Lela “Masap lun Lung Kulang” in Karungin Loam
“El ikasla oalul ke lalmetmet, a masap lun kulang on fwin loal.”—SOAKAS 31:26.
1, 2. (a) Oiya mwomwo fuka met kulansap lun Jeova elos enenu in akkeye? (b) Mea fwa lutlutkinyuk ke me lutlut se inge?
KAS mwomwo su Togusra Lemuel in pal meeta el eis sin nine kiyel el akkalemye pa ke oiya mwomwo su eneneyuk nu sin sie mutan payuk mwo. Pa inge kas mwomwo su fwakyuk nu sel: “El ikasla oalul ke lalmetmet, a masap lun kulang on fwin loal.” (Soakas 31:1, 10, 26) Sie mutan lalmetmet a met nukewa saye su lungse in akinsemwomwoye Jeova God elos enenu orekmakin loalos in kaskaskin kas mwomwo su akkalemye lung kulang. (Ridi Soakas 19:22.) Lung kulang enenu in arlana kalem ke kas lun met nukewa su wi ke alu paye.
2 Mea se inge lung kulang? Nu sin su oiya se inge enenu in akkalemyeyuk? Mea ku in kasre kut in filiye ‘masap lun lung kulang’ ke loasr? Kut fwin oru ma inge, mea oiya inge ku in oru ke sramsram lasr nu sin met in sou lasr a nu sin met lili wiyesr ke congregation?
Lung Kulang el sie Oiya Mwomwo su Akkalemyeyuk ke Sripen Lungse Paye
3, 4. (a) Mea se inge lung kulang? (b) Ke oiya fuka lung kulang el tia oana sie ke kulang lun metu?
3 In oana ke kas se inge akkalemye, lung kulang el kalmekin nu ke lungse a kulang. Aok kulang eneneyuk nu ka, kalme pa in akkalemye insemwomwo a nunak mwomwo nu sin met puspus in kasrelos ke orekma a ke kas mwomwo. Ke sripen lungse eneneyuk pa nu ke oiyen lung kulang in akkalemye nunak mwomwo ke met puspus ke sripen lungse nu selos. Tusruktu, kas in pal meeta su lungasyukla nu ke lung kulang oasr kalme saye liki oiya kulang su tuku ke lungse. Orekma mwo in akkalemye lung kulang el kalmekin nu ke kulang su orek ke inse mulala a oaru nu sin sie met nu ke pal ma inge akpayeyuk.
4 Oasr siepa oiya su lung kulang el tia oana sie ke kulang. Kulang lun metu ku in akkalemyeyuk nu sin met nukewa wekunang met sa puspus. Met sap Poul a met 275 saye su oasr ke oak soko su musalla in mwea elos pulakin kain in kulang inge sin met su muta ke tuka lun Malta, kain in met su elos tia etu. (Orekma 27:37–28:2) Ke luma saye, lung kulang akkalemyeyuk sin met puspus su etu tari sie sin sie a oasr tari fototo mwomwo lalos nu sin sie sin sie.a Pa inge ma met Ken elos akkalemye nu sin “tulik natul Israel nukewa, ke elos utyuk liki an Ijipt.”—1 Samuel 15:6.
Orekma in Sifwilpa Nunku Yok a Pre Arlana Yok Sripe
5. Mea ku in kasre kut in kutongye loasr?
5 Tia fusrasr in akkalemye lung kulang ke kaskas lasr. Met tuma lutlut Jemes el akkalemye ke loa, el simusla ouinge: “Wangin met ku in akmunaye loa. El sie ma koluklanu su tia okaki a tingtinginu ke me mise.” (Jemes 3:8) Mea ku in kasre kut in sruokye laan manosr inge su arlana upa in kutongye? Kas lun Jisus nu sin met kol puspus lun alu in pal meeta akkalemye nu sesr kalem ka. El fwak: “Tu oalu kaskas ke ma puspus su on insie.” (Mattu 12:34) Kut fwin lungse in akkalemye lung kulang ke kas lasr, kut enenu in kafweang yok tu oiya mwomwo in oan ke insiesr. Lela kut in liye la fuka orekma lasr in sifwilpa nunku yok a pre ku in kasre kut in oru ma inge.
6. Efu ku kut enenu in engun in sifwilpa nunku yok ke orekma mwomwo lun Jeova ke lung kulang?
6 Baibel el akkalemye la Jeova God el “yoklana ke lung kulang.” (Exodus 34:6) Met sim lun sam el akkalemye kas inge: “Fwalu, O Jeova, tingtingi ke lung kulang lom.” (Sam 119:64) Oasr ma simusla puspus su akkalemye ke inkanek mwo su Jeova el oru lung kulang lal nu sin met puspus su alu nu sel. Kut fwin engun in orekmakin pal lasr in sifwilpa nunku yok ke ‘orekma mwomwo lun Jeova’ ku in oru kut in arlana lungse in akkeye oiya mwomwo se inge.—Ridi Sam 77:12.
7, 8. (a) Jeova el akkalemye fuka lung kulang lal nu sel Lot a sou lal? (b) Mea pulakin lal Devid ke lung kulang lun God nu sel?
7 Ke sie me pupulyuk, nunku ke orekma mwo lun Jeova ke el molela nephew se lal Ebream su pangpang Lot a sou lal ke pal se El kunausla an Sodom, siti se su elos muta ka. Meet liki pal in kunanela siti se inge, oasr lipufan luo su tuku nu yurol Lot elos kaifwel in silaklak in som liki an se inge wekunang sou lal. Baibel el akkalemye la, “a el patla, a met luo inge eltal srukye paul, a poun mutan kiel, a poun an luo natul tu Jeova el kulang nu sel, a eltal kololla a likilye likin siti.” Paye la kut eis me akkeye yok kut fwin sifwilpa nunku ke orekma se inge lun God in molela metu, a kut akilen la God el akkalemye lung kulang lal nu sin met kulansap lal.—Genesis 19:16, 19.
8 Nunku akmwoye pa ke me srikasrak lal Togusra Devid lun an Israel in pal meeta, el akkalemye kas inge ke on soko su el simusla: “[Jeova el] nunak munas ke ma koluk lom kemwa, [el] akkeyela mas nukewa lom.” Aok Devid el arlana engun a lungse na paye in sang kulo nu sin Jeova meyen ma koluk su el oru yurol Bat-siba, God el nunak munas nu sel ka! Ke ma inge el akfulatyel Jeova, a el fwak: “Tu oana fulatan kosrao nu fwalu, ouinge lupan pakoten lal nu selos su sangeng sel.” (Sam 103:3, 11) Kut fwin sifwilpa nunku yok ke ma Simusla nukewa inge ku in akkeye insiesr in sang kulo nu sin Jeova ke lung kulang lal, a kut akkeyeyuk in kaksakunul a in sang kulo nu sel. Kut ku in etawi God paye kut fwin aksaokye a lungse na paye in sang kulo ke orekma mwomwo lun God.—Efesus 5:1.
9. Sripe mwomwo fuka oasr yurin met kulansap nukewa lun Jeova elos in akkalemye lung kulang ke moul lalos len nukewa?
9 Oasr me srikasrak puspus su simusyukla in ma Simusla ke lung kulang lun Jeova nu sin met puspus su oasr tari fototo mwomwo lalos nu sel. Na fuka nu sin met puspus su wangin fototo mwomwo lalos nu sin God moul? Ya Jeova el upa a sekulang nu selos? Mo tia ouinge. “El kulang nu selos su tia kulo a su koluk,” Luk 6:35 el akkalemye. “El oru fwat lal in takak nu fwin met koluk a met mwo, a supamu af nu fwin met sumwos a met sesumwos.” (Mattu 5:45) Meet liki kut eis etauk ke ma paye a orekmakin ma inge, God el akkalemye tari kulang lal nu sesr su el akkalemye pa nu sin met nukewa. Tusruktu, in oana met kulansap lal, kut pulakin lungse paye lal, aok lung kulang lal nu sesr pal nukewa. (Ridi Isaia 54:10.) Kut arlana engun a kulo ka! A pa inge sripe mwomwo kut in akkalemye lung kulang ke kaskas lasr a ke oiya nukewa ke moul lasr!
10. Efu ku pre el sie me kasru su arlana yok sripe in oru lung kulang in oasr ke insiesr a kalem ke moul lasr?
10 Pre el arlana yok sripe in kasre kut in akkeye lung kulang ke moul lasr. Meyen lungse a kulang, oiya luo inge su eneneyuk in akkalemye lung kulang, pa fwako lun ngun mutal lun Jeova. (Galetia 5:22) Kut ku in oru lung kulang in oan ke insiesr kut fwin lela ku lun God in kol kut ke moul lasr. Inkanek mwomwo in eis ku lun God pa in siyuk ka ke inkanek lun pre. (Luk 11:13) Arlana fwal kut in pre a siyuk ke ku lun God pal nukewa a akos kolyuk lun ma inge. Aok, pre a in sifwilpa nunku yok arlana yok sripe kut fwin lungse masap ke lung kulang in kalem ke kas lasr.
Fuka Mokul a Mutan Payuk Elos ku in Akkalemye Lung Kulang Fwin Elos Kaskas nu sin Sie Sin Sie
11. (a) Kut etu fuka la Jeova el lungse mokul elos in akkalemye lung kulang nu sin mutan kiyelos? (b) Ke inkanek fuka masap lun lung kulang ku in kasru sie mokul payuk in karungin loal?
11 Met sap Poul el kaifwe mokul payuk nukewa: “Komwos in lungse mutan kiomwos, oana Kraist el ouyepa lungse surs, a sifwana esalang ka.” (Efesus 5:25) Poul el akesmakinyelos ke ma Jeova el fwak nu sel Adam a If. Met sap se inge el simusla: “Ke sripe se inge sie met fwa likiye papa a nine a fwa fulyung nu sin mutan kiel, a eltal fwa ikwe siefwanna.” (Efesus 5:31) Kalem la, Jeova el lungse mokul payuk in oaru pal nukewa nu sin mutan kiyelos, a akkalemye nu selos lung kulang pal nukewa. Sie mokul su oasr lungse paye yurol el tia akkalemye ma tafongla lun mutan kiel nu sin met puspus ku el tia kaskas kel in akmwekinyel. Aok el insemwomwo in kaksakin mutan kiyel. (Soakas 31:28) Fwin ke kutu sripe oasr ma upa sikyak inmasrlolos, lung kulang ku in kasru mokul elan kutongye loal in tia akmwekinye mutan kiyel ke el kaskas.
12. Kaskas lun sie mutan payuk el akkalemye fuka la masap lun lung kulang oasr ke loal, ku kas lal?
12 Masap lun lung kulang enenu pa in orekmakinyuk nu ke kaskas lun mutan payuk. Kas lal enenu in tia etawi kaskas lun met puspus lun fwalu. Ke sripen el akkalemye ‘sunak yok nu sin mokul tumal,’ el kaskas ke ma mwomwo kel ye mutun met puspus a ma inge ku in sang kasru nu sin met puspus in akyokye sunak lalos nu sin mokul tumal. (Efesus 5:33) El tia akukuin a lain nunak lun mokul tumal ye mutun tulik nukewa natulos a in kasrelos in tia akwanginyela sunak lalos nu sin papa tumalos. El sramsramkin ma el tia insese ka nu sin mokul tumal ke elos mukelana muta. Baibel el akkalemye: “Mutan lalmetmet nu kemwa musaeuk loom sel.” (Soakas 14:1) Loom sel el sie an mwomwo nu sin met nukewa ke sou lal.
13. Nu ke oiya fuka masap lun lung kulang enenu in orekmakinyuk, a ma inge ku in orek fuka?
13 Mokul a mutan payuk elos kafweang in orekmakin loalos ke sie inkanek su akkalemye la elos sunakin sie sin sie fwinne elos na pa muta ke loom selos. Met sap Poul el simusla: “Komwos sisla ma inge nu kemwa, mulat, koskusrok, nunak koluk lain met, kaskas ko, a kas fokfok liki oalumwos.” El fwak pa: “Komwos nukomang, oana met sulosula lun God, mutal a kulu, inse pakoten, kulang, fwokpap, fulpap, mongfusesr. . . . Komwos in nukomang lungse, su me kapur lun sumwosna.” (Kolosse 3:8, 12-14) Fwin tulik elos pala in liye la papa a nine elos akkalemye lung kulang ke elos kaskas nu sin sie sin sie, elos e fwa kapkapek a ku in etawi papa a nine kiyelos ke inkanek su elos kaskas ka.
14. Ke inkanek fuka sifwen sou elos ku in orekmakin loalos in akkeye met in sou lalos?
14 Met sim lun sam el simusla kas mwomwo inge kel Jeova: “Nga siyuk sum, lela lung kulang lom in akparye yu.” (Sam 119:76) Sie inkanek mwomwo su Jeova God el akkeye met lal pa ke el sang nu selos kas in kaifwe a kas in kasru. (Sam 119:105) Sifwen sou nukewa ku in eis me kasru fuka ke me srikasrak lun Papa tumasr in orekmakin loalos in akkeye met nukewa saye su oasr ke me karungin lal? Elos ku in oru ma inge ke elos sang kas in kolyuk a me akkeye nu selos. Aok oasr pal mwomwo lun sifwen sou ke pal in Tukeni Lutlut lun Sou in akkeye met nukewa in sou lal ke elos eis etauk sumwos su oasr in Baibel!—Soakas 24:4.
Akkalemye Lungse Paye nu sin Met Lili
15. Fuka met elder a met lili puspus elos ku in orekmakin loalos in karungin met lili saye ke congregation?
15 Togusra Devid el pre ouinge: “Lela lung kulang lom a paye lom in liyeyuyung pal e nukewa.” (Sam 40:11) Met Kristian elder nukewa a met lili ke congregation elos etawi fuka oiya mwomwo inge lun Jeova? Kut fwin orekmakin loasr in akkalemye kas in kasru su oasr in ma Simusla el sie orekma su akkalemye lung kulang.—Soakas 17:17.
16, 17. Mea kutu inkanek in akkalemye la kut orekmakin masap ke lung kulang nu ke kas lasr?
16 Mea kut enenu in oru kut fwin liye la sie met Kristian wiyesr el oru ma se su lain akwuk fulat lun Baibel? Ya lung kulang fwa oru kut in orekmakin loasr in kafweang in aksumwosyel? (Sam 141:5) Kut fwin etu ke sie ma koluk su orek sin sie met lili wiyesr, lungse paye fwa oru kut in akkeye met orekma koluk inge in ‘suloeni met elder ke congregation’ tu elos in ku in “pre kel a moswella ke oil in en Jeova.” (Jemes 5:14) Fwin met lili su oru ma koluk el tia som nu yurin met elder, a kut tia pa fwakak ma koluk lal nu selos el tia mwo, a kut tia akkalemye lung kulang. Kutu met lili su wi kut saap munasla insielos, asor, elos nunku mu elos tila yok sripe, ku elos tia engun ke sripen me aktoasr puspus. Sie inkanek mwomwo su kut ku in akkalemye masap lun lung kulang pa in orekmakin loasr in “akpulaikyelos su munas inse,” ku orekmakin kas mwomwo in akkeyelos.—1 Tessalonika 5:14.
17 Oiya fuka kut fwa akkalemye fwin oasr kas in lesrik ke met lili wiyesr su kut long sin met lokwalok lun God? Kut fwa tia akkalemye nunak luo ke paye a oaru lun met lili wiyesr, a kut enenu in pulesr kain in sramsram inge, ku kut ku in siyuk sin met se su fwak kas in lesrik inge fwin paye a el etu na paye sripe paenang el fwak kas inge. Fwin met lokwalok lun God elos suk inkanek in etu la piya met Kristian wiyesr tu elos in ku in akkolukyelos, lungse paye lasr nu sin met lili wiyesr fwa oru kut in tia tukakinelos.—Soakas 18:24.
Met lun “Lung Kulang Fwa Koneak Moul”
18, 19. Efu ku kut enenu in orekmakin pal nukewa masap ke lung kulang nu ke orekma lasr nu sin met lili wiyesr?
18 Lungse paye enenu in kalem ke orekma nukewa lasr nu sin met lili wiyesr su alu pa nu sin Jeova. Masap lun lung kulang enenu in oasr ke loasr pal nukewa, fwinne kut oasr ke ma upa puspus. Ke pal se lung kulang lun tulik nutin Israel nukewa ekla ‘oana aunfong su sa in wanginla,’ Jeova el tia insemwomwo ka. (Hosia 6:4, 6) Ke luma saye, Jeova el insemwomwo kut fwin akkalemye lung kulang pal nukewa. Nunku akmwoye la fuka el akinsemwomwoye met nukewa su kafweang in orekmakin oiya se inge ke moul lalos.
19 Soakas 21:21 el akkalemye: “El su fwasr tokin sumwosmwos a [lung] kulang konoiyuk moul, sumwosmwos, a sunak.” Met su oru ma inge fwa eis me insemwomwo puspus a el fwa koneak moul, tia ke kitin pal na tusruktu moul ma patpat a wangin saflaiye. Jeova el fwa kasrel in “srukye moul ma patpat su moul paye.” (1 Timote 6:12, 19) Ke ma inge, ke oiya nukewa lela kut in akpayeye ‘lung kulang nu sin sie sin sie.’—Zekaraia 7:9.
[Footnote]
a Ke kutupa me akuteye la fuka lung kulang el tia oana sie ke oaru, lungse, a kulang, srike liye November 1, 2002, Tauer in San, sra 20-21, 26-27.
Ya Kom Ku In Akuteye?
• Kom akuteye fuka lung kulang?
• Mea fwa kasre kut in orekmakin ke kas lasr masap lun lung kulang?
• Fuka mokul a mutan payuk elos akkalemye lungse paye ke kas lalos?
• Mea akkalemye la masap lun lung kulang oasr ke loasr ke orekma lasr nu sin met lili wiyesr?
[Caption on page 13]
Devid el akfulatye lung kulang lun Jeova
[Caption on page 14]
Ya oasr akwuk lom ke Tukeni Lutlut lun Sou ke eku in orek pal nukewa?