Orekmakihn Mwe Srihkasrak luhn Mwet Pahluh Oacna Amos
1. Efuh mwe srihkasrak lal Amos el kuh in mwe ahkweye nuh sesr?
1 Kom nuh wi tari puhla muh kom suhfallac in forfor luti ke srihpen kom sie kain in mwet suc srihk etwacack la ac kom tuhkuh ke sie sucu ma tiac kahsruhp? Fwin pwacye, kom kuh in ahkeyeyuck ke mwe srihkasrak lal Amos. El mwet liyacacng sip se ac sie mwet suc orekma ke imac ke kais kuhtuh na pacl in yac se. Tuhsruhktuh, Jeova el sang kuh nuh sel in fahkwack pweng na yohk srihpac se. (Amos 1:1; 7:14, 15) Ke ohiyac se pacna inge Jeova el orekmakihn elos suc inse puhsisacl ke lwen lasr uh. (1 Corinth 1:27-29) Mwe lutlut fuhkah pac sahyac kuht kuh in lotelah sel mwet pahluh Amos ke orekma in forfor lasr uh?
2. Efuh kuht kuh in tu na kuh ke pacl se kuht sun mwe lain ke orekma in forfor?
2 Tu Na Kuh ke Pacl se Kuht Sun Mwe Lain: Ke Amaziah, sie mwet tol suc alu nuh sin kaho ke tohkohsrahi luhn sruf singuhul lacyen eir ke acn Israel el lohng kahs pahluh lal Amos, el fwahk oacna in topkuhl, ‘Fohlohklac nuh yen sum ah! Nikmet wakrekuht! Oasr alu lasr sifwacna!’ (Amos 7:12, 13) Amaziah el furohklah kahs lal Amos ke el som in siyuck Tohkohsrah Jeroboam el in tulokihnyac orekma luhn mwet pahluh se inge. (Amos 7:7-11) Tuh Amos el tiacna sahngweng. Mihsenge, oasr mwet kol luhn alu suc suk kahsruh sin kafuhrmacn in kalyei mwet luhn Jeova. Fwinne ohinge, Jeova el olelah nuh sesr lah wacngihn kuhtwena kuhfwen mwe mweun ma ac lain kuht kuh in kuhtangkuhtlac.—Isaiah 54:17.
3. Meac ip luo ke pweng se kuht fahkwack inge?
3 Fahkwack Nuhnuhnkuh luhn God ac Mwe Insewowo ke Pacl Fahsruh: Fwinne Amos el palye kahs in nuhnuhnkuh lain sruf singuhul luhn acn Israel, el ahksahfye in fwahk ke puk se ma oan ke inel in Bible ke olelah luhn Jeova ke mwe insewowo pucspucs ac ma el ac fwah sifwil fohlohkuhnack. (Amos 9:13-15) Kuht wi pac fahkwack ke lwen in nuhnuhnkuh se luhn God suc fwah tuhkuh, tuhsruhk ma inge sie na sin ip ke pweng wo ke tohkohsrahi suc kuht enenuh in fahkwack. (2 Peter 3:7; Matthew 24:14) Ke Jeova el ac kuhnahoslah mwet kuluk ke Armageddon, ma inge ac fwah ikacslah inkacnek nuh ke pacruhtais fwin facluh.—Psalm 37:34.
4. Kuht etuh fuhkah lah kuht kuh in oruh ma luhngse luhn Jeova na pwacye?
4 In fahkwack pweng ke Tohkohsrahi ke sie facl ma puhkantwen mwet suc lain, arlac srihfe sulaclah lasr in ahkpwacyeye olelah lasr ac in oruh ma luhngse luhn Jeova. (John 15:19) Fwinne ohinge, kuht etuh na pwacye lah Jeova el ac tahfwelah in use ma kuht enenuh tuh kuht in oruh ma luhngse lal, oacna ke el oruh nuh sel Amos.—2 Corinth 3:5.