Lutlut Sin Mwet Kuhlwacnsap Oaru luhn Jeova uh

1, 2. David el ahkkahlwemye fuhkah oaru lal nuh sin God? (Liye petsac se meet ke mwe lutlut inge.)

SAUL ac mwet mweun 3,000 lal ah sokol David ke yen mwesis fin acn Judah in unilyac. Tuhsruhktuh, ke sie fong ah, David ac mwet lal uh konwacack acn in monglac lal Saul ac mwet mweun lal inge. Eltahl nohfohnna mutul. Na David ac Abishai kahkahsrihk na fahsr ahluhkwelah mwet mweun ah nuh yohrohl Saul. Abishai el mahmahyang nuh sel David: “Lwelah nga in faksilyac inge ke osra nahtuhl sifacna. Nga ac faksilyac nuh infohk uh ke fakfuhk sefanna ac tiac enenuh in pacl luo.” Tuhsruhktuh David el tiac lwelah elan unilyac Saul. El fahk nuh sel Abishai: “Nik kom ahkkulukyacl! LEUM GOD El ac kai kuhtwena mwet suc ahkkulukye moul luhn tohkohsrah se suc El sulaclah.” Na David el sifwil pac tahfwelah in fahk: “LEUM GOD elan ikolyucwi tuh nga in tiac ahkkulukye moul luhn mwet se suc el sulaclah in tohkohsrah!”​—Sie Samuel 26:8-12.

² David el etuh ma el enenuh in oruh tuh elan oaru nuh sin Jeova. El etuh lah el enenuh in suhnakihn Saul, pwacnacng el tiac pacna nuhnkuh elan ahkngalyacl. Efuh? Mweyen God el sulacllah Saul elan tohkohsrah luhn mwet Israel. Ke pacl inge, Jeova el luhngse mwet kuhlwacnsap nuhkewa lal in oaru nuh sel ac suhnakihn mwet el sulaclah uh, in oacna ke pacl meet ah.​—Riti Psalm 18:25.

3. Ke inkacnek fuhkah Abishai el oaru nuh sel David?

³ Abishai el suhnakihn David ke srihpen el etuh lah David pa God el sulaclah in tohkohsrah uh. Tuhsruhktuh, tukun David el eklac tohkohsrah, el oraclah ma kuluk pucspucs. El wi muhtwacn kiyacl Uriah ah oan, na tohkoh el sap Joab elan oraclah sie inkacnek ah tuh Uriah elan misac ke pacl in mweun. (Luo Samuel 11:2-4, 14, 15; Sie Chronicle 2:16) Joab el ma wiyacl Abishai. Pwacnacng, sahp Abishai el lohng ma David el oruh inge. Tuhsruhktuh, el srackna suhnakuhnuhl David. In wekuhnacng, Abishai el sie mwet kol ke mweun pwacnacng el kuh na in orekmakihn pacl wo sac in eklac sie tohkohsrah, tuhsruhk el tiac. Ma el oruh ah pa, el kuhlwacnsuhpacl David ac karuhnguhnuhl liki mwet lokoalok lal.​—Luo Samuel 10:10; 20:6; 21:15-17.

4. (a) Ke inkacnek fuhkah David el sie mwe srihkasrak na wo ke oaru lal nuh sin God? (b) Meac kuhtuh pac mwe srihkasrak sahyac ma kuht ac fah sramsramkihn uh?

⁴ David el oaru nuh sin Jeova ke lusen moul lal nohfohn. Ke pacl se el srackna fuhsr, el unilyac Goliath, suc ahkkulukye inen Jeova ac mwet Israel. (Sie Samuel 17:23, 26, 48-51) Ke pacl se David el eklac tohkohsrah, Nathan mwet pahluh luhn Jeova el ahksuwohsyacllah ke srihpen ma kuluk pucspucs ma el oraclah ah. David el sa na fahkwack lah pwacye el oraclah ma kuluk upac se ac el auliyak. (Luo Samuel 12:1-5, 13) Tok, ke David el mahtuhoh, el sang ma sacohk pucspucs lal in kahsruh muhsahelah tempuhl luhn Jeova. (Sie Chronicle 29:1-5) Arlacna kahlwem lah finne David el oraclah ma na kuluk, el tiac tui in ahkkahlwemye oaru nuh sin God. (Psalm 51:4, 10; 86:2) Ke mwe lutlut se inge, kuht ac fah sramsramkihn mwe srihkasrak lal David ac ke kuhtuh pac mwet sahyac in pacl lal. Kuht ac fah oacyacpac lutlutkihn lah kuht ac ahkkahlwemye ohiyen oaru nuh sin Jeova yohk liki kuhtwena mwet sahyac ke inkacnek fuhkah. Ac kuht fah sramsramkihn kuhtuh pac ohiyac sahyac ma ac fah kahsre kuht in oruh ma inge.

YAC KOM AC FAH OARU NUH SIN JEOVA?

5. Mwe lutlut fuhkah se kuht lotwelah ke tahfonglac lal Abishai uh?

⁵ Abishai el luhngse in unilyac Saul ke srihpen el srihke in oaru nuh sel David. Tuhsruhktuh ke srihpen David el etuh lah sie ma kuluk in ahkkulukye moul luhn mwet suc Jeova “El sulaclah,” el tiac lwelah Abishai elan unilyac tohkohsrah. (Sie Samuel 26:8-11) Ma inge luti nuh sesr sie mwe lutlut na yohk srihpac: Ke pacl se kuht enenuh in sulaclah lah suc kuht ac oaru nuh se meet uh, kuht enenuh in nuhnkuh ke kahs in kahsruh luhn Bible ma ac kuh in kahsre kuht ke ohiyac ma kuht sun uh.

6. Finne tiac kuluk kuht in oaru nuh sin sucu kuh kawuck lasr uh, efuh kuh kuht enenuh in taran?

⁶ Tiac kuluk kuht in oaru nuh sin sie mwet kuht luhngse, oacna kawuck se lasr kuh sie mwet in sucu lasr uh. Tuhsruhktuh ke srihpen kuht sesuwohs, puhlakihn lasr inge ac kuh in kiacpwekuhtlac. (Jeremiah 17:9) Pwacnacng, fin mwet se kuht luhngse oraclah sie ma kuluk ac som liki ma pwacye uh, kuht enenuh in esam lah yohk srihpac kuht in oaru nuh sin Jeova liki kuhtwena mwet sahyac.​—Riti Matthew 22:37.

7. Ke inkacnek fuhkah sie muhtwacn lili el oaru na nuh sin God ke sie pacl upac?

⁷ Fin sie mwet in sucu lom an sisilac liki congregation uh, kom kuh in ahkkahlwemye nuh sin Jeova lah kom oaru nuh sel. Ke sie mwe puhpuhlyuck, ninac kiyacl Anne ah sisilac liki congregation uh. Sie lwen ah el pahnglolack Anne ac fahk nuh sel lah el ke som muhtwacta yohrohl.^[1] (Liye endnote.) Ninac kiyacl Anne uh fahk lah el arlacna ahsor ke srihpen sucu uh sruhnga sramsram nuh sel. Ma inge oruh Anne el arlacna ahsor pac. Pwacnacng, el wuhlelah nuh sel muh el ac tohpohkuhl ke sie lwacta. Meet liki Anne el suhmuhslah lwacta se inge, el muhta nuhnkuh ke kuhtuh kahs in kahsruh ke Bible uh. (Sie Corinth 5:11; Luo John 9-11) Na ke lwacta sac, el ahkuhtweyac ke sie inkacnek na kuhlwacng lah ninac kiyacl uh pa som liki sucu uh ke pacl se el oraclah ma kuluk ac sruhnga in auliyak. Anne el fahk nuh sin ninac kiyacl uh lah inkacnek sefanna el kuh in sifwil engan uh pa el fin fohlohk nuh yurin Jeova.​—James 4:8.

8. Ohiyac fuhkah ac fah kahsre kuht in oaru nuh sin God?

⁸ Mwet kuhlwacnsap oaru luhn God ke pacl lal David ah inse puhsisacl, kuhlwacng ac puhlaik pac. Lwelah kuht in liye lah ohiyac inge ac kahsre kuht fuhkah in oaru nuh sin Jeova.

KUHT ENENUH IN INSE PUHSISACL

9. Efuh kuh Abner el srihke in unilyac David?

⁹ Jonathan suc wen nahtuhl Saul ac Abner suc mwet kol ke un mwet mweun luhn acn Israel eltahl liye ke David el us insifacl Goliath tukun el unilyac ac sang nuh sel Tohkohsrah Saul. Jonathan el eklac kawuck se lal David ac el arlacna oaru nuh sel. (Sie Samuel 17:57–18:3) Tuhsruhktuh Abner el tiac. Tok el kahsrel Saul suc luhngse in unilyac David. (Sie Samuel 26:1-5; Psalm 54:3) Jonathan ac Abner eltahl etuh lah God el luhngse David elan eklac tohkohsrah se tok luhn acn Israel. Tuhsruhktuh, tukun Saul el misac Abner el tilac kahsrel David a el srihke in oruh Ish-bosheth, wen nahtuhl Saul elan tohkohsrahlac. Sahp Abner el sifacna ke eklac tohkohsrah ac sahp pa inge srihpac se pwacnacng el oan yurin sie sin muhtwacn kiyacl Tohkohsrah Saul. (Luo Samuel 2:8-10; 3:6-11) Efuh kuh tiac oacna sie nuhnak ac puhlakihn lal Jonathan ac Abner kacl David uh? Mweyen Jonathan el oaru nuh sin Jeova ac el inse puhsisacl tuhsruhktuh Abner el tiac.

10. Efuh kuh Absalom el tiac oaru nuh sin God?

¹⁰ Absalom, wen nahtuhl Tohkohsrah David el tiac oaru nuh sin God mweyen el tiac inse puhsisacl. El ke eklac tohkohsrah pwacnacng el eis “chariot se ac horse ekahsr nuh sel sifacna, oacyacpac mwet luhmngaul in ahtlol.” (Luo Samuel 15:1) El oacyacpac kihfaslah nuhnak luhn mwet Israel pucspucs in oaru nuh sel. El tuh srihke pac in uniyac pahpah tuhmwacl uh, finne el etuh lah Jeova el sulacllah David elan tohkohsrah luhn mwet Israel.​—Luo Samuel 15:13, 14; 17:1-4.

11. Ma wo fuhkah kuht kuh in lotwelah ke ma suhmuhslah in Bible kacl Abner, Absalom ac Baruch uh?

¹¹ Ke pacl se sie mwet el tiac inse puhsisacl a el ke in yohk kuh ac wal lal, ma inge oruh upac nuh sel elan oaru na nuh sin God. Pwacye lah kuht luhngse Jeova ac kuht tiac luhngse in nuhnkuh kacsr sifacna ac kuluk oacna Abner ac Absalom. Tuhsruhktuh, kuht enenuh in taran kuht in tiac muhtwacwacack in luhngse kahsruhp ke mani kuh in eis sie orekma ma ac oruh kuht in puhla muh yohk srihpacsr. Ma inge ac kuh in ahkkulukyelah fototo lasr nuh sin Jeova. Ke lusen pacl se, Baruch, mwet sihm lal Jeremiah el luhngse in eis sie ma ma wacngihn yohrohl ac el tilac engan in kuhlwacnsuhpuh God. Pwacnacng Jeova el fahk nuh sel Baruch: “Nga ikruiyac ma nga muhsahelah, ac nga fohsack ma nga yukwiyac. Nga ac oruh ohinge nuhke facluh nohfohn. Yac kom suk in orek nuh sum wo liki mwet ngiac? Nimet nuhnkuh ohingacn.” (Jeremiah 45:4, 5) Baruch el lohngohl Jeova. Ac kuht enenuh in lohngohl pac, mweyen ke pacl na sa el ac fah kuhnahoslah facl kuluk se inge.

12. Ahkkahlwemye lah efuh kuht tiac kuh in oaru nuh sin God ke pacl kuht nuhnkuh kacsr sifacna uh.

¹² Daniel, sie mukul lili fin acn Mexico el tuh enenuh in sulaclah lah suc el ac fah oaru nuh se uh. El luhngse in pahyuck nuh sin sie muhtwacn suc tiac kuhlwacnsuhpuh Jeova. Daniel el fahk: “Nga tahfwelah na in sihm nuh sel tukun pacna nga sroacng nuh ke orekma in pioneer uh.” Tuhsruhktuh el akihlenack lah el nuhnkuh na kacl sifacna ac ke ma el luhngse uh. El tiac oaru nuh sin Jeova pwacnacng el enenuh in sisilyac. Pwacnacng, el fahk nuh sin sie mwet elder ke muhtwacn se inge. Daniel el ahkuhtweyac: “El kahsreyuc in liye lah in oaru nuh sin God, nga enenuh in tui ke sihm nuh sel uh. Tukun puhruhe yohk ac tuhng, pa inge ma nga oruh ah. Kihtin pacl tohkoh, engan luhk ke orekma in luti uh yohkwelihk.” Oasr muhtwacn kiyacl Daniel ke pacl inge suc luhngse Jeova ac el kuhlwacnsuhpuh Jeova ke pacl inge oacna sie mwet suc fuhfahsryacsr nuh ke congregation pucspucs.

OARU LASR NUH SIN GOD AC KAHSRE KUHT IN KUHLWACNG

13. Ke pacl se David el oraclah ma na kuluk se, Nathan el oruh fuhkah elan oaru nuh sin God ac David kewana?

¹³ Ke pacl se kuht oaru nuh sin Jeova, kuht kuh pac in oaru nuh sin mwet sahyac ac kahsreltahl ke inkacnek ma wo emeet uh. Mwet pahluh Nathan el oaru nuh sin Jeova ac oacyacpac nuh sel David. Tukun David el eislah muhtwacn kiyacn sie pacna mukul ac uniyac mukul inge, Jeova el suhpwaclah Nathan in sang kahs in kai nuh sel David. Nathan el puhlaik ac ahkos Jeova. Tuhsruhktuh el lahlmwetmwet ac sramsram nuh sel David ke inkacnek na kuhlwacng. El luhngse in kahsrel David in kahlwem kac lah fuhkah luhpan ma kuluk el oraclah inge. Pwacnacng, el sruhmuhn nuh sel ke sie mukul kahsruhp suc pihsraclah lamb sokofanna nuhtin mukul suhkahsrup se. Ke pacl se David el lohngack ma inge, el arlacna foloyak ke ma mukul kahsruhp se inge oraclah ah. Tohkoh, Nathan el fahk: “Kom pa mwet sac!” David el kahlwemack kac lah el oraclah ma na kuluk se lainuhl Jeova.​—Luo Samuel 12:1-7, 13.

14. Kom ac oruh fuhkah kom in oaru nuh sin Jeova ac nuh sin kawuck kuh sucu lom an?

¹⁴ Kom kuh pac in oaru nuh sin Jeova ac srackna oaru nuh sin mwet sahyac ke kom kuhlwacng. Ke sie mwe puhpuhlyuck, sahp oasr etuh lom ke sie mwet lili suc oraclah sie ma kuluk na upac. Sahp kom luhngse in oaru nuh sel, yohkna el fin kawuck fototo se lom kuh el sie mwet in sucu lom. Tuhsruhktuh, kom etuh pac lah ma yohk srihpac emeet uh pa kom in oaru nuh sin Jeova. Pwacnacng in oacna Nathan, ahkos Jeova tuhsruhktuh kuhlwacng nuh sin mwet lili wiyom an. Fahk nuh sel lah el enenuh in siyuck kahsruh sin mwet elder ac lah el enenuh in sramsram nuh seltahl ke pacl na sa. El fin tiac, na kom enenuh in sifacna som fahk nuh sin mwet elder ah. Ke kom oruh ma inge, kom oaru na nuh sin Jeova. Ac ke pacl sacn pacna, kom kuhlwacng nuh sin mwet lili wiyom an mweyen mwet elder uh kuh in kahsrel ingena in sifwil fototo nuh sin Jeova. Eltahl ac ahksuwohsyacl ke kahs fihsracsr ac kuhlwacng.​—Riti Leviticus 5:1; Galatia 6:1.

KUHT ENENUH PUHLAIK TUH KUHT IN OARU NUH SIN GOD

15, 16. Efuh kuh Hushai el enenuh in puhlaik tuh fah el oaru nuh sin God?

¹⁵ Hushai el sie sin kawuck na oaru lal Tohkohsrah David. Ke mwet in pacl sac luhngse Absalom elan tohkohsrah, Hushai el enenuh puhlaik tuh elan oaru na nuh sel David ac nuh sin God. El etuh lah Absalom el tuhkuh nuh Jerusalem wi mwet mweun lal ah ac lah David el kahinglac. (Luo Samuel 15:13; 16:15) Tuhsruhktuh meac Hushai el oruh? Yac el muhlkuhnuhllah David ac ahkkweyacl Absalom? Moh. Finne David el mahtuhoh ac puhs mwet luhngse in unilyac, Hushai el oaru na nuh sel mweyen Jeova el srihsrngilyac elan tohkohsrah. Pwacnacng, Hushai el som nuh Finohl Olive in ohsun nuh sel David.​—Luo Samuel 15:30, 32.

¹⁶ David el siyuck sel Hushai elan fohlohk nuh Jerusalem ac oruh in na muh el kawuck nuh sel Absalom tuh elan kuh in kihfaslah insiacl Absalom in lohng kahs in kahsruh lal uh luhkel na Ahithophel. Hushai el puhlaik ac fihliyac moul lal in mwe sensen tuh elan ahkos ma David el siyuck inge ac in oaru na nuh sin Jeova. David el puhruhe tuh Jeova elan kahsrel Hushai, ac pa inge ma sikyak ah. Absalom el lohngohl Hushai luhkel na Ahithophel.​—Luo Samuel 15:31; 17:14.

17. Efuh kuh kuht enenuh in puhlaik tuh fah kuht kuh in oaru?

¹⁷ Kuht enenuh in puhlaik tuh fah kuht kuh in oaru nuh sin Jeova ac ahksol liki na in oruh ma luhngse luhn mwet in sucu lasr, mwet wi kuht orekma kuh mwet kol luhn government. Ke sie mwe puhpuhlyuck e ke pacl se Taro el srackna tuhlihk mukul srihsrihk se fin acn Japan, el sang kuhiyacl kewa in ahkinsewowoye pahpah ac ninac kiyacl uh. El ahkos ma eltahl fahk uh ac oaru nuh seltahl. El tiac oruh ma inge ke na srihpen el enenuh in oruh, tuhsruhktuh ma ke srihpen el luhngse eltahl. Tuhsruhktuh, ke pacl se el muhtwacwacack in lutlut Bible yurin Mwet Loh luhn Jeova, pahpah tuhmwacl ac ninac kiyacl ah luhngse elan tui. Ma inge arlac ahkahsoryacl ac upac nuh sel in fahk nuh seltahl lah el sulaclah in som nuh ke toeni inge. Taro el fahk: “Eltahl arlacna kasrkuhsrak sihk pwacnacng ke yac ekahsr, eltahl tiac lwelah nga in som muhtwacta yohrohltahl. Nga puhruhe siyuck ke puhlaik tuh nga in tu na kuh ke sulaclah luhk ah. Ke pacl inge eltahl tiac kasrkuhsrak oacna meet ah ac nga kuh in sifwilpac muhtwacta yohrohltahl.”—Riti Soakas 29:25.

18. Mwe kahsruh fuhkah kom eis ke mwe lutlut se inge?

¹⁸ In oacna David, Jonathan, Nathan, ac Hushai, lwelah kuht in puhla mwe insewowo ma tuhkuh ke kuht oaru nuh sin Jeova. Kuht tiac luhngse in oacna Abner ac Absalom, suc tiacna oaru. Pwacye lah kuht sesuwohs ac kuht tahfonglac pacl puhs. Tuhsruhktuh, lwelah kuht in ahkkahlwemye nuh sin Jeova lah oaru lasr nuh sel uh pa yohk srihpac emeet ke moul lasr uh.