Yongo yofuneya vinjinji ineyo uliwetene unafuneya liye sakula chi yokuza vipeleka wa Yehova nokala m’banja la athu anayo kanamulambela. Yehova unafuna ira muthu uliwetene apange vyevi. Chifukwa n’ni? Liye unafuna ira akale vausamwali na aliwa koma teto kaze kafwanye moyo oomala. (Doto. 30:19, 20; Agal. 6:7, 8) Yehova kanakanyi-eda muthu uliwetene ira amutumikelenga. Liye unafuna ira muthu uliwetene asakulenga ekave vyevyo unafuna liye panga. Kodi inaireya chin’ni ngati Mkiristu obatiziwa uphwanyile lamulo la Mulungu nopanga chimo lilukulu? Ngati kanalape, unafuneya chosiwa mupingo. (1 Akor. 5:13) Koma ngakale vili eno, Yehova unoembekezela ira muthu unoyo upangile vyotakaloyo dambo limo-i unoza awelele wa liye. Moi chi chifukwa iwa apelekile dipo ira athu ochimwa anayo kalapile kakululukaliwenga. Mulungwi-u wachikondi unovepa athu anayo kapangile chimo ira kalape. — Zak. 1:3; Arom. 2:4; Yak. 4:8. w24.08 14 ¶1-2

Vevo namarumiwa Yohani alemba liye kalatae yanaralu, athu amo-iwa koowambeela falisa vyongo vyonama vyevyo vyapangi-ile ira athu katigwilizanenga mupingo. Koma athu amo-i koopitilizave ‘enda mu choonadi.’ Aliwa koovwela Yehova moi koopitilizave “enda mo-arela malamulo.” (2 Yoh. 4, 6) Akiristu ororomeleyala koopanga vyongo vyomusangalasa Yohani koma teto Yehova. (Miya. 27:11) Kodi ninafunjedavo n’ni? Kala ororomeleya unopangi-a ira nisangalalenga. (1 Yoh. 5:3) Mwaisazo, ninokala osangalala naiziwa ira ninomusangalasa Yehova Mulungu. Liye unosangalala aona nipewanga maeselo no-arelanga makundo a choonadi. Naaliwene angelo kanosangalala udimu. (Luka 15:10) Na-iyene ninosangalala naona Akiristu afwi-u kakalangave ororomeleya. (2 Ates. 1:4) Ilambwela yaza iwonongiwa ninoza nisangalale voiziwa ira nookalave ororomeleya wa Yehova muilambo yolamuleliwa na Satanela. w24.11 12 ¶17-18

Kodi thawi yomuiziwa muthuyo inafuneya kala yolapa moi avi? Mwambaraanya mufotokozela muthu maganizwinyu, munoza muoneye ngati opupuluma. (Miya. 29:20) Koma teto mwadimbeliwa munoza muoneye ngati muthu ozengeleza makamaka ngati muthu m’mo-iwoyo unaiziwa ira munomufuna. (Nam. 11:4) Umbuwelani ira mwa-anadowe dowamufotokozela muthu maganizwinyu, kamuganizenga ira mulimwetene unoulolani basi. Mukedenga kala osimikiza ira mukozeya volowa m’banja ndipo muonenga ira muthu m’mo-iwoyo unokoza kala oufwanelelani. Kodi munapange avi ngati muzindikilile ira muthu m’mo-iwene unoufunani? Ngati muthuyo kamunamufuna kamupangenga vyongo ngati munomufuna. Kai pama mupangi-a muthu m’mo-iwa ganizanga ira munokoza kala nae va imweendi koma vya-ali eno. — Aife. 4:25. w24.05 22-23 ¶9-10