24.11 12 §17-​18