Khani ineyo Solomo alembile liyela, inotonyi-eda vyevyo vinamuireele mtumiki wa Yehova uliwetene. Liye unokoza panga chimo lilukulu noonanga ira vikede ireya mwazizizi. Kapena teto unokoza onga ira “vikede ndiireela.” Koma aganizela pamapama vyevyo vyaireile vathawiyo, unokoza fwanya ira vikala vyongo vimo-i vyevyo apangile liye mo-oganiza pama vyevyo vyapangi-ile ira apange chimolo. Vyongo vyevi vinokoza kala vyosangalasa vyo-ofwanelela, waleda na athu a makalelo otakala kapena fwanyeya m’malo okaiki-a, kaya malo enieni kapena va intaneti. Mwina teto oo-iya pempela, welenga Baibulo, fwanyeya vamisonkano kapena teto inda chito yolaleela. Eno mofwanafwana na muzombwe wa m’buku la Miyambo, chimo lae kalinakale ira likede ireya mwazizizi. Kodi ninafunjedavo n’ni? Kaninafuneya keda pewa chimo, koma ninafuneya pewa vyongo vyevyo vinapangi-e ira nipange chimolo. Solomo oowonga movweya pama likundo leli vevo afotokozile liye khani ya muzombwe unola. — Mat. 5:29, 30. w24.07 16 ¶10-11

Kodi chuma inela chin’ni? Chi chito yolaleela vya Umwene ineyo ili yovulumucha miyoyo. (2 Akor. 4:1) Nanga viwiya vya teya chin’ni? Vinaimelela atumiki a Mulungu anayo kanawandela amo-iwa uthenga wapama. Muthawi ya Paulo, athu oguli-a vyongo koo-indi-eda chito misuwo da teya votukula vyongo vyofuneya monga yodja, vinyu koma teto ndalama. Mofwanafwana na vyevi, Yehova univa-a uthenga wapama unoyo uli wantengo wavadimu. Motandiziwa na Yehova, ninokoza fwanya kopolo dedo ninafuneya iyo ira nipitilize laleela uthenga wapama mororomeleya. Thawi dimo-i ninokoza ovanga athu koma teto ova ira kanokoonda uthengi-u. Kodi ninalimbane avi na vuto leli? Kaganizelani pempelo lelo anamarumiwa kapelekileathu kangalamuliwe ira ka-iye laleela. M’malo moova, aliwa koomuvepa Yehova ira aatandize kala olimba murima. Yehova oosomeda pempelo liwa thawi ineyo. (Vyo. 4:18, 29, 31) Na-iyene thawi dimo-i naambeela ova athu, nivepenga wa Yehova ira anitandize. Mumuvepenga ira autandizeni ira muwakondenga vinjinji athu ira kamuovenga awandela uthenga wapama. w24.04 16 ¶8-9

Konda Yehova unonilimbikisa teto ira niweli-enga zina lae. Vyevi vinatantauza ira ninofunechecha wandela amo-iwa ira vyongo vyotakala vyevyo Satana unaonga liye vyokuza Yehova kai vyoona. (Gen. 3:1-5; Yob. 2:4; Yoh. 8:44) Nalaleelanga, ninofunechecha awandela athu etene anayo kanavuruwane vyoona vyokuza Yehova. Ninofuna ira uliwetene aiziwe ira ikalelo yae ilukulu chi chikondi, unolamulela mwachilungamo koma teto ira chineneveva Umwenae unomali-a mavuto etene nozi-a murendele na chimwemwe wa athu. (Sal. 37:10, 11, 29; 1 Yoh. 4:8) Nawandelanga athu vyongo ngati vyevi vyokuza Yehova, ninakala niweli-anga zina lae. Ninosangalala teto chifukwa ninoiziwa ira ninopanga vyongo mogwilizana na zina li-u. w24.05 18 ¶12