Met Fwusr—Lain Me Akkoluk su Tuku sin Met Asrouki Lom
“Lela kas lomwos in . . . solela ke sol, tu komwos fwa ku in etu fuka fwal in topuk nu sin kais sie met.”—KOLOSSE 4:6.
1, 2. Mea pulakin lun met fwusr puspus ke elos tu ku in siena liki met fwusr saye, a efu?
WANGIN alolo ka la kom long tari ke pulo kas se inge “me akkoluk su tuku sin met asrouki” a kom pulakin pa ma inge nu sum sifwana. Ke pal puspus, saap oasr sie met su kaifwe kom in oru ma se su kom etu la tia mwo. Mea pulakin lom fwin ma inge sikyak? Christopher, sie met fwusr su yea 14 matwe, el fwak, “Kutupal nga lungse in sa wanginla, ku ngan fuleak a etawi met lutlut nukewa wiyuk tu ngan tia siena lukelos.”
2 Ya met asrouki lom elos ku in kufuskomla? Fwin ouinge, efu? Ya ke sripen kom lungselos in engun keim? Oasr pal kain in lungse ku nunak inge tia koluk. Paye la, met matu elos lungse pa met asrouki lalos in engun kelos. Wangin sie met fwusr ku sie met matu, lungse in pulesreyuk. Tusruktu, paye la oasr kutu met su tia insemwomwo keim kom fwin tu ku in oru ma sumwos. Jisus el pulakin pa ouinge. Ne ouinge, Jisus el oru ma sumwos pal nukewa. Oasr kutu met su fwasr tokol a ekla met tumal lutlut lal, tusruktu met puspus elos pulesru Mwen nutin God a elos “tia oael.”—Isaia 53:3.
Fuka Kuiyen Me Purakak lun Met Asrouki Lom Oru Kom in Oana Elos?
3. Efu ku sie tafongla na yok kom fwin insese nu ke akwuk lun met asrouki lom?
3 Ke pal puspus, saap kom srufweyuk in oru pa ma met asrouki lom elos oru tu elos in tia toasr keim. Sie tafongla na yok pa inge kom fwin oru moul lom in oana elos. Met Kristian elos tia “tulik, ikik ke noa a mukuikui.” (Efesus 4:14) Tulik srisrik arlana fusrasr in kufusyukla sin met puspus. Tusruktu, oana met fwusr, sie len kom e fwa matula. Ke ma inge, kom fwin lulalfongi la akwuk fulat nukewa lun Jeova e mwo nu sum, arlana fwal kom in eis me insemwomwo puspus ke sripen kom moulkin moul fwal nu ke lulalfongi mwo lom sifwana. (Duteronomi 10:12, 13) Kom fwin oru ma siena liki, kalme pa kom ku in fuleak akwuk mwomwo ke moul lom. Paye la, kom fwin fuleak ke sripen me purakak koluk lun met fwusr puspus, kom ekla sie puppet, ku sie met su oru ma nukewa met saye fwak nu sel elan oru.—Ridi 2 Piter 2:19.
4, 5. (a) Aron el fuleak fuka ke me kufusla lun met lal, a me lutlut yok sripe fuka kom lotela ka? (b) Inkanek puspus fuka met asrouki lom elos e fwa orekmakin nu sum in kufuskomla?
4 Ke sie pal, Aron, tulik mokul se wiyel Moses, el tia ku in tu ku in lain ma met puspus sapkin nu sel elan oru. Ke pal se met Israel elos kaifwel in oru sie god nu selos, el oru ma inge. Aron el tia sie mokul su arlana munas a sangengtot. Meet liki pal san, el welul Moses a kaskas nu sel Fero, su met ku se emeet in an Ijipt. Aron el pulaik in kaskas, a fwakak kas lun God nu sel. Tusruktu ke pal se met lal, met Israel elos patkol ku sap nu sel elan oru ma se, el tia ku in lain ma lungse lalos, a el oru ma elos fwak nu sel elan oru. Paye la me kufusla lun met asrouki yurol arlana fokoko! Fusrasr nu sel Aron in tu ku in lain togusra lun an Ijipt liki na in tu ku ke me kufusla lun met asrouki lal.—Exodus 7:1, 2; 32:1-4.
5 In oana ke ma sikyak nu sel Aron el akkalemye la, me kufusla lun met asrouki tia orek mukena nu sin met fwusr, ku ma upa inge sikyak mukena nu sin kutu met fwusr su lungse in oru ma koluk. Me kufusla lun met asrouki ku in akkolukye met puspus su lungse in oru ma sumwos, wi kom yang pa. Met asrouki lom elos fwa srike in patok kom in oru ma koluk ke elos aksangengye kom, ke sie kaskas kikiap, ku kas in angon ku sufwan kom. Ke kutena oiya, me purakak lun met asrouki arlana upa nu sin met fwusr in lain a tu na ku ka. Inkanek mwo tu met fwusr in kutangla in lain ma inge pa in akkeye nunak a insielos la elos ku in tu na ku ke ma elos lulalfongi ka.
“Akpayeye Komwos Sifwana”
6, 7. (a) Efu ku lulalfongi yok lom ke ma kom lulalfongi arlana yok sripe, a fuka kom ku in akkeye ma inge? (b) Kusensiyuk puspus fuka kom ku in siyuk sum sifwana in akkeye lulalfongi lom?
6 Inkanek mwo in lain me kufusla lun met asrouki lom, pa ma se meet kom enenu in akpayeye nu sum sifwana la ma kom lulalfongi ka a akwuk lom pa sumwos. (Ridi 2 Korint 13:5.) Lulalfongi fokoko lom e fwa kasre kom in pulaik, fwinne kom sie kain in met su mwekin. (2 Timote 1:7, 8) Tusruktu fwinne sie met el pulaik, saap upa pa nu sel in tu ku ke ma se su el tia arlana lulalfongi ka. Ke ma inge efu ku kom tia akpayeye nu sum sifwana la ma lutiyuk nu sum su tuku ke Baibel pa ma paye? Ma se meet kom in mutawauk in tuni me luti su sramtauk ka. Ke sie me pupulyuk, kom lulalfongi ke God a kom long ke metu elos fwak paenang oasr lulalfongi lalos la oasr God a el moul. Tokin ma inge, siyuk sum sifwana, ‘Mea oru ngan lulalfongi la oasr God?’ Sripe paenang kusensiyuk se inge siyukyak pa in akkeye lulalfongi lom a in oru kom in tia nunak luo ka. Oayepa, siyuk sum, ‘Nga etu fuka la ma Simusla el simusyukla ke kasru lun God?’ (2 Timote 3:16) ‘Efu ku nga lulalfongi na paye la pa inge “len safla”?’ (2 Timote 3:1-5) ‘Mea oru nga lulalfongi la akwuk mwomwo lun Jeova ku in akinsemwomwoye yu?’—Isaia 48:17, 18.
7 Saap kom inse luo in siyuk kusensiyuk nukewa inge nu sum sifwana, meyen kom alolo mu kom tia ku in eis me top na mwomwo ka. Tusruktu, kom ku in pupulyukkin ma inge ke pal se kom srunga pa in liye ke fuel gauge oan ke dashboard ke sitosa okoman, meyen kom nunku mu me akul ka srusrngiye nu ke “Empty” ku wanginla koano! Fwin lusr koanon tank u, kom enenu in liye a etu tu kom in ku in nek tank lom an. Ke inkanek oapana inge, mwo nu sum in etu a akilen fwin munas lulalfongi lom a kom in kafweang in akkeye ma inge.—Orekma 17:11.
8. Akutuye la fuka kom ku in akkeye lulalfongi lom ke mwoiyen masap lun God in kaengla liki kosro.
8 Nunku ke sie me pupulyuk. Baibel el kaifwe kom in “kaengla liki kosro.” Siyuk sum sifwana, la ‘Efu ku masap se inge arlana mwo a fwal?’ Nunku ke sripe nukewa paenang met asrouki lom elos wi oru kain in oiya koluk inge. Nunku pa ke sripe puspus paenang sie met su oru orekma lun kosro el “oru ma koluk nu ke manol sifwana.” (1 Korint 6:18) Inge nunku yok ke me top puspus ka, a siyuk sum sifwana: ‘Piyeka inkanek mwo emeet in oru? Ya oasr sripe na paye in wi oru kain in oiya fokfok inge?’ Kom in sifwilpa nunku yok ka, a siyuk sum sifwana, ‘Mea pulakin luk fwin nga fuleak a nga wi oru orekma lun kosro?’ Kalem la met asrouki lom ku in insemwomwo keim, tusruktu mea pulakin lom tok kutu ke pal se kom wi papa a nine kiyom a met lili puspus ke Kingdom Hall? Mea pulakin lom ke pal se kom srike in pre nu sin God? Ya kom e fwa akkolukye oiya mwomwo lom ye mutun God meyen kom lungse in akengunye met asrouki ku tulik lutlut wiyom?
9, 10. Fuka lulalfongi yok lom ke ma paye el kasre kom in pulaik in lain me kufusla lun met asrouki lom?
9 Kom fwin met fwusr su matu kutu, kom sun tari pal ke moul lom su ‘kuiyen nunak lom’ arlana kapkapek. (Ridi Rom 12:1, 2.) Kom in orekmakin pal se inge in nunku yok la ke sripen kom sie sin Met Lo lun Jeova, efu ku ma inge arlana yok sripe nu sum. Kain in oiya se inge in nunku yok ka fwa kasre kom in akkeye lulalfongi lom ke ma paye su kom lotela. A, ke pal se met asrouki lom elos srike in kufuskomla, kom e fwa ku in sang me top mwomwo ke inkanek pulaik. Kom e fwa pulakin pa oana sie met Kristian fwusr el pula, a el fwak kas inge: “Pal nukewa nga lain me akkoluk lun met asrouki luk, a nga akkalemye nu selos pal nukewa nga tia insese ka a tu na ku in lain me kufusla su elos oru nu sik. Nga akkalemye kalem nu selos la alu luk arlana yok sripe nu sik. Nga nunku ka a aksaokye ma inge pal nukewa, meyen alu luk el yok sripe nu ke ma mwomwo su nga lungse in oru, ke oiyen moul nasnas luk a ke moul luk.”
10 Aok, kom enenu in kafweang yok in tu ku ke ma kom etu la sumwos in oru. (Luk 13:24) A saap kom nunku fwin kafweang lom inge yok sripe. Tusruktu, kom in esam ma inge: Kom fwin mwekin in akkalemye la kom lungse in oru ma sumwos, met saye elos fwa akilen ma inge, a elos e fwa tafwela na in kufuskomla. Tusruktu, kom fwin kaskas nu selos wi pulaik in akkalemye lulalfongi yok lom, kom e fwa lut ka la met asrouki lom elos sa in tui in akkolukye kom.—Srike liye Luk 4:12, 13.
‘Met Lalmetmet Nunku Ke Topuk’
11. Me kasru fuka tuku ke kafweang in sa akola meet liki me akkoluk lun met asrouki sikyak?
11 Siepa inkanek yok sripe in lain me akkoluk lun met asrouki pa in akola. (Ridi Soakas 15:28.) Kalmen kas inge akola pa in nunku ke ma se meet liki oasr oiya su sikyak. Kutupal kom fwin nunku a akola ke sie oiya ku in kasre kom in tulokinye sie ma in tia sikyak. Ke sie me pupulyuk, kom fwin liye sie u lun tulik lutlut wiyom oasr ke sie an a elos orekmakin paip. Ya elos e fwa sot nu sum soko paip? Ke sripen kom akola tari ke oiya se inge, mea kom ku in oru? Soakas 22:3 el akkalemye: “Sie met lalmetmet liye ma koluk, a sifwana mwukla.” Kom ku in fwasr liki me akkoluk lalos kom fwin fwasr ke inkanek saye, elos in tia liye kom. Tia sie inkanek in sangengtot pa inge; a pa inge inkanek mwo in oru.
12. Mea inkanek mwo in sang topuk fwin oasr sie met angon kom?
12 Na fuka kom fwin tia ku in fwasr liki sie oiya oana ma akkalemyeyuk tari? Ke sie me pupulyuk fwin sie tulik lutlut wiyom el lut na paye ka a siyuk sum, “Ya kom srakna sie virgin?” Inkanek mwo in orekmakin pa kas in kasru su oasr in Kolosse 4:6: “Lela kas lomwos in kulang pal e nu kemwa, solela ke sol, tu komwos fwa ku in etu fuka fwal in topuk nu sin kais sie met.” In oana ke ma simusla se inge el akkalemye, inkanek su kom sang topuk nu ke kusensiyuk se inge enenu in fwal nu ke ma sikyak. Paye la kom tia enenu in akuteye me lutlut puspus lun Baibel ka. Saap sie me top fototo a mwo fwal tari. Ke sie me pupulyuk, in sang me top nu ke kusensiyuk san fwin kom srakna virgin, saap kom ku in fwak, “Aok, nga srakna nasnas,” ku, “Ma na luk sifwana pa inge, tia ma lom in etu.”
13. Efu ku lalmetmet eneneyuk in sang me top nu ke kaskas koluk lun sie met asrouki?
13 Jisus el sang met top fototo ke pal puspus ke pal se el liye la wangin sripen fwak ma pukanten ka. Aok, ke pal se Herod el siyuk kusensiyuk sel Jisus, el tia fwak kutena ma. (Luk 23:8, 9) Mwo kom fwin misla na, in tia topuk kusensiyuk puspus. (Soakas 26:4; Ekklisiastis 3:1, 7) Ke luma saye, kom ku in akilen la oasr kutu met su siyuk meyen elos lungse na paye in etu topuk ka, ke sie me pupulyuk ke oiyen moul nasnas, fwinne met se inge ke pal somla el angon kom, a kaskas koluk lain kom. (1 Piter 4:4) Ke oiya se inge, fwal kom in akuteye mwo nunak lom ka fwal nu ke akwuk lun Baibel. Kom fwin enenu in topuk, kom enenu in tia sangeng ku tufwal in oru. Kom in “akola pal nukewa in topuk.”—1 Piter 3:15.
14. Ke kutu oiya, fuka kom ku in oru tu met asrouki lom pa enenu in sang me top a tia kom?
14 Ke kutu oiya, kom ku in oru tu met asrouki pa in sang topuk. Tusruktu, kom enenu in oru ma inge ke inkanek mwo a fwal. Ke sie me pupulyuk, fwin sie tulik lutlut wiyom el kaifwe patok kom in eis soko paip lal, kom ku in fwak. “Mo kulo” a kom ku in fwak pa, “Nga nunku mu kom etu la sismok el koluk nu sum!” Ya kom liye ingena la el pa enenu in topuk a tia kom? Kom tia enenu in akuteye la efu kom tia sismok, met asrouki lom el pa nunku yok ingena ke me top la efu ku el sismok.
15. Ngea pal fwal kom in som liki met asrouki puspus lom su patok kom in oru ma se su tia mwo, a efu?
15 Tusruktu, na fuka fwin me akkoluk srakna oasr fwinne kom srike tari in akwanginyela ma inge? Fwin ma inge sikyak, ma mwo emeet in oru pa kom in som liki met asrouki lom inge. Meyen fwin kom pat in muta yurolos, saap kom e fwa fuleak a wiwi na ma elos lungse in oru. Ke ma inge, mwo kom in kaengla liki oiya inge. Kom fwin oru ma inge kom tia enenu in pulakin mu kom tia kutangla in tu ku. Aok, kom oru sulela mwomwo a elos tia ku in akkolukye kom. Kom tia na oru ma elos lungse kom in oru, a kom oru insien Jeova in engun.—Soakas 27:11.
Orala Akwuk Mwo in Sang Kasru Ka
16. Fuka me kufusla ku in tuku nu sin sie met su fwak mu el sie met Kristian?
16 Ke pal puspus, me kufusla in wi ke orekma tia mwo ku in tuku sin sie met fwusr su fwak mu el sie met kulansap lun Jeova. Ke sie me pupulyuk, na mea fwin kom tuku ke sie toeni su orek sin met fwusr inge a kom liye la wangin met matu we in karungin a liaung tukeni se inge? Na fuka fwin sie met fwusr su ekin mu el sie met Kristian el us me nimnim wain ke sie tukeni a kom a met nukewa su oasr we srakna fwusr a soenna sun yea fwal in nim wain? Oasr oiya puspus su ku in sikyak su kom enenu in orekmakin nunak a ella lom su eis me akpa mwomwo ke Baibel. Sie met Kristian fwusr el fwak: “Nga a tulik mutan wiyuk tuyuk a som liki an se ma kut a kutupa met liye sie movie su orekmakin kain in kaskas koluk a tia fwal. Kutu met fwusr elos sulela in mutana we. Papa a nine kiyesr elos kaksakin kut ke ma kut oru inge. Tusruktu, kutu sin met fwusr ke u lasr elos mulat nu sesr meyen elos mu kut oru elos in tia mwo a koluk.”
17. Fwin kom e wi ke sie toeni, akwuk mwo fuka kom ku in orekmakin in akos masap lun God?
17 In oana ke ma sikyak inge el akkalemye, kom fwin akos nunak a ella lom su fwal nu ke akwuk mwomwo lun Baibel, ma inge ku in oru kom in pulakin ma upa a akmwekinye kom. Tusruktu kom in oru na ma kom lulalfongi mu sumwos a mwo. Kom in akola. Fwin kom e wi ke sie toeni, kom in orala sie akwuk mwomwo tu kom ku in som liki an se inge fwin oasr ma puspus orek we tia fwal nu ke ma kom nunku. Kutu met fwusr a papa a nine kiyelos elos insese ke sie akwuk la fwin oasr ma tia mwo sikyak, tulik natul inge in panglolos ke phone lalos in sruklulak ku uselma folok nu ke loom selos. (Sam 26:4, 5) Paye la kain in akwuk inge ku in sang kasru nu sin met fwusr.—Soakas 21:5.
‘Engun Ke Len in Fwusr Lom’
18, 19. (a) Efu ku kom ku in lulalfongi la Jeova el lungse kom in insemwomwo? (b) Mea pulakin lun God nu selos su lain me akkoluk lun met asrouki lalos?
18 Jeova el orekomla tu kom in ku in engunkin moul lom, a el lungse kom in insemwomwo. (Ridi Ekklisiastis 11:9.) Esam la ma puspus su met asrouki lom elos engunkin pa “engun ke ma koluk ke kitin pal na.” (Hibru 11:25) God paye lasr el lungse kom in engunkin ma mwo liki ma inge. El lungse kom in engun ma patpat. Ke ma inge, fwin oasr me srufwe nu sum in oru ma se su kom etu la koluk ye mutun God, esam la ma Jeova el siyuk sum pa ma mwo emeet nu sum.
19 Oana sie met fwusr, kom enenu in etu a akilen la fwinne met asrouki lom elos engun keim, tokin yea puspus somla saap pus selos fwa tia ku in esam inem. Ke oiya saye, fwin kom lain me kufusla lun met asrouki lom, Jeova el etu ma inge, a el fwa tia mwulkinkomla a oaru lom nu sel el esam ma inge. El fwa “ikasla windo in kosrao nu sumwos, a okoila me insemwomwo nu fwomwos, tu a fwa tia fwal an in eis.” (Malakai 3:10) Sayen ma inge, el sang ku lal nu sum in akfwalye ma enenu nukewa lom. Aok, Jeova God el ku in kasre kom in tu na ku a lain me akkoluk sin met asrouki lom!
Ya Kom Esam?
• Mea me akkoluk lun met asrouki ku in oru nu sin met?
• Fuka lulalfongi fokoko ku in kasru met fwusr in lain me akkoluk lun met asrouki?
• Kom ku in akola fuka tu kom in lain me akkoluk lun met asrouki lom?
• Kom etu fuka la Jeova el aksaokye oiyen oaru lom?
[Petsac ke sra 8]
Efu ku Aron el insese in orala soko calf gold?
[Petsac ke sra 10]
Kom in akola—kom in etu ke pal sa mea kom fwa fwak nu sin met asrouki lom