Akkeye Oiyen Pre Lom ke Inkanek in Lutlut Baibel
“O Leum, nga siyuk sum, lela srem in porongo inge pre lun met kulansap lom.”—NIEMAIA 1:11.
1, 2. Efu ku arlana yok sripe in nunku akmwoye ke kutu pre su simusyukla in Baibel?
PRE a lutlut Baibel pa orekma saok nu ke alu paye. (1 Tessalonika 5:17; 2 Timote 3:16, 17) Aok, Baibel el tia sie buk su oasr pre puspus ka su orekmakinyuk ke alu. Tusruktu, oasr pre puspus ka wekunang ma puspus su koneyukyak ke buk lun Sam.
2 Ke kom rid a lutlutkin Baibel, saap kom lungse in liye a ridi pre su fwal nu ke luma a ma sikyuk ke moul lom. Ke ma paye, kom fwin orekmakin pa kas mwomwo su simusyukla ke Baibel ku in sang kasru in akmwoye pre lom. Mea kom ku in lotela ke pre lun met puspus su God el topuk me siyuk lalos ke kasru a ke koanon pre lalos?
Suk a Akos Kolyuk lun God
3, 4. Mea met kulansap lal Ebream el enenu in oru? A mea kut ku in lotela ke me top mwomwo su Jeova el sang?
3 Ke lutlut lom ke Baibel, kom lotela la kom enenu in pre pal nukewa nu ke kolyuk lun God. Nunku ke ma sikyuk ke pal se Ebream el supwela met kulansap matou emeet lal pangpang Iliezar nu in an Mesopotamia in suk sie mutan su sangeng sin God in payuk nu sel Isaak. Ke pal se el liye sie mutan el ut kof ke sie luf, met kulansap el pre: “Jeova . . . , lela tu ma inge in te oru, tu mutan fwusr se su nga fwa fwak nu sel, ‘Filiye me ut kof lom, nga siyuk sum, tu nga in nim,’ a el a fwa fwak, ‘Numla, a nga fwa ouyepa sang nu sin kamel nutum in nim,’ lela mutan sa na tu lan mutan se su kom pakiye nu sel Isaak, met kulansap lom; a ke ma inge nga fwa etu tu kom fwakak kulang nu sin leum luk.”—Genesis 24:12-14.
4 Pre lun met kulansap lal Ebream topukyuk ke pal se Rebeka el sang kof nimen kamel puspus natul. Tia pat tok el welul som nu Kenan a el payukyak nu sel Isaak. Aok, ke pal inge kom etu la God el fwa tia akkalemye nu sum me akul ke me top lal ke pre lom oana ma el oru in pal meeta. Tusruktu, el fwa kol kom ke moul lom kom fwin pre a kom fwin lungse ku lal in kol moul lom.—Galetia 5:18.
Pre el Kasru in Aksrikye Fosrnga
5, 6. Mea yok ke pre lal Jekob ke pal se el apkuran in osun nu sel Iso?
5 Pre ku in aksrikye fosrnga. Sangeng ke me sensen su tuku sel Iso, fak se wiel, Jekob el pre: “O Jeova, . . . Nga kupansumwol nu ke ma srik ke kulang nukewa, a paye nukewa, su kom fwakak nu sin met kulansap lom . . . Moliyula, nga siyuk sum, liki poun ma lik, liki paul Iso, tu nga sangeng sel, saap el tuku, uniyuwi, a nine wi tulik. A kom fwak, nu sik ‘Paye Nga fwa oru ma mwo nu sum, a oru fute lom in oana puk mweanu, su tia ku in oekyukla tu pus.’”—Genesis 32:9-12.
6 Paye la Jekob el oru inkanek in tulokinye fos, a pre lal topukyuk ke pal se el a Iso sifwilpa akmwoyelosla. (Genesis 33:1-4) Rid akmwoye pre inge, a kom fwa liye la Jekob el tia pre siyuk ke me kasru mukena. El akkalemye lulalfongi ke Fute se su mwulela ka a kulo ke lungkulang lun God. Ya kom pulakin pa “sangeng ka”? (2 Korint 7:5) Fwin ouinge, me siyuk lal Jekob ku in akesmakinye kom la pre ku in aksrikyela fosrnga. Tusruktu, ma inge enenu in tia oasr ke me siyuk mukena a ouyepa me akkalemye lun lulalfongi.
Pre ke Lalmetmet
7. Efu ku Moses el pre ke etauk ke inkanek puspus lun Jeova?
7 Kena yok in akinsemwomwoye Jeova enenu in mokle kom in pre ke lalmetmet. Moses el pre ke etauk ke inkanek puspus lun God. “Liye,” el siyuk, “kom [Jeova] el fwak nu sik, ‘Wisak met inge [liki an Ijipt]’ . . . Ke ma inge, nga siyuk sum, nga fwin liye kulang ye mutom, luti nu sik inge inkanek lom, . . . tu nga fwa ku in liye kulang ye mutom.” (Exodus 33:12, 13) In akkalemye me top lal, God el sang nu sel Moses etauk yok ke inkanek puspus Lal, sie me enenu fwin el lungse in oru me kolyuk inmasrlon met kulansap lun Jeova.
8. Fuka kom ku in eis ma lane su tuku ke kom sifwilpa nunku ke ma simusla in 1 Togusra 3:7-14?
8 Devid el pre pa: “Fwakak inkanek lom nu sik, O Jeova.” (Sam 25:4) Tulik natul Devid el pa Solomon el siyuk sin God ke lalmetmet su eneneyuk in akpayeye kunokon lun togusra in an Israel. Pre lal Solomon akinsemwomwoye Jeova, su sang nu sel tia ma el siyuk mukena a oayepa me kasrup a mwolana. (Ridi 1 Togusra 3:7-14.) Fwin itukot nu sum kunokon ke congregation su upala nu sum, pre ke lalmetmet a akkalemye oiyen pusisel. Na God el fwa kasre kom in eis etauk a kasre kom in orekmakin lalmetmet su eneneyuk in karungin kunokon lom ke sie inkanek mwo a in lungse.
Pre Su Tuku ke Insie
9, 10. Mea kom liye mu arlana yok sripe ke Solomon el sramsramkin insie ke pre lal ke pal in kisekin tempel?
9 Tu God el long pre lasr, ma inge enenu in ma tuku ke insie. Solomon el akkalemye pre ke inse paye, simusyukla in 1 Togusra sapta 8, ye mutun met puspus su tukeni nu sie in an Jerusalem ke pal in kisekin tempel lun Jeova in yea 1026 B.C.E. Tokin tuptup in mwuleang filiyuki nu ke infwokil Mutal na Mutal a pukunyeng lun Jeova nekla tempel, Solomon el kaksakin God.
10 Kafweang in lutlutkin pre lal Solomon, a loang ke el sramsramkin ke insie ke pal puspus. Solomon el akilen la Jeova mukena etu insien sie met. (1 Togusra 8:38, 39) Pre sepana inge el akkalemye la oasr fwinsrak nu sin sie met koluk su ‘forla nu sin God ke insiel kemwa.’ Fwin met lokwalok el sruokye met lun God, me siyuk lalos fwa longyuk fwin insielos sumwos na yurin Jeova. (1 Togusra 8:48, 58, 61) Ke ma inge, paye la, pre lom enenu in ma tuku ke insie.
Fuka Buk lun Sam Ku In Akmwoye Pre Lom
11, 12. Mea kom ku in lotela ke pre lun sie met Livai su tia ku in som nu ke tempel lun God ke sie pal?
11 In lutlutkin buk lun Sam ku in akmwoye pre lom a kasre kom in fwinsrak in God in sang me top ke ma inge nukewa. Loang akmwoye nu ke mongfusesr lun sie met Livai ke pal se el muta fwin an saye oana met sruo. Fwinne el kofla som nu ke tempel lun Jeova ke sie pal, el on: “Efu kom ku sumwoli ke toasr, O ngunik, a efu kom ku tia misla insiuk? Kom fwinsrak in God, tu nga a fwa kaksakunul pa, su moul lun mutuk a God luk.”—Sam 42:5, 11; 43:5.
12 Mea kom ku in lotela sin met Livai se inge? Fwin kom filiyuki ke nien kalpous ke sripen kom oru ma sumwosmwos, a ke sripe se inge paenang kom tia ku in wi met lili puspus ke an in alu ke lusen sie pal, ke ma inge kom in muteng in sano God lan kasre kom. (Sam 37:5) Sifwilpa nunku ke engun yok lom su kom pulakin ke orekma in kulansap lom nu sin God, a pre siyuk in kasre kom in muteng ke kom “fwinsrak in God” in sifwilpa oru kom in engunkin asrouki mwomwo yurin met kulansap nukewa lal.
Pre ke Lulalfongi
13. In fwal nu ke Jemes 1:5-8, efu ku kom enenu in pre wi lulalfongi?
13 Kom in pre pal nukewa wi lulalfongi ke oiya nukewa su sikyak nu sum. Fwin oasr me srifwe nu ke oiyen oaru lom, kom in akos kas in kasru lun met tuma lutlut Jemes. Forla nu sin Jeova ke pre, a nik kom alolo ka la el ku in sot nu sum lalmetmet su kom enenu in muteng ke kutena me srifwe. (Ridi Jemes 1:5-8.) God el etu ma upa puspus su sun kom, a el ku in kasre kom a akpwarye kom ke inkanek lun ngun mutal lal. Akkalemye nunak a pulakin lom nu sel wi lulalfongi yok, a “tia alolo,” eis me kolyuk lun ngun mutal lal a kas in kasru ke Kas lal.
14, 15. Efu kut ku in fwak la Hanna el pre a orekma wi lulalfongi?
14 Hanna, sie sin mutan kiyel Elkana sie met Livai, el pre a orekma wi lulalfongi. Mutan saye kiyel su pangpang Penina su oasr tulik pukanten natul el anglol Hanna meyen wangin tulik natul. Ke imwen aktuktuk, Hanna el fulak ka mu fwin el oswela sie mwen, el fwa esalang nu sin Jeova. Ke sripen ngoasrol mukena mukuikui ke pal se el pre, met Tol Fulat se inge Ilai el nunku mu el srui. Ke pal se Ilai el etauk la tia paye ma el nunku kel, paenang el fwak: “God lun Israel asot me siyuk lom.” Fwinne Hanna el tia etu fwin pre lal fwa topukyuk ku tia, tusruktu el lulalfongi yok la pre lal fwa topukyuk. Ke ma inge, “mutal tia sifwil toasr.” Aok el tila asor ku el pulakin mu wangin fwinsrak lal.—1 Samuel 1:9-18.
15 Tokin Samuel el isusla a liktitla, Hanna el akkalemyel nu sin Jeova in oru orekma in kulansap nu sel ke tempel. (1 Samuel 1:19-28) Kom fwin eis pal lom in sifwilpa nunku yok ke pre lal Hanna in pal san, ma inge ku in sang kasru nu ke pre lom sifwana. A ma inge ku in kasre kom in liye la asor yok lom su tuku ke ma upa yok ku in wanginla kom fwin pre wi lulalfongi la Jeova el fwa topuk pre lom.—1 Samuel 2:1-10.
16, 17. Mea sikyak ke sripen Niemaia el pre a orekma wi lulalfongi?
16 Met sumwosmwos se inge Niemaia su moul in century aklimekosr B.C.E. el pre a orekma pa wi lulalfongi. El siyuk ouinge: “O Leum, nga siyuk sum, lela srem in porongo inge pre lun met kulansap lom, su engun in sangeng ke em; a akkapkapye yu, met kulansap lom, misenge, nga siyuk sum, a sang nu sel kulang ye mutun met se inge.” Su “met se inge”? Met se inge pa Togusra Artaxerxes lun an Persia, su Niemaia el kulansap nu sel oana met sang ma nimen togusra.—Niemaia 1:11.
17 Niemaia el pre wi lulalfongi ke lusen len puspus tokin el lotela la met Ju su aksukosokyeyukla liki sruo fwin an Babulon “elos muta in keok lulap a angonkas; oayepa pot lun Jerusalem mogukla.” (Niemaia 1:3, 4) Pre lal Niemaia topukyuk ke inkanek yok ke pal se Togusra Artaxerxes el lela elan som nu Jerusalem in sifwil musaela pot ka. (Niemaia 2:1-8) Tia pat pot lun Jerusalem el sifwil musaela. Pre lal Niemaia el topukyuk meyen elos nunku yok ke alu paye a elos orekma fwal nu ke lulalfongi yok lalos. Ya ma inge paye pa ke pre lasr?
Esam ke Kas in Kaksak a in Sang Kulo
18, 19. Ke sripe puspus fuka sie met kulansap lun Jeova el enenu in kaksakunul a sang kulo nu sel?
18 Ke kut pre, lela kut in esam in kaksakin a sang kulo nu sin Jeova. Oasr sripe mwomwo puspus kut ku in oru ma inge! Ke sie me pupulyuk, Devid el lungse na paye in akfulatye kolyuk lun Jeova. (Ridi Sam 145:10-13.) Ya pre lom akkalemye la kom aksaokye kunokon lom in sulkakin Togusrai lun Jeova? Kas lun met sim lun sam ku in kasre kom in fwakak nu sin God ke kom pre nu sel ke kulo lom ke meeting nukewa lun congregation, assembly nukewa, a toeni lulap.—Sam 27:4; 122:1.
19 Kulo wi kas in kaksak lom nu ke fototo mwomwo lom nu sin God ku in akkeye kom in pre ke insiom wi nunak ouinge: “Nga fwa sot kulo nu sum, O Jeova, in masrlon metu, nga fwa on in kaksakin kom inmasrlon mutanfwalu. Tu lungkulang lom yok a sun in kosrao, a paye lom sun yen engyengu. Kom in akfulatyeyuk, O God, liki kosrao; lela mwolana lom in on fwin fwalu na fon.” (Sam 57:9-11) Paye la kain in nunak inge arlana mwo! Ya kom tia insese ka la kain in kas mwomwo inge su tuku ke buk lun Sam ku in sang kasru a akkeye pre lom?
Pre nu sin God Wi Sunak Yok
20. Mary el akkalemye fuka lungse yok lal nu sin God?
20 Sunak yok nu sin God enenu in arlana kalem ke pre lom. Kas mwomwo lal Mary wi sunak yok lal nu sin God tokin el lotela la el fwa ekla nine kiyen Messaia oana ke kas lal Hanna ke pal se el akkalemyel Samuel nu sin God ke tempel. Sunak yok lal Mary nu sin God el arlana kalem ke kas lal inge: “Ngunik kaksakin Leum, a ngunik engun in God met Lango luk.” (Luk 1:46, 47) Ya kom ku in akmwoye pre lom ke kom etawi a orekmakin kas mwomwo ke fus inge? Pa inge sripe paenang God el sulela Mary elan pa nine kiyen Jisus su pangpang Messaia!
21. Fuka pre lun Jisus sang me akpayeye ke sunak a lulalfongi lal?
21 Jisus el kafweang in pre wi lulalfongi yok lal. Ke sie me pupulyuk, meet liki el akmoulyelak Lazarus, “Jisus el ngetak, a fwak: ‘Papa, Nga sot kulo nu sum tu kom long yu. A Nga etu tu kom long yu pal e nukewa.’” (Jon 11:41, 42) Ya kalem pa ke pre lom kain in sunak a lulalfongi inge? Kom in lutlutkin pre mwomwo lun Jisus su eteyuk pa oana Pre lun Leum, a kom ku in liye ka la arlana yok sripe in akmutalye en Jeova, ke tuku lun Togusrai lal, a in akpayeye ma lungse lal. (Mattu 6:9, 10) Srike nunku akmwoye ke pre lom sifwana. Ya ma inge akkalemye pa la kom aksaokye na paye Togusrai lun God, in oru ma lungse lal, a in akmutalye inel? Aok enenu in ouinge.
22. Efu ku kom lulalfongi yok la Jeova el a fwa akpulaikye kom in sulkakin peng mwo?
22 Ke sripen me kalyai ku kutupa me srifwe, kut enenu pa in pre a siyuk ke kasru tu kut ku in kulansapu Jeova ke pulaik. Ke pal se met kol puspus ke Sanedrin elos sapkin Piter a Jon in tui in ‘luti ke en Jisus,’ met sap inge elos tia aksolos a elos kafweang in luti. (Orekma 4:18-20) Tokin elos aksukosokyeyukla liki prison, elos fwak nu sin met lili nukewa la mea sikyak nu selos. Ke ma inge met tuma lutlut nukewa su oasr we elos kaifwe in siyuk sin God in kasrelos in kaskaskin peng mwo ke pulaik. Paye la elos arlana insemwomwo ke pal se pre lalos topukyak, meyen elos “tingtingi ke ngun mutal a elos pulaik in fwak kas lun God”! (Ridi Orekma 4:24-31.) Ke sripe se inge, oasr met puspus su lulalfongi Jeova a baptaisla. Pre ku in akkeye kom pa in sulkakin peng mwo ke inkanek pulaik.
Kafweang in Akmwoye Pre Lom
23, 24. (a) Akkalemye ke kutupa me pupulyuk saye la fuka lutlut lun Baibel ku in sang kasru in akmwoye pre lom. (b) Mea kom enenu in oru in akmwoye pre lom?
23 Oasr me pupulyuk puspus in ma simusla su akkalemye la orekma in rid Baibel a lutlutkin ma inge ku in sang kasru in akmwoye pre lasr. Ke sie me pupulyuk, in oana Jona kom ku in akkalemye ke pre lom la molela ku “lango ma sin Jeova me.” (Jona 2:1-10) Kom fwin asor yok ke sie ma koluk upa su kom orala a kom suk me kasru sin met elder ke congregation, pre lal Devid ku in kasre kom in akkalemye la kom auli ke ma koluk lom ke pal se kom pre. (Sam 51:1-12) Ke pre lom, kom ku in kaksakin Jeova oana Jeremaia el oru. (Jeremaia 32:16-19) Kom fwin nunku in payukyuk a suk ke sie mokul ku mutan su kom lungse ke congregation, kom fwin lutlutkin pre su oasr ke sapta 9 lun Ezra, ku in akkeye kom in akpayeye sulela lom in akos God in ‘mari in leum mukena.’—1 Korint 7:39; Ezra 9:6, 10-15.
24 Kafweang in rid, lutlut, a suk a tuni akmwoye ma simusla in Baibel. Liye akmwoye ke me lutlut mwomwo su kom ku in orekmakin pa ke pre lom. Kom ku in orekmakin me lutlut mwomwo inge ke pre lom, ke kom kaifwe, sang kulo, a sang kas in kaksak. Paye la kom ku in akfototoye kom nu sin Jeova God ke kom kafweang in akmwoye pre lom ke kasru lun lutlut lom ke Baibel.
Kom E Topuk Fuka?
• Efu ku kut enenu in suk a akos kas in kolyuk lun God?
• Mea ku in akkeye kut in pre siyuk ke lalmetmet?
• Fuka buk lun Sam ku in sang kasru in akmwoye pre lasr?
• Efu ku kut enenu in pre wi lulalfongi a sunak yok nu sin God?
[Picture on page 14]
Met kulansap lal Ebream el pre ke me kolyuk. Ya kom oru pa ouinge?
[Picture on page 16]
Orekma lun sou in Alu nu sin Jeova ku in sang kasru in akmwoye pre lom