Tinsamu tia Salomo tisongele misamu milendi turila tisari ni tisari tia Yehova. Lendi bwa mu masumu ma manene, mpe ha manima lendi banza ti misamu ho nkatika bendo. Kwa mitulumukini. Peleko lendi tâ, musamu wo ka mbêle’â wa kêlaka ko. Kâ, bu kadimbitila mu mio miyôkele kampe mbo kakwizi bakula ti, nzengolo za kondo ndwenga katoko bonga zimuneti mu bwa mu masumu ma manene. Nzengolo zo zilendi tarila bindiku bia mbi, nsaka za mbi, peleko tifu tia kotaka mu site Internet zilembolo za delakana, peleko tia kwendaka mu mbuka zilembolo za delakana kwe Bakristo. Kampe wabika mu sambilaka, mu tangaka Bibila, mu kwendaka ku tukutakanu, peleko mu samunaka. Ntiana kwa ntwenia ya bakala yi bazonzelaka mu Bingana, kampe ni mu bungu dia nzengolo zandi zazingi za mbi kizi sila masumu ma manene. Ntia malongi tuta baka? Tufweti dioka masumu, kâ mpe na misamu minataka ku masumu. Salomo musamu ni wo katâ bu kazonzela ntwenia yo ya bakala na mukento wa bunsuza.—Mat. 5:​29, 30. w24.07 16 par. 10-11

Ngano timvwama tio ni nti? Ni tisalu tivûkisaka luzingu bu tusamunaka nsangu za Timfumu. (2 Kor. 4:1) Ngano binzu bia tibuma ni nti? Ni bisari bia Nzambi bisamunaka nsangu za mbote kwe bantu. Mu ntangu ya Paulo, bitê bia nkari binzu bia tibuma beri sarilaka mu nata bima bia ntalu, ntiana bidia, vinu na mbongo. Mpila mosi mpe, Yehova watuhana nsangu za mbote. Na lubakusu lwa Yehova, tulendi baka ngolo ze neto nsatu mu tatamana mu samuna. Ntangu zakaka, tulendi bâ na bunkuta bwa bantu, peleko na bunkuta ti bakala nsangu zeto. Bwe tulendi telamana musamu wo wa mpasi? Tataluzuleno lusambulu lwa bantumwa bu babatuma mu lembo vutu samuna. Kani babâ mu bunkuta mpe babika mu samuna, balomba lubakusu kwe Yehova kabahana ‘nguria butindi bwa zonzela.’ Ho nkatika bendo Yehova wahana mvutu mu lusambulu lwawu. (Bis. 4:​18, 29, 31) Tala ti ntangu zakaka bunkuta bwa bantu lwaka bututâka mu samuna, tufweti sambila Yehova mu baka lubakusu, lomba kwe Yehova kayika ngolo luzolo lwaku mu bantu, ngatu walembo bâ na bunkuta bwa ba samunina nsangu za mbote. w24.04 16 par. 8-9

Luzolo lweto mu Yehova beto lutumaka mu santukisa nkumbu’andi. (Mat. 6:9) Wuzololo tâ ti tuzololo tatâ kwe bantu ti misamu mia bungungu miatâ Satana mu Yehova ka miena mia matieleka ko. (Mba. 3:​1-5; Yobe 2:4; Za 8:44) Mu tisalu tieto tia samuna, timina dibâka neto dia nwanina Nzambi’eto, dia tâ matieleka mu Yandi kwe bô babansoni bazololo mu wâ mo. Tuzololo ti muna muntu kazaba ti tifu tiandi tiyôkele bunene ni luzolo, mpila’andi ya twarisila ya buderede mpe ya sungama yena, mpe ntamana Timfumu tiandi mbo titûla nsuka mu mpasi zazansoni, mpe mbo tinata tidzunu na nsayi kwe bantu. (Mik. 37:​10, 11, 29; 1 Za 4:8) Bu tuzonzelaka misamu mio mu bungu dia Yehova kwe bantu, nkumbu’andi tusantukisaka. Mu nsayi twena mu bungu ti mio mi tuyirikaka tufweti yirika bu twena Mbangi za Yehova. w24.05 18 par. 12