Isikiɛɛ
19 “A nɔ ma soli chondii imɔnɛi a yuŋgula leboltaŋ Isɔluɛi okɔɔ. 2 Dimi aa:
‘Vɛɛnɛ kala num wa yɛ? Kpɔkuŋ* laandoo o kpɔkuŋnda tɛɛŋ o wa ni.
O wa ihini kpɔkuŋaa fonduaa kpaaya bɛnduaa tɛɛŋ mbo manda chuauwaa nduaa.
3 Mbo manda chuauwaa nduaa o pilɛ, mbo simnuŋ kpɔkuŋ fɔŋndɔ kpaaya bɛndu.+
Mbo pɛɛku le visiaa sɛɛsiaa,
Nduyɛ mi ndoo de pɛŋ waŋnda chieeya.
4 Mɛɛ lɛŋnde tuei a ndu okɔɔ, ma tuu ndu sooŋndo mbo del leniŋ.
Okoŋ, ma baa ndu doluŋndoŋ ma kua a ndu o lɛŋnde Ichipi leŋ niŋ.+
5 Mɛɛ kala ndɔ nua o nɛi tei, mbo cha maa tiindaŋ cho lɛ le mi chuale ndɔleŋ le miiŋgu le.
Okoŋ, mbo hɛli vɛlɛ chuale cheleŋ o chuauwaa nduaa tɛɛŋ, mbo siiŋguu leŋ kpɔkuŋ fɔŋndɔ kpaaya bɛndu.
6 Mi ndu bɛɛ ndoo balu kpɔkuŋnda tɛɛŋ, nduyɛ mbo simnuŋ kpɔkuŋ fɔŋndɔ kpaaya bɛndu.
Mbo pɛɛku le visiaa sɛɛsiaa, nduyɛ mi ndoo de pɛŋ waŋnda chieeya.+
7 Mi ndoo baluŋ daŋgoŋ daŋgoŋ o chiɛila ndala choo choola kala kalalaŋ tɛɛŋ, nduyɛ mbo tɛɛmbuu chieeŋ ndaŋ bɛndoŋ.
Mbo tosa mi lɛŋndeŋ le lo pɔm, nduyɛ pɛɛliaa ndɔɔ koni wanaa tuɛi niŋ ni.+
8 Mi lɛŋii balu ndu ve kuel ndu, ma wuu ndu yala ndaa choo.
Nduyɛ mbo del o sooŋ nda tuulul ndu wo niŋ, ma bii ndu.
9 Ma baa ndu doluŋndoŋ, ma wou ndu o kesoo niŋ, okoŋ ma kua a ndu o masaa le Babilɔŋ ndo.
Loŋ nda kɔ kinda ndu ni, le halikpeŋ wanaa tui lɛ diom ndɔɔ o pembuŋ bɛndoŋ choo o Isɔluɛi niŋ te.
10 Kala num wa ko maa yɔm makilepiiyo+ o kooma numndaŋ niŋ, o nda tɔl o pioo daŋgala wo.
Mbo soli lɛuwoŋ tau, nduyɛ mbo kuam le mɛɛ o wa mɛŋndaŋ sɔlaa tau tau yɛ.
11 Mbo soli lɛuwuŋ kala kalaŋ muŋ bɛnda le tindala lemasalaŋ ndoŋ.
Mi yɔmndo hoo hindu, mbo pɛŋgɛlaŋ yɔmii cheleŋ choo.
Le mɛɛ ndoo bandu mbo pui yukɔŋ yɛ, wana o wana ndoo nɔla mbo che ndu.
12 Kɛ mɛɛ nda dɔɔnuŋ tumbe a ndu o kala kala, ma suŋgu ndu,+ ma viau ndu lɛŋ,
Okoŋ mi hueiyii fula ba luaŋ ndo ve veesiaa komɔɔ ndɔɔ.
Ma kili lɛuwuŋ ndɔŋ kala kalaŋ, miŋ vesa,+ nduyɛ ma mal muŋ o yiŋ.+
13 Suŋ suŋ niŋ, o cho o tualaa o pollo niŋ,
Naa mɛŋma cho le wa.+
14 Mi yiŋndeŋ le chaŋ o lɛuwuŋ ndɔŋ, mi le luam puunduŋ ndɔŋ a komɔɔ ndɔɔ.
Lɛuvii kala kɛ kɛ ve lɛ le tinda lemasaa toosiaa le.+
“‘Chondii imɔnɛi cho hei ni, nduyɛ i cho hiouwɔɔ lachi a waa chondii imɔnɔ.’”