စီၤပၤဒၤဝံးသ့ၣ်ညါ ယဟိဝၤယွၤ ဒီးသန့ၤအသးလၢအီၤ. ဖဲစီၤပၤစီလူး ဒီးဒုၣ်ဒါအဂၤတဖၣ် ဂုာ်ကျဲးစၢး လူၤမၤသံ စီၤဒၤဝံးအခါ စီၤဒၤဝံး ဃ့ထုကဖၣ်လၢ ယဟိဝၤယွၤအအိၣ် ဒ်သိး ယဟိဝၤယွၤ ကမၤစၢၤအီၤ. ယဟိဝၤယွၤ စံးဆၢအတၢ်ထုကဖၣ် ဒီးမၤပူၤဖျဲးအီၤ ဝံၤအလီၢ်ခံ စီၤဒၤဝံးတဲဝဲလၢ “ယဟိဝၤယွၤန့ၣ် မူဝဲ.” (စံး ၁၈:၄၆) ဖဲစီၤဒၤဝံး တဲဝဲလၢ ယဟိဝၤယွၤ မူဝဲအခါ အတအဲၣ်ဒိး တဲဝဲထဲ ကစၢ်ယွၤမူဝဲ အဂ့ၢ်ဘၣ်. လံာ်တဘ့ၣ် ပာ်ဖျါထီၣ်ဝဲလၢ ဖဲစီၤဒၤဝံး တဲဝဲဒ်န့ၣ်အခါ အပာ်ဖျါထီၣ် အတၢ်နာ်လၢ ယဟိဝၤယွၤန့ၣ် “မ့ၢ်ကစၢ်ယွၤလၢ အမ့ၢ်အတီ ဒီးအဘၣ်သးမၤစၢၤ အခ့အပှၤထီဘိ.” ခီဖျိလၢ စီၤဒၤဝံး သ့ၣ်ညါဝဲလၢ ယဟိဝၤယွၤ ထံၣ်ဝဲ တၢ်ကဲထီၣ်သးဒီးအီၤ ဒီးမၤစၢၤအီၤအဃိ စီၤဒၤဝံး အဂံၢ်အဘါ ဆူၣ်ထီၣ်လၢ အကဆဲးမၤ ယဟိဝၤယွၤ အတၢ်မၤ ဒီးကဆဲးစံးထီၣ်ပတြၢၤ ယဟိဝၤယွၤ. (စံး ၁၈:၂၈, ၂၉, ၄၉) ပနာ်လၢ ယဟိဝၤယွၤ မ့ၢ်ကစၢ်ယွၤလၢ အမူဝဲအဃိ မၤစၢၤပှၤလၢ ပကဆဲးမၤ အတၢ်မၤ လၢတၢ်သးဆူၣ်အပူၤ. တကးဒံးဘၣ် ပတၢ်နာ်အံၤ ကဟ့ၣ်ဆူၣ်ထီၣ် ပဂံၢ်ပဘါလၢ ပကလဲၤခီဖျိ တၢ်ကီတၢ်ခဲ ဒီးကထိၣ်ဟူးထိၣ်ဂဲၤထီၣ်ပှၤလၢ ပကဆဲးမၤယဟိဝၤယွၤ အတၢ်မၤဆူၣ်ဆူၣ်. တကးဒံးဘၣ် ပတၢ်နာ်အံၤ ကမၤစၢၤစ့ၢ်ကီးပှၤလၢ ပကဆဲးမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤထီဘိ. တၢး၂၄.၀၆ ၂၀-၂၁ ¶၃-၄

လံာ်ပရၢလၢ တၢ်မၢဖိပီလူးကွဲးန့ၢ် ပှၤသ့းစၤလနံဖိန့ၣ် ပန့ၢ်ဘၣ် တၢ်မၤလိဒ်လဲၣ်. ဖဲပနၢ်ဟူ တၢ်ဂ့ၢ်လၢ အတဘၣ်လိာ်သးဒီး တၢ်လၢပမၤလိဘၣ် လၢလံာ်စီဆှံပူၤဘၣ် မ့တမ့ၢ် ဖဲပနၢ်ဟူဘၣ် တၢ်ဂ့ၢ်လၢ အလီၤဆီ တမံၤမံၤအခါ ပကဘၣ် ဆိကမိၣ် ပဲာ်ထံနီၤဖးအီၤ လီၤတံၢ်လီၤဆဲး. လၢညါ ဖဲစိဘံးယၢး ယူနံၤယၢၤ ပၢတၢ်အစိၤန့ၣ် ပဒုၣ်ပဒါတဖၣ် ရၤလီၤဝဲ လံာ်ပရၢလၢ အလီၤဂာ်လၢ အဟဲလၢ ဝဲၤလီၢ်ခိၣ်သ့ၣ်အအိၣ်. လံာ်ပရၢ တဲဝဲလၢ ပဒီပုၢ်ဝဲၢ်တဖၣ် ကဘၣ် မၤလီၤဖးအသး မ့တမ့ၢ် တဘၣ်ကနၣ်ဃုာ် တၢ်ဟံးစုနဲၣ်ကျဲလၢ အဟဲလၢ ပတၢ်ကရၢကရိအအိၣ်ဘၣ်. လံာ်ပရၢအံၤ ဖျါလီၤဂာ်လၢ အဟဲလၢ ပတၢ်ကရၢကရိအအိၣ် ဘၣ်ဆၣ် ဒီပုၢ်ဝဲၢ်လၢ အအိၣ်ဒီး တၢ်သးတီတဖၣ် တနာ်ဝဲ တၢ်လံၣ်တၢ်လီအံၤဘၣ်. ဒီးအဝဲသ့ၣ် သ့ၣ်ညါဝဲလၢ တၢ်ဂ့ၢ်လၢ အအိၣ်လၢ လံာ်ပရၢအပူၤန့ၣ် တဘၣ်လိာ်သးဒီး တၢ်လၢအဝဲသ့ၣ် မၤလိဝဲလၢ လံာ်စီဆှံအပူၤဘၣ်. ဆၢကတီၢ်ခဲအံၤ ပဒုၣ်ပဒါတဖၣ် သူဝဲအ့ၤထၢၤနဲၣ် ဒီးစိၤၡၢၤမံဒံယါ ဒ်သိး ကမၤဒံဝ့ၤဒံဝီၤပသး ဒီးကမၤလီၤဖးပှၤအဂီၢ်. အဃိ ဒ်သိးပသးတ “ဒံဝ့ၤဒံဝီၤ” ဒီးပတ “ဘၣ်ယိၣ်တၢ်တဂ့ၤ” အဂီၢ် ပကဘၣ် ဒီသဒၢပသး. ဒီးတၢ်လၢပဖး ဒီးပနၢ်ဟူဘၣ်တဖၣ် ဘၣ်လိာ်သးဒီး တၢ်မ့ၢ်တၢ်တီလၢ ပမၤလိဘၣ်ဧါန့ၣ် ပကဘၣ်ဆိကမိၣ်ထံအီၤ လီၤတံၢ်လီၤဆဲး.—၂ သ့း ၂:၂; ၁ ယိၤ ၄:၁. တၢး၂၄.၀၇ ၁၂-၁၃ ¶၁၄-၁၅

ယဟိဝၤယွၤ တ့လီၤပှၤဃုာ်ဒီး တၢ်သ့တၢ်ဘၣ်လၢ ပကဆၢတဲာ်တၢ်လၢ ပနီၢ်ကစၢ် အဃိ ပဆၢတဲာ်တၢ် ကိးနံၤဒဲး. ဘၣ်ဆၣ် တၢ်အရ့ဒိၣ်ကတၢၢ်လၢ ပကဘၣ်ဆၢတဲာ်န့ၣ် မ့ၢ်ဝဲ ပဟ့ၣ်လုၢ်ထီၣ်သးလၢ ယဟိဝၤယွၤအအိၣ် ဒီးဘူၣ်ထီၣ်ဘါထီၣ်အီၤ တပူၤဃီဒီး ပဒီပုၢ်ဝဲၢ်မုၣ်ခွါ. ဘၣ်မနုၤအဃိ ယဟိဝၤယွၤ အဲၣ်ဒိးလၢ ပှၤကိးဂၤဒဲး ကဟ့ၣ်လုၢ်ထီၣ်သး လၢအအိၣ်လဲၣ်. အအဲၣ်ဒိးလၢ အဝဲသ့ၣ်ကအိၣ်ဒီး တၢ်ရ့လိာ်သးဒီးအီၤလၢအဂ့ၤ ဒီးအိၣ်မူဘၣ် လီၤထူလီၤယိာ်. (၅ မိၤ ၃၀:၁၉, ၂၀; ကလၤ ၆:၇, ၈) ယဟိဝၤယွၤ တမၢဆူၣ်ပှၤလၢ ပကဘူၣ်ထီၣ်ဘါထီၣ်အီၤဘၣ်. ယဟိဝၤယွၤ ပျဲဝဲလၢ ပကဆၢတဲာ်တၢ်လၢ ပနီၢ်ကစၢ်. အဃိ ပှၤလၢအဒိးဘျၢထံဝံၤတဂၤ မ့ၢ်မၤဘၣ် တၢ်ကမၣ်ဖးဒိၣ်န့ၣ် တၢ်အိၣ်ဖှိၣ်သးပှၢ် ကဘၣ်မၤဒ်လဲၣ်. ပှၤတဂၤအံၤ မ့ၢ်တပီၢ်ယၢ်လီၤက့ၤသးဘၣ်န့ၣ် ပှၤကထုးထီၣ်ကွံာ်အီၤလၢ တၢ်အိၣ်ဖှိၣ်အပူၤ. (၁ ကရံၣ် ၅:၁၃) သနာ်က့ ယဟိဝၤယွၤ အဲၣ်ဒိးဝဲလၢ အဝဲသ့ၣ် ကပီၢ်ယၢ်လီၤက့ၤသး ဒီးဟဲက့ၤလၢအအိၣ်. အဃိ ယဟိဝၤယွၤရဲၣ်ကျဲၤဝဲ တၢ်ပှ့ၤက့ၤ ဒ်သိး အကပျၢ်ကွံာ် ပှၤလၢအပီၢ်ယၢ်လီၤက့ၤသးတဂၤ အတၢ်ကမၣ်. ပကစၢ်ယွၤလၢ အသူၣ်အိၣ်သးအိၣ်ပှၤန့ၣ် အအဲၣ်ဒိးလၢ ပှၤမၤကမၣ်တၢ်တဖၣ် ကပီၢ်ယၢ်လီၤက့ၤသး.—ကၤ ၁:၃; ရိ ၂:၄; ယၤ ၄:၈. တၢး၂၄.၀၈ ၁၄ ¶၁-၂