Kuht Kuh In Nwacsnwacs Pacl Nuhkewa
‘Ohllah pouwos, . . . ac ahknwacsnwacsye insiowos.’ —JAMES 4:8.
FUHS TEN INGE KAHSRE KUHT FUHKAH IN NWACSNWACS PACL NUHKEWA?
1. Ohiyac fuhkah ma mwet pucspucs uh nuhnkuh muh tiac kuluk?
KUHT muhta ke sie facl ma nwacnwaclah ke orekma kuluk. Ke sie mwe puhpuhlyuck, mwet pucspucs nuhnkuh muh tiac kuluk in oasr inmahsrlon mukul nuh sin mukul kuh muhtwacn nuh sin muhtwacn kuh in oan yurin sie mwet suc eltahl tiac pahyuck nuh se. Petsac mukwikwi, puk, on, ac kuhtuh pac kain in mwe eyeinse ke TV uh ahkkahlwemye pacl nuhkewa ke orekma in kosro. (Psalm 12:8) Tuhsruhktuh, Jeova el kuh in kahsre kuht in moulkihn moul lasr ke sie inkacnek ma ac ahkinsewowoyacl. Kuht kuh in nwacsnwacs kuh wo, ke sie facl ma arlacna kuluk.—Riti Sie Thessalonica 4:3-5.
2, 3. (a) Efuh kuht enenuh in sislah kena kuluk lasr uh? (b) Meac kuht ac fah ahkuhtweyac ke mwe lutlut se inge?
2 Kuht enenuh in sruhnga ma nuhkewa ma Jeova el sruhnga uh kuht in kuh in ahkinsewowoyacl. Tuhsruhktuh, ke srihpen kuht sesuwohs, sahp srihfeyuck kuht ke ma kuluk, oacna soko ik ma srihke in kanglah pa se. Fin muhtwacwack in oasr nuhnak kuluk yohrohsr, kuht enenuh in suhlahklahk na sislah. Kuht fin tiac, kena kuluk se inge ac yohkwelihk ac kuht kuh na in oraclah sie ma kuluk upac. In oacna ke ma Bible uh fahk: “Ac ke kena kuluk lal kuhi in el, ac oswelah ma kuluk luhlahp.”—Riti James 1:14, 15.
3 Sie kena kuluk ac kuh in yohkwelihk ke insiacsr. Pa inge srihpac pwacnacng kuht enenuh in sensenkihn ma kuht nuhnkuh kac uh. Kuht fin fahsr liki kena kuluk lasr, kuht kuh in fahsr liki orekma in kosro ac fahko kuluk ma tuhkuh kac uh. (Galatia 5:16) Ke mwe lutlut se inge, kuht ac fah ahkuhtweyac ma tolu ma kuh in kahsre kuht in lain kena kuluk inge: fototo lasr nuh sin Jeova, kahs in kahsruh ke Kahs lal, ac kahsruh luhn mwet Christian suc pah ac yohk experience la.
“KALUCKYANG NUH YURIN GOD”
4. Efuh kuh yohk srihpac nuh sesr in kaluckyang nuh yurin Jeova?
4 Bible uh fahk ma inge nuh sin mwet ma luhngse in “kaluckyang nuh yurin God”: “Ohllah pouwos” ac “ahknwacsnwacsye insiowos.” (James 4:8) Ke srihpen Jeova pa Kawuck wo emeet lasr uh, kuht luhngse pac nuhnak lasr ac orekma lasr uh in ahkenganyacl. Nuhnak lasr uh fin nwacsnwacs ac wo, na insiacsr ac fah nwacsnwacs pac. (Psalm 24:3, 4; 51:6; Philippi 4:8) Jeova el kahlwem kac lah kuht sesuwohs ac lah kuht kuh in muhtwacwack in nuhnkuh ke ma kuluk. Tuhsruhktuh, ke srihpen kuht sruhnga in ahktoasrye insiacn Jeova, kuht kwacfeacng ke insiacsr kewa in sislah nuhnak kuluk nuhkewa. (Genesis 6:5, 6) Kuht sang kuhiyacsr kewa tuh nuhnak lasr uh in nwacsnwacs.
5, 6. Puhruhe uh ac kahsre kuht fuhkah in lain kena kuluk lasr uh?
5 Jeova el kuh in kahsre kuht in lain nuhnak kuluk ke kuht puhruhe pacl nuhkewa ac siyuck ke kahsruh lal uh. El use ngun muhtahl lal nuh sesr tuh kuht kuh in nwacsnwacs pacl nuhkewa. Ke puhruhe lasr uh, kuht kuh in fahk nuh sin Jeova lah kuht ke nuhnak lasr uh in ahkinsewowoyacl. (Psalm 19:14) Kuht siyuck, ke inse puhsisacl, tuh elan liye fin ac oasr kuhtwena kena kuluk ke insiacsr ma ac kuh in oruh kuht in oraclah sie ma kuluk. (Psalm 139:23, 24) Siyuck Jeova elan kahsre kom in fahsr liki orekma in kosro pacl nuhkewa ac in oruh ma wo, finne ke pacl upac.—Matthew 6:13.
6 Meet liki kuht lutlut kacl Jeova, sahp kuht luhngse in oruh ma el tiac engan kac, ac sahp ke pacl inge kuht srackna kwacfeacng in lain kena kuluk inge. Tuhsruhktuh Jeova el kuh in kahsre kuht in eklac ac in oruh ma ac ahkinsewowoyacl. Ke sie mwe puhpuhlyuck, tukun Tohkohsrah David el oan yohrohl Bath-sheba, el auliyak ac siyuck Jeova elan ‘oruh insiacl in nwacsnwacs’ ac in kahsrel elan kuh in ahkos. (Psalm 51:10, 12) Pwacnacng e fin oasr kena kuluk lasr in pacl meet ah ac kuht srackna lain ma inge, Jeova el kuh in kahsre kuht pac in in ahksol ac in oruh ma wo. El kuh pac in kahsre kuht in kutong nuhnak sesuwohs lasr uh.—Psalm 119:133.
“ORUH OACNA MA KAHS LUHN GOD UH FAHK”
7. Kahs luhn God uh ac kahsre kuht fuhkah in lain nuhnak kuluk?
7 Jeova el kuh in orekmakihn Bible in topuk ma kuht siyuck ke puhruhe lasr uh. Kuht kuh in konwacack in puk se inge lahlmwetmwet luhn God suc nwacsnwacs. (James 3:17) Ke kuht riti Bible uh ke kais sie lwen, kuht nwek nuhnak lasr uh ke ma nwacsnwacs. (Psalm 19:7, 11; 119:9, 11) Oacyacpac oasr mwe srihkasrak ac kahs in sensen ke Bible uh, ma kuh in kahsre kuht in lain nuhnak kuh kuhtwena kena kuluk.
8, 9. (a) Efuh kuh tuhlihk mukul fuhsr sac oan yurin muhtwacn kosro sac? (b) Ke Soakas sapta 7, kain in mwe sensen fuhkah ke fuhs se inge kuh in kahsre kuht in fahsr liki ke pacl inge?
8 Ke Soakas 5:8, Kahs luhn God uh sensenkihn kuht in fahsr liki orekma in kosro. Ke Soakas sapta 7, kuht riti sramsram se ke mukul fuhsr se ma fahsr inkacnek uh ke fong, ac apkuhran nuh ke lohm sin sie muhtwacn kosro. Muhtwacn sac tu pe innek ah nukum “nuknuk oacna sie muhtwacn kosro.” El fahsracng nuh yohrohl, sruokilyac, ngokyac muhtahl, ac fahk nuh sel kain in kahs ma ac puhrakack kena kuluk in el. El tiac lain kena kuluk lal ah ac ke sahflahiyac ah el oan yurin muhtwacn sac. El finne tiac pahngon muh el ac oruh kuhtwena ma kuluk, el oraclah pac na. Ke ma inge el tiac kuh in fahsr liki ma upac ma tuhkuh kac uh. El fuhnuh kahlwem ke mwe sensen ma tuhkuh kac uh, el luhkuhn tiacna suk in fototo nuh sel.—Soakas 7:6-27.
9 In oacna mukul fuhsr sac, kuht kuh pac in oraclah sulaclah na kuluk ke srihpen kuht tiac etuh mwe sensen ma ac tuhkuh kac uh. Ke sie mwe puhpuhlyuck, ke fong uh oasr channel ke TV ma ahkkahlwemye ke kain in program ke orekma in kosro. Pwacnacng, ma inge kuh in mwe sensen se nuh sesr kuht fin ikihl nuh ke kais kuhtuh channel in liye na lah meac oasr kac uh. Oasr pac kain in Web site kuh inkacnek in sramsram nuh sin mwet suc kuhpahsr nuh ke orekma in kosro kuh mwe eyeinse nuh ke petsac fohkfohk. Pwacnacng, sie mwe sensen kuht fin ana toan link pucspucs ke Internet, kuht fin tiac etuh lah ac som nuh oyac. Ke kain in ohiyac inge nuhkewa, ma kuht liye uh kuh in puhrakack kena kuluk in kuht, ac ma inge kuh in kol kuht in seahkos Jeova.
10. Efuh kuh mwe sensen se in fihlacng? (Liye petsac se meet ke mwe lutlut inge.)
10 Bible uh ahkuhtweyac pac ke ohiyac ma mukul ac muhtwacn uh enenuh in ahkkahlwemye nuh sin sie sin sie. (Riti Sie Timothy 5:1, 2.) Mwet Christian uh ahkkahlwemye luhngse, lohacng ac pwacr laltahl nuh sin mukul kuh muhtwacn kiyacltahl muhkwena kuh nuh sin sie mwet eltahl luhngse in pahyuck nuh se. Eltahl enenuh in tiac orek fihlacng nuh sin mwet sahyac. Kuhtuh mwet uh nuhnkuh muh wacngihn ma kuluk kac in ahkkahlwemye luhngse, lohacng kuh pwacr laltahl nuh sin sie mwet sahyac ke mukuikui laltahl, ohiyacltahl kuh ke muhtahltahl, eltahl finne tiac apuhsrali. Tuhsruhktuh, ke pacl se mwet luo fihlacng nuh sin sie sin sie, ma inge kuh in puhrakack nuhnak kuluk, ac kohluhltahl nuh ke orekma in kosro. Ma inge sikyak tari, ac kuh in sifwil pac sikyak.
11. Mwe lutlut fuhkah se kuht lotwelah sel Joseph?
11 Joseph el mwe srihkasrak na wowo se nuh sesr. Muhtwacn kiyacl Potiphar ah srihfacl elan weluhl oan. Joseph el ahkkahlwemye lah el sruhnga, tuhsruhktuh muhtwacn kiacl Potiphar ah tiac tui in srihfacl. Lwen nuhkewa el siyuck sel Joseph elan “som weluhl oan.” (Genesis 39:7, 8, 10) Sie mwet suc oruh lutlut ke koanon Bible uh el ahkuhtweyac lah muhtwacn kiyacl Potiphar ah finsrak tuh ke pacl se eltahl muhkwena uh, Joseph el ac fah ahkkahlwemye kena lal nuh sel. Joseph el tu na kuh ac tiac fohlohkihn kuh tiac fihlacng nuh sel. Ke inkacnek se inge, el tiac lwelah kena kuluk in kapkapack ke insiacl. Ac ke pacl se el sruokyac nuknuk lal Joseph ah ac kwacfel in oan yohrohl, Joseph el suhlahklahk na “kahinglac nuh lihkihn lohm sac, sislah na nuknuk lal ah yurin muhtwacn sac.”—Genesis 39:12.
12. Kuht etuh fuhkah lah ma kuht liye uh ac kuh in ahkkulukye insiacsr?
12 Jesus el sensenkackihn nuh sesr muh ma kuht liye uh ac kuh in ahkkulukye insiacsr ac puhrakack kena kuluk. El fahk: “Kuhtwena mwet suc ngwetacng nuh sin sie muhtwacn ac oasr nuhnak in kena lal nuh sel, el orek kosro nuh sel tari in nuhnak luhn insiacl.” (Matthew 5:28) Pa inge ma sikyak nuh sel Tohkohsrah David. “Ke sucwuclsrihsr se lucng ke lohm sin tohkohsrah [David] . . . el liye sie muhtwacn yihyih in lohm sel,” tuhsruhktuh el tiac tui ke liyacl ac nuhnkuh kacl uh. (Luo Samuel 11:2) El finne muhtwacn kiyacn sie pacna mukul sahyac, David el lwelah kena lal in pihrihk insiacl nuh sin muhtwacn se inge ac tohkoh el weluhl oan.
13. Efuh kuh kuht enenuh in oraclah “sie wuhlelah” ke muhtahsr? Kuht ac oruh fuhkah ma inge?
13 Kuht fin luhngse in sislah kuhtwena nuhnak kuluk, kuht enenuh in etahi mwe srihkasrak lal Job. El fahk muh: “Nga oraclah tari sie wuhlelah na kuh. In tiac ngwetngwet in mwel nuh sin sie muhtwacn fuhsr.” (Job 31:1, 7, 9) Oacna Job, kuht kuh in oraclah sie sulaclah na kuh in tiacna nuhnkuh ma kuluk ke mwet ma kuht liye uh. Ac kuht fin liye sie petsac fohkfohk ke computer, mwe akucl, mackuhsin, kuh ke kuhtwena ma kuht enenuh in suhlahklahk na ngetlah liki.
14. Meac kuht enenuh in oruh tuh kuht in nwacsnwacs pacl nuhkewa?
14 Kom fin nuhnkuh ke ma kuht sramsramkihn nwe ingena uh, sahp kom ac akihlen lah kom enenuh in kwacfeacng liki na meet ah in lain kena kuluk uh. Fin oasr ma kom enenuh in ekuhllah, oruh ingena! Ke kom ahkos ma Jeova el fahk uh, kom ac kuh in fahsr liki orekma in kosro ac kom kuh in nwacsnwacs pacl nuhkewa.—Riti James 1:21-25.
SIYUCK KASRUH LUHN MWET ELDER
15. Kuht fin puhla muh upac nuh sesr in lain kena kuluk lasr uh, efuh kuh yohk srihpac kuht in siyuck ke kahsruh?
15 Kom fin konwacack tuh upac nuh sum in lain kena kuluk lom uh, sramsram nuh sin sie mwet ke congregation suc kuhlwacnsuhpuh Jeova ke lusen pacl na loeloes se, ac kuh in usot kahs in kahsruh wowo ke Kahs luhn God. Sahp tiac fihsracsr nuh sum in sramsramkihn ma upac lom uh nuh sin sie mwet, tuhsruhktuh arlacna yohk srihpac kom in siyuck ke kahsruh. (Soakas 18:1; Hebrew 3:12, 13) Mwet lili ma pah ac yohk experience la, e kuh in kahsre kom in akihlen ma kom enenuh in ekuhllah an. Na, kom fah oraclah eklac ingacn tuh kom in Kawuck nuh sin Jeova pacl nuhkewa.
16, 17. (a) Mwet elder uh ac kahsruh fuhkah mwet ma upac nuh se in lain kena kuluk uh? Sang sie mwe puhpuhlyuck an. (b) Efuh kuh yohk srihpac nuh sin mwet ma pahlah in liye petsac fohkfohk uh in siyuck ke kahsruh ingena?
16 Mwet elder ke congregation lasr uh pa wo ac fal emeet in kahsre kuht uh. (Riti James 5:13-15.) Ke lusen yac pucspucs, mukul fuhsr se fin acn Brazil el puhla muh upac nuh sel in lain kena kuluk lal uh. El fahk: “Nga etuh lah nuhnak luhk ah tiac ahkinsewowoye Jeova, tuhsruhktuh nga arlacna mwekihn in fahk nuh sin mwet sahyac ma nga puhla ah.” Sie mwet elder el akihlen lah mukul fuhsr se inge enenuh kahsruh ac el ahkkweyacl elan eis kahsruh luhn mwet elder. Mukul fuhsr se inge fahk: “Nga lut ke ohiyac na kuhlwacng ma mwet elder inge ahkkahlwemye nuh sihk ah. Eltahl kahlwem ke ma nga puhla ah ac kuhlwacng laltahl nuh sihk ac ahluhkwelah ma nga puhla muh fal eltahl in oruh. Eltahl lohng ahkwoyac nuh ke ma upac luhk ah. Eltahl orekmakihn Bible uh in ahkacsmakihnyeyuc ke luhngse luhn Jeova nuh sihk ac eltahl wiyuc pac puhruhe. Ma inge oruh fihsracsr nuh sihk in eis kahs in kahsruh ma eltahl use ke Bible me uh.” Tukun el ahkkweye fototo lal nuh sin Jeova, el fahk muh, “ingena, nga akihlen lah yohk srihpac nga in eis kahsruh liki na in muhkwena us mwe toasr luhk.”
17 Kom fin pahlah tari ke liyeyuck petsac fohkfohk uh, kom enenuh in siyuck ke kahsruh ingena. Kom fin sano pahtlaclac in siyuck ke kahsruh, kuh in upaclah liki meet ah mwe sensen nuh sum in sun kuh oruh orekma in kosro. In pacl sacn kom ac ahksuhpwacrye mwet sahyac ac kom kuh na in oruh mwet sahyac uh fahk ma kuluk kacl Jeova. Puhs mwet suc siyuck kahsruh luhn mwet elder ac eis kahs in kahsruh laltahl ke srihpen eltahl luhngse in ahkenganye Jeova ac muhta na ke congregation luhn mwet Christian uh.—Psalm 141:5; Hebrew 12:5, 6; James 1:15.
KWACFEACNG IN NWACSNWACS PACL NUHKEWA
18. Meac kom ac kwacfeacng in oruh?
18 Facl lal Satan uh kuluklac liki meet ah. Tuhsruhktuh mwet kuhlwacnsap luhn Jeova uh kwacfeacng in oruh nuhnak laltahl uh in wo ac nwacsnwacs. Jeova el arlacna engan sin kain in mwet Christian inge. Lwelah kuht in fototo nuh sin Jeova ac in ukwe kahs in kahsruh ma kuht eis ke Kahs lal ac ke congregation uh. Ke kuht oruh ma inge, kuht ac fah engan ac nwacsnwacs nuhnak luhn insiacsr. (Psalm 119:5, 6) Ac ke pacl fahsruh uh, ke kuhnausyucklac Satan, kuht ac fah moul ma pahtpaht ke facl sasuc ac facl nwacsnwacs luhn God.