Yehova wayirika bantu na timpwanza tia sola. Kabu ni dio sarilaka bu bongaka nzengolo. Nzengolo yiyôkele mfunu yi lendi bonga muntu ni mu tihana kwe Yehova na mu bâ mu kanda dia bisari biandi. Yehova zololo ti muna muntu wabonga nzengolo yo. Mu bungu dia nti? Yandi zololo ti bawu babâ ndiku zandi mpe bazinga mankululu. (Lub. 30:​19, 20; Nga. 6:​7, 8) Kâ, Yehova ka tumaka muntu mu ngolo ko mu mu sarila. Yandi muna muntu kabikaka mu sola misamu mi kayirika. Nti bilendi tûla tala ti Mukristo wa batusu wuyirikiri masumu ma manene? Tala ti ka sobele’â mabanza ko bafweti mu katula mu timvuka. (1 Kor. 5:13) Ntono musamu wo, Yehova tivuvu titomo bâka nandi ti muntu wuyirikiri masumu mbo wukâla kwe Yandi. Diangana, wo ni musamu wumosi wa mfunu wasa ti Yehova kahana nkûlulu—lemvokela masumu ma bantu basobaka mabanza. Yehova mu luzolo lwandi, bantu bayirika masumu ma manene kalemberelaka mu soba mabanza.—Zka. 1:3; Rom. 2:4; Zaki 4:8. w24.08 14 par. 1-2

Mu ntangu ntumwa Za katsoneka mukanda’andi wa 3, bantu beri kô beri yangasaka ndongosolo za bungungu zeri nataka tihambula mu kati dia timvuka. Kâ, bakaka batatamana mu ‘diatila mu matieleka.’ Yehova beri tumamanaka mpe ntumunu zandi beri landaka. (2 Za 4, 6) Bakristo bo ba kwikama Yehova na Za beri tâka nsayi. (Bin. 27:11) Ntia malongi tuta baka? Bu tubâ ba kwikama kwe Yehova mbo tubâ mu nsayi mpe na bantu bakaka. (1 Za 5:3) Mu tifwani, nsayi ye neto mu zaba ti Yehova tutâka nsayi. Nsayi yayingi yibâka nandi bu katumonaka bu tutelamanaka ntontolo za nza na bu tutambulaka matieleka. (Bin. 23:15) Bambazi mpe bê ku zulu nsayi yibâka nawu. (Like 15:10) Nsayi yayingi mpe yibâka neto bu tumonaka mpangi zeto zitatamanaka mu bâ ba kwikama, ni bu sa ti nkwamusu peleko ntontolo ya yirika mbi bata bwabana na yo. (2 Tes. 1:4) Bu fwa nza ya Satana nsayi yayingi yibâ neto mu bungu ti tatatamane mu bâ ba kwikama kwe Yehova. w24.11 12 par. 17-18

Ngano ntangu zi kwa fweti taluzula muntu ntete wamutêla mabanza maku ma luzolo? Wamana kulu kwe zonza na muntu, lendi banza ti ka watomono’â dimbitila ko ntete wabonga nzengolo. (Bin. 29:20) Kâ, tala ti muntu wo wubakuri ti yandi tazolo, mpe bongele ntangu yayingi mu mu têla wo, lendi banza ti kekama tomo kekamaka ntete wabonga nzengolo. (Ekl. 11:4) Bambuka ti, ntete wazonza na muntu, ka wena na nsatu ko yabâ na lukwikulu ti mbo kwela muntu wo. Kâ fweti bâ na lukwikulu ti wa kubama wena mu bungu dia makwela mpe muntu wo wuta zolo wulendi bâ muntu wa mbote mu kwela. Ngano nti fweti sa tala ti bakuri ti muntu we kô wuta dinga mu tomo ku zaba? Tala ti ka wena na mabanza mamosi ko na yandi, dinga mu tomo wasongela mu nsalulu zaku. Ka wubâ musamu wa mbote ko tala ti muntu benzi ti lendi batika tindiku na nge, kâ butomo tala ka wena buna ko.—Efz. 4:25. w24.05 22-23 par. 9-10