Su Ku In Molelosla Su Tung A Siyuk ke Kasru?

“O God, sang nununku lom nu sin togusra . . . Tu el a fwa molela met enenu ke el wowoyuk.”​—SAM 72:​1, 12.

1. Ke ma sikyuk nu sel Devid, mea kut ku in lotela ke pakoten lun God?

SIE me akkeye yok ke kas inge nukewa, su simusyukla sel Togusra Devid lun Israel in pal meeta! Yea puspus meet liki el simusla ma inge nukewa, el pulakin asor yok tokin el orek kosro yurol Bat-siba. In pal se, Devid el siyuk sin God: “Fwal nu ke pakoten lulap lom ela ma koluk luk. . . . Ma koluk luk on ye mutuk pal e nu kemwa. . . . Liye! Nga orekla in ku, a in koluk nine kiuk el osweyula.” (Sam 51:​1-5) Ke sripen pakoten yok lal, Jeova el akilen ma koluk su kut usrui.

2. Sam 72 ku in kasre kut fuka?

² Jeova el kalem ke oiya upa su sikyak nu sesr. Tusruktu, oana ma palu fwak, Togusra akmusrala lun God el “fwa molela met enenu ke el wowoyuk, a met sekasrup, su wangin met kasreyel. El a fwa pakomuta met sekasrup a met enenu, a el a fwa molela ngunin met enenu.” (Sam 72:​12, 13) Me kasru e fwa orek fuka? Sam 72 el akkalemye nu sesr la fuka ma inge fwa akpayeye. On soko inge akkalemye ke kolyuk lal Togusra Solomon, mwen natul Devid, a ma simusla ka inge sang me lumala nu ke kolyuk mwomwo lun Mwen nutin God, Jisus Kraist, su a fwa aksukosokyela metu ke me keok nukewa.

Me Srikasrak nu ke Kolyuk lun Kraist

3. Mea Solomon el siyuk ka, a mea God el sang nu sel?

³ Tokin el orala masap in oru Solomon oana sie togusra, Devid el sang nu sel masap a kas in kasru mwomwo a Solomon el akpayeye ma inge nukewa. (1 Togusra 1:​32-35; 2:​1-3) Tok Jeova el sikme nu sel Solomon in sie mwemwe a fwak: “Siyuk ma nga fwa sot nu sum.” Solomon el siyuk ma se na: “Ke ma inge ase nu sin met kulansap lom inse etauk in nununku met sram, tu nga fwa ku in akilen in masrlon ma mwo a ma koluk.” God el long me siyuk lal Solomon, a el sang pa nu sel ma puspus saye su el tia siyuk ka.​—1 Togusra 3:​5, 9-13.

4. Kolyuk lal Solomon akkalemyeyuk fuka sin siepa met kol ke pal lal?

⁴ Ke sripen Jeova el akinsemwomwoye kolyuk lal Solomon paenang oasr pal in misla a moul mwomwo su liyeyuk fwin fwalu su tia sikyuk ke kutena guferment ke kutena pal. (1 Togusra 4:​25) Oasr met puspus su tuku nu yurol Solomon in liye la fuka kolyuk lal, a met kasra lun Siba wekunang met puspus lal elos tuku pa nu yurol. El fwak nu sel Solomon: “Paye kas nga long in fwal sika . . . Tufwu ma inge, tia fwak nu sik ke lalmetmet a kapkapak lom yok liki peng.” (1 Togusra 10:​1, 6, 7) Tusruktu, Jisus el akkalemye lalmetmet yok lukel Solomon, su ku in fwak kas inge kel sifwana: “Liye! sie su yok lukel Solomon oasr inge.”​—Mattu 12:⁠42.

Me Keok Nukewa Wanginla Ye Koko lun Solomon Lulap

5. Mea Sam ak 72 el akkalemye, a me srikasrak mwomwo inge lumeyuk nu ke mea?

⁵ Lela kut in tuni ingena me lutlut mwomwo ke Sam ak 72 in kasre kut in eis etauk ke me insemwomwo puspus ye kolyuk lun Jisus Kraist, su Solomon Lulap. (Ridi Sam 72:​1-4.) Sapta se inge el akkalemye ka la mea pulakin lun Jeova ke “guferment” lun Mwen natul, Jisus Kraist su “Fwisrak in Misla.” (Isaia 9:​6, 7) Ye me kolyuk lun God, Solomon Lulap el fwa ‘sang kasru met sekasrup nukewa, a molela tulik nutin met enenu.’ Ke kolyuk lal e fwa oasr misla yok a ma sumwosmwos. Ke pal se el oasr fwin fwalu, Jisus el akkalemye me srikasrak ke ma mwolana nukewa su fwa akpayeyuk ke lusen Sie Tausan Yea Kolyuk lal.​—Fwakyuk 20:⁠4.

6. Me srikasrak mwomwo fuka Jisus el oru in pal meeta in akkalemye nu ke me insemwomwo puspus ye kolyuk lun Togusrai?

⁶ Loang akmwoye nu ke kutu orekma lun Jisus Kraist su ase nu sesr me pupulyuk ke ma el fwa oru nu sin metu in oana me akpayeyen Sam ak 72. Oasr sripe puspus lasr in sang kaksak nu ke pakoten yok lal nu sin met puspus su keok ka. (Mattu 9:​35, 36; 15:​29-31) Ke sie me pupulyuk, mokul se su musen lepa el sonol Jisus a siyuk: “Kom fwin lungsum, kom ku in aknasnasye yu.” Jisus el topuk: “Nga lungsik. Kom in nasnas.” A mokul sa el kela! (Mark 1:​40-42) Tok, Jisus el osun nu sin mutan katinmas su mwen sefwanna natul el mise. Ke sripen el “pakomutal,” paenang Jisus el fwak nu sel, “Tukakek!” a mwen natul el tukakek. El sifwil moul!​—Luk 7:​11-15.

7, 8. Mea kutu me akpayeye ke ku lun Jisus in akkeye?

⁷ Jeova el sang ku nu sel Jisus in orala mwenmwen puspus. Ma inge akkalemyeyuk ke ma sikyuk nu sin “sie mutan su musen sra ke lusen yea siengoul luo.” El som pa nu yurin ‘met ono puspus tusruktu el srakna keok ke mas lal, a el sisla mani lal nukewa,’ ne ouinge mas lal yokyokelik. Mutan se inge el wi u lulap a kalilye Jisus, kalem la el kunausla Masap meyen el sie mutan su ‘surorla sral.’ (Livitikus 15:​19, 25) Jisus el akilen la oasr ku su som lukel, ke ma inge el siyuk la su kalilye. “Mutan sa, sangeng a rarrar . . . el putati ye mutal, a fwakak ma paye nukewa nu sel.” Aok el etu la Jeova el akkeyela mutan sa, ke ma inge Jisus el akkalemye nu sel kulang a fwak nu sel: “An, lulalfongi lom ore kom in kela. Som in misla, a kela liki me lokwalok lom.”​—Mark 5:​25-27, 30, 33, 34.

⁸ Ku lun Jisus su tuku sin God akkeyela met mas a ma inge sang pa kasru na yok nu sin met nukewa su liye. Ke sie me pupulyuk, wangin alolo ka la met puspus elos kaksakunul Jisus ke pal se elos liyel akkeyela metu meet liki Me Sramsram lal Fwin Eol a. (Luk 6:​17-19) Ke Jon Baptais el supala met tutafpo luo lal in suk ke me akpayeye la Jisus pa Messaia, elos konealak ‘akkeyela met puspus liki mas a me lokwalok a ngun fokfok a el sang liyaten nu sin met puspus su kun.’ Ke ma inge Jisus el fwak nu sin met luo inge: “Fwakak nu sel Jon ma komtal liye a long: met kun elos liye, met ul elos fwasr, met leper elos aknasnasyeyukla, a met silongkas long, met mise elos akmoulyeyukyak, a mwo sasu lutiyuk nu sin met sikasrup.” (Luk 7:​19-22) Kas inge akkeyel na paye Jon!

9. Mwenmwen lun Jisus el me srikasrak nu ke mea?

⁹ Paye, me kasru su Jisus el oru in aksukosokyela metu liki me keok ke pal se el oasr fwin fwalu el ma na nu ke kitin pal. Met nukewa su el akkeyela a akmoulyeyak tok elos mise. Ne ouinge, mwenmwen su Jisus el oru ke pal se el oasr fwin fwalu el me srikasrak nu ke moul mwomwo su wangin me keok su metu fwa engunkin ye koko lun Messaia.

Sie Paredais Fwin Fwalu Nufon Apkuran!

10, 11. (a) Putaka me insemwomwo puspus lun Togusrai fwa oan? A kolyuk lun Jisus el oana mea? (b) Su fwa welul Kraist ke Paredais, a fuka el fwa ku in moul ma patpat?

¹⁰ Srike lumala ke nunak loman ke moul mwomwo su fwa sikyak ke Paredais fwin fwalu. (Ridi Sam 72:​5-9.) Met nukewa su alu nu sin God paye mukefwanna elos fwa engunkin moul ke Paredais len nukewa, aok, nu tok ma patpat! Togusra Jisus Kraist el fwa akpayeye la el me akkeye, ‘oana af fwin maa, oana af aksroksrokye fwalu.’

¹¹ Ke kom lumala ke nunak lom me akpayeyen sam inge, ya insiom tia mokleyuk ke fwinsrak in moul ma patpat ke sie paredais fwin fwalu? Paye la met koluk se su sripsripyuk ke sak soko el arlana engun ke Jisus el fwak nu sel: “Kom fwa muta yuruk in Paredais.” (Luk 23:​43) Ke lusen Sie Tausan Yea Kolyuk lun Jisus, mokul se inge fwa sifwil moulyuk. Fwin el akpusiselyel sifwana ke kolyuk lun Kraist, el fwa ku in moul ma patpat fwin fwalu ke sie mano fokoko a insemwomwo.

12. Ke lusen Sie Tausan Yea Kolyuk lun Kraist, kain in pal fuka fwa ikasla nu sin met sesumwos su akmoulyeyukyak we?

¹² Ye Kolyuk lun Solomon Lulap, Jisus Kraist, “met sumwosmwos elos fwa kapkapak.” (Sam 72:⁠7) Lungse lun Kraist a me karungin lal fwa pulakinyuk yen nukewa, oana ke pal se ma el oasr fwin fwalu. Ke fwal sasu su God el mwulela ka, fwinne “met sesumwos” su akmoulyeyukyak we fwa sang pal mwomwo in akfwalye moul lalos fwal nu ke akwuk nukewa lun Jeova a moul. (Orekma 24:​15) Aok, met nukewa su srunga in akfwalye orekma lal in fwal nu ke masap nukewa lun God fwa tia lela in tafwela in moul a akkolukye misla ke fwal sasu.

13. Fuka lupan kolyuk lun Togusrai? A efu ku misla ka fwa tia ku in wanginla fwinne ke kitin pal?

¹³ Kolyuk lun Solomon Lulap fwin fwalu nufon el akkalemye ke kas inge: “El a fwa ouyepa leum liki mwea nu ke mwea, a liki Infwal [Euphrates], nu ke saflaiyen fwalu. Elos su muta yen mesis fwa epas ye mutal, a met lokwalok lal elos fwa loala kutkut.” (Sam 72:​8, 9) Aok, Jisus Kraist el fwa oru kolyuk lal fwin fwalu nufon. (Zekaraia 9:​9, 10) Met nukewa su akilen a aksaokye kolyuk lal a me insemwomwo ka fwa “epasr ye mutal” in akpusiselyelos ke inse mulalla. Ke inkanek saye, met orekma koluk nukewa su srunga in auliyuk fwa mise, fwinne el sun “yea siefok matwe.” (Isaia 65:​20) Elos “fwa loala kutkut.”

Jisus el Kulang a Etu Pulakin Lasr

14, 15. Kut etu fuka la Jisus el etu ke pulakin a nunak lun metu a “fwa molela met enenu ke elos wowoyuk” ke kasru?

¹⁴ Met sesumwos elos pakomuta a pulakin keok a asor a enenu na paye me kasru. Tusruktu oasr fwinsrak lasr. (Ridi Sam 72:​12-14.) Jisus, Solomon Lulap el pakomutasr meyen el etu la kut met sesumwos. Yok liki nukewa, Jisus el keok ke ma sumwosmwos, a God el lela elan sun me sifwe nu sel sifwana. Aok, Jisus el pulakin keok upa tu “fiyol ekla oana tulin sra lulap su putatla nu in foko”! (Luk 22:​44) Tok, fwin sak soko, el wowoyuk a fwak: “God luk, God luk, efu kom ku fwasr liki yu?” (Mattu 27:​45, 46) Fwinne el sun me keok puspus, a fwinne Setan el oru ma nukewa elan forla liki Jeova, Jisus el akpayeye la el oaru nu sin Jeova God.

¹⁵ Kut ku in lulalfongi la Jisus el etu keok lasr a “fwa molela met enenu ke el wowoyuk, a met sekasrup, su wangin met kasreyel.” Ke sripen el lungse a nunku ke met puspus oana Papa tumal, Jisus el fwa ‘long elos su enenu’ a el fwa ‘akmwoyelos su musalla insielos, a puela kinet kelos.’ (Sam 69:33; 147:⁠3) Jisus el ku in ‘pakomutasr ke sripen el etu me munas lasr,’ meyen el “sie su srifweyuk tari in ma nukewa oana kut.” (Hibru 4:​15) Sie me insemwomwo yok in etu la Togusra Jisus Kraist el oru kolyuk lal ingena in kosrao a el lungse na paye in kasru metu ke el a aksafyela me keok lalos!

16. Efu ku Solomon el etu pulakin lun metu su oasr ye koko lal?

¹⁶ Ke sripen oasr yurol etauk, liyaten a lalmetmet, pasis Solomon el “pakomuta met sekasrup a met enenu.” El etu ma inge meyen oasr ma sikyak puspus ke moul lal su ku in oru elan asor ka. Mokul se wiyel su pangpang Amnon el sruinkui mutan wiyel su pangpang Tamar, a Absalom, mokul se wiyel Solomon el unilye Amnon ke sripen ma koluk su el oru. (2 Samuel 13:​1, 14, 28, 29) Absalom el lungse pa in eis tron lal Devid, tusruktu akwuk koluk lal tia eis kutangla ka, a el anwuki sel Joab. (2 Samuel 15:​10, 14; 18:​9, 14) Tok, siepa sin mokul wiyel Solomon su pangpang Adonaija el srike pa in oral sifwana oana sie togusra. Fwin mokul se wiyel inge el akpayeye akwuk koluk lal, a ma inge ku in oru Solomon elan mise meyen Adonaija el fwa unilye. (1 Togusra 1:⁠5) Aok Solomon el kalem ke me keok lun metu, a ma inge kalem ke ma el fwak ke pre lal ke pal in kisekin temple lun Jeova. Togusra se inge el pre ke met nukewa su muta ye kolyuk lal: “Kais sie selos etu me lokwalok lal sifwana a asor lal sifwana . . . Kom [Jeova] a nunak munas, a oru nu sin kais sie met fwal nu ke inkanek lal nu kemwa.”​—2 Kronikel 6:​29, 30.

17, 18. Me asor yok fuka kutu sin met kulansap lun God elos enenu in muteng ka? A mea kasrelos in muteng ka?

¹⁷ ‘Asor yok lasr’ ku in sikyak nu sesr ke sripen ma koluk su sikyak ke moul lasr in pal somla. Mary,a sie Met Lo lun Jeova su yea 30 kutu matwe, el simusla: “Oasr sripe mwomwo luk in insemwomwo, tusruktu ma koluk su sikyak nu sik in pal meeta oru ngan pulakin mwekin ka a in srunga moul luk. Ke sripe se inge nga pulakin asor yok, a nga tung, meyen ma inge oana sikyak ekea na. Oiya inge oan ke nunak luk a srakna oru ngan pulakin mu wangin sripen moul luk a nga pula la oasr ma koluk nga orala.”

¹⁸ Oasr met kulansap lun God ke pal inge elos pulakin pa ouinge. Tusruktu mea ku in kasrelos in sang nu selos ku su eneneyuk in muteng ka? Mary el fwak: “Met kawuk paye, a sister a brother puspus ke congregation elos oru ngan pulakin insemwomwo. Nga kafweang pa in loang akmwoye ke ma Jeova el mwulela ke pal fwasru, a nga lulalfongi na paye la tung a sroninmutuk in siyuk ke kasru e fwa ekla sroninmutuk ke sripen nga arlana engun.” (Sam 126:⁠5) Kut enenu in filiye fwinsrak lasr ke akwuk lun God ke el orekmakin Mwen natul, met Kol se su el srusrngiye. Oasr kas in palu kel ouinge: “El a fwa pakomuta met sekasrup a met enenu, a el a fwa molela ngunin met enenu. El a fwa molela ngunalos liki kemkatu a silolel, a a fwa saok sralos ye mutal.” (Sam 72:​13, 14) Sie kas in mwulela mwomwo pa inge!

Me Insemwomwo Puspus Sane Kut ke Fwal Sasu

19, 20. (a) In oana ke ma akkalemyeyuk in Sam 72, ma upa fuka e fwa wanginla ye koko lun Togusrai? (b) Kut enenu in kaksakin su ke sripen kolyuk mwomwo lun Kraist, a mea kom pulakin a nunku ke ma togusrai se inge fwa akpayeyuk?

¹⁹ Aok kut in sifwilpa srike in lumala ke nunak lasr ke met sumwosmwos su oasr tari ke akwuk sasu lun God ye koko lun Solomon Lulap. God el mwulela: “A fwa pus korn fwin fwalu fwin mangon eola, fwakolos fwa mukuikui.” (Sam 72:​16) Ke sripen korn su lumeyuk nu ke me mongo oana rice ku kain in fute ke fwokin saku el tia tuku fwin eolu, paenang kas inge akkalemye kalem la e fwa oasr me mongo arlana pukanten fwin fwalu. Mongo su fwa kosrani e fwa “oana Lebanon,” sie an in pal meeta su metu elos eis a kosrani fwokin saku su arlana pus ke pal in kolyuk lal Solomon. Paye la, wanginla met e fwa fwak la wangin mongo nelos, wanginla kutena met fwa srikla mongo nel, wanginla met e fwa musrinsral! Met nukewa fwa engunkin “kofwo in ma fwat.”​—Isaia 25:​6-8; 35:​1, 2.

²⁰ Mwolana a kaksak fwal in akkalemyeyuk nu sin su ke sripen me insemwomwo nukewa inge? Aok nu sin Jeova God, su Togusra Ma Patpat lasr, a Met Kol lun kosrao a fwalu nufon. Ke kas in pupulyuk, kut nukewa e fwa wi pa akkalemye kas mwomwo ke saflaiyen soko on mwolana inge: “El [inen Togusra Jisus Kraist] a fwa on ma patpat; el a fwa on pat oana fwatu, a met elos fwa akinsemwomwoyeyuk in el; mutanfwal nukewa elos fwa fwak tu el insemwomwo. Jeova God, God lun Israel lan kaksakinyuk, su mukena orala ma sakuruk. A el mwolana, in kaksakinyuk ma patpat; a lela fwalu nufon in tingtingi ke mwolana lal. Amen a Amen.”​—Sam 72:​17-19.

[Footnote]

Kom E Topuk Fuka?

• Sam 72 el akkalemye ke kas palu su lumeyuk nu ke mea?

• Su Solomon Lulap, a mea lupan kolyuk lal?

• Mea kom lungse na paye ke me insemwomwo puspus su palyeyuk in Sam 72?

[Caption on page 17]

Moul mwomwo ye koko lal Solomon el lumeyuk nu ke mea?

[Caption on page 20]

Arlana yok sripe in kafweang in eis moul ke Paredais ye koko lun Solomon Lulap