Bible uh Tiac Eklac Finne Puhs Mwet Srihke In Ekuhllah

MA UPAC: Kuhtwena ma upac ma sikyak nuh ke Bible uh, oacna kuhlawi la kuh mwe lain, ma inge tiac kuhnahoslah kuh ahkwacngihnyelah. Tuhsruhktuh, kuhtuh sin mwet sihm ma sifwil suhmuhslah koanon Bible uh ac mwet lweng kac uh srihke in ekuhllah kahs ke Bible uh. Oasr pacl ma eltahl srihke in oruh Bible uh in fal nuh ke mwe luti laltahl uh, liki na in ahkfalye mwe luti laltahl nuh ke Bible. Nuhnkuh ke kuhtuh mwe puhpuhlyuck inge:

• Acn in alu: Yac 300 nuh ke yac 100 meet liki Christ, mwet sihm luhn Samaritan Pentateucha eltahl sang nuh ke Exodus 20:17 kahs inge, “ke Finohl Gerizim. Ac ke acn we kom in muhsahelah sie loang.” Mwet Samaria inge finsrak tuh fuhs inge in ahkkweye orekma in muhsah laltahl ke tempuhl se ma ac oan ke Finohl Gerizim inge.

• Mwe luti ke Trinity: Tiac sun yac tolfoko tukun ahksahfyeyucklac Bible uh, na sie mwet sihm suc luhlahlfongi ke Trinity ac sifwil sihmihs Bible uh el sang nuh ke Sie John 5:7 kahs inge, “inkuhsrao, Pahpah, Kahs, ac Nguhn Muhtahl: ac ma tolu inge ma sefanna.” Kahs inge wacngihn ke ma suhmuhslah na pwacye uh. Bruce Metzger, sie mwet suc lutlut yohk ke Bible uh el fahk, “Muhtwacwacack ke yac 500 tukun Christ, kahs inge konweyuckyak pacl pucspucs ke ma suhmuhslah mahtuh ke kahs Latin ac ke [Latin] Vulgate.”

• Inen God: Mwet lweng pucspucs ke Bible uh sulaclah in eslah inen God liki ma suhmuhslah uh, ke srihpen aliyalu luhn mwet Jew. Eltahl ahollah inel nuh ke wal pucspucs oacna, “God” kuh “Leum,” kain in kahs ma oacyacpac orekmakihnyuck nuh sin mwet, ma sruhloaclah luhn alu kikiacp, ac Devil.​—John 10:34, 35; Sie Corinth 8:5, 6; Luo Corinth 4:4.b

FUHKAH TUH BIBLE UH OASR NA NE KE PACL INGE: Ma se meet, finne kuhtuh sin mwet sihm ma sifwil sihmihs koanon Bible uh tiac lohacng ahkwoyac kuh kuhtasrihk, puhs sin mwet sihm sahyac ma arlacna pihsrlac ac lohacng ahkwoyac nuh kac. Ke yac 500 nuh ke yac 900 tukun Christ, oasr u se pahngpahng Masoretes, ac eltahl sihmihs puk luhn Genesis nuh ke Malachi. Sie copy ma eltahl suhmuhslah inge pahngpahng Masoretic text. Eltahl oek pihsen kahs ac lwacta nuhkewa ma eltahl sihmihs inge tuh in wacngihn ma eltahl tahfonglac sang kuh eslah liki. Ke acn ma eltahl motko muh oasr ma tahfonglac kac ke ma suhmuhslah na pwacye ma eltahl orekmakihn inge, eltahl akihlenyac ma inge siskac uh. Mwet Masorete inge sruhnga ekuhllah kuhtwena ma ke ma suhmuhslah in Bible uh. Professor Moshe Goshen-Gottstein el fahk, “Nuh seltahl sie orekma na kuluk eltahl fin ekuhllah kuhtwena ma kac.”

Ahkluo, pihsac yohk se ma ma suhmuhslah mahtuh uh oreklac nuh kac ke pacl inge uh kahsruh mwet sihm pucspucs ke Bible uh in akihlen ma tahfonglac uh. Ke sie mwe puhpuhlyuck, mwet kol luhn alu pucspucs eltahl luti ke lusen yac pucspucs lah lweng laltahl ke kahs Latin inge oasr ke ma suhmuhslah na pwacye ke Bible uh. Pwacnacng, ke Sie John 5:7, eltahl sang kahs suhtuh ma kuht sramsramkihn ke muhtwacwaciyen mwe lutlut se inge. Ma tahfonglac inge oacyacpac oasr ke lweng ke King James ma oreklac nuh ke kahs English ma mwet pucspucs orekmakihn! Tuhsruhktuh, ke konweyuckyak ma suhmuhslah mahtuh inge, meac konweyuckyak kac? Bruce Metzger el suhmuhslah: “Kahs ma ituckyang nuh ke fuhs sac [ke Sie John 5:7] wacngihn ke ma suhmuhslah mahtuh ke lweng nuhkewa meet ah (Syriac, Coptic, Armenian, Ethiopic, Arabic, Slavonic), sahyen Latin.” Ke srihpac se inge, itucklac kahs tahfonglac nuhkewa liki lweng ke King James ma ahksasucyeyucklac ac ke kuhtuh pac Bible sahyac.

Yac ma suhmuhslah mahtuh uh ahkpwacyeye lah pweng ke Bible uh tiac eklac? Ke pacl se ma Dead Sea Scroll uh konweyuckyak in yac 1947, mwet lutlut pucspucs ke Bible uh kuh in tuni ma oasr ke puk lihmlihm pucspucs ke Bible ma sihmlac ahluhkwelah tausin yac meet liki inge nuh ke Masoretic text. Sie mwet suc wi ahkwoye Dead Sea Scroll inge el fahk lah puk lihmlihm sefanna ac kuh in “ahkkahlwemye mwe ahkpwacyeye nuh ke inkacnek oaru ac sensen luhn mwet sihm pucspucs suc mwet Jew eltahl ukwe ke paholtahl sifacna ke lusen tausin yac.”

Ke sie Library fin acn Dublin, Ireland pahngpahng Chester Beatty, oasr ma suhmuhslah pucspucs ma ituckyang nuh ke papyrus ac apkuhran in puk nuhkewa ke ma suhmuhslah uh muhtwacwacack ke Matthew nuh ke Fwackyuk, wekuhnacng ma suhmuhslah ma sihmlac apkuhran nuh ke yac 100 tukun ahksahfyeyucklac Bible uh. The Anchor Bible Dictionary fahk, “Finne yohk mwe ahkuhtweyac ma ip srihsrihkiyucki ke papyri uh, ma inge arlac wo pac ac tiac ekuhllah ma suhmuhslah ke Bible in pacl meet ah nuh ke pacl inge.”

SAHFLAHIYAC: Pihsac ac matwacn ma suhmuhslah mahtuh luhn Bible inge tiac ahkkulukye a ahkwoye pweng ke Bible uh. Sir Frederic Kenyon el fahk ma inge ke ma suhmuhslah ke Matthew nuh ke Fwackyuk, “Wacngihn kuhtwena puk mahtuh sahyac ma oacna ke sa ac puhsiyen mwe ahkpwacyeye nuh ke ma suhmuhslah uh ac wacngihn mwet lutlut sahyac suc tiac insese kac lah kahs ma orekmakihnyuck ne ke pacl lasr uh arlacna wo.” Ac in fal nuh ke ma suhmuhslah ke Genesis nuh ke Malachi, William Henry Green el fahk: “Sahp fal kuht in fahk muh wacngihn kuhtwena ma suhmuhslah sahyac in pacl meet ah arlacna wo ukweyacn sihm kac uh.”