E nzengo zisundidi o mfunu kalenda baka konso muntu i yekola e zingu kiandi kwa Yave yo kota muna kanda dia asambidi andi. Yave ozolele vo yeto awonso twabaka e nzengo zazi. Ekuma? Yave ozolele vo wantu bakala se akundi andi yo vua moyo a mvu ya mvu. (Nsi. 30:19, 20; Ngal. 6:7, 8) Kansi, Yave ke komekenanga wantu ko vo bansadila. Oyambulanga vo konso muntu kabaka nzengo mu dina kazolele vanga. Adieyi akuluntu bafwete vanga kele vo Nkristu wavubwa, ovolele sumu diampwena? Avo kavilukidi ntima ko, kafwete katulwa mu nkutakani. (1 Kor. 5:13) Kana una vo i wau, Yave okalanga ye luzolo vo nsumuki kavutuka kwa yandi. Dianu vo muna loloka asumuki ana bevilukanga o ntima, Yave wavana lukûlu. Wau vo Yave i Nzambi a zola, owondelelanga awana bevolanga masumu mampwena kimana baviluka o ntima.—Zak. 1:3; Roma 2:4; Yak. 4:8. w24.08 14 ¶1-2

Muna kolo kina Yoane kasoneka nkanda wau, wantu ankaka bamwanganesanga malongi ma luvunu yo twasa mpambani muna nkutakani. Kansi, akaka bakwamanana ‘kangalela muna ludi.’ Balemvokelanga Yave yo ‘kangalela mun’owu wa nkanikinu miandi.’ (2 Yoa. 4, 6) Akristu awaya akwa kwikizi ke bayangidikanga kaka Yoane ko kansi yo Yave mpe. (Nga. 27:11) Adieyi tulongokele? Avo tusikidi ye kwikizi kwa Yave, tukala ye kiese ye tumwesa mpe akaka e kiese. (1 Yoa. 5:3) Kasikil’owu, tutoma yangalalanga mu zaya vo tumwesanga ntim’a Yave e kiese. Yave otoma yangalalanga vava tuvenganga vanga mambu mambi yo lemvokela nkanikinu miandi. Ambasi mpe kuna zulu betoma yangalalanga. (Luka 15:10) Yeto mpe tumonanga kiese vava mpangi zeto besikilanga ye kwikizi. (2 Tes. 1:4) Vava e nza ya Satana ifwaswa, tutoma yangalala wau twasikila ye kwikizi kwa Yave. w24.11 12 ¶17-18

Nga ofwete viokesa kolo kiayingi muna toma zaya o muntu vitila wamvovesa vo ongeye zola okunzolanga? Avo kuviokese ntangwa yafwana ko, o muntu olenda vova vo kutomene yindula ko muna baka e nzengo zazi. (Nga. 29:20) Kuna diaka e sambu, avo oviokese kolo kiayingi lembi vova, musungula avo muntu obakwidi wo, kalenda yindula vo ongeye fu kia lukatikisu una kiau. (Kim. 11:4) Zaya wo vo, vitila wenda mokena yo muntu, ke difwete vava ko vo wakala ye ziku vo kazala kikilu okazala yandi. Kansi, ofwete kala ye ziku vo ongeye wakubama wina muna kazala, o muntu ndioyo wafwana kwandi kwa ngeye mu kala nkaz’aku. Adieyi ovanga avo obakwidi vo mpangi kingandi zola kekuzolanga? Avo kuzolele banda yandi kimakangu ko, toma dio songa muna mavangu maku. Ke diambote ko mu fila muntu ankaka kayindula vo okala ye lau dia banda yaku kimakangu, kinga nkatu kwandi.—Efe. 4:25. w24.05 22-23 ¶9-10