Nahum
3 Kpundɔɔ cho le chiee diu diu hoo waŋnda chieeya wo!
O cho o piaa cha a choolaŋ, nduyɛ wanaa cho loŋ nda kaala delɔɔ choo wo.
Le teleŋ o teleŋ, a cho waŋnda kɔlaŋ delɔɔ choo ma puŋga nyɛm ndaŋ!
2 A koŋ kpatooleŋ mi diomndo kua kɛ. Peluŋ nyɛm nyaanaŋndoŋ cho bɔɔluuwo wɔkɔ wɔkɔ.
Suaa cho kɔlaŋ a tioŋnɔŋndo o hueiye niŋ, mi nyɛm nyaanaŋ suaa naŋndoŋ wa hiilɔŋndo yokpaŋ yokpaŋ.
3 Puaa cho kɔlaŋ o suaa choo. Mɔɔŋ faŋndoŋ cho woli wolioo, mi baltaŋ la wa iŋɛlɛŋgi ŋɛlɛŋgiei.
Wanaa nda diu diu wa cho ihini lɛɛsiɛŋ, ma wa a diuwaa a bembelaŋ.
A cho a kuaŋnaŋ kɛ kɛ.
Waŋnda cho keiyo boŋi boŋioo o waŋvilɛiya.
4 Kanifuule, tiɔmɔɔ bɛndu wana lanɔ tiamaa hoo tosa muŋ kpou ni.
Wana che ndu dɔɔ pɛ nyɔɔ hɛnaŋ num a naŋɔɔ o naŋ ndo. Wana viamaa layawa bɛndoo pila o cho vɛlɛ ni.
A kaa ndɔ tiamaa hoo o luei lɛŋii bɔɔbɔɔ o yaŋɔɔleŋ niŋ ni. Nduyɛ, mbo hui yuŋgula bɔɔbɔɔ a yawala o viam ndaŋ.
5 Chɛhowa, Mɛlɛka puaa chɔuwa dimi aa, “I cho num chiŋalaŋ a sɔŋgɔɔ, Ninivɛɛ.+
I cho doma vilɛi cho num lekɔɔ wo kpeeŋa mi heelu ndu tema num o hɔl.
Okoŋ mi tosa mi lɛŋnde kpou che num tum fondo.
Nduyɛ, masɛi cheleŋnde cho siɔmbula numndaŋ chɔ.
6 I cho num nyɛm nɔɔlɛiyoŋ hulɔɔ choo,
Mi tɛɛmbuu num labɛɛ.
I cho tosa mi waŋnda che num ma handuŋ balaŋ o lasondo.+
7 Wana o wana che num pɛ, o cho nyaanɔŋ+ mbo dimi aa,
‘Ninivɛɛ sɔla tambei fɔ!
Nɛɛnɛ mɔnɛi cho yɛ biyɔɔ le num?’
Kuɛɛnɛ ya cho yɛ waŋnda sɔla le ma dɛɛniaa num kɔllo?
8 Baa a bɛnda pa ma hiau No-amɔŋ,*+ chiee wa hoo o pioo Nail ikɛiyo?+
Mɛŋndaŋ ma wa ndu ma balaa silɔ.
Pee mɛŋma ihɛllo wa sul ndɔɔ ni, nduyɛ kpaki ndɔɔ wa pee mɛŋma ihɛllo ni.
9 Itoopiaa a Ichipi o ba chioo hoo ndoo sɔla kpaaya bɛndu ndoo nɔ wo ni.
Waŋnda Puti+ a haa Liibiaa wa wanaa nduaa malaa ni.+
10 Kɛ a koŋ kpou, ma bii waŋnda No-amɔŋ,
Ma kua a nda o chɛleŋ niŋ.+
Chuauwaa ndaa bɛɛ, ma viɔl nda o sɔŋgi nɛi o nɛi ma pesi nda vɛ vɛ.
Waŋ piaanduaa ndaa ke bɛɛleŋ tau wa, ma wuu kooŋ le nda piɔuwaŋndo.
Nduyɛ puaa nduaa tɔɔmaa bɛnduaa kpou, ma duau nda o kpiɔɔ.
11 Num Ninivɛɛ, muɛiyaŋ ma cho num biyɔɔ.+
A cho hunɔɔ lo pɛ,
Nduyɛ ma nuuviaa fondaa le yaamɔɔnɔɔ vioŋnɔŋndo.
12 Fondaŋnda kala kalala ŋ taŋgul taŋ, la cho ko maa yɔmii mafikii nɔ fikiima tasiaŋ ma diuwaa lechoo ve.
Te a hiiluu ndi pɛ, ma cho deli wanaa yima bɛnduaŋ ma cho niŋ nda o lasondo.
13 Puaa chɔuwaa ŋ nɔ wa cho ko maa ŋwaŋ laandu.
Diola kpakila cho o lɛŋnde numndeŋ niŋndaŋ la cho kumbiŋ wakpa le yaamɔɔwaa numnda.
Yiŋndeŋ le cho pɛŋgɛŋ cho o diola kpakilaŋ ndoŋ kpou lomɔɔ.
14 Naŋ pɔɔ mɛŋndaŋ le dɔwɔɔ nda cho num o piŋndo niŋndo!+
Bɛɛndiaa fondaŋnda kala kalala ŋ taŋgul taŋ.
Tol o puulu lindaa niŋ ma niɔu niɔu ndu.
Chua kowii* luaa ŋkpilikioo.
15 Kɛ a koŋ kpou, yiŋndeŋ le cho hunɔɔ num lomɔɔ chilikɔ.
Muɛi faŋnde cho num lɔwa ma del.+
I cho num tɛɛmbuu, mɛɛ soonuaa pɔmbuaa tɛɛmbuu tɔlɔɔ yɛ.+
Tosa mi wanaa numnda kui mɛɛ soonuaa pɔmbuaa wa nuaa yɛ!
A tonya, tosa ma kui maa ŋsoonɔ!
16 A tosa mi yulaa numnda kui ma hiau looŋ o halaa niŋ.
Kɛ soonɔɔ fulaŋ o boo niŋ mbo kuaŋnuŋ.
17 Wanaa num aa mɛŋgɛlaa cho ko maa soonuaa.
Kuubaa num aa dialuŋ kalaa bɛɛ cho ko maa soonuaa kunda bɛnduaa.
Te hueiye wa pɛ, a chal o heela chɔluaa nda taŋgul a poutaŋ ndaŋ.
Kɛ te paaleŋ le fula pɛ, a kuɛŋnuŋ.
Nduyɛ wana o wana sina lɛ naa nda cho le.
18 Masaa Asiiliaa, wanaa num aa mandaa lasaa yɔŋnuŋ yiŋgi yiŋgi a luaŋ.
Laŋgbaa num aa kalla choŋnuŋ o chiɛila ndalaŋ niŋ.
Wanaa numnda saŋnuŋ o pembuŋ bɛndoŋ choo.
Nduyɛ wana o wana cho le nda chuuŋgiaa naapilɛ le.+
19 Wana cho le num mala o kpundɛ komal num hoo wo niŋ te.
Pau del numndo chiɔunuŋ te.
Wanaa cho konaa hoo tueiyɔɔ a num okɔɔ wa kpou cho balaŋ tiɔmɔɔ.+
Kanifuule, a saaŋgiaa bɔɔ waŋnda a dɛnɛ wɔɔŋ num bɛndoo.”+