Jerusalem gëtt zerstéiert

D’Mënschen a Juda verloossen ëmmer nees Jehova a biede falsch Gëtter un. Jehova versicht wärend ville Joren, hinnen ze hëllefen. Hie schéckt vill Prophéiten, fir se ze warnen. Awer amplaz ze lauschteren, maachen si de Geck mat hinnen. Wéi mécht Jehova der Ubiedung vu Gëtzen en Enn?

Den Nebukadnezar, de Kinnek vu Babylon, erobert ee Land no deem aneren. Déi éischte Kéier wéi hie Jerusalem erobert, hëlt hien de Kinnek Jojachin, d’Leit vun der Regierung, d’Zaldoten an d’Handwierker gefaangen a bréngt se all op Babylon. Hien hëlt och all d’Schätz aus Jehova sengem Tempel mat. Da mécht den Nebukadnezar den Zedekia zum Kinnek vu Juda.

Am Ufank follegt den Zedekia dem Kinnek Nebukadnezar. D’Nopeschnatiounen an déi falsch Prophéite ginn dem Zedekia awer de Rot, géint Babylon ze rebelléieren. Awer de Jeremia warnt hien: »Wann s du rebelléiers, wäert et a Juda Krankheet, Honger a Mord ginn.«

No aacht Joer, wou den Zedekia regéiert, entscheet hien, géint Babylon ze rebelléieren. Hie freet d’Ägypter ëm Hëllef. Doropshi schéckt den Nebukadnezar seng Arméi, fir Jerusalem unzegräifen an ze belageren. De Jeremia erkläert dem Zedekia: »Jehova seet: ›Wann s du dech Babylon ergëss, iwwerliefs du an d’Stad gëtt gerett. Mee wann s du dech net ergëss, da verbrennen d’Baylonier ganz Jerusalem an huelen dech gefaangen.‹« Den Zedekia seet: »Ech ergi mech net!«

Annerhalleft Joer méi spéit duerchbrécht déi babylonesch Arméi d’Mauere vu Jerusalem a setzt d’Stad a Brand. D’Babylonier verbrennen den Tempel, maache vill Leit dout an huelen Dausende vu Mënschen als Prisonéier mat.

Den Zedekia leeft aus Jersualem fort, awer d’Babylonier rennen him hannendrun. Si huelen hien an der Géigend vu Jericho fest a bréngen hie bei den Nebukadnezar. Den Zedekia muss nokucken, wéi seng Jongen dout gemaach ginn. An hie selwer gëtt blann gemaach. Hie gëtt an de Prisong gehäit, wou hien da schlussendlech stierft. Awer Jehova versprécht dem Vollek vu Juda: »A 70 Joer bréngen ech iech erëm zeréck op Jerusalem.«

Wat geschitt mat de Kanner an Teenager, déi als Prisonéier op Babylon bruecht ginn? Bleiwe si Jehova trei?