Efuh Kuht Enenuh in Moliyucklac?

Emeet me na, mwet uh nuhnkuh ke luhpan woiyac in moulkihn sie moul fuhsr ac fokoko nwe tok ma pahtpaht. Tuhsruhktuh, mwe ahsor se lah ke ma na pwacye uh, kuht tiac kuh in moul ma pahtpaht. Kahs lal Job lucng inge, finne sihmlac ahluhkwelah yac tausin tolu somlah ah, ma inge srackna pwacye nwe mihsenge.

Fin facluh nohfohn, arlacna yohk kena luhn mwet uh in moul ma pahtpaht. Bible uh ahkkahlwemye nuh sesr lah God el fihliyac ke insiacsr sie kena in moul ma pahtpaht, oacyacpac sie kena in kahlwem kac, kuh in etuh ke pacl fahsruh uh. (Ecclesiastes 3:11) Ke srihpac se inge, yac kom nuhnkuh tuh fal sie God luhn luhngse el in fihliyac kena inge in kuht suc ac fah tiac kuh in sikyak? Fin top lom uh pa moh, pwacye sum. Ke kahs luhn God, el pahngon misac oacna sie mwet lokoalok ac el wuhlelah lah misac uh “ac fah kuhtangyucklac etok.”​—Sie Corinth 15:26.

Wacngihn ahlohloh kac lah misac uh mwet lokoalok se. Wacngihn sie mwet suc nuhnak la uh wo ac luhngse misac. Ke pacl se sie mwe sensen ac sikyak, kuht ac suk kuht in tiac sun, wihklac, kuh kahingkuhnlah. In oacpacna nuh ke pacl se kuht masack uh, kuht ac suk inkacnek in ahkkweyaclah mas lasr uh. Kuht ac sang kuhiyacsr kewa in tiac sun kuhtwena ma suc ac kuh in oruh kuht in misac.

Yac oasr srihpac wo pwacnacng kuht kuh in luhlahlfongi muh mwe lokoalok se inge suc oasr na emeet me, ac kuh in wacngihnlac? Ahok, oasr. Jeova God, suc orekuhtlac, el tiac oraclah mwet uh in moul yac ekahsr na ac misac. Misac luhn mwet uh tiac ipin oakwuck lal nuh sesr ke muhtwacwackiyac ah. Oakwuck lal nuh sin mwet uh pa eltahl in moul ma pahtpaht fin facluh, ac ma nuhkewa ma el luhngse in orek uh ac fah ahkpwacyeyuck.​—Isaiah 55:11.

Na, ac ahkwacngihnyeyucklac misac uh fuhkah? Ke lusen moul luhn mwet uh fin facluh, eltahl suk in konwacack lah meac ac kuh in ahkwacngihnyelah misac uh. Tuhsruhktuh nwe mihsenge srackna sukok inkacnek in elah misac. Puhs sin scientist ma oraclah kain in kohsrkohsr mas ac ono ma ac kuh in unwela kais kuhtuh mas. Eltahl oacyacpac tuni ahkwoye ip na srihsrihk ke monin ma moul uh in eis kahlwem ke oreklac ac kapkapack la. Ke acn pucspucs, kuhtuh mwet uh, eltahl moul paht liki mwet ke yac siofok somlah ah. Tuhsruhktuh, mwet uh srackna misac. Oacna ke Bible uh fahk, “eltahl nuhkewa oreklac ke fohk, ac eltahl nuhkewa fah sifwil eklac nuh kac.”​—Ecclesiastes 3:20.

Kuht tiac enenuh in luhlahlfongi ke lahlmwetmwet luhn mwet uh in ahkwacngihnyelah ma upac, suc oan ke lusen yac pucspucs. Mweyen ma wo uh pa, Jeova God el oakiyac tari in molikuhtlac liki misac, ac Jesus Christ pa srihpac se ma yohk emeet nuh ke oakwuck se inge.