Mwe Kahsruh Tolu in Ahkwoye Ohiyacn Luti Lom
1. Efuh kuh kuht enenuh in kafweacng in ahkwoye ohiyacn luti lasr?
1 Mwet Loh nuhkwewa elos mwet luti. Ke kuht oruh muhtwacta se met nuh yurin mwet uh, ke kuht sifil fohlohk nuh yurin mwet suc luhngse in lohng, kuh oruh sie lutlut Bible, nien sun lasr pa in ahkkahlwemye etwacack nuh selos. Ac etwacack suc kuht luti nuh sin mwet arlacna sacohk. Kuht ahkkahlwemye kalem ke “ma simusla mutal” suc kuh in oruh mwet in lalmwetmwet suc ‘kol nu ke molela.’ (2 Timothy 3:15) Kunohkohn se inge arlacna sacohk! Pa inge mwe kahsruh tolu in ahkwoye ohiyacn luti lasr.
2. Kuht kuh in oruh fuhkah in fihsracsr in kahlwem ohiyacn luti lasr?
2 Fihsracsr in kahlwem: Fin oasr etwacack yohk lasr ke sie mwe sramsram, sahp fihsracsr kuht in muhlkuhnlah lah ma kuht luti kuh in upac nuh sin sie mwet suc tiac etuh mwe sramsram lasr. Na, ke pacl se kom oruh sie lutlut ke Bible, nikmet toeni kain in ma pucspucs nuhke mwe luti lom. A, kom in ahkkahlwemye mwe lutlut yohk srihpac. Fin kom fahk ma puhkantwen, ma inge tiac kahlmekin lah wo ohiyacn luti lohm. (Soakas 10:19) Ma enenweyuck pa kom in riti na fuhs ma yohk srihpac nuhke mwe lutlut. Tukun kom riti sie fuhs, loang akwoye na nuhke pulo kahs ke ma suhmuhslah suc kuhpahsr nuhke mwe lutlut suc ahkuhtweyucki. Mwe sramsram fin eol suc oasr in Matthew sapta 5 nuhke 7 ahkkahlwemye ma paye, ne ouinge Jesus el oruh luti lal ke inkacnek fihsracsr ac sulelah na kuhtuh kahs wo in orekmakihn.
3. Meac yohk srihpacyen mwe puhpuhlyuhk, ac kain in mwe puhpuhlyuhk fuhkah arlacna wo?
3 Mwe Puhpuhlyuhk: Mwe puhpuhlyuhk mokle nuhnak luhn mwet, puhlahkin lalos, ac me kashruh in esam mwe lutlut. Nik kom nuhnkuh muh kom enenuh in oacna sie mwet suc sruhmuhn mwe sramsram in sang mwe puhpuhlyuhk wo pucspucs. Ke pacl pucspucs, Jesus el orekmakihn ma fototo ac fihsracsr. (Matthew 7:3-5; 18:2-4) Petsac suc sroaleyucklah ke sie pwepuh kuh pac in mwe kahsruh wo. Fin kom ahkolah wo, kom kuh in nuhnkuh ke sie mwe puhpuhlyuhk wo in luti.
4. Kuht kuh in orekmakihn fuhkah kihsen siyuck ke inkacnek wo?
4 Kihsen siyuck: Kihsen siyuck oruh mwet lutlut lom in nuhnak. Ke ma inge, kom mongfihsracsr in soano tukun kom siyuck kihsen siyuck. Fin kom sa in sang mwe top, kom ac tiac etuh na pwacye meac mwet lutlut lom el kahlwem kac. Fin sito topuk lal, lwelah kom in tiac ahksuwohsyel, a wo kom in kahsrel in etuh top suwohs ke kom orekmakihn kuhtuh pac kihsen siyuck. (Matthew 17:24-27) Pwacye lah wacngihn inmasrlosr mwet luti suwohswohs. Ke ma inge, Bible el ahkkeye kuht in taran na pwacye mwe luti lasr. Ke kuht oruh ma inge, ac fah ase nuh sesr mwe insewowo ma pahtpaht ac nuh selos suc long kuht.—1 Timothy 4:16.