“Oru En Jeova In Nien Molela”
“A Nga fwa filiye . . . sie mutanfwal su keokyung a sekasrup, a elos fwa oru en Jeova in nien molela lalos.”—ZEFENAIA 3:12, New World Translation.
1, 2. Mea ma se inge su pupulyukkinyuk nu ke ongoiye upa se su apkurun na in sun metu?
YA OASR pal kom enenu in suk sie loom sririk in loangekomla liki af a eng upa? Tusruktu fwin oasr sie paka ku sie foru upa su apkurun in tuku in sun an sum an, saap loom srisrik se inge a tia fwal in loangekomla, a kom enenu in kasrusr nu luun sie loom lulap fokoko.
2 Tusruktu, oasr sie na kain in paka su apkurun na in tuku, su aksensenye moul lun met nukewa. Ma se inge el pupulyukkinyuk nu ke sie “len in ongoiye.” Len se inge su pangpang pa “len lulap lun Jeova” e fwa oru me kunausten nu sin met nukewa. Tusruktu, kut ku in koneak sie nien molela su kut enenu. (Ridi Zefenaia 1:14-18.) Fuka kut ku in oru ma inge ke “len in kasrkusrak lun Jeova” su apkurun na in mutawauk?
Len in Ongoiye In Pal Meeta
3. Kain in “paka in af upa” fuka tuku nu sin togusrai lun sruf sengoul lun Israel?
3 Len lun Jeova fwa mutawauk ke pal se kunanela lun alu kikiap nukewa fwin fwalu sikyak. Na fuka kut ku in koneak nien molela se inge? Kut ku in liye me top nu ka ke kut kalweni ma sikyak ke met kulansap lun God in pal meeta. Met palu Isaia su moul in century ak oalkosr B.C.E., el pupulyukkin nununku lun Jeova nu sin togusrai lun sruf sengoul lun Israel oana sie “paka in af upa” su metu tia ku in tulokinye. (Ridi Isaia 28:1, 2.) Kas palu se inge akpayeyuk in yea 740 B.C.E. ke pal se met Assiria elos sruokye an sin sruf sengoul inge, su sruf lun Ifreim el pa pengpeng emeet liki sruf sengoul.
4. Fuka “len lulap lun Jeova” kunausla an Jerusalem in yea 607 B.C.E.?
4 Me nununku nu sin met Israel su seoaru sifwilpa orek in yea 607 B.C.E. a “len lulap lun Jeova” tuku nu sin Jerusalem a nu sin togusrai lun an Juda. Ma inge sikyak meyen met lun an Juda elos oru pa ma koluk lain God. Met Babulon ye kolyuk lal Nebukadnezzar aksangengye met lun an Juda a lun an Jerusalem. Met Juda elos suk kasru sin mutunfwal lun Ijipt su “nien molela in ma kikiap.” Tusruktu, in oana sie paka upa, met Babulon elos kunausla “nien molela” se inge.—Isaia 28:14, 17.
5. Mea e fwa sikyak nu sin met kulansap lun God oana sie u ke pal in kunanela lun alu kikiap nukewa?
5 Len lulap lun Jeova su sun Jerusalem el me akkalemye pa ke me nununku su fwa orek nu sin alu kikiap nukewa su fwak mu elos met Kristian ke pal lasr. Sayen ma inge, alu kikiap nukewa lun “Babulon Lulap,” e fwa kunausyukla. Tokin ma inge, ip nukewa ke akwuk koluk puspus lal Setan e fwa akwanginyeyukla pa. Ne ouinge, met kulansap nukewa lun God oana sie u elos fwa moliyukla meyen elos oru Jeova oana nien molela lalos.—Fwakyuk 7:14; 18:2, 8; 19:19-21.
Me Karungin ke Fototo lasr nu sin God a Molela lasr in Len lun Jeova
6. Fuka met kulansap lun Jeova elos ku in koneak me molela?
6 Fuka met lun God elos ku in koneak me loeyuk lalos fwinne ke pal se inge in pal safla inge? Kut koneak me karungin ke fototo lasr nu sin God ke kut akkalemye sunak yok a “nunku ke en [God]” a ke kut moniyuk in kulansap nu sel. (Ridi Malakai 3:16-18.) Tusruktu, oasr pa ma eneneyuk saye liki na in nunku ke el. Baibel el akkalemye kas inge: “Elos nu kemwa su pangon nu ke en Jeova elos fwa moul.” (Rom 10:13) Oasr fwako mwomwo lun orekma lun met in pangon nu ke en Jeova, a fwako inge pa me molela. A met puspus su paye insielos elos ku in liye ma tia oana sie inmasrlon met Kristian paye, su akkalemye sunak nu sel a “nunku ke el,” a kulansap nu sel oana Met Lo lal, a nu sin met puspus su tia na kulansap nu sel.
7, 8. Ke inkanek fuka met Kristian in century se meet elos moliyukla? A fuka oiya sepana inge ku in sikyak pa ke pal inge?
7 Me molela su kut ku in eis ku in kasre kut in karungin fototo mwomwo lasr nu sin God, a ke len lulap lun Jeova el mwulela pa nu sin met kulansap nukewa lal la el e fwa molelosla. Kut ku in liye la God el orala tari ma inge nu sin met lal in yea 66 C.E. tokin met meun lun an Rom ye koko lal Cestius Gallus elos tuku in kunausla an Jerusalem. Jesus el palye la lusen len in ongoiye se inge e fwa “akfototoyeyuk.” (Mattu 24:15, 16, 21, 22) Ma inge sikyak ke pal se met meun lun an Rom elos som liki siti se inge, su sang pal mwomwo nu sin kutu “ikwe,” su kalmekin nu sin met Kristian paye, tu elos in “moliyukla.” Elos ku in kaengla liki siti se inge a kaengla pa liki yen nukewa su apkurun ke siti se inge. Kutu selos elos sasla liki infwal Jordan a elos koneak nien molela lalos fwin eol leyen kutulap lun infwal soko inge.
8 Kut ku in liye la oasr ma oana sie inmasrlon met Kristian in pal meeta a ke met kulansap lun God in pal inge. In pal somla, met Kristian in pal meeta elos suk ke nien molela lalos, a oapana met kulansap lun God ke pal inge elos suk pa ke nien molela lalos. Tusruktu, ke pal inge elos tia enenu in kaengla nu ke sie an, meyen met Kristian paye elos oasr yen nukewa fwin fwalu nufon. Ne ouinge, oana met kulansap lun God, “met sulela” nukewa a met oaru nukewa su welulos elos e fwa moliyukla ke elos oru Jeova a u lal oana nien molela lalos su arlana fokoko oana eol fulat, a ma inge fwa sikyak ke pal se alu nukewa su fwak mu elos met Kristian fwa kunausyukla.
9. Su oru in mwulkinyukla inen Jeova? Sang sie me pupulyuk.
9 Ke oiya saye, alu nukewa su fwak mu elos met Kristian elos fwal nu ke kunanela su fwa tuku meyen elos tia luti met lalos ke ma paye ke God a ke akwuk lal, a elos pulesru inen God. Ke sie lusen pal mutawauk in yea 500 nu ke 1,500 C.E., inen God arlana eteyuk fwin an Europe. Inen God, su oasr ke leta akosr ke kas Hibru su pangpang Tetragrammaton a lungusyukla oana YHWH (ku JHVH), sikyuk ke coins, ke loom puspus sin metu, ke buk a Baibel puspus, a ke kutu loom alu lun Catholic a Protestant. Tusruktu, ke kutu pal somla metu elos lungse in eisla inen God ke leng lalos ke Baibel a ke ma puspus. Sie me akpayeye ka pa ke sie Leta nu sin Bishop ku met kol puspus ke alu lun Catholic su oru tukeni lalos, leta se inge sramsramkin ke ‘Inen God,’ simusyukla in June 29, 2008, su tuku sin Congregation for Divine Worship and the Discipline of the Sacraments. Ke leta se inge alu lun Roman Catholic elos fwak mu inen God ke leta akosr enenu in ayaola nu ke “Leum.” Met kol fulat ke alu lun Catholic elos orala masap la inen God in tia orekmakin ku fwak ke on a ke pre ke pal in alu ke loom alu lun Catholic. A met kol lun alu puspus su ekin mu elos met Kristian a met kol lun alu puspus saye elos tia luti ma paye ke God nu sin million puspus sin met su wi ke alu lalos.
Me Karungin Nu Selos su Akmutalye Inen God
10. Inen God el akfulatyeyuk fuka ke pal inge?
10 Alu saye puspus elos pulesru inen God, tusruktu Met Lo lun Jeova elos akkalemye sunak a akfulatye inen God. Elos akmutalye ma inge ke elos orekmakin ke inkanek fwal a sumwos. Jeova el insemwomwo nu selos su lulalfongi nu sel, a el e oru ma nukewa su eneneyuk in akinsemwomwoye a molela met kulansap nukewa lal. “El etalos su eis moul lalos in el.”—Nehum 1:7; Orekma 15:14.
11, 12. Su akfulatye inen Jeova in an Juda in pal meeta, a su oru ma inge in pal inge?
11 Oasr met Ju puspus in pal meeta elos som liki alu paye, ne ouinge oasr kutu selos su ‘oru inen Jeova in nien molela lalos.’ (Ridi Zefenaia 3:12, 13.) Aok, ke pal se God el sang kai upa nu sin met Juda su wangin lulalfongi nu sel ke el lela met Babulon in sruokye an selos a utukla met Ju oana met sruo, oasr kutu met oana Jeremaia, Beruk, a Ibed-milek, elos moliyukla ka. Elos moul “inmasrlon” mutunfwal se su forla liki Jeova. Kutu met Ju elos sruokye oaru lalos ke elos muta in an saye oana met sruo. In yea 539 B.C.E., met Medo a met Persia ye koko lal togusra Sairus elos sruokye an Babulon. Tia pat tokin ma inge Sairus el orala sie masap in fulela met lula sin met Ju elos in folokla nu in an selos sifwana.
12 Zefenaia el palye ke met nukewa su fwa engunkin ke sifwil folokonak alu paye, la Jeova el fwa molelosla a engun kelos. (Ridi Zefenaia 3:14-17.) Oiya se inge paye pa ke pal lasr. Tokin Togusrai lun God oakiyuki in kosrao, Jeova el molela met lula sin met akmusrala liki sruo lalos ke Babulon Lulap. A el welulos engun nu ke pal inge.
13. Kain in sukosok fuka sikyak nu sin met lun mutunfwal nukewa?
13 Met puspus su oasr fwinsrak in moul ma patpat fwin fwalu elos pa illa liki Babulon Lulap a elos sukosokla liki me luti nukewa lun alu kikiap. (Fwakyuk 18:4) Ke ma inge, Zefenaia 2:3 el akpayeye ke pal inge su kut oasr ka: “Suk Jeova, komwos met fulpap lun fwalu nukewa.” Met fwokpap lun mutunfwal nukewa, su aksaokye fwinsrak lalos in moul in kosrao ku oasr fwinsrak in moul fwin fwalu, elos oru inen Jeova in nien molela lalos.
Inen God el Tia sie Talisman
14, 15. (a) Kutu met elos orekmakin ma fuka in oana sie magic in molelosla? (b) Ma fuka kut tia enenu in orekmakin oana sie ma in molikutla?
14 Kutu met Israel elos nunku mu temple in Jerusalem el sie ma su oasr magic ka su ku in molelosla liki met lokwalok lalos. (Jeremaia 7:1-4) Meet liki pal se inge met Israel elos nunku mu tuptup in mwuleang el sie ma su ku in molelosla ke meun nukewa. (1 Samuel 4:3, 10, 11) Mokul se inge su pangpang Constantine Lulap el simusla leta luo inge khi a rho ke kas Grik, su pa inge leta luo ke mutaweyen mwal se inge “Kraist” ke kas Grik, aok el sroalela ma inge ke me loeyuk lun met meun nukewa lal meyen el fwinsrak mu ma inge ku in loangela met meun nukewa lal ke meun. A Togusra Gustav Adolph II lun an Sweden, su wi ke Meun ke lusen Yea Tolngoul, nunkeyuk pa mu el orekmakin me meun ku me loeyuk su akkalemyeyuk in sra 7. Liye akmwoye ka la e se inge “Iehova” simusyukla kalem ke me loeyuk se inge.
15 Kutu sin met kulansap lun God su akkolukyeyuk sin lipufan koluk elos eis me molela ke elos pang nu ke inen Jeova ke pusra lulap. Tusruktu, sie ma su inen God oasr ka el tia enenu in nunkeyuk oana sie talisman ku magic in orekmakin ke moul len nukewa in oana oasr ku lun ma inge in molela met. Tia pa inge kalmen kas inge in oru inen Jeova oana nien molela.
Fuka Kut Ku In Eis Me Molela Ke Pal Inge
16. Fuka kut ku in eis me loeyuk ke pal inge?
16 Kut ku in koneak me loeyuk a misla mwomwo ke pal inge su oasr yurin met kulansap nukewa lun God. (Sam 91:1) Ke inkanek lun “met kulansap oaru a lalmetmet” a met elder ke congregation, kut akesmakinyeyuk ke oiya puspus lun fwalu su ku in aksensenye oiyen misla lasr. (Mattu 24:45-47; Isaia 32:1, 2) Nunku ke kas in sensen su akkalemyeyuk nu sesr ke pal puspus ke lungse yok ke ma lun fwalu, a nunku ke inkanek mwomwo la fuka kas in sensen nukewa inge karungin kut liki me akkoluk nu ke fototo lasr nu sin God. A na fuka ke me sensen nu ke kain in oiya su senunku a alsrangesr, su ku in oru sie met in tila oru orekma in kulansap lal nu sin Jeova? Kas lun God el fwak: “Mutawel lusrongten lun met lalfon fwa kunauselosla. A kutena su long yu fwa muta mwo, a el fwa misla liki sangeng ke ma koluk.” (Soakas 1:32, 33) Kafweang lasr in moukin moul nasnas kasre kut pa in oasr misla a oiya mwomwo pal nukewa ke congregation.
17, 18. Ma fuka sang kasru nu sin million puspus sin met in oru inen Jeova in nien molela lalos ke pal inge?
17 Oayepa, nunku ke kas in akkeye su tuku sin met kulansap oaru kut in akos masap lun Jisus in sulkakin peng mwo lun Togusrai yen nukewa fwalu. (Mattu 24:14; 28:19, 20) Zefenaia el akkalemye ke sie ma ekla su ku in sang kasru nu sin met in oru inen God in oana nien molela lalos. El simusla kas inge: “Tu na Nga fwa furokla nu sin mutanfwalu sie kas nasnas, tu elos nu kemwa fwa ku in pang nu ke En Jeova, in kulansupal ke inse siefwanna.”—Zefenaia 3:9.
18 Mea se inge kas nasnas? Kas nasnas el kalmekin nu ke ma paye kel Jeova God a ke akwuk nukewa lal su akkalemyeyuk in Baibel. Paye la kom orekmakin kas inge ke pal se kom fwakak nu sin met puspus etauk sumwos ke Togusrai lun God a la fuka ma inge fwa akmutalye inel, a ke pal se kom akkalemye kalem ke inkanek in akfulatye kolyuk lun God, a ke kom engun in sramsramkin ke me insemwomwo ma patpat su met oaru nukewa fwa engunkin. Ke sripen oasr met puspus su kaskaskin kas nasnas inge, oasr met puspus su ‘pang nu ke en Jeova’ a piselos arlana yokyokelik a elos ‘inse sefwanna in kulansap nu sel.’ Aok, million puspus sin met fwin fwalu ke pal inge elos oru Jeova in nien molela lalos.—Sam 1:1, 3.
19, 20. Fuka lulalfongi ke ‘nien molela kikiap’ tia sang kasru paye in pal meeta oana ke ma akkalemyeyuk in Baibel?
19 Met lun fwalu elos sun kain in me keok su arlana upa. Elos lungse na paye in akwanginyela ma upa lalos, ke ma inge elos fwinsrak mu oasr me kasru sin met kol lalos su sesumwos. Ku elos fwinsrak mu oasr me kasru ka su tuku ke akwuk lun politic, oana met Israel in pal meeta elos ngetak nu sin mutunfwal saye su apkurun nu selos ke kasru, a elos orek mwuleang nu selos. Tusruktu, kom etu tari la ma inge tia sang kasru nu sin met Israel. A wangin pa kutena mutunfwal ke pal inge, ku u lun United Nation, fwa ku in akwanginyela ma upa nukewa lun metu. Ke ma inge efu ku sie met el nunku mu akwuk lun politic a in kawuk nu sin mutunfwal puspus el nien molela lal? Ke inkanek lun kas palu, Baibel el akkalemyelos oana, “nien molela in ma kikiap.” Kom ku in nunku ka oana nien molela in ma kikiap meyen met nukewa su lulalfongi nu selos elos e fwa pulakin asor a toasr yok.—Ridi Isaia 28:15, 17.
20 E fwa tia pat len lun Jeova su oana paka upa e fwa sun fwalu. Akwuk a nunak nukewa lun metu tia ku in sang me molela; a me loeyuk liki me meun fokoko ku me kasrup tia pa na ku in sang me molela paye. Isaia 28:17 el akkalemye: “Af upa fwa imonla nien molela in ma kikiap, a kofu fwa sronoti nu in nien mwukla sa.”
21. Ma lane fuka kut ku in engunkin kut fwin akos yeartext nu ke yea 2011?
21 Ke pal inge a oayepa ke pal fwasru, met kulansap lun God elos fwa koneak nien molela in Jeova God lalos. Zefenaia, su inel kalmekin nu ke “Jeova El Mwukinyukla,” akkalemye ke sropon nien mwukla se inge. Arlana fwal, meyen year text lasr nu ke yea 2011 tuku ke kas in kasru mwomwo inge: “Oru en Jeova in nien molela.” (Zefenaia 3:12, NW) Fwinne ke pal inge, kut ku a kut enenu in fungfung nu ke inen Jeova oana nien molela lasr, aok lulalfongel ke inkanek nukewa. (Sam 9:10) Lela kut in esam len nukewa kas in mwulela mwomwo inge: “En Jeova sie tauer ku. Met sumwosmwos kasrusr nu lu, a moul.”—Soakas 18:10.
Ya Kom Esam?
• Fuka kut ku in oru inen Jeova oana nien molela lasr ke pal inge?
• Efu ku kut tia enenu in lulalfongi ke ‘nien molela kikiap’?
• Nien molela fuka akkalemyeyuk nu sesr ke pal fwasru?
[Petsac ke sra 6]
Yeartext nu ke yea 2011 pa: “Oru en Jeova in nien molela.”—Zefenaia 3:12, NW.
[Picture Credit Line on page 7]
Thüringer Landesmuseum Heidecksburg Rudolstadt, Waffensammlung “Schwarzburger Zeughaus”