Tahfwelah Na In Kuhlwacnsuhpuh Jeova Ke Engan
NUHNKUH ke lwen se ma kom engankihn emeet ke moul lom uh. Yac lwen se inge pa lwen se ma kom pahyuckyak ah kuh ke pacl se ma tuhlihk se emeet nuhtum an isuslac ah? Kuh yac pa inge lwen se ma kom ahkkahlwemye wuhlelah lom nuh sin Jeova ke inkacnek luhn bacptais? Sahp pa inge lwen se ma yohk srihpac emeet ma kom engankihn ke moul lom an. Ac ke lwen se inge, mwet lili wiyom uh arlacna engan in liye ke kom ahkpwacyeye nuh sin mwet nuhkewa lah kom luhngse God ke insiom kewa, nguhnum kewa, nuhnkom kewa, ac kuh lom kewa!—Mark 12:30.
Kahlwem lah, kom puhla engan yohk ke kom kuhlwacnsuhpuh Jeova muhtwacwacack tukun lwen in bacptais lom. Tuhsruhktuh, kuhtuh sin mwet suc fahkwack ke Tohkohsrahi uh tilac puhla engan yohk se ma eltahl puhla meet ah. Efuh kuh ma inge sikyak? Srihpac fuhkah oasr yohrohsr in tahfwelah na kuhlwacnsuhpuh Jeova ke engan?
EFUH KUH KUHTUH SELTAHL TILAC ENGAN?
Pweng ke Tohkohsrahi uh use engan yohk nuh sesr. Efuh? Mweyen Jeova el wuhlelah lah Tohkohsrahi uh ac fah kuhnahoslah oakwuck kuluk se lal Satan inge ke pacl na sa ac oakiyac facl sasuc lal uh. Zephaniah 1:14 fahk ma inge nuh sesr: “Lwen luhlahp luhn LEUM GOD apkuhran me! Arlacna fototome, ac ac sa na tuhkuh!” Tuhsruhktuh, kuht fin puhla muh srackna yohk pacl ma kuht ac enenuh in tuhpan uh, engan lasr ke muhtwacwacackiyac ah ac kuh in tuhlac kuh wacngihnlac. Ma inge ac kuh in oruh kuht in kahkahsrihklac ke orekma in kuhlwacnsap lasr nuh sin God uh.—Soakas 13:12.
Ke kuht wi mwet lili wiyacsr uh, kuht ahkkweyeyuck in tahfwelah na kuhlwacnsuhpuh Jeova ke engan. Sahp ohiyac wo luhn mwet luhn Jeova uh pwen kuht me nuh ke alu pwacye ac kahsre kuht in muhtwacwacack in kuhlwacnsuhpuh God ke engan yohk. (Sie Peter 2:12) Tuhsruhktuh, meac ac kuh in sikyak fin sie sin mwet lili wiyacsr uh eis mwe kai ke srihpen el tiac ahkos masap luhn God uh? Sahp ma inge ac kuh in ahkmuhnahsye kuhtuh mwet ke congregation uh ac oruh eltahl in tilac engan.
Mwe kahsruhp luhn facluh ac kuh pac in oruh kuht in tilac engan. Ke inkacnek fuhkah? Facl lal Satan uh srihke in kihfaslah nuhnak lasr uh in moli ma kuht tiac enenuh na pwacye. Pwacnacng, kuht in esam kahs lal Jesus inge: “Wacngihn mwet kuhlwacnsap kuh in kuhlwacnsuhpuh leum luo. El ac sruhnga sie, ac luhngse el ngiac; el ac pwacye nuh sin sie, ac kwase el ngiac. Kowos koflahna kuhlwacnsuhpuh God ac mani.” (Matthew 6:24) Kuht tiac kuh in kuhlwacnsuhpuh Jeova ke engan ac ke pacl sacn pacna srihke in eis ma nuhkewa kuht luhngse ke facl se inge.
ENGANKIHN KUHLWACNSAP LOM NUH SIN JEOVA
Kuhlwacnsuhpuh Jeova el tiac ma upac se nuh sin mwet suc luhngse el. (Sie John 5:3) Esam lah Jesus el fahk: “Fahsruh nuh yuruk, kowos suc orekma ac tohtohlah, tuh nga fah sot monglac nuh suwos, eis srenenuh luhk nuh fowos ac lutlut sihk, tuh nga fakpacp ac inse puhsisacl; ac kowos fah konwacack monglac. Tuh srenenuh luhk fihsracsr, ac mwe utuck luhk muhlahlah.” (Matthew 11:28-30) Sie mwe ahkkweye ac mwe engan nuh sesr in oacna sie mwet Christian pwacye. Oasr na pwacye srihpac wo lasr in engankihn kuhlwacnsap lasr nuh sin Jeova uh. Kuht srihke tuni srihpac tolu inge.—Habakkuk 3:18.
Kuht kuhlwacnsuhpuh sie God insewowo suc acse moul lasr uh. (Orekma 17:28; Sie Timothy 1:11, BMK) Kuht akihlen lah kuht soemoul nuh sin God, suc orekuhtlac. Pwacnacng, lwelah kuht in tahfwelah na in kuhlwacnsuhpwacl ke engan, finne ke lusen yac somlah tukun kuht bacptaislac.
Héctor el sruokyacna engan lal ke el esam finsrak lal ke Tohkohsrahi uh ac kahfofo pacl nuhkewa ke orekma in luti uh
Nuhnkuh kacl Héctor suc kuhlwacnsuhpuh Jeova oacna sie mwet fuhfahsryacsr nuh ke congregation pucspucs ke lusen yac 40. El finne “mahtuhoh,” el srackna engan in kuhlwacnsuhpuh Jeova. (Psalm 92:12-14) Mas luhn muhtwacn kiyac uh oruh srihkeni orekma in kuhlwacnsap lal nuh sin God uh, tuhsruhktuh engan lal Héctor uh tiacna tuhlac. El fahk: “Finne nga ahsor in liye lah tiac fihsracsruh mas luhn muhtwacn kiyuck uh ac upaclah nuh sihk in karuhnguhnuhl, nga tiac lwelah ma inge in eislah engan luhk in kuhlwacnsuhpuh God pwacye. Ke nga etuh lah nga soemoul nuh sin God, suc oraclah mwet uh ke sie srihpac, ma inge fal tari nuh sihk in luhngse el ac in kuhlwacnsuhpwacl ke insiuck kewa. Nga kwacfeacng in kahfofo ke orekma in luti uh, ac nga srihke in sruokyac finsrak luhk ke Tohkohsrahi uh in pa ma se meet ke nuhnak luhk uh tuh engan luhk uh in tiacna tuhlac likiyuc.”
Jeova el oraclah oakwuck ke mwe kihsac ke mwe lahngo, in oruh kuht in kuh in engankihn moul lasr. Pwacye, “God el luhngse facluh ohinge, el acse Wen sefanna nahtuhl, tuh elos nuhkewa suc luhlahlfongi in el fah tiac misac, a elos fah eis moul ma pahtpaht.” (John 3:16) Ahok, kuht kuh in eis nuhnak muhnahs ke ma kuluk lasr uh ac kuht kuh in moul ma pahtpaht ke pacl se kuht ahkkahlwemye luhlahlfongi lasr nuh ke mwe sang na sacohk se inge ke mwe molwelah luhn God uh. Srihpac na wo se pa inge nuh sesr in engan! Srui yohk lasr nuh ke mwe molwelah uh mokle kuht in kuhlwacnsuhpuh Jeova ke engan.
Jesús el ahkfihsracsrye moul lal ac el engan in kuhlwacnsuhpuh Jeova ke lusen yac pucspucs
Jesús, sie mukul lili suc tuh muhta fin acn Mexico, el fahk: “Nga tuh eklac mwet kohs se nuh ke orekma luhk ah, oasr pacl nga orekma ke lusen ao pucspucs lwen nuh ke lwen, finne tiac sapkihnyuck nga in oruh. Nga oruh na tuh in yohk mani ma nga oraclah. Na nga lotwelah kacl Jeova ac ke el kihsackuhnlah Wen kuloh sefanna nahtuhl tuh mwet uh in eis moul. Yohk na pwacye luhngse luhk in kuhlwacnsuhpwacl. Pwacnacng, nga wuhlelah moul luhk uh nuh sin Jeova, ac tukun yac 28 ma nga orekma ke company se inge, nga sulaclah nga in tui ac nga muhtwacwacack in kuhlwacnsuhpuh Jeova ke inkaiyen pacl luhk ke orekma in luti uh.” Pa inge inkacnek ma Jesús el muhtwacwacack in kuhlwacnsuhpuh Jeova ke engan.
Kuht moulkihn sie moul nwacsnwacs ac ma inge acse engan yohk nuh sesr. Yac kom esam lah meac moul lom an el oacna meet liki kom eis etwacack kacl Jeova? Mwet sap Paul el ahkacsmakihnye mwet Christian fin acn Rome lah ke sie pacl ah eltahl tuh “mwet kohs nuh ke ma kuluk” tuhsruhktuh, eltahl “mwet kohs lac nuh ke ma suwohswohs.” Ke srihpen eltahl moulkihn moul nwacsnwacs, eltahl kuh in ngwetlah ac tuhpan ke moul ma pahtpaht. (Rome 6:17-22) Kuht oacyacpac ukwe oakwuck luhn Jeova uh, pwacnacng kuht tiac puhla mwe ahsor ma tuhkuh ke orekma in kosro kuh sie moul suhlallacl. Srihpac wo in engan pa inge!
“Pacl nga engankihn emeet ke moul luhk uh pa pacl ma nga orekmakihn in kuhlwacnsuhpuh Jeova.”—Jaime
Nuhnkuh kacl Jaime, suc sie mwet sritacl boxing ac oacyacpac tiac na luhlahlfongi muh oasr God ac el luhlahlfongi muh mwet uh tuhkuh ke ma orahkrahk (evolution). Jaime el muhtwacwacack in wi toeni luhn mwet Christian uh ac luhngse ma ahkkahlwemyeyuck we inge sun insiacl. In sislah moul se lal meet ah, Jaime el enenuh in siyuck Jeova elan kahsrel in luhlahlfongel. Jaime el fahk, “Kais kuhtuh na, nga konwacack lah oasr Pahpah na luhngse se ac sie God pahkotwen. Ke nga sruokyacna oakwuck suwohs luhn Jeova ke moul, ma inge karihngihnyuc. Nga fuhnuh tiac eklac, sahp nga luhkuhn misac, in oacna ma sikyak nuh sin kuhtuh kawuck luhk meet suc wi sritacl boxing. Pacl ma nga engan emeet ke moul luhk uh pa ke pacl ma nga orekmakihn in kuhlwacnsuhpuh Jeova.”
TIAC FUHLEACK!
Meac kuht enenuh in puhla ke kuht soano sahflahiyen oakwuck kuluk se inge? Esam lah kuht oruh ma luhngse luhn God uh ac kuht ngwetlah ac tuhpan ke moul ma pahtpaht. “Lwelah kuht in tiac tohtohlah in oruh ma wo, ke pacl fal kuht fah eis kosrwacni lasr, kuht fin tiac fuhleack.” (Galatia 6:8, 9) Ke kahsruh luhn Jeova, lwelah kuht in muhtweng, orekma upac in ahkkapye ohiyac wo ma enenweyuck nuh sesr in moullac liki lwen in ongaiyac luhlahp uh ac tahfwelah na in kuhlwacnsuhpuh Jeova ke engan.—Fwackyuk 7:9, 13, 14; James 1:2-4.
Kuht kuh in luhlahlfongi lah Jeova el ac fah ahkinsewowoye mongfihsracsr lasr ke srihpen el etuh orekma ma kuht oruh uh ac luhngse ma kuht ahkkahlwemye nuh sel ac nuh ke inel. Kuht fin tahfwelah na in kuhlwacnsuhpwacl ke engan, kuht ac fah oacna David suc mwet sihm luhn psalm ke el fahk: “Nga puhla na muh LEUM GOD el oasr yuruk pacl e nuhkewa, El apkuhran, ac wacngihn ma ac fah mokleyuc. Ke ma inge nga arulacna engan ac sang kuloh, ac nga muhta in moul mislac.”—Psalm 16:8, 9.