O lusansu lwa Solomo lusonganga dina dilenda bwila konso selo kia Yave. Olenda vola e sumu diampwena i bosi, omona vo mawonso kuna kinsalukisa mavangamene. Kansi, avo otomene yindula dina divangamene, obakula vo mambu mayingi makizowa katekele vanga oma mamfididi muna sumuka. O mambu mama makizowa malenda kala vo kuyisia muna yikundi yambi, nsaka zambi yo kwenda muna fulu yambi, dilenda kala vo muna internete. Dilenda kala mpe vo wayambula samba, tanga Bibila, kwenda muna tukutakanu yo sala e salu kia umbangi. Nze i toko diyikwanga muna Ngana, e sumu diandi ke divangamene kuna kinsalukisa ko. Adieyi tulongokele muna nona kiaki? Ke tufwete venganga kaka e sumu ko, kansi tufwete venganga mpe mambu malenda kutufila mu vola e sumu. Solomo wasonga e mbuta diambu vava kasoneka lusansu lwalu—Mat. 5:29, 30. w24.07 16 ¶10-11

Nki i lusalu lwalu? I salu kia samuna e nsangu za Kintinu kivuluzanga e mioyo mia wantu. (2 Kor. 4:1) Nki i yinzu yatûma? E yinzu yatûma, i selo ya Nzambi ana besamunanga e nsangu zambote kwa akaka. Muna lumbu ya Paulu, akiti mvungu miatûma basadilanga muna natina lekwa yamfunu nze madia, vinyu ye nzimbu. Diau dimosi mpe, Yave watuvana e kiyekwa kia samuna e nsangu zambote. Muna lusadisu lwa Yave, tulenda vua nkuma tuvuidi o mfunu muna samuna e nsangu zambote una ufwene. Ezak’e ntangwa, tulenda mona wonga wa siwa kitantu yovo bembolwa kwa wantu. Aweyi tulenda sundila wonga wau? Badika e sambu kia antumwa vava bakanikinua vo bayambula samuna e nsangu zambote. Vana fulu kia mona wonga, balomba lusadisu lwa Yave kimana bakwamanana vovela kuna unkabu wawonso. Yave wavana e mvutu za sambu kiau vana vau. (Mav. 4:18, 29, 31) Avo ezak’e ntangwa wonga wa wantu omonanga, lomba kwa Yave kawokesa o zola kwaku kuna kwa wantu kimana walembi kala yo wonga wa kubasamunuina e nsangu zambote. w24.04 16 ¶8-9

O zola kweto muna Yave kukutufilanga mu zitisa e nkumbu andi. Ediadi disongele vo tuzolanga zayisa kwa wantu vo mana Satana kavova mu kuma kia nkumbu a Yave ma luvunu. (Tuku 3:1-5; Yobi 2:4; Yoa. 8:44) Muna salu kia umbangi, tukalanga ye tima dia zayisa kwa awana bekalanga ye luzolo lwa kutuwá, kana nani i Yave ye mambu mana kezolanga. Tuzolele vo wantu awonso bazaya vo e fu kiandi kisundidi i zola, mu mpila ansongi ye ndungidi keyadilanga. Tuzolele bazaya mpe vo ke kolo ko e Kintinu kiandi kifokola e mpasi yo twasa luvuvamu ye kiese kwa kanda dia wantu. (Nku. 37:10, 11, 29; 1 Yoa. 4:8) Vava tuzayisanga mambu mama kwa akaka muna salu kia umbangi, nkumbu a Yave tuzitisanga. Tukalanga mpe ye kiese mu zaya vo tuzingilanga e ngwizani ye nkumbu Mbangi za Yave ina tuyikilwanga. w24.05 18 ¶12