Ahkpwacyeye nuh sin Jeova lah Kom Oaru nuh Sel

1, 2. Efuh kuh fototo lal Jonathan nuh sel David uh mwe srihkasrak na wowo se ke ohiyen oaru?

JONATHAN el arlacna fwefwelac ke luhpan puhlaik lal David ke el unilyac Goliath. Na ingena, David el “us sifacl Goliath” nuh yohrohl Tohkohsrah Saul luhn Israel, pahpah tuhmwacl Jonathan. (Sie Samuel 17:57) Wacngihn ahlohloh lal Jonathan lah God el weluhl David. Pwacnacng muhtwacwacack ke pacl sac fahlac, Jonathan ac David eklac kawuck na fototo. Eltahl wuhlelah in oaru pacl nuhkewa nuh sin sie sin sie. (Sie Samuel 18:1-3) Ke lusen moul lal Jonathan, el oaru nuh sel David.

² Jeova el finne sulacllah David ac tiac Jonathan in pa tohkohsrah se tok luhn acn Israel, Jonathan el sruokyacna oaru lal nuh sel David. Ac ke pacl se Saul el srihke in unilyac David, Jonathan el sensen ke kawuck se lal uh. El etuh lah David el oasr ke yen mwesis nuh Horesh, pwacnacng Jonathan el som nuh we ac ahkkweyacl in tahfwelah na luhlahlfongi kacl Jeova. Jonathan el fahk nuh sel David: “Nikmet sahngweng. Saul, pahpah tuhmuhk, el tiac kuh in oruh kuhtuh ma in ahkkulukye kom. El etuh na pwacye lah kom pa ac tohkohsrah fin mwet Israel, ac nga pa ac ahkluo uh.”​—Sie Samuel 23:16, 17.

3. Meac yohk srihpac emeet nuh sel Jonathan liki na oaru lal nuh sel David? Kuht etuh fuhkah ma inge? (Liye petsac se meet ke mwe lutlut inge.)

³ Apkuhran in mwet nuhkewa kaksakihn mwet oaru uh. Tuhsruhktuh, yac kuht kaksakuhnuhl Jonathan ke na srihpen oaru lal nuh sel David? Moh. Ma se ma yohk srihpac emeet ke moul lal Jonathan ah pa oaru lal nuh sin God. Ac pa inge srihpac se pwacnacng el oaru nuh sel David ac tiac sok sel, finne tiac el a David pa ac eklac tohkohsrah uh. Jonathan el oacyacpac kahsrel David in luhlahlfongi Jeova. Mukul luo inge kewa sruokyacna oaru laltahl nuh sin Jeova ac nuh sin sie sin sie. Eltahl sruokyacna wuhlelah se eltahl tuh oraclah inge: “LEUM GOD El ac fah oruh tuh kom ac fihl nuhtum, oacyacpac nga ac fihl nuhtihk, in sruokyacna wuhlelah muhtahl se suc nga kom oraclah inmahsrloktacl tuh in oan ma pahtpaht.”​—Sie Samuel 20:42.

4. (a) Meac ac kuh in oruh kuht in engan ac insewowo na pwacye uh? (b) Meac kuht ac fah sramsramkihn ke mwe lutlut se inge?

⁴ Kuht enenuh pac in oaru nuh sin sucu, kawuck ac mwet lili wiyacsr ke congregation uh. (Sie Thessalonica 2:10, 11) Tuhsruhktuh, yohk liki nuhkewa, kuht enenuh in oaru nuh sin Jeova. El pa acse moul nuh sesr uh! (Fwackyuk 4:11) Ke pacl kuht oaru nuh sel uh, kuht ac engan ac insewowo na pwacye. Tuhsruhktuh, kuht etuh lah kuht enenuh in oaru nuh sin God finne ke pacl upac. Ke mwe lutlut se inge, kuht ac fah sramsramkihn lah mwe srihkasrak lal Jonathan uh ac kahsre kuht fuhkah in sruokyacna oaru lasr nuh sin Jeova ke inkacnek ahkosr: (1) ke pacl kuht puhla muh sie mwet suc oasr kuh la el tiac fal in suhnakihnyuck, (2) kuht fin enenuh in sulaclah lah suc kuht ac enenuh in oaru nuh se uh, (3) fin sie mukul lili suc kol congregation uh tahfonglac ke liye lal kuh ma el nuhnkuh kacsr, ac (4) ke pacl kuht puhla muh upac nuh sesr in sruokyacna wuhlelah lasr uh.

KE PACL KUHT PUHLA MUH SIE MWET SUC OASR KUH LA EL TIAC FAL IN SUHNAKIHNYUCK

5. Efuh kuh upac nuh sin mwet Israel ah in oaru nuh sin God ke lusen pacl se ma Saul el tohkohsrah?

⁵ Ohiyac na upac se pa Jonathan ac mwet Israel eltahl oasr kac ah. Tohkohsrah Saul, suc pahpah tuhmwacl Jonathan el seahkos Jeova, pwacnacng Jeova el tilac insewowo sel. (Sie Samuel 15:17-23) Finne ohinge, God el srackna lwelah Saul elan kol ke lusen yac pucspucs. Ma inge oruh upac nuh sin mwet ah in oaru nuh sin God, ke srihpen tohkohsrah se ma suleyucklac in muhta “fin tron luhn Jeova” el oruh ma kuluk pucspucs.​—Sie Chronicle 29:23.

6. Kuht etuh fuhkah lah Jonathan el sruokyacna oaru lal nuh sin Jeova?

⁶ Jonathan el sruokyacna oaru lal nuh sin Jeova. Srihke nuhnkuh ke ma Jonathan el oruh tukun Saul el muhtwacwacack in seahkos God. (Sie Samuel 13:13, 14) Ke pacl sac, un mwet mweun na luhlahp se luhn acn Philistia tuhkuh wi chariot 30,000 in lain mwet Israel. Mwet mweun na 600 pa lal Saul ah. Oacyacpac, el ac Jonathan muhkwena pa oasr kuhfwen mweun nahtuh in pacl sac. Tuhsruhktuh, Jonathan el tiac sahngweng. El esam kahs lal mwet pahluh Samuel inge: “Leum God El oraclah tari sie wuhlelah muhtahl, ac El fah tiac siskowoslac.” (Sie Samuel 12:22) Jonathan el fahk pac nuh sin sie mwet mweun ah: “Wacngihn na ma ac ikolyac [Jeova] Elan acse kuhtanglah nuh sesr, kuht finne mwet puh.” Pwacnacng, el ac mwet mweun se inge eltahl lain un mwet Philistia ekahsr ac uniyac 20 seltahl. Jonathan el luhlahlfongi Jeova ac Jeova el ahkinsewowoyacl. Jeova el oruh facluh in kusrusryak ac mwet Philistia inge sahngwenglah. Tohkoh, eltahl foracni lain ac uniyac sie sin sie. Na, mwet Israel inge kuhtanglah ke mweun sac.​—Sie Samuel 13:5, 15, 22; 14:1, 2, 6, 14, 15, 20.

7. Ohiyac fuhkah Jonathan el ahkkahlwemye nuh sin pahpah tuhmwacl?

⁷ Saul el finne tahfwelah na in seahkos Jeova, Jonathan el srackna ahkos pahpah tuhmwacl uh ke pacl nuhkewa ma el kuh. Ke sie mwe puhpuhlyuck, eltahl tuhkweni som mweun in karihngihn mwet lal Jeova uh.​—Sie Samuel 31:1, 2.

8, 9. Kuht ahkkahlwemye fuhkah oaru lasr nuh sin God ke pacl ma kuht suhnakihn mwet suc ituckyang kuh nuh se in kol kuht?

⁸ In oacna Jonathan, kuht kuh in oaru nuh sin Jeova ke kuht ahkos mwet kol luhn acn sesr uh ke pacl nuhkewa kuht kuh. Jeova el lwelah in oasr kuh luhn “mwet kol fin acn uh” facsr ac el luhngse kuht in ahkkahlwemye suhnak nuh seltahl. (Riti Rome 13:1, 2.) Pa inge srihpac se pwacnacng kuht enenuh in suhnakihn mwet kol luhn government uh eltahl finne tiac pwacye nuh sesr ac kuht puhla muh eltahl tiac fal in suhnakihnyuck. Kuht enenuh pac in suhnakihn mwet nuhkewa suc Jeova el sang kuh nuh se in kol kuht.​—Sie Corinth 11:3; Hebrew 13:17.

⁹ Olga, sie muhtwacn lili fin acn Bolivia, el ahkkahlwemye oaru lal nuh sin Jeova ke el suhnakihn mukul tuhmwacl uh, el finne oruh kuluk nuh sel.^[1] (Liye endnote.) Kuhtuh pacl uh, el ac tiac sramsram nuh sel kuh el ac fahk ma na upac nuh sel ke srihpen el sie mwet Loh luhn Jeova. El tuh fahk pac nuh sel muh el ac som luhkel ac us pac tuhlihk nahtuhltahl ingacn. Tuhsruhktuh, Olga el tiac fohlohkihn ma kuluk el oruh inge. El sang insiacl kewa in oacna sie muhtwacn pahyuck wo nuh sel. El orek mongo nwacl, oul nuknuk lal uh ac karihngihn mwet in sucu lal uh. (Rome 12:17) Ac ke pacl nuhkewa ma el kuh, el ac weluhl som muhtwacta yurin sucu ac kawuck lal inge. Ke sie mwe puhpuhlyuck, ke mukul tuhmwacl uh tuh luhngse in som nuh ke sie pacna siti nuh ke misac luhn pahpah tuhmwacl ah, Olga el oracni ac ahkolah ma nuhkewa ma eltahl ac enenuh nuh ke fuhfahsryacsr laltahl uh. Ke mas luhn pahpah sac, el tu lihkihnum ac soano in sahflah alu nuh kac uh. Tukun yac pucspucs, mukul tuhmwacl Olga uh muhtwacwacack in oruh wo nuh sel mweyen el arlacna mongfihsracsr ac el suhnakuhnuhl pacl nuhkewa. Ingena, el ahkkweyacl Olga in som wi miting ac el pa ac wucnuhllah uh. Kuhtuh pacl uh el ac weluhl Olga nuh ke toeni uh.​—Sie Peter 3:1.

KUHT FIN ENENUH IN SULACLAH LAH SUC KUHT AC FAH OARU NUH SE UH

10. Jonathan el sulaclah fuhkah lah suc el ac oaru nuh se uh?

¹⁰ Ke Saul el fahk muh el ac som unilyac David, sulaclah na upac se Jonathan el enenuh in oraclah. El ke oaru nuh sin pahpah tuhmwacl uh, a el ke oacyacpac oaru nuh sel David. Jonathan el etuh lah God el weluhl David ac tiac Saul, pwacnacng el sulaclah elan oaru nuh sel David. El sensenkuhnuhl David elan wihklac na ac el fahk nuh sel Saul lah efuh el enenuh in fuhlwellah David elan moul.​—Riti Sie Samuel 19:1-6.

11, 12. Luhngse lasr nuh sin God uh kahsre fuhkah sulaclah lasr in oaru nuh sel?

¹¹ Alice, sie muhtwacn lili fin acn Australia el tuh enenuh pac in sulaclah lah suc el ac oaru nuh se uh. Ke el lutlut Bible yurin sie Mwet Loh, el sruhmuhn ma el lotwelah inge nuh sin sucu lal uh. El fahk nuh seltahl lah el ac tiac sifwil weluhltahl ahkfuhlwactye Christmas ac el ahkuhtweyac pac lah efuh. Ke muhtwacwacackiyac ah, mwet in sucu lal uh luhman inse toasr kac, na tok eltahl arlacna kasrkuhsrak sel. Eltahl puhla muh Alice el tilac nuhnkacltahl. Na tohkoh, ninac kiyacl Alice ah fahk nuh sel muh el tiacna ke sifwil liyacl. Alice el fahk: “Nga lut ac ahsor na upac mweyen nga luhngse na pwacye sucu luhk uh. Finne ohinge, nga sulaclah muh Jeova ac Wen nahtuhl uh pa yohk srihpac emeet nuh sihk uh ac nga bacptaislac ke toeni luhlahp se na tok ah.”​—Matthew 10:37.

¹² Kuht tiac enenuh in lwelah oaru lasr nuh ke kuhtwena ma sahyac, oacna sie u in sritacl, lutlut kuh muhtuhnfacl se in yohk liki oaru lasr nuh sin Jeova uh. Ke sie mwe puhpuhlyuck, Henry el pwacr ke sritacl chess ke u in tuhlihk sritacl chess ke lutlut lal ah ac el ke som sritacl chess in kuhtanglah luhn lutlut lal uh. Tuhsruhktuh, ke srihpen el sritacl chess ke weekend nuhkewa, srihkeni pacl lal nuh ke orekma in luti ac nuh ke toeni uh. Henry el fahk lah tuh eklac, ma yohk srihpac nuh sel ah pa in oaru nuh ke lutlut ac liki na nuh sin God. Pwacnacng, el sulaclah in tui ke sritacl chess luhn lutlut ah.​—Matthew 6:33.

13. Oaru lasr nuh sin God uh ac kahsre kuht fuhkah in muhtweng ke ma upac luhn sucu lasr uh?

¹³ Kuhtuh pacl uh ac kuh in upac in oaru nuh sin kuhtuh sin mwet ke sucu lasr uh ke pacl sefanna. Ke sie mwe puhpuhlyuck, Ken el fahk: “Nga ke som muhtwacta pacl nuhkewa yurin ninac kiyuck ah suc mahtuhoh ac oraclah elan tuhkuh muhta yohrohsr ke kais kuhtuh pacl. Tuhsruhktuh, ninac ac muhtwacn kiyuck uh tiac insese. Nga tiac kuh in ahkinsewowoye sie ac ke pacl sacn pacna tiac ahktoasrye mwet se sahyac an.” Ken el muhta nuhnkuh ke ma Bible uh fahk ac el akihlenack lah ke ohiyac se ma el oasr kac inge, el enenuh in ahkinsewowoye muhtwacn kiyacl uh ac oaru nuh sel. Pwacnacng, el konwacack inkacnek se ma muhtwacn kiyacl ah ac engan kac. Na el ahkuhtweyac nuh sel lah efuh el enenuh in kuhlwacng nuh sin ninac kiyacl uh. El oacyacpac ahkuhtweyac nuh sin ninac kiyacl uh lah efuh el enenuh in suhnakihn muhtwacn kiyacl uh.​—Riti Genesis 2:24; Sie Corinth 13:4, 5.

FIN SIE MUKUL LILI SUC KOL CONGREGATION UH TAHFONGLAC KE LIYE LAL KUH KE MA EL NUHNKUH KACSR UH

14. Ke inkacnek fuhkah Saul el tiac oruh wo nuh sel Jonathan?

¹⁴ Kuht kuh pac in oaru nuh sin Jeova fin sie mukul lili suc kol congregation uh tahfonglac ke liye lal kuh ke ma el nuhnkuh kacsr uh. Tohkohsrah Saul el srihsrngiyucki sin God, tuhsruhktuh el oruh kuluk nuh sin tuhlihk mukul se nahtuhl sifacna. El tiac kahlwem kac lah efuh Jonathan el arlacna luhngse David. Pwacnacng, ke pacl se Jonathan el srihke in kahsrel David, Saul el foloyak ac ahkmwekihnyelah tuhlihk se na nahtuhl inge ye muhtuhn mwet pucspucs. Tuhsruhktuh, Jonathan el srackna suhnakihn pahpah tuhmwacl uh. Ke pacl sac pacna, el sruokyacna oaru lal nuh sin Jeova ac nuh sel David suc suleyucklac sin God in pa tohkohsrah se tok luhn acn Israel.​—Sie Samuel 20:30-41.

15. Fin sie mukul lili el tiac ahkkahlwemye nuhnuhnkuh suwohs nuh sesr, meac kuht enenuh in oruh?

¹⁵ Ke congregation lasr ke pacl inge uh, mukul lili suc kol congregation uh kwacfeacng in oruh oacna sie nuh sin mwet nuhkewa. Tuhsruhktuh mukul lili inge sesuwohs. Ke srihpac se inge, sahp eltahl tiac kahlwem na pwacye kac lah efuh kuht oraclah sie ma. (Sie Samuel 1:13-17) Pwacnacng, ke kuhtwena pacl ma tiac suwohs nuhnuhnkuh ma utuckuh nuh sesr uh, lwelah kuht in sruokyacna oaru lasr nuh sin Jeova.

KE PACL KUHT PUHLA MUH UPAC NUH SESR IN SRUOKYACNA WUHLELAH LASR UH

16. Ke pacl fuhkah kuht ac enenuh in sruokyacna oaru lasr nuh sin God ac tiac nuhnkuh kacsr sifacna?

¹⁶ Saul el ke in Jonathan pa tohkohsrah se tok uh, ac in tiac David. (Sie Samuel 20:31) Tuhsruhktuh, Jonathan el luhngse Jeova ac el oaru nuh sel. Pwacnacng el tiac nuhnkuh kacl sifacna, a el eklac kawuck se lal David ac sruokyacna wuhlelah lal nuh sel uh. Pwacye lah, kuhtwena mwet suc luhngse Jeova ac oaru nuh sel “el ahkfalye wuhlelah lal pacl nuhkewa, finne arlacna upac.” (Psalm 15:4) Ke srihpen kuht oaru nuh sin God, kuht ac sruokyacna wuhlelah lasr uh. Ke sie mwe puhpuhlyuck, kuht fin oraclah wuhlelah se nuh ke business, kuht ac ahkfalye ma kuht wuhlelah in oruh uh finne upaclah tok. Ac fin oasr ma upac ke moul in pahyuck lasr uh, kuht ac ahkkahlwemye luhngse lasr nuh sin Jeova ke kuht sruokyacna oaru lasr nuh sin mukul kuh muhtwacn kiyacsr uh.​—Riti Malachi 2:13-16.

17. Mwe lutlut se inge kahsre kom fuhkah?

¹⁷ Kuht luhngse in oaru nuh sin God kuht finne sun ma upac, oacna Jonathan. Pwacnacng, lwelah kuht in sruokyacna oaru lasr nuh sin mwet lili wiyacsr uh, ke pacl eltahl ahktoasrye kuht. Na kuht fah kuh in ahkenganye insiacn Jeova ac pa inge ma oruh kuht in insewowo na pwacye uh. (Soakas 27:11) Kuht kuh in luhlahlfongi na pwacye lah el ac fah oruh ma ac wo nuh sesr emeet ac karihngihn kuht. Ke mwe lutlut se tok uh, kuht ac fah liye lah meac kuht kuh in lotwelah ke kuhtuh mwet in pacl lal David suc oaru ac kuhtuh pac sahyac suc tiac oaru.