Moulkihn Moul Lom Fal nuh ke Puhruhe luhn Leum—Ip Se Ahkluo
“Pahpah tuhmowos El etuh tari ma kowos enenuh.”—MATTHEW 6:8.
YAC KOM ESAM?
Meac kuht enenuh in puhruhe siyuck kac sahyacn mongo nwacsr ke kais sie lwen?
Meac kuht enenuh in oruh tuh Jeova elan nuhnak muhnahs nuh sesr ke soemoul lasr?
Jeova el topuk fuhkah puhruhe lasr ke kuht siyuck elan “tiac kol kuht in mwel”?
1-3. Efuh kuh sie muhtwacn lili el puhla na pwacye muh Jeova el etuh enenuh lal uh?
LANA, sie regular pioneer, el tiac kuh in muhlkuhnlah ma sikyak ke pacl se el muhtwacta fin acn Germany in yac 2012. El puhla muh Jeova el lohng ma luo ma el puhruhe siyuck kac ah. Ke pacl se el wi train se som nuh ke yen oaksohk ah, el siyuck sin Jeova in kahsrel elan konwacack sie mwet ah elan kuh in fahkwack pweng wo nuh se. Ke pacl se ma el sun yen oaksohk ah, el konwacack lah oaksohk sac foslac nuh ke lwen tok ah. Lana el siyuck kahsruh sin Jeova mweyen el orekmakuhnlah tari inkaiyen mani lal ah ac wacngihn acn elan muhta we ke fong sac.
2 Ke pacl se Lana el tari ke puhruhe lal ah, el lohng puhsren mwet se fahk, “Ekewo Lana, meac kom oruh ngwe uh?” Mukul se ma kahskahs inge tuhlihk lutlut se wiyacl in pacl somlah ah. El wi ninac kiyacl ac ninac mahtuh kiyacl ah, suc usacl in wihlkacs nuh sel mweyen el ac som nuh South Africa. Ke pacl se Lana el fahk nuh seltahl ke ma upac lal ah, ninac ac ninac mahtuhoh kiyacn mukul sac suhlwacl in muhta ke lohm seltahl ah. Eltahl kihsen siyuck sel ke luhlahlfongi ac ke orekma in pioneer lal ah.
3 Ke lwen tohkoh ah tukun mongo in lututacng laltahl, Lana el tohpohklah kuhtuh pac kihsen siyuck laltahl ke Bible uh. Lana el siyuck ac eis address ac nacmpuh in telefon laltahl tuh in oasr mwet lili ma ac kuh in tahfwelah na som nuh yohrohltahl ac topuk kihsen siyuck laltahl uh. Lana el fohlohklac nuh ke acn sel ah ac el tahfwelah pioneer. El puhla muh Jeova el lohng puhruhe lal, etuh ma el enenuh uh, ac kahsrel.—Psalm 65:2.
4. Mwe enenuh fuhkah kuht ac fah lutlutkihn uh?
4 Ke pacl se kuht sun ma upac uh, arlac fihsracsr in puhruhe siyuck ke kahsruh luhn Jeova, ac El engan in lohng puhruhe lasr uh. (Psalm 34:15; Soakas 15:8) Tuhsruhktuh mwe srihkasrak wo ke puhruhe ma Jesus el luti nuh sesr uh pa ac fah kahsre kuht in etuh lah oasr ma yohk srihpac sahyac ma kuht enenuh in puhruhe siyuck kac. Ke mwe lutlut se inge, kuht ac fah lutlutkihn lah fuhkah mwe siyuck ahkosr sahyac ke puhruhe luhn leum uh kuh in kahsre kuht in sruokyacna oaru lasr nuh sin Jeova.—Riti Matthew 6:11-13.
“KIHTE KUHT LWEN SE INGE MA KUHT MONGO MIHSENGE”
5, 6. Efuh kuh Jesus el luti kuht in siyuck ke ‘mongo nwacsr’ finne yohk kuh puhs ma nwacsr?
5 Jesus el luti nuh sesr in siyuck ke ‘mongo nwacsr’ ac tiac ‘mongo nak’ muhkwena. Victor, sie elder suc liyacng congregation pucspucs in acn Africa, el ahkuhtweyac: “Nga kwacna sang kuloh ac kaksak nuh sin Jeova lah nga ac muhtwacn kiyuck uh tiac arlacna fosrngahkihn mongo nwacsr ke kais sie lwen kuh molin lohm sesr uh. Mweyen mwet lili wiyacsr uh kahsre kuht in eis mwe enenuh lasr uh lwen nuhkewa. Tuhsruhktuh, nga oacyacpac puhruhe tuh elos nuhkewa suc kahsre kuht inge eltahl in kuhtanglah ma upac eltahl sun ke mani ac ke moul laltahl uh.”
6 Sahp yohk kuh puhs mongo nwacsr, tuhsruhktuh puhs mwet lili wiyacsr muh suhkahsruhp kuh kweok ke srihpen mwe ongaiyac ma sikyak ke acn seltahl uh. Sahyacn puhruhe, oasr pac inkacnek sahyac kuht kuh in kahsreltahl. Ke sie mwe puhpuhlyuck, kuht kuh in sang ma oasr yohrohsr uh nuh seltahl. Kuht kuh pac in sang mwe kahsruh nuh ke pohk in mani ke orekma in luti pweng wo fin facluh nohfohn. Kuht etuh lah mwe sang lasr uh sang kahsruh nuh sin mwet lili suc enenuh kahsruh.—Sie John 3:17.
7. Jesus el luti kuht fuhkah in tiac “nuhnuhnkaclah ke lutu”?
7 Tukun Jesus el ahkuhtweyac ke puhruhe luhn Leum, el luti nuh sesr in tiac arlacna fosrngah ke mwe enenuh lasr uh. El fahk lah fin Jeova el karihngihn mah inimac uh, “yac El fah tiac oruh ma yohk liki nuh suwos, O kowos suc srihk luhlahlfongi lowos? Ke ma inge nik kowos nuhnuhnkaclah, ac fahk, . . . ‘Piyac ma kuht fah nokomacng?’” Tukun ma inge el sifwil pac fahk: “Nik kowos nuhnuhnkaclah ke lutu.” (Matthew 6:30-34, BMK) Kuht tiac enenuh in fosrngah ke mwe enenuh lasr nuh ke pacl fahsruh uh. A, kuht enenuh in falkihn ma oasr tari yohrohsr ke kais sie lwen. Ke sie mwe puhpuhlyuck, kuht kuh in puhruhe ac siyuck in oasr acn kuht muhta kac, ke sie orekma ma kuh in kahsre kuht in karihngihn sucu lasr uh, ac ke lahlmwetmwet in oraclah sulaclah wo nuh ke mwe enenuh luhn mahnosr. Tuhsruhktuh srackna oasr ma se ma yohk srihpac liki ma inge ma kuht enenuh in puhruhe siyuck kac.
8. Kahs lal Jesus ke mongo nwacsr ke lwen nuhkewa ahkacsmakihnye kuht ke meac? (Liye petsac se meet ke mwe lutlut inge.)
8 Kahs lal Jesus ke mongo nwacsr nuh ke kais sie lwen ahkacsmakihnye kuht ke sie pac ma el fahk: “Mwet tiac moul ke bread muhkwena, a elos enenuh pac kahs nuhkewa ma tuhkuh sin God me.” (Matthew 4:4) Ke ma inge, kuht enenuh in puhruhe ke “mwet kuhlwacnsap oaru” tuh eltahl in tahfwelah na acse kahs in kahsruh luhn Jeova nuh sesr ke “pacl fal.”—Luke 12:42.
“NUHNAK MUHNAHS NUH SESR KE SOEMOUL LASR”
9. Efuh kuh ma kuluk lasr uh oacna sie soemoul?
9 Jesus el fahk: “Nuhnak muhnahs nuh sesr ke soemoul lasr.” (Matthew 6:12, NW) Ke sie pac pacl, el fahk: “Nuhnak muhnahs nuh sesr ke ma kuluk lasr.” (Luke 11:4) El fahk ma inge mweyen ma kuluk lasr uh oacna sie soemoul. In yac 1951, mackuhsin se inge The Watchtower ahkuhtweyac lah ke pacl se kuht oraclah sie ma kuluk, ma inge oacna sie soemoul nuh sin Jeova. Kuht soemoul ke luhngse lasr nuh sin Jeova ke ahkostwen lasr nuh sel uh. Pwacnacng ke pacl se kuht oraclah sie ma kuluk lain God, ma inge tiac sang kahsruh nuh ke soemoul lasr uh. Jeova El kuh na in tilac kawuck nuh sesr, el fin luhngse in oruh. The Watchtower ahkkahlwemye pac lah, “Ma kuluk uh tiac ahkkahlwemye luhngse nuh sin God.”—Sie John 5:3.
10. Efuh kuh Jeova el kuh in nuhnak muhnahs nuh sesr ke ma kuluk lasr uh, ac meac puhlakihn lasr kac uh?
10 Kuht arlacna insewowo mweyen Jeova el oraclah mwe kisac luhn lahngo ke inkacnek luhn Jesus in oasr nuhnak muhnahs ke ma kuluk lasr uh. Kuht enenuh nuhnak muhnahs luhn Jeova lwen nuhkewa. Jesus el misac kacsr apkuhran yac 2,000 somlah, ne ohinge kuht eis mwe insewowo ma tuhkuh ke mwe lango ke pacl inge. Kuht enenuh in ahksacohkye ac sang kuloh nuh sin Jeova ke mwe sang na sacohk se inge. Wacngihn kuhtwena sesr kuh in sang moul lal sifacna in oacna mwe lahngo in ahksukohsohkye kuht liki ma kuluk ac misac. (Riti Psalm 49:7-9; Sie Peter 1:18, 19.) Pohloh kahs inge “nuhnak muhnahs nuh sesr ke ma kuluk lasr” ke puhruhe luhn Leum, ahkacsmakihnye kuht lah kuht enenuh na pwacye mwe lango, ac mwet lili wiyacsr uh enenuh pac. Jeova el luhngse kuht in nuhnkuh kacltahl ac ke fototo laltahl nuh sel. Kuht enenuh pac in sa in nuhnak muhnahs nuh seltahl fin eltahl oruh ma kuluk nuh sesr. Inkaiyen pacl uh ma kuluk inge tiac upac, tuhsruhktuh kuht fin nuhnak muhnahs nuh sin mwet lili wiyacsr uh, kuht ahkpwacyeye lah kuht luhngse eltahl. Kuht ahkpwacyeye pac lah kuht engan ac srui ke nuhnak muhnahs luhn Jeova nuh sesr.—Colossae 3:13.
11. Efuh kuh yohk srihpac kuht in nuhnak muhnahs nuh sin mwet sahyac?
11 Ke srihpen kuht sesuwohs, kuhtuh pacl uh upac nuh sesr in nuhnak muhnahs nuh sin mwet ma ahktoasrye kuht. (Leviticus 19:18) Kuht fin muhtwacwack in sruhmuhn ma eltahl oruh nuh sesr uh, mwet lili sahyac ke congregation uh ac kuh in etuh pac kac. Na eltahl ac wi pac sramsramkihn ma inge, suc ac kuh in ahkmuhnahsye inse sefanna luhn congregation uh. Kuht fin lwelah ma inge in sikyak, ma inge ahkkahlwemye lah kuht tiac ahksacohkye mwe sang luhn God ke mwe lango ac kuht ac tiac eis ma wo ma tuhkuh kac uh. Kuht fin tiac nuhnak muhnahs nuh sin mwet sahyac, Jeova el ac tiac pac nuhnak muhnahs nuh sesr. (Riti Matthew 6:14, 15; Matthew 18:35) Oacyacpac, kuht fin luhngse Jeova elan nuhnak muhnahs nuh sesr, kuht enenuh in tiac oruh kuhtwena ma kuluk upac.—Sie John 3:4, 6.
“TIAC KOL KUHT IN MWEL”
12, 13. (a) Meac sikyak nuh sel Jesus tukun el bacptaislac? (b) Kuht fin sruhflah ke sie ma kuluk, efuh kuht tiac enenuh in sis mwacta uh nuh sin mwet sahyac? (c) Ke Jesus el sruokyac na oaru lal nwe ke el misac, meac ma inge ahkpwacyeye?
12 Pohloh kahs inge, “Tiac kol kuht in mwel” ke puhruhe luhn Leum, ahkacsmakihnye kuht ke ma sikyak nuh sel Jesus tiac paht tukun el bacptaislac ah. Ngun muhtahl luhn God koluhl nuh yen mwesis, ac ke acn sac “tuh srihfeyuck el sel Devil.” (Matthew 4:1; 6:13) Efuh kuh Jeova el lwelah ma inge in sikyak? Adam ac Eve eltahl pihlesruh kolyuck luhn Jeova. Puhs kihsen siyuck ma Satan el oraclah ac yohk pacl ma enenweyuck in topukyucklac ma inge. Ke sie mwe puhpuhlyuck, yac oasr ma tahfonglac ke inkacnek luhn Jeova in oraclah mwet uh? Yac sie mwet suwohswohs kuh in sruokyac na oaru lal nuh sin Jeova el fin srihfeyuck sin Devil? Yac wo mwet uh in koluhltahl sifacna? (Genesis 3:4, 5) Oaru lal Jesus nuh sin God ahkpwacyeye lah Devil el kikiacp. Ke pacl fahsruh uh, ke kihsen siyuck inge nuhkewa topukyucklac tari, lipufacn ac mwet nuhkewa ac fah etuh lah inkacnek in kol luhn Jeova pa ma wo emeet uh.
13 Jeova el muhtahl, pwacnacng el tiac na srihfe kuhtwena mwet ke ma kuluk. Satan pa “mwet sruf” uh. (Matthew 4:3, BMK) Satan el srihke in srihfe kuht ke inkacnek pucspucs. Tuhsruhktuh oasr kuh lasr in sulaclah. Kais sie sesr kuh in sulaclah kuht fin ac lain mwe sruhf se kuh tiac. (Riti James 1:13-15.) Ke pacl se Satan el srihfacl Jesus, el sa in fohlohkihn kahs in lain lal ke el orekmakihn Kahs luhn God. Jesus el oaru nuh sin God. Tuhsruhktuh, Satan el tiac fuhleack. El sano “nuh ke sie pac pacl” fal elan sifwil srihfacl Jesus. (Luke 4:13) Tuhsruhktuh finne ke ma nuhkewa Satan el oruh nuh sel, Jesus el ahkos God oana Mwet Kol lal pacl nuhkewa. El ahkpwacyeye lah sie mwet suwohswohs el kuh in sruokyac na oaru lal nuh sin Jeova finne ke pacl upac. Ne ohinge, Satan el srihke in srihfe mwet tuma lutlut nuhkewa lal Jesus in seahkos Jeova, ac el srihfe kom pac.
14. Meac kuht enenuh in oruh in fahsr liki mwe sruhf?
14 Kihsen siyuck ma oreklac ke suwohs luhn God in kol mwet uh srackna enenuh in topukyucklac. Ke ma inge, Jeova el lwelah Satan elan srihfe kuht nwe ke pacl inge. Jeova el tiac “kol kuht in mwel.” Pwacye lah, el luhngse in kahsre kuht mweyen el luhlahlfongi lah kuht kuh in sruokyac na oaru lasr nuh sel uh. Tuhsruhktuh el tiac pahtok kuht in oruh ma wo. El ahkfuhlwactye sukohsohk lasr in oruh sulaclah lasr sifacna. Pwacnacng el lwelah kuht in sifacna sulaclah in oaru nuh sel kuh tiac. Kuht enenuh in oruh ma luo inge tuh kuht in fahsr liki mwe sruhf: kwacfeacng in fototo nuh sin Jeova ac puhruhe siyuck ke kahsruh lal pacl nuhkewa. Jeova el ac topuk fuhkah puhruhe lasr in fahsr liki mwe sruhf?
15, 16. (a) Meac kuhtuh mwe sruhf ma kuht enenuh in lain? (b) Sie mwet fin sruhflah, suc kuluk uh?
15 Jeova el acse nuh sesr ngun muhtahl lal in kahsre kuht lain mwe sruhf nuhkewa lal Satan uh. Jeova el acse pac nuh sesr Bible ac congregation uh in kahsre kuht ke kuhtwena mwe sensen. Ke sie mwe puhpuhlyuck, el fahk nuh sesr kuht in tiac orekmakihn mani lasr, kuh lasr, ac inkaiyen pacl lasr uh nuh ke ma kuht tiac enenuh na pwacye. Espen ac Janne eltahl muhta ke sie acn kahsruhp fin acn Europe. Ke lusen yac pucspucs eltahl regular pioneer ke sie siti fin acn we ma yohk enenuh nuh ke orekma in luti uh. Ke pacl se tuhlihk se meet nahtuhltahl isuslac, eltahl enenuh in tui ke orekma luhn pioneer, ac ingena tuhlihk luolac nahtuhltahl. Espen el fahk: “Ke srihpen kuht tiac kuh in orekmakihn inkaiyen pacl lasr uh nuh ke orekma in kuhlacnsap lasr oacna meet ah, pwacnacng kuht kwacna puhruhe nuh sin Jeova tuh kuht in tiac srihfeyuck ke pacl inge. Kuht siyuck Jeova elan kahsre kuht karihngihn fototo lasr nuh sel ac moniyuck lasr ke orekma in luti uh.”
16 Sie pac mwe sruhf ma kuht enenuh in lain pa petsac ac video fohkfohk. Kuht fin fuhleack ac sruhflah, kuht tiac kuh in fahk muh Satan pa kuluk uh. Efuh? Mweyen Satan ac mwet nuhkewa suc ahksol uh tiac kuh in pahtok kuht in oruh kuhtwena ma kuht sruhnga oruh. Kuhtuh mwet uh muhtwacwacack liyeyuck petsac fohkfohk ke srihpen eltahl tiac sislah nuhnak fohkfohk inge luhkeltahl. Tuhsruhktuh puhs sin mukul ac muhtwacn lili wiyacsr eltahl lain mwe sruhf inge, pwacnacng kuht kuh pac in oruh.—Sie Corinth 10:12, 13.
EISKUHTLAC LUHKEL SUC KULUKLACNA
17. (a) Kuht ac ahkkahlwemye fuhkah lah kuht luhngse Jeova elan eiskuhtlac luhkel suc kuluklacna? (b) Mwe kahsruh ma wowo fuhkah apkuhran me?
17 Kuht ac ahkkahlwemye fuhkah lah kuht luhngse Jeova elan molikuhtlac kuh eiskuhtlac luhkel suc kuluklacna? Enenuh kuht in “tiac ma luhn facluh” ac kuht in “tiac luhngse facluh, kuh ma suc on in facluh.” (John 15:19; Sie John 2:15-17) Sie mwe engan na yohk ke pacl se Jeova el kuhnahosuhllah Satan ac mwet kuluk nuhkewa fin facl se inge. Tuhsruhktuh nuh ke pacl sacn, kuht enenuh in esam lah Satan el “arlacna kasrkuhsrak, mweyen el etuh lah fototo pacl luhlah lal.” El ac fah oruh ke kuhiyacl kewa in tulokihnkuhti ke kuhlwacnsap lasr nuh sin Jeova uh. Ke ma inge kuht enenuh in kwacfeacng in puhruhe tuh Jeova elan karihngihn kuht luhkel Satan.—Fwackyuk 12:12, 17.
18. Kuht fin luhngse in moullac liki sahflahiyen facl lal Satan uh, meac kuht enenuh in oruh?
18 Yac kom ke muhta ke sie facl ma Satan el wacngihn kac? Ke ma inge tahfwelah na puhruhe siyuck ke Tohkohsrahi luhn God in tuhkuh, in ahkmuhtahlyeyuck inen God, ac ma luhngse lal in orek fin facluh. Luhlahlfongi pacl nuhkewa nuh sin Jeova elan karihngihn kom ac elan usot nuh sum ma nuhkewa kom enenuh tuh kom in sruokyac na oaru lom nuh sel uh. Ahok, oruh ke kuhiyom kewa in moulkihn moul lom fal nuh ke puhruhe luhn Leum.